7. суниккхиттавима̄навагго

1. читталата̄вима̄наван̣н̣ана̄

йатха̄ ванам̣ читталатам̣ пабха̄сатӣти читталата̄вима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена са̄ваттхийам̣ ан̃н̃атаро упа̄сако далиддо аппабхого паресам̣ каммам̣ катва̄ джӣвати. со саддхо пасанно джин̣н̣е вуд̣д̣хе ма̄та̄питаро посенто ‘‘иттхийо на̄ма патикуле т̣хита̄ иссарийам̣ каронти, сассусасура̄нам̣ мана̄пача̄ринийо дуллабха̄’’ти ма̄та̄питӯнам̣ читтадуккхам̣ парихаранто да̄рапариггахам̣ акатва̄ сайамева не упат̣т̣хахати, сӣла̄ни раккхати, упосатхам̣ упавасати, йатха̄вибхавам̣ да̄на̄ни дети. со апарабха̄ге ка̄лам̣ катва̄ та̄ватим̣сесу два̄дасайоджанике вима̄не ниббатти. там̣ а̄йасма̄ маха̄моггалла̄но хет̣т̣ха̄ вуттанайена гантва̄ катакаммам̣ има̄хи га̄тха̄хи пат̣ипуччхи –

1114. ‘‘йатха̄ ванам̣ читталатам̣ пабха̄сати, уййа̄насет̣т̣хам̣ тидаса̄намуттамам̣;

татхӯпамам̣ туйхамидам̣ вима̄нам̣, обха̄сайам̣ тит̣т̣хати анталиккхе.

1115. ‘‘девиддхипаттоси маха̄нубха̄во…пе…

ван̣н̣о ча те саббадиса̄ пабха̄сатӣ’’ти.

1116. ‘‘со девапутто аттамано…пе… йасса каммассидам̣ пхалам̣’’.

1117. ‘‘ахам̣ мануссесу мануссабхӯто, далиддо ата̄н̣о капан̣о каммакаро ахосим̣;

джин̣н̣е ча ма̄та̄питаро абха̄рим̣, пийа̄ ча ме сӣлаванто ахесум̣;

аннан̃ча па̄нан̃ча пасанначитто, саккачча да̄нам̣ випулам̣ ада̄сим̣.

1118. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

сопи тасса бйа̄ка̄си. сесам̣ вуттанайамева.

читталата̄вима̄наван̣н̣ана̄ нит̣т̣хита̄.

2. нанданавима̄наван̣н̣ана̄

йатха̄ ванам̣ нанданам̣ пабха̄сатӣти нанданавима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена са̄ваттхийам̣ ан̃н̃атаро упа̄сакотиа̄ди саббам̣ анантаравима̄насадисам̣. айам̣ пана да̄рапариггахам̣ катва̄ ма̄та̄питаро посесӣти айамева висесо.

1120. йатха̄ ванам̣ нанданам̣ пабха̄сати, уййа̄насет̣т̣хам̣ тидаса̄намуттамам̣;

татхӯпамам̣ туйхамидам̣ вима̄нам̣, обха̄сайам̣ тит̣т̣хати анталиккхе.

1121. ‘‘девиддхипаттоси маха̄нубха̄во…пе…ван̣н̣о ча те саббадиса̄ пабха̄сатӣти.

1122. ‘‘со девапутто аттамано…пе… йасса каммассидам̣ пхалам̣’’.

1123. ‘‘ахам̣ мануссесу мануссабхӯто, далиддо ата̄н̣о капан̣о каммакаро ахосим̣;

джин̣н̣е ча ма̄та̄питаро абха̄рим̣, пийа̄ ча ме сӣлаванто ахесум̣;

аннан̃ча па̄нан̃ча пасанначитто, саккачча да̄нам̣ випулам̣ ада̄сим̣.

1124. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

га̄тха̄хи бйа̄ка̄си. таттха га̄тха̄супи апуббам̣ наттхи.

нанданавима̄наван̣н̣ана̄ нит̣т̣хита̄.

