8. анекаван̣н̣авима̄наван̣н̣ана̄

анекаван̣н̣ам̣ дарасокана̄сананти анекаван̣н̣авима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена а̄йасма̄ маха̄моггалла̄но хет̣т̣ха̄ вуттанайена девача̄рикам̣ чаранто та̄ватим̣сабхаванам̣ агама̄си. атха нам̣ анекаван̣н̣о девапутто дисва̄ сан̃джа̄тага̄равабахума̄но упасан̇камитва̄ ан̃джалим̣ паггайха ат̣т̣ха̄си. тхеро –

1199. ‘‘анекаван̣н̣ам̣ дарасокана̄санам̣, вима̄нама̄руйха анекачиттам̣;

парива̄рито аччхара̄сан̇ган̣ена, суниммито бхӯтапатӣва модаси.

1200. ‘‘самассамо наттхи куто пануттаро, йасена пун̃н̃ена ча иддхийа̄ ча;

саббе ча дева̄ тидасаган̣а̄ самечча, там̣ там̣ намассанти сасим̣ва дева̄;

има̄ ча те аччхара̄йо самантато, наччанти га̄йанти памодайанти.

1201. ‘‘девиддхипаттоси маха̄нубха̄во,

мануссабхӯто кимака̄си пун̃н̃ам̣;

кена̄си евам̣ джалита̄нубха̄во,

ван̣н̣о ча те саббадиса̄ пабха̄сатӣ’’ти. –

адхигатасампаттикиттанамукхена катакаммам̣ пуччхи. там̣ дассетум̣ –

1202. ‘‘со девапутто аттамано…пе…йасса каммассидам̣ пхала’’нти. –

вуттам̣. сопи –

1203. ‘‘ахам̣ бхаданте ахува̄си пуббе, сумедхана̄масса джинасса са̄вако;

путхуджджано ананубодхохамасми, со сатта васса̄ни париббаджиссахам̣.

1204. ‘‘сохам̣ сумедхасса джинасса саттхуно, париниббутассогхатин̣н̣асса та̄дино;

ратануччайам̣ хемаджа̄лена чханнам̣, вандитва̄ тхӯпасмим̣ манам̣ паса̄дайим̣.

1205. ‘‘на ма̄си да̄нам̣ на ча маттхи да̄тум̣, паре ча кхо таттха сама̄дапесим̣;

пӯджетха нам̣ пӯджанӣйасса дха̄тум̣, евам̣ кира саггамито гамиссатха.

1206. ‘‘тадева каммам̣ кусалам̣ катам̣ майа̄,

сукхан̃ча диббам̣ анубхоми аттана̄;

мода̄махам̣ тидасаган̣асса маджджхе,

на тасса пун̃н̃асса кхайампи аджджхага’’нти. – катхеси;

ито кира тим̣сакаппасахассе сумедхо на̄ма самма̄самбуддхо локе уппаджджитва̄ садевакам̣ локам̣ екобха̄сам̣ катва̄ катабуддхакиччо париниббуто, мануссехи ча бхагавато дха̄тум̣ гахетва̄ ратаначетийе кате ан̃н̃атаро пурисо саттху са̄сане паббаджитва̄ сатта васса̄ни брахмачарийам̣ чаритва̄ анават̣т̣хитачиттата̄йа куккуччако хутва̄ уппаббаджи. уппаббаджито ча сам̣вегабахулата̄йа дхаммаччхандавантата̄йа ча четийан̇ган̣е саммаджджанапарибхан̣д̣а̄дӣни каронто ниччасӣлаупосатхасӣла̄ни раккханто дхаммам̣ сун̣анто ан̃н̃е ча пун̃н̃акирийа̄йа сама̄дапенто вичари. со а̄йупарийоса̄не ка̄лакато та̄ватим̣сесу ниббатти. со пун̃н̃акаммасса ул̣а̄рабха̄вена махесаккхо маха̄нубха̄во сакка̄дӣхи девата̄хи саккатапӯджито хутва̄ таттха йа̄вата̄йукам̣ т̣хатва̄ тато чуто апара̄парам̣ девамануссесу сам̣саранто имасмим̣ буддхуппа̄де тассева каммасса випа̄ка̄васесена та̄ватим̣сабхаване ниббатти, ‘‘анекаван̣н̣о’’ти нам̣ девата̄ сан̃джа̄ним̣су. там̣ сандха̄йа вуттам̣ ‘‘атха нам̣ анекаван̣н̣о девапутто…пе… на тасса пун̃н̃асса кхайампи аджджхаганти катхесӣ’’ти.

