5. два̄рапа̄лакавима̄наван̣н̣ана̄

уччамидам̣ ман̣итхӯн̣анти два̄рапа̄лакавима̄нам̣. тасса ка̄ уппатти? бхагава̄ ра̄джагахе вихарати вел̣уване. тена ча самайена ра̄джагахе ан̃н̃атаро упа̄сако чатта̄ри ниччабхатта̄ни сан̇гхасса дети. тасса пана гехам̣ парийанте т̣хитам̣ чорабхайена йебхуййена пихитадва̄рамева хоти. бхиккхӯ гантва̄ када̄чи два̄расса пихитатта̄ бхаттам̣ аладдха̄ва пат̣игаччханти. упа̄сако бхарийам̣ а̄ха ‘‘ким̣, бхадде, аййа̄нам̣ саккаччам̣ бхиккха̄ дӣйатӣ’’ти? са̄ а̄ха ‘‘екесу дивасесу аййа̄ на̄гамим̣сӯ’’ти. ‘‘ким̣ ка̄ран̣а’’нти? ‘‘два̄расса пихитатта̄ ман̃н̃е’’ти. там̣ сутва̄ упа̄сако сам̣вегаппатто хутва̄ екам̣ пурисам̣ два̄рапа̄лам̣ катва̄ т̣хапеси ‘‘твам̣ аджджато пат̣т̣ха̄йа два̄рам̣ раккханто нисӣда, йада̄ ча аййа̄ а̄гамиссанти, тада̄ те павесетва̄ павит̣т̣ха̄нам̣ несам̣ паттапат̣иггахан̣аа̄санапан̃н̃а̄пана̄ди саббам̣ йуттапайуттам̣ джа̄на̄хӣ’’ти. со ‘‘са̄дхӯ’’ти татха̄ каронто бхиккхӯнам̣ сантике дхаммам̣ сутва̄ уппаннасаддхо каммапхалам̣ саддахитва̄ саран̣есу ча сӣлесу ча патит̣т̣хахи, саккаччам̣ бхиккхӯ упат̣т̣хахи.

апарабха̄ге ниччабхаттада̄йако упа̄сако ка̄лам̣ катва̄ йа̄месу ниббатти. два̄рапа̄ло пана саккаччам̣ бхиккхӯнам̣ упат̣т̣хахитва̄ парасса паричча̄ге веййа̄ваччакаран̣ена анумоданена ча та̄ватим̣сесу уппаджджи. тасса два̄дасайоджаникам̣ канакавима̄нантиа̄ди саббам̣ каккат̣акавима̄не вуттанайенева ведитаббам̣. пуччха̄виссаджджанага̄тха̄ евама̄гата̄ –

918. ‘‘уччамидам̣ ман̣итхӯн̣ам̣ вима̄нам̣, самантато два̄даса йоджана̄ни;

кӯт̣а̄га̄ра̄ саттасата̄ ул̣а̄ра̄, вел̣урийатхамбха̄ ручакаттхата̄ субха̄.

919. ‘‘таттхаччхаси пиваси кха̄даси ча, дибба̄ ча вӣн̣а̄ паваданти ваггум̣;

дибба̄ раса̄ ка̄магун̣еттха пан̃ча, на̄рийо ча наччанти суван̣н̣ачханна̄.

920. ‘‘кена тета̄дисо ван̣н̣о…пе… ван̣н̣о ча те саббадиса̄ пабха̄сатӣ’’ти.

922. ‘‘со девапутто аттамано…пе… йасса каммассидам̣ пхалам̣’’.

923. ‘‘диббам̣ мамам̣ вассасахассама̄йу, ва̄ча̄бхигӣтам̣ манаса̄ паваттитам̣;

етта̄вата̄ т̣хассати пун̃н̃акаммо, диббехи ка̄мехи саман̇гибхӯто.

924. ‘‘тена мета̄дисо ван̣н̣о…пе…

ван̣н̣о ча ме саббадиса̄ пабха̄сатӣ’’ти.

923. таттха диббам̣ мамам̣ вассасахассама̄йӯти йасмим̣ деваника̄йе сайам̣ уппанно, тесам̣ та̄ватим̣садева̄нам̣ а̄йуппама̄н̣амева вадати. тесан̃хи манусса̄нам̣ ган̣ана̄йа вассасатам̣ еко раттидиво, та̄йа раттийа̄ тим̣сараттико ма̄со, тена ма̄сена два̄дасама̄сико сам̣ваччхаро, тена сам̣ваччхарена сахассасам̣ваччхара̄ни а̄йу, там̣ манусса̄нам̣ ган̣ана̄йа тиссо вассакот̣ийо сат̣т̣хи ча вассасатасахасса̄ни хонти. ва̄ча̄бхигӣтанти ва̄ча̄йа абхигӣтам̣, ‘‘а̄гаччханту аййа̄, идам̣ а̄санам̣ пан̃н̃аттам̣, идха нисӣдатха̄’’тиа̄дина̄, ‘‘ким̣ аййа̄нам̣ сарӣрасса а̄рогйам̣, ким̣ васанат̣т̣ха̄нам̣ пха̄сука’’нтиа̄дина̄ пат̣исантха̄равасена ча ва̄ча̄йа катхитаматтам̣. манаса̄ паваттитанти ‘‘име аййа̄ песала̄ брахмача̄рино дхаммача̄рино’’тиа̄дина̄ читтена паваттитам̣ паса̄даматтам̣, на пана мама сантакам̣ кин̃чи париччаттам̣ аттхӣти дассети. етта̄вата̄ти еттакена евам̣ катханаматтена паса̄даматтенапи. т̣хассати пун̃н̃акаммоти катапун̃н̃о на̄ма хутва̄ девалоке т̣хассати чирам̣ паваттиссати, тит̣т̣ханто ча диббехи ка̄мехи саман̇гӣбхӯто тасмим̣ деваника̄йе дева̄нам̣ валан̃джанийа̄менева диббехи пан̃чахи ка̄магун̣ехи саман̇гӣбхӯто саманна̄гато хутва̄ индрийа̄ни парича̄ренто вихаратӣти аттхо. сесам̣ вуттанайамева.

два̄рапа̄лакавима̄наван̣н̣ана̄ нит̣т̣хита̄.