3. ман̣итхӯн̣авима̄наван̣н̣ана̄

уччамидам̣ ман̣итхӯн̣ам̣ вима̄нанти ман̣итхӯн̣авима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена самбахула̄ тхера̄ бхиккхӯ аран̃н̃а̄йатане вихаранти. тесам̣ га̄мам̣ пин̣д̣а̄йа гаманамагге еко упа̄сако висамам̣ самам̣ кароти, кан̣т̣аке нӣхарати, гаччхагумбе апанети, удакака̄ле ма̄тика̄су сетум̣ бандхати, виванат̣т̣ха̄несу чха̄йа̄руккхе ропети, джала̄сайесу маттикам̣ уддхаритва̄ те путхулагамбхӣре кароти, титтхе сампа̄дети, йатха̄вибхавам̣ да̄нам̣ дети, сӣлам̣ раккхати. со апарабха̄ге ка̄лам̣ катва̄ та̄ватим̣сесу два̄дасайоджанике канакавима̄не ниббатти. там̣ а̄йасма̄ маха̄моггалла̄наттхеро упасан̇камитва̄ има̄хи га̄тха̄хи пат̣ипуччхи –

1126. ‘‘уччамидам̣ ман̣итхӯн̣ам̣ вима̄нам̣, самантато два̄даса йоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

1127. ‘‘таттхаччхаси пиваси кха̄даси ча, дибба̄ ча вӣн̣а̄ паваданти ваггум̣;

дибба̄ раса̄ ка̄магун̣еттха пан̃ча, на̄рийо ча наччанти суван̣н̣аччханна̄.

1128. ‘‘кена тета̄дисо ван̣н̣о…пе…ван̣н̣о ча те саббадиса̄ пабха̄сатӣ’’ти.

сопи тасса га̄тха̄хи бйа̄ка̄си –

1130. ‘‘со девапутто аттамано…пе… йасса каммассидам̣ пхалам̣’’.

1131. ‘‘ахам̣ мануссесу мануссабхӯто, виване патхе сан̇каманам̣ ака̄сим̣;

а̄ра̄маруккха̄ни ча ропайиссам̣, пийа̄ ча ме сӣлаванто ахесум̣;

аннан̃ча па̄нан̃ча пасанначитто, саккачча да̄нам̣ випулам̣ ада̄сим̣.

1132. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти.

1131. таттха виванети аран̃н̃е. а̄ра̄маруккха̄ни ча̄ а̄ра̄мабхӯте руккхе, а̄ра̄мам̣ катва̄ таттха руккхе ропесинти аттхо. сесам̣ саббам̣ вуттанайамева.

ман̣итхӯн̣авима̄наван̣н̣ана̄ нит̣т̣хита̄.

4. суван̣н̣авима̄наван̣н̣ана̄

сован̣н̣амайе паббатасминти суван̣н̣авима̄нам̣. тасса ка̄ уппатти? бхагава̄ андхакавинде вихарати. тена самайена ан̃н̃атаро упа̄сако саддхо пасанно вибхавасампанно тасса га̄масса авидӯре ан̃н̃атарасмим̣ мун̣д̣акапаббате сабба̄ка̄расампаннам̣ бхагавато васана̄нуччхавикам̣ гандхакут̣им̣ ка̄ретва̄ таттха бхагавантам̣ васа̄пенто саккаччам̣ упат̣т̣хахи, сайан̃ча ниччасӣле патит̣т̣хито сувисуддхасӣласам̣варо хутва̄ ка̄лам̣ катва̄ та̄ватим̣сабхаване ниббатти. тасса камма̄нубха̄васам̣сӯчакам̣ на̄на̄ратанарам̣сиджа̄ласамуджджалам̣ вичиттаведика̄париккхиттам̣ вивидхавипула̄лан̇ка̄ропасобхитам̣ сувибхаттабхиттиттхамбхасопа̄нам̣ а̄ра̄мараман̣ӣйакам̣ кан̃чанапаббатамуддхани вима̄нам̣ уппаджджи. там̣ а̄йасма̄ маха̄моггалла̄но девача̄рикам̣ чаранто дисва̄ има̄хи га̄тха̄хи пат̣ипуччхи –

1134. ‘‘сован̣н̣амайе паббатасмим̣, вима̄нам̣ саббатопабхам̣;

хемаджа̄лапат̣иччханнам̣, кин̇кин̣иджа̄лакаппитам̣.

