6. пат̣хамакаран̣ӣйавима̄наван̣н̣ана̄

уччамидам̣ ман̣итхӯн̣анти каран̣ӣйавима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена са̄ваттхива̄сӣ еко упа̄сако нха̄нопакаран̣а̄ни гахетва̄ ачираватим̣ гантва̄ нхатва̄ а̄гаччханто бхагавантам̣ са̄ваттхим̣ пин̣д̣а̄йа пависантам̣ дисва̄ упасан̇камитва̄ вандитва̄ евама̄ха ‘‘бханте кена нимантита̄’’ти. бхагава̄ тун̣хӣ ахоси. со кеначи анимантитабха̄вам̣ н̃атва̄ а̄ха ‘‘адхива̄сету ме, бханте, бхагава̄ бхаттам̣ анукампам̣ упа̄да̄йа̄’’ти. адхива̄сеси бхагава̄ тун̣хӣбха̄вена. со бхагавантам̣ аттано гехам̣ нетва̄ буддха̄рахам̣ а̄санам̣ пан̃н̃а̄петва̄ таттха бхагавантам̣ нисӣда̄петва̄ пан̣ӣтена аннапа̄нена сантаппеси. бхагава̄ катабхаттакиччо тасса анумоданам̣ катва̄ пакка̄ми. сесам̣ анантаравима̄насадисам̣. тена вуттам̣ –

926. ‘‘уччамидам̣ ман̣итхӯн̣ам̣ вима̄нам̣…пе… на̄рийо ча наччанти суван̣н̣ачханна̄.

928. ‘‘кена тета̄дисо ван̣н̣о…пе… ван̣н̣о ча те саббадиса̄ пабха̄сатӣ’’ти.

930. ‘‘со девапутто аттамано…пе… йасса каммассидам̣ пхалам̣’’.

931. ‘‘каран̣ӣйа̄ни пун̃н̃а̄ни, пан̣д̣итена виджа̄ната̄;

саммаггатесу буддхесу, йаттха диннам̣ махаппхалам̣.

931. ‘‘аттха̄йа вата ме буддхо, аран̃н̃а̄ га̄мама̄гато;

каттха читтам̣ паса̄детва̄, та̄ватим̣сӯпаго ахам̣.

933. ‘‘тена мета̄дисо ван̣н̣о…пе… ван̣н̣о ча ме саббадиса̄ пабха̄сатӣ’’ти.

931. таттха пан̣д̣итена̄ти саппан̃н̃ена. виджа̄ната̄ти аттано хита̄хитам̣ джа̄нантена. саммаггатесӯти самма̄пат̣ипаннесу, буддхесӯти самма̄самбуддхесу.

932. аттха̄йа̄ти хита̄йа, вуд̣д̣хийа̄ ва̄. аран̃н̃а̄ти виха̄рато, джетаванам̣ сандха̄йа вадати. та̄ватим̣сӯпаготи та̄ватим̣садевака̄йам̣, та̄ватим̣сабхаванам̣ ва̄ уппаджджанавасена упагато. сесам̣ вуттанайамева.

каран̣ӣйавима̄наван̣н̣ана̄ нит̣т̣хита̄.