7. чатуриттхивима̄наван̣н̣ана̄

абхиккантена ван̣н̣ена̄ти чатуриттхивима̄нам̣. тасса ка̄ уппатти? бхагавати са̄ваттхийам̣ вихаранте а̄йасма̄ маха̄моггалла̄но хет̣т̣ха̄ вуттанайена девача̄рикам̣ чаранто та̄ватим̣сабхаванам̣ гато. со таттха пат̣ипа̄т̣ийа̄ т̣хитесу чатӯсу вима̄несу чатассо девадхӣтаро паччекам̣ аччхара̄сахассапарива̄ра̄ диббасампаттим̣ анубхавантийо дисва̄ та̄хи пуббе катакаммам̣ пуччханто –

755. ‘‘абхиккантена ван̣н̣ена…пе…ван̣н̣о ча те саббадиса̄ пабха̄сатӣ’’ти. –

има̄хи га̄тха̄хи пат̣ипа̄т̣ийа̄ пуччхи. та̄пи тасса пуччха̄нантарам̣ пат̣ипа̄т̣ийа̄ бйа̄карим̣су. там̣ дассетум̣ –

758. ‘‘са̄ девата̄ аттамана̄…пе…йасса каммассидам̣ пхала’’нти. –

айам̣ га̄тха̄ вутта̄.

та̄ кира кассапасса бхагавато ка̄ле есика̄на̄маке рат̣т̣хе пан̣н̣акате на̄ма нагаре кулагехе ниббатта̄ вайаппатта̄ тасмим̣йева нагаре патикулам̣ гата̄ самаггава̄сам̣ васанти. та̄су ека̄ ан̃н̃атарам̣ пин̣д̣ача̄рикам̣ бхиккхум̣ дисва̄ пасанначитта̄ индӣваракала̄пам̣ ада̄си, апара̄ ан̃н̃асса нӣлуппалахаттхакам̣ ада̄си, апара̄ падумахаттхакам̣ ада̄си, апара̄ суманамакул̣а̄ни ада̄си. та̄ апарена самайена ка̄лам̣ катва̄ та̄ватим̣сабхаване ниббаттим̣су, та̄сам̣ аччхара̄сахассам̣ парива̄ро ахоси. та̄ таттха йа̄вата̄йукам̣ диббасампаттим̣ анубхавитва̄ тато чута̄ тассева каммасса випа̄ка̄васесена апара̄парам̣ таттхева сам̣сарантийо имасмим̣ буддхуппа̄де таттхева уппанна̄ вуттанайена а̄йасмата̄ маха̄моггалла̄нена пуччхита̄. та̄су ека̄ аттана̄ катам̣ пуббакаммам̣ тхерасса катхентӣ –

759. ‘‘индӣвара̄нам̣ хаттхакам̣ ахамада̄сим̣, бхиккхуно пин̣д̣а̄йа чарантасса;

есика̄нам̣ ун̣н̣атасмим̣, нагараваре пан̣н̣акате рамме.

760. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

а̄ха. апара̄ –

766. ‘‘нӣлуппалахаттхакам̣ ахамада̄сим̣, бхиккхуно пин̣д̣а̄йа чарантасса;

есика̄нам̣ ун̣н̣атасмим̣, нагараваре пан̣н̣акате рамме.

767. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

а̄ха. апара̄ –

773. ‘‘ода̄тамӯлакам̣ харитапаттам̣, удакасмим̣ саре джа̄там̣ ахамада̄сим̣;

бхиккхуно пин̣д̣а̄йа чарантасса, есика̄нам̣ ун̣н̣атасмим̣;

нагараваре пан̣н̣акате рамме.

774. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

а̄ха. апара̄ –

780. ‘‘ахам̣ сумана̄ суманасса суманамакул̣а̄ни, дантаван̣н̣а̄ни ахамада̄сим̣;

бхиккхуно пин̣д̣а̄йа чарантасса, есика̄нам̣ ун̣н̣атасмим̣;

нагараваре пан̣н̣акате рамме.

781. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

а̄ха.

759. таттха индӣвара̄нам̣ хаттхаканти удда̄лакапуппхахаттхам̣ ва̄тагха̄такапуппхакала̄пам̣. есика̄нанти есика̄рат̣т̣хасса. ун̣н̣атасмим̣ нагараварети ун̣н̣ате бхӯмипадесе нивит̣т̣хе мегходарам̣ лихантехи вийа аччуггатехи па̄са̄дакӯт̣а̄га̄ра̄дӣхи ун̣н̣ате уттаманагаре. пан̣н̣акатети евам̣на̄маке нагаре.

766. нӣлуппалахаттхаканти кувалайакала̄пам̣.

773. ода̄тамӯлаканти сетамӯлам̣, бхисамӯла̄нам̣ дхавалата̄йа вуттам̣, падумакала̄пам̣ сандха̄йа вадати. тена̄ха ‘‘харитапатта’’нтиа̄ди. таттха харитапаттанти нӣлапаттам̣. авиджахитамакул̣апаттасса хи падумасса ба̄хирапатта̄ни харитаван̣н̣а̄ни ева хонти. удакасмим̣ саре джа̄танти саре удакамхи джа̄там̣, сароруханти аттхо.

780. сумана̄ти евам̣на̄ма̄. суманасса̄ти сундарачиттасса. суманамакул̣а̄нӣти джа̄тисуманапуппхамакул̣а̄ни. дантаван̣н̣а̄нӣти саджджукам̣ улликхитахаттхидантасадисаван̣н̣а̄ни.

евам̣ та̄хи аттана̄ катакамме катхите тхеро та̄сам̣ анупуббим̣