1135. ‘‘ат̣т̣хам̣са̄ суката̄ тхамбха̄, саббе вел̣урийа̄майа̄;

екамека̄йа ам̣сийа̄, ратана̄ сатта ниммита̄.

1136. ‘‘вел̣ӯрийасуван̣н̣асса, пхалика̄ рӯпийасса ча;

маса̄рагалламутта̄хи, лохитан̇гаман̣ӣхи ча.

1137. ‘‘читра̄ манорама̄ бхӯми, на таттхуддхам̣сатӣ раджо;

гопа̄насӣган̣а̄ пӣта̄, кӯт̣ам̣ да̄ренти ниммита̄.

1138. ‘‘сопа̄на̄ни ча чатта̄ри, ниммита̄ чатуро диса̄;

на̄на̄ратанагаббхехи, а̄диччова вирочати.

1139. ‘‘ведийа̄ чатассо таттха, вибхатта̄ бха̄гасо мита̄;

даддаллама̄на̄ а̄бханти, саманта̄ чатуро диса̄.

1140. ‘‘тасмим̣ вима̄не паваре, девапутто махаппабхо;

атирочаси ван̣н̣ена, удайантова бха̄н̣ума̄.

1141. ‘‘да̄насса те идам̣ пхалам̣, атхо сӣласса ва̄ пана;

атхо ан̃джаликаммасса, там̣ ме аккха̄хи пуччхито’’ти.

сописса има̄хи га̄тха̄хи бйа̄ка̄си –

1142. ‘‘со девапутто аттамано…пе… йасса каммассидам̣ пхалам̣’’.

1143. ‘‘ахам̣ андхакавиндасмим̣, буддхасса̄диччабандхуно;

виха̄рам̣ саттху ка̄ресим̣, пасанно сехи па̄н̣ибхи.

1144. ‘‘таттха гандхан̃ча ма̄лан̃ча, паччайан̃ча вилепанам̣;

виха̄рам̣ саттху ада̄сим̣, виппасаннена четаса̄;

тена майхам̣ идам̣ ладдхам̣, васам̣ ваттеми нандане.

1145. ‘‘нандане ча ване рамме, на̄на̄диджаган̣а̄йуте;

рама̄ми наччагӣтехи, аччхара̄хи пураккхато’’ти.

1134. таттха саббатопабханти саббабха̄гехи пабха̄сантам̣ пабха̄мун̃чанакам̣. кин̇кин̣иджа̄лакаппитанти каппитакин̇кин̣икаджа̄лам̣.

1135. саббе вел̣урийа̄майа̄ти саббе тхамбха̄ вел̣урийаман̣имайа̄. таттха пана екамека̄йа ам̣сийа̄ти ат̣т̣хам̣сесу тхамбхесу екамекасмим̣ ам̣сабха̄ге. ратана̄ сатта ниммита̄ти саттаратанакамманиммита̄, екеко ам̣со саттаратанамайоти аттхо.

1136. ‘‘вел̣ӯрийасуван̣н̣асса̄’’тиа̄дина̄ на̄на̄ратана̄ни дассети. таттха вел̣ӯрийасуван̣н̣асса̄ти вел̣урийена ча суван̣н̣ена ча ниммита̄, читра̄ти ва̄ йоджана̄. каран̣аттхе хи идам̣ са̄мивачанам̣. пхалика̄ рӯпийасса ча̄ти еттха̄пи есева найо. маса̄рагалламутта̄хӣти кабараман̣ӣхи. лохитан̇гаман̣ӣхи ча̄ти раттаман̣ӣхи.

1137. на таттхуддхам̣сатӣ раджоти ман̣имайабхӯмикатта̄ на тасмим̣ вима̄не раджо уггаччхати. гопа̄насӣган̣а̄ти гопа̄насӣсамӯха̄. пӣта̄ти пӣтаван̣н̣а̄, суван̣н̣амайа̄ чева пхуссара̄га̄диман̣имайа̄ ча̄ти аттхо. кӯт̣ам̣ дха̄рентӣти саттаратанамайам̣ кан̣н̣икам̣ дха̄ренти.