1199. таттха анекаван̣н̣анти нӣлапӣта̄дивасена вивидхаван̣н̣ата̄йа анантаравима̄на̄дӣнам̣ вивидхасан̣т̣ха̄ната̄йа ча на̄на̄видхаван̣н̣ам̣. дарасокана̄сананти сӣталабха̄вена даратхапарил̣а̄ха̄нам̣ виноданато манун̃н̃ата̄йа дассанӣйата̄йа ча сокасса анока̄сато дарасокана̄санам̣. анекачиттанти на̄на̄видхачиттарӯпам̣. суниммито бхӯтапатӣва̄ти та̄ватим̣сака̄йикопи ул̣а̄радиббабхогата̄йа суниммитадевара̄джа̄ вийа модаси туссаси абхирамаси.

1200. самассамоти само ева хутва̄ само, ниббарийа̄йена садисо те туйхам̣ наттхи, куто пана кена ка̄ран̣ена уттари адхико ко на̄ма сийа̄. кена пана самата̄ уттаритарата̄ ча̄ти а̄ха ‘‘йасена пун̃н̃ена ча иддхийа̄ ча̄’’ти. таттха йасена̄ти парива̄рена. иддхийа̄ти а̄нубха̄вена. йасена̄ти ва̄ иссарийена, иддхийа̄ти девиддхийа̄. йасена̄ти ва̄ вибхавасампаттийа̄, иддхийа̄ти йатхиччхи тасса ка̄магун̣асса иджджханена. йасена̄ти ва̄ киттигхосена, иддхийа̄ти самиддхийа̄. пун̃н̃ена̄ти таттха таттха вутта̄васит̣т̣хапун̃н̃апхалена, пун̃н̃акамменева ва̄.

‘‘саббе ча дева̄’’ти са̄ман̃н̃ато гахитаматтхам̣ ‘‘тидасаган̣а̄’’ти имина̄ висесетва̄ вуттам̣. екаччасса паччекам̣ нипаччака̄рам̣ каронта̄пи памудита̄ на каронти, на еваметасса. етасса пана памудита̄пи каронтийева̄ти дассетум̣ ‘‘самечча̄’’ти вуттам̣. там̣ танти там̣ твам̣. сасим̣ва дева̄ти йатха̄ на̄ма суккапаккхапа̄т̣ипадийам̣ диссама̄нам̣ сасим̣ чандам̣ манусса̄ дева̄ ча а̄дараджа̄та̄ намассанти, евам̣ там̣ саббепи тидасаган̣а̄ намассантӣти аттхо.

1203. бхадантети тхерам̣ га̄равабахума̄нена самуда̄чарати. ахува̄синти ахосим̣. пуббети пуримаджа̄тийам̣. сумедхана̄масса джинасса са̄вакоти сумедхоти евам̣ па̄кат̣ана̄масса самма̄самбуддасса са̄сане паббаджитабха̄вена са̄вако. путхӯджджаноти анарийо. таттха̄пи сачча̄нам̣ анубодхаматтасса̄пи абха̄вена ананубодхо. со сатта васса̄ни париббаджиссаханти со ахам̣ сатта сам̣ваччхара̄ни паббаджджа̄гун̣аматтена вичарим̣, уттаримануссадхаммам̣ на̄дхигаччхинти адхиппа̄йо.

1204. ратануччайанти ман̣иканака̄диратанехи уччитам̣ усситаратаначетийам̣. хемаджа̄лена чханнанти самантато упари ча кан̃чанаджа̄лена пат̣иччха̄дитам̣. вандитва̄ти пан̃чапатит̣т̣хитена таттха таттха пан̣а̄мам̣ катва̄. тхӯпасмим̣ манам̣ паса̄дайинти ‘‘саббан̃н̃угун̣а̄дхит̣т̣ха̄на̄йа вата дха̄туйа̄ айам̣ тхӯпо’’ти тхӯпасмим̣ читтам̣ паса̄десим̣.

1205. на ма̄си да̄нанти ме майа̄ катам̣ да̄нам̣ на̄си на̄хоси. касма̄ пана? на ча меттхи да̄тунти ме мама париггахабхӯтам̣ да̄нам̣ да̄тум̣ на аттхи, на кин̃чи деййаваттху виджджати, паре ча кхо сатте таттха да̄не сама̄дапесим̣. ‘‘паресан̃ча таттха сама̄дапеси’’нти ча пат̣ханти, таттха паресанти упайогаттхе са̄мивачанам̣ дат̣т̣хаббам̣. пӯджетха нантиа̄ди сама̄дапана̄ка̄радассанам̣, там̣ дха̄тунти йоджана̄. евам̣ кира̄ти кира-саддо ануссаваттхо.

1206. на тасса пун̃н̃асса кхайампи аджджхаганти тасса тада̄ сумедхам̣ бхагавантам̣ уддисса катасса пун̃н̃акаммасса париккхайам̣ на̄дхигаччхим̣, тассева каммасса випа̄ка̄васесам̣ паччанубхомӣти дассети. йам̣ панеттха на вуттам̣, там̣ хет̣т̣ха̄ вуттанайатта̄ сувин̃н̃еййамева̄ти дат̣т̣хаббам̣.

анекаван̣н̣авима̄наван̣н̣ана̄ нит̣т̣хита̄.