11. дутийана̄гавима̄наван̣н̣ана̄

махантам̣ на̄гам̣ абхируйха̄ти дутийана̄гавима̄нам̣. тасса ка̄ уппатти? бхагава̄ ра̄джагахе вихарати вел̣уване. тена самайена ра̄джагахе ан̃н̃атаро упа̄сако саддхо пасанно пан̃часу сӣлесу патит̣т̣хито упосатхадивасесу упосатхасӣлам̣ сама̄дийитва̄ пуребхаттам̣ аттано вибхава̄нурӯпам̣ бхиккхӯнам̣ да̄на̄ни датва̄ сайам̣ бхун̃джитва̄ суддхаваттханиваттхо суддхуттара̄сан̇го паччха̄бхаттам̣ йебхуййена ат̣т̣ха па̄на̄ни га̄ха̄петва̄ виха̄рам̣ гантва̄ бхиккхусан̇гхасса ниййа̄детва̄ бхагавантам̣ упасан̇камитва̄ дхаммам̣ сун̣а̄ти. евам̣ со саккаччам̣ да̄намайам̣ сӣламайан̃ча бахум̣ сучаритам̣ упачинитва̄ ито чуто та̄ватим̣сесу уппаджджи. тасса пун̃н̃а̄нубха̄вена саббасето маханто диббо хаттхина̄го па̄турахоси. со там̣ абхируйха махантена парива̄рена махантена дибба̄нубха̄вена ка̄лена ка̄лам̣ уййа̄накӣл̣ам̣ гаччхати.

атхекадивасам̣ катан̃н̃ута̄йа чодийама̄но ад̣д̣хараттисамайе там̣ диббана̄гам̣ абхируйха махата̄ парива̄рена ‘‘бхагавантам̣ вандисса̄мӣ’’ти девалокато а̄гантва̄ кевалакаппам̣ вел̣уванам̣ обха̄сетва̄ хаттхиккхандхато оруйха бхагавантам̣ упасан̇камитва̄ абхива̄детва̄ ан̃джалим̣ паггайха екамантам̣ ат̣т̣ха̄си. там̣ бхагавато самӣпе т̣хито а̄йасма̄ ван̇гӣсо бхагавато анун̃н̃а̄йа има̄хи га̄тха̄хи пуччхи –

968. ‘‘махантам̣ на̄гам̣ абхируйха, саббасетам̣ гаджуттамам̣;

вана̄ ванам̣ анупарийа̄си, на̄рӣган̣апураккхато;

обха̄сенто диса̄ сабба̄, осадхӣ вийа та̄рака̄.

969. ‘‘кена тета̄дисо ван̣н̣о…пе…

ван̣н̣о ча те саббадиса̄ пабха̄сатӣ’’ти.

таттха̄ пуччхито сопи тасса га̄тха̄хи ева бйа̄ка̄си.

971. ‘‘со девапутто аттамано, ван̇гӣсенева пуччхито;

пан̃хам̣ пут̣т̣хо вийа̄ка̄си, йасса каммассидам̣ пхалам̣’’.

972. ‘‘ахам̣ мануссесу мануссабхӯто, упа̄сако чаккхумато ахосим̣;

па̄н̣а̄типа̄та̄ вирато ахосим̣, локе адиннам̣ париваджджайиссам̣.

973. ‘‘амаджджапо но ча муса̄ абха̄н̣им̣, сакена да̄рена ча тут̣т̣хо ахосим̣;

аннан̃ча па̄нан̃ча пасанначитто, саккачча да̄нам̣ випулам̣ ада̄сим̣.

974. ‘‘тена мета̄дисо ван̣н̣о…пе…

ван̣н̣о ча ме саббадиса̄ пабха̄сатӣ’’ти.

таттха апуббам̣ наттхи, сесам̣ хет̣т̣ха̄ вуттанайамева.

дутийана̄гавима̄наван̣н̣ана̄ нит̣т̣хита̄.