1138-9. на̄на̄ратанагаббхехӣти на̄на̄ратанамайехи оваракехи. ведийа̄ти ведика̄. чатассоти чатӯсу диса̄су чатассо. тена̄ха ‘‘саманта̄ чатуро диса̄’’ти.

1140. махаппабхоти маха̄джутико. удайантоти уггаччханто. бха̄н̣ума̄ти а̄диччо.

1143. сехи па̄н̣ибхӣти ка̄йаса̄рам̣ пун̃н̃ам̣ пасаванто аттано па̄н̣ӣхи там̣ там̣ киччам̣ каронто виха̄рам̣ саттху ка̄ресинти йоджана̄. атха ва̄ сехи па̄н̣ибхӣти таттха андхакавиндасмим̣ гандхан̃ча ма̄лан̃ча паччайан̃ча вилепанан̃ча пӯджа̄васена. йатха̄ катхам̣? виха̄ран̃ча виппасаннена четаса̄ саттхуно ада̄сим̣ пӯджесим̣ ниййа̄десим̣ ча̄ти еваметтха йоджана̄ ведитабба̄.

1144. тена̄ти тена йатха̄вуттена пун̃н̃акаммена ка̄ран̣абхӯтена. майханти майа̄. иданти идам̣ пун̃н̃апхалам̣, идам̣ ва̄ диббам̣ а̄дхипатеййам̣. тена̄ха ‘‘васам̣ ваттемӣ’’ти.

1145. нанданети нандийа̄ диббасамиддхийа̄ уппаджджанат̣т̣ха̄не имасмим̣ девалоке, таттха̄пи висесато нандане ване рамме, евам̣ раман̣ӣйе имасмим̣ нандане ване рама̄мӣти йоджана̄. сесам̣ вуттанайамева.

евам̣ девата̄йа аттано пун̃н̃акамме а̄викате тхеро сапарива̄расса тасса девапуттасса дхаммам̣ десетва̄ бхагавато таматтхам̣ ниведеси. бхагава̄ там̣ ат̣т̣хуппаттим̣ катва̄ сампаттапариса̄йа дхаммам̣ десеси. са̄ десана̄ маха̄джанасса са̄ттхика̄ ахосӣти.

суван̣н̣авима̄наван̣н̣ана̄ нит̣т̣хита̄.

5. амбавима̄наван̣н̣ана̄

уччамидам̣ ман̣итхӯн̣анти амбавима̄нам̣. тасса ка̄ уппатти? бхагава̄ ра̄джагахе вихарати вел̣уване. тена самайена ра̄джагахе ан̃н̃атаро дуггатапурисо паресам̣ бхаттаветанабхато хутва̄ амбаванам̣ раккхати. со екадивасам̣ а̄йасмантам̣ са̄рипуттам̣ гимхасамайе сӯрийа̄тапасантатте ун̣хава̄лика̄ниппӣл̣ите виппхандама̄намарӣчиджа̄лавиттхате бхӯмиппадесе тасса амба̄ра̄масса авидӯрена маггена седа̄гатена гаттена гаччхантам̣ дисва̄ сан̃джа̄тага̄равабахума̄но упасан̇камитва̄ евама̄ха ‘‘маха̄ айам̣, бханте, гхаммапарил̣а̄хо, ативийа париссантарӯпо вийа диссати, са̄дху, бханте, аййо имам̣ амба̄ра̄мам̣ пависитва̄ мухуттам̣ виссамитва̄ аддха̄напариссамам̣ пат̣ивинодетва̄ гаччхатха анукампам̣ упа̄да̄йа̄’’ти. тхеро висесато тасса читтаппаса̄дам̣ парибрӯхетука̄мо там̣ а̄ра̄мам̣ пависитва̄ ан̃н̃атарасса амбаруккхасса мӯле нисӣди.

