11. суниккхиттавима̄наван̣н̣ана̄

уччамидам̣ ман̣итхӯн̣ам̣ вима̄нанти суниккхиттавима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена а̄йасма̄ маха̄моггалла̄но хет̣т̣ха̄ вуттанайенева девача̄рикам̣ чаранто та̄ватим̣сабхаванам̣ упагато. тасмин̃ча кхан̣е ан̃н̃атаро девапутто аттано вима̄надва̄ре т̣хито а̄йасмантам̣ маха̄моггалла̄нам̣ дисва̄ сан̃джа̄тага̄равабахума̄но упасан̇камитва̄ пан̃чапатит̣т̣хитена вандитва̄ ан̃джалим̣ паггайха ат̣т̣ха̄си.

со кира атӣте кассапасамма̄самбуддхе париниббуте тасса сарӣрадха̄туйо паккхипитва̄ йоджанике канакатхӯпе ча кате чатассо париса̄ ка̄лена ка̄лам̣ упасан̇камитва̄ гандхапуппхадхӯпа̄дӣхи четийе пӯджам̣ каронти, таттха ан̃н̃атаро упа̄сако ан̃н̃есу пуппхапӯджам̣ катва̄ гатесу техи пӯджитат̣т̣ха̄не дунниккхитта̄ни пуппха̄ни дисва̄ таттхева та̄ни саммадева т̣хапенто саннивесавасена дассанӣйам̣ па̄са̄дикам̣ вибхаттивисесайуттам̣ пуппхапӯджам̣ ака̄си. катва̄ ча пана етам̣ а̄рамман̣ам̣ ган̣ханто саттху гун̣е ануссаритва̄ пасанначитто там̣ пун̃н̃ам̣ хадайе т̣хапеси.

со апарабха̄ге ка̄лам̣ катва̄ тассева каммасса а̄нубха̄вена та̄ватим̣сабхаване два̄дасайоджанике канакавима̄не ниббатти, маха̄нубха̄во маха̄ часса парива̄ро ахоси. там̣ сандха̄йа вуттам̣ ‘‘тасмин̃ча кхан̣е ан̃н̃атаро девапутто…пе… ат̣т̣ха̄сӣ’’ти. атха нам̣ а̄йасма̄ маха̄моггалла̄но йатха̄ладдхасампаттикиттанамукхена катасучаритакаммам̣ има̄хи га̄тха̄хи пуччхи –

1282. ‘‘уччамидам̣ ман̣итхӯн̣ам̣ вима̄нам̣, самантато два̄дасайоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

1283. ‘‘таттхаччхаси пиваси кха̄даси ча, дибба̄ ча вӣн̣а̄ паваданти ваггум̣;

дибба̄ раса̄ ка̄магун̣еттха пан̃ча, на̄рийо ча наччанти суван̣н̣ачханна̄.

1284. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

1285. ‘‘пуччха̄ми там̣ дева маха̄нубха̄ва, мануссабхӯто кимака̄си пун̃н̃ам̣;

кена̄си евам̣ джалита̄нубха̄во, ван̣н̣о ча те саббадиса̄ пабха̄сатӣ’’ти.

сопи тасса аттано катакаммам̣ има̄хи га̄тха̄хи катхеси. там̣ дассента̄ сан̇гӣтика̄ра̄ а̄хам̣су –

1286. ‘‘со девапутто аттамано, моггалла̄нена пуччхито;

пан̃хам̣ пут̣т̣хо вийа̄ка̄си, йасса каммассидам̣ пхалам̣’’.

1287. ‘‘дунниккхиттам̣ ма̄лам̣ суниккхипитва̄, патит̣т̣хапетва̄ сугатасса тхӯпе;

махиддхико чамхи маха̄нубха̄во, диббехи ка̄мехи саман̇гибхӯто.

1288. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

1289. ‘‘аккха̄ми те бхиккху маха̄нубха̄ва, мануссабхӯто йамахам̣ ака̄сим̣;

тенамхи евам̣ джалита̄нубха̄во, ван̣н̣о ча ме саббадиса̄ пабха̄сатӣ’’ти.