пуна со пурисо а̄ха ‘‘саче, бханте, нха̄йитука̄маттха, ахам̣ ито кӯпато удакам̣ уддхаритва̄ тумхе нха̄песса̄ми, па̄нӣйан̃ча дасса̄мӣ’’ти. тхеропи адхива̄сеси тун̣хӣбха̄вена. со кӯпато удакам̣ уддхаритва̄ парисса̄ветва̄ тхерам̣ нха̄песи, нха̄петва̄ ча хаттхапа̄де дховитва̄ нисиннасса па̄нӣйам̣ упанеси. тхеро па̄нӣйам̣ пивитва̄ пат̣иппассаддхадаратхо тасса пурисасса удакада̄не чева нха̄пане ча анумоданам̣ ватва̄ пакка̄ми. атха со пурисо ‘‘гхамма̄бхитаттасса вата тхерасса гхаммапарил̣а̄хам̣ пат̣иппассамбхесим̣, бахум̣ вата майа̄ пун̃н̃ам̣ пасута’’нти ул̣а̄рапӣтисоманассам̣ пат̣исам̣ведеси. со апарабха̄ге ка̄лам̣ катва̄ та̄ватим̣сесу уппаджджи. там̣ а̄йасма̄ маха̄моггалла̄но упасан̇камитва̄ има̄хи га̄тха̄хи катапун̃н̃ам̣ пуччхи.

1146. ‘‘уччамидам̣ ман̣итхӯн̣ам̣ вима̄нам̣, самантато два̄даса йоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

1147. ‘‘таттхаччхаси пиваси кха̄даси ча, дибба̄ ча вӣн̣а̄ паваданти ваггум̣;

дибба̄ раса̄ ка̄магун̣еттха пан̃ча, на̄рийо ча наччанти суван̣н̣ачханна̄.

1148. ‘‘кена тета̄дисо ван̣н̣о…пе…

ван̣н̣о ча те саббадиса̄ пабха̄сатӣ’’ти.

1150. ‘‘со девапутто аттамано…пе…

йасса каммассидам̣ пхалам̣’’.

1151. ‘‘гимха̄нам̣ паччхиме ма̄се, патапанте диван̇каре;

паресам̣ бхатако посо, амба̄ра̄мамасин̃чати.

1152. ‘‘атха тена̄гама̄ бхиккху, са̄рипуттоти виссуто;

килантарӯпо ка̄йена, акилантова четаса̄.

1153. ‘‘тан̃ча дисва̄на а̄йантам̣, авочам̣ амбасин̃чако;

са̄дху там̣ бханте нха̄пеййам̣, йам̣ мамасса сукха̄вахам̣.

1154. ‘‘тасса ме анукампа̄йа, никкхипи паттачӣварам̣;

нисӣди руккхамӯласмим̣, чха̄йа̄йа екачӣваро.

1155. ‘‘тан̃ча аччхена ва̄рина̄, пасаннама̄насо наро;

нха̄пайӣ руккхамӯласмим̣, чха̄йа̄йа екачӣварам̣.

1156. ‘‘амбо ча ситто саман̣о ча нха̄пито,

майа̄ ча пун̃н̃ам̣ пасутам̣ анаппакам̣;

ити со пӣтийа̄ ка̄йам̣, саббам̣ пхарати аттано.

1157. ‘‘тадева еттакам̣ каммам̣, ака̄сим̣ та̄йа джа̄тийа̄;

паха̄йа ма̄нусам̣ дехам̣, упапанномхи нанданам̣.

1158. ‘‘нандане ча ване рамме, на̄на̄диджаган̣а̄йуте;

рама̄ми наччагӣтехи, аччхара̄хи пураккхато’’ти. –

сопи тасса има̄хи га̄тха̄хи бйа̄ка̄си.

1151. таттха гимха̄нам̣ паччхиме ма̄сети а̄са̄л̣хима̄се. патапантети ативийа диппанте, саббасо ун̣хам̣ виссаджджентети аттхо. диван̇карети дива̄каре, айамева ва̄ па̄т̣хо. асин̃чатӣти син̃чати, -ка̄ро нипа̄таматтам̣, син̃чати амбаруккхамӯлесу дхувам̣ джаласекам̣ каротӣти аттхо. ‘‘асин̃чатха̄’’ти ча па̄т̣хо, син̃читтха̄ти аттхо. ‘‘асин̃чаха’’нти ча пат̣ханти, паресам̣ бхатако посо хутва̄ тада̄ амба̄ра̄мам̣ асин̃чим̣ аханти аттхо.

1152. тена̄ти йена диса̄бха̄гена со амба̄ра̄мо, тена агама̄ аган̃чхи. акилантова четаса̄ти четодуккхасса маггенева пахӣнатта̄ четаса̄ акилантопи сама̄но килантурӯпо ка̄йена тена маггена агама̄ти йоджана̄.

1153-4. авочам̣ ахам̣ тада̄ амбасин̃чако хутва̄ти йоджана̄. екачӣвароти нха̄йитука̄моти адхиппа̄йо.

1156. итӣти евам̣ ‘‘амбо ча ситто, саман̣о ча нха̄пито, майа̄ ча пун̃н̃ам̣ пасутам̣ анаппакам̣, екенева пайогена тивидхопи аттхо са̄дхито’’ти имина̄ка̄рена паватта̄йа пӣтийа̄ со пурисо аттано саббам̣ ка̄йам̣ пхарати, нирантарам̣ пхут̣ам̣ каротӣти йоджана̄. атӣтаттхе четам̣ ваттама̄навачанам̣, пхарӣти аттхо.

1157. тадева еттакам̣ камманти там̣ еттакам̣ евам̣ па̄нӣйада̄наматтакам̣ каммам̣ ака̄сим̣, та̄йа тассам̣ джа̄тийам̣ ан̃н̃ам̣ на̄нуссара̄мӣти адхиппа̄йо. тесам̣ вуттанайамева.

амбавима̄наван̣н̣ана̄ нит̣т̣хита̄.

6. гопа̄лавима̄наван̣н̣ана̄

дисва̄на девам̣ пат̣ипуччхи бхиккхӯти гопа̄лавима̄нам̣. тасса ка̄ уппатти? бхагава̄ ра̄джагахе вихарати вел̣уване. тена самайена ра̄джагахава̄сӣ ан̃н̃атаро гопа̄лако па̄тара̄саттха̄йа пилотика̄йа пут̣абаддхам̣ кумма̄сам̣ гахетва̄ нагарато никкхамитва̄ га̄вӣнам̣ чаран̣ат̣т̣ха̄набхӯтам̣ гочарабхӯмим̣ сампа̄пун̣и. там̣ а̄йасма̄ маха̄моггалла̄но ‘‘айам̣ ида̄нева ка̄лам̣ кариссати, майхан̃ча кумма̄сам̣ датва̄ та̄ватим̣сесу уппаджджиссатӣ’’ти ча н̃атва̄ тасса самӣпам̣ агама̄си. со велам̣ олокетва̄ тхерасса кумма̄сам̣ да̄тука̄мо ахоси. тена ча самайена га̄вийо ма̄саккхеттам̣ пависанти. атха со гопа̄ло чинтеси ‘‘ким̣ ну кхо тхерасса кумма̄сам̣ дадеййам̣, уда̄ху га̄вийо ма̄саккхеттато нӣхареййа’’нти. атхасса етадахоси ‘‘ма̄саса̄мика̄ мам̣ йам̣ иччханти, там̣ каронту, тхере пана гате кумма̄сада̄нантара̄йо ме сийа̄, ханда̄хам̣ пат̣хамам̣ аййасса кумма̄сам̣ дасса̄мӣ’’ти там̣ тхерасса упанеси. пат̣иггахеси тхеро анукампам̣ упа̄да̄йа.