1287. таттха дунниккхиттам̣ ма̄ланти четийе пӯджа̄каран̣ат̣т̣ха̄не нирантарат̣т̣хапана̄дина̄ рачана̄висесена ат̣т̣хапетва̄ йатха̄никкхиттата̄йа на сут̣т̣ху никкхиттам̣, ва̄тена ва̄ пахаритва̄ дунниккхиттам̣ пуппхам̣. суниккхипитва̄ти сут̣т̣ху никкхипитва̄ рачана̄висесена дассанӣйам̣ па̄са̄дикам̣ катва̄ никкхипийа. патит̣т̣хапетва̄ти вибхаттивисеса̄дивасена пуппхам̣ патит̣т̣ха̄петва̄. там̣ ва̄ пуппхам̣ никкхипанто саттху четийам̣ уддисса мама санта̄не кусаладхаммам̣ патит̣т̣ха̄петва̄ти евам̣ еттха аттхо дат̣т̣хаббо. сесам̣ вуттанайамева.

евам̣ девапуттена аттано сучаритакамме пака̄сите тхеро тасса дхаммам̣ десетва̄ а̄гантва̄ бхагавато таматтхам̣ ниведеси. бхагава̄ там̣ ат̣т̣хуппаттим̣ катва̄ сампаттамаха̄джанасса дхаммам̣ десеси. десана̄ маха̄джанасса са̄ттхика̄ ахосӣти.

суниккхиттавима̄наван̣н̣ана̄ нит̣т̣хита̄.

ити параматтхадӣпанийа̄ кхуддака-ат̣т̣хакатха̄йа вима̄наваттхусмим̣

ека̄дасаваттхупат̣иман̣д̣итасса саттамасса

суниккхиттаваггасса аттхаван̣н̣ана̄ нит̣т̣хита̄.

нит̣т̣хита̄ ча пурисавима̄наван̣н̣ана̄.

нигаманакатха̄

етта̄вата̄ ча –

девата̄нам̣ вима̄на̄ди-сампаттим̣ тасса ка̄ран̣ам̣;

пака̄сайантӣ сатта̄нам̣, саббалокахита̄ваха̄.

аппака̄нампи ка̄ра̄нам̣, йа̄ вибха̄вети десана̄;

ул̣а̄рапхалатам̣ читта-кхеттасампаттийогато.

йам̣ катха̄ваттхукусала̄, супарин̃н̃а̄таваттхука̄;

вима̄наваттхуиччева, сан̇га̄йим̣су махесайо.

тасса аттхам̣ пака̄сетум̣, пора̄н̣ат̣т̣хакатха̄найам̣;

саннисса̄йа сама̄раддха̄, аттхасам̣ван̣н̣ана̄ майа̄.

йа̄ таттха параматтха̄нам̣, таттха таттха йатха̄рахам̣;

пака̄сана̄ параматтха-дӣпанӣ на̄ма на̄мато.

сампатта̄ паринит̣т̣ха̄нам̣, ана̄кулавиниччхайа̄;

са̄ саттарасаматта̄йа, па̄л̣ийа̄ бха̄н̣ава̄рато.

ити там̣ сан̇кхаронтена, йам̣ там̣ адхигатам̣ майа̄;

пун̃н̃ам̣ тасса̄нубха̄вена, локана̄тхасса са̄санам̣.

ога̄хетва̄ висуддха̄йа, сӣла̄дипат̣ипаттийа̄;

саббепи дехино хонту, вимуттирасабха̄гино.

чирам̣ тит̣т̣хату локасмим̣, самма̄самбуддхаса̄санам̣;

тасмим̣ сага̄рава̄ ниччам̣, хонту саббепи па̄н̣ино.

самма̄ вассату ка̄лена, девопи джагатӣпати;

саддхамманирато локам̣, дхамменева паса̄сатӯти.

ити бадаратиттхавиха̄рава̄сина̄ а̄чарийадхаммапа̄лена

ката̄йа

параматтхадӣпанийа̄ кхуддака-ат̣т̣хакатха̄йа

вима̄наваттхуаттхаван̣н̣ана̄ нит̣т̣хита̄.

вима̄наваттху-ат̣т̣хакатха̄ саматта̄.