атха нам̣ га̄вийо ниваттетум̣ париссайам̣ анолокетва̄ вегена упадха̄вантам̣ па̄дена пхут̣т̣хо а̄сӣвисо д̣ам̣си. тхеропи там̣ анукампама̄но там̣ кумма̄сам̣ парибхун̃джитум̣ а̄рабхи. гопа̄лакопи га̄вийо ниваттетва̄ а̄гато тхерам̣ кумма̄сам̣ парибхун̃джантам̣ дисва̄ пасанначитто ул̣а̄рам̣ пӣтисоманассам̣ пат̣исам̣веденто нисӣди. та̄вадевасса сакаласарӣрам̣ висам̣ аджджхоттхари. мухуттамева веге муддхапатте ка̄ламака̄си, ка̄лакато ча та̄ватим̣сесу два̄дасайоджанике канакавима̄не ниббатти. там̣ а̄йасма̄ маха̄моггалла̄но дисва̄ има̄хи га̄тха̄хи пат̣ипуччхи –

1159. ‘‘дисва̄на девам̣ пат̣ипуччхи бхиккху, учче вима̄намхи чират̣т̣хитике;

а̄муттахаттха̄бхаран̣ам̣ йасассим̣, диббе вима̄намхи йатха̄пи чандима̄.

1160. ‘‘алан̇като малйадхаро суваттхо, сукун̣д̣алӣ каппитакесамассу;

а̄муттахаттха̄бхаран̣о йасассӣ, диббе вима̄намхи йатха̄пи чандима̄.

1161. ‘‘дибба̄ ча вӣн̣а̄ паваданти ваггум̣; ат̣т̣хат̣т̣хака̄ сиккхита̄ са̄дхурӯпа̄;

дибба̄ ча кан̃н̃а̄ тидасачара̄ ул̣а̄ра̄, наччанти га̄йанти памодайанти.

1162. ‘‘девиддхипаттоси маха̄нубха̄во…пе…

ван̣н̣о ча те саббадиса̄ пабха̄сатӣ’’ти.

сопи тасса бйа̄ка̄си –

1163. ‘‘со девапутто аттамано…пе…йасса каммассидам̣ пхалам̣’’.

1164. ‘‘ахам̣ мануссесу мануссабхӯто, сан̇гамма раккхиссам̣ паресам̣ дхенуйо;

тато ча а̄га̄ саман̣о мамантике, га̄во ча ма̄се агамам̣су кха̄дитум̣.

1165. ‘‘двайаджджа киччам̣ убхайан̃ча ка̄рийам̣, иччевахам̣ бханте тада̄ вичинтайим̣;

тато ча сан̃н̃ам̣ пат̣иладдха йонисо, ‘дада̄ми бханте’ти кхипим̣ анантакам̣.

1166. ‘‘со ма̄сакхеттам̣ турито ава̄сарим̣, пура̄ айам̣ бхан̃джати йассидам̣ дханам̣;

тато ча кан̣хо ураго маха̄висо, ад̣ам̣си па̄де туритасса ме сато.

1167. ‘‘сва̄хам̣ ат̣т̣омхи дуккхена пӣл̣ито, бхиккху ча там̣ са̄мам̣ мун̃читва̄нантакам̣;

аха̄си кумма̄сам̣ мама̄нукампайа̄, тато чуто ка̄лакатомхи девата̄.

1168. ‘‘тадева каммам̣ кусалам̣ катам̣ майа̄, сукхан̃ча каммам̣ анубхоми аттана̄;

тайа̄ хи бханте анукампито бхусам̣, катан̃н̃ута̄йа абхива̄дайа̄ми там̣.

1169. ‘‘садеваке локе сама̄раке ча, ан̃н̃о муни наттхи тайа̄нукампако;

тайа̄ хи бханте анукампито бхусам̣, катан̃н̃ута̄йа абхива̄дайа̄ми там̣.

1170. ‘‘имасмим̣ локе парасмим̣ ва̄ пана, ан̃н̃о мунӣ наттхи тайа̄нукампако;

тайа̄ хи бханте анукампито бхусам̣, катан̃н̃ута̄йа абхива̄дайа̄ми та’’нти.

атха̄йасма̄ маха̄моггалла̄но аттана̄ ча девата̄йа ча катхитанийа̄менева там̣ бхагавато а̄рочеси. саттха̄ таматтхам̣ паччанубха̄ситва̄ там̣ ат̣т̣хуппаттим̣ катва̄ сампаттапариса̄йа дхаммам̣ десетум̣ ‘‘дисва̄на девам̣ пат̣ипуччхи бхиккхӯ’’тиа̄дима̄ха.

1159. таттха деванти гопа̄ладевапуттам̣. бхиккхӯти а̄йасмантам̣ маха̄моггалла̄нам̣ сандха̄йа саттха̄ вадати. со хи саббасо бхиннакилесата̄йа бхиккху. вима̄насса бахука̄ла̄ват̣т̣ха̄йита̄йа каппат̣т̣хитиката̄йа ева ва̄ ‘‘чират̣т̣хитике’’ти вуттам̣, ‘‘чират̣т̣хитика’’нтипи кечи пат̣ханти. тан̃хи ‘‘дева’’нти имина̄ самбандхитаббам̣. сопи хи сат̣т̣хисатасахасса̄дхика̄ тиссо вассакот̣ийо таттха ават̣т̣ха̄нато ‘‘чират̣т̣хитике’’ти ваттаббатам̣ лабхати. йатха̄пи чандима̄ти йатха̄ чандима̄ девапутто кантасӣталаманохаракиран̣аджа̄ласамуджджале аттано диббе вима̄намхи вирочати, евам̣ вирочама̄нанти вачанасеса̄.

1160. алан̇катотиа̄ди тасса девапуттасса тхерена пуччхита̄ка̄радассанам̣, там̣ хет̣т̣ха̄ вуттаттхамева.

1164. сан̇гамма̄ти сан̇гаметва̄, сан̇гамма̄ти ва̄ сан̇гахетва̄. хетваттхопи хи идха антонӣто, бахӯ екато хутва̄ти аттхо. а̄га̄ти а̄ган̃чхи. ма̄сети ма̄сасасса̄ни.

1165. двайаджджа̄ти двайам̣ аджджа етарахи киччам̣ ка̄таббам̣. убхайан̃ча ка̄рийанти вуттассеваттхасса парийа̄йавачанам̣. сан̃н̃анти дхаммасан̃н̃ам̣. тена̄ха ‘‘йонисо’’ти пат̣иладдха̄ти пат̣илабхитва̄. кхипинти панигга̄ха̄панавасена хаттхе кхипим̣. анантаканти нантакам̣ кумма̄сам̣ паккхипитва̄ бандхитва̄ т̣хапитам̣ пилотикам̣. а-ка̄ро четтха нипа̄таматтам̣.

1166. соти со ахам̣. туритоти турито самбхаманто. ава̄саринти упагаччхи, па̄висим̣ ва̄. пура̄ айам̣ бхан̃джати йассидам̣ дхананти йасса кхеттаса̄микасса идам̣ ма̄сасассам̣ дханам̣, там̣ айам̣ гоган̣о бхан̃джати пура̄ тасса бхан̃джанато, а̄мадданато пуретарамева̄ти аттхо. татоти таттха. туритасса ме сатоти самбхамантасса ме сама̄насса, сахаса̄ гаманена магге кан̣хасаппам̣ анолокетва̄ гатасса̄ти адхиппа̄йо.

1167. ат̣т̣омхи дуккхена пӣл̣итоти тена а̄сӣвисад̣ам̣санена ат̣т̣о ат̣т̣ито упаддуто маран̣адуккхена ба̄дхито бхава̄ми. аха̄сӣти аджджхохари, парибхун̃джӣти аттхо. тато чуто ка̄лакатомхи девата̄ти тато мануссаттабха̄вато чуто маран̣ака̄лаппаттийа̄, таттха ва̄ а̄йусан̇кха̄расса кхепанасан̇кха̄тасса ка̄ласса кататта̄ ка̄лакато, таданантарамева ча амхи девата̄ деваттабха̄ваппаттийа̄ девата̄ хомӣти аттхо.

1169. тайа̄ти тайа̄ садисо ан̃н̃о муни монеййагун̣айутто иси наттхи. тайа̄ти ва̄ ниссакке идам̣ каран̣авачанам̣. сесам̣ вуттанайамева.

гопа̄лавима̄наван̣н̣ана̄ нит̣т̣хита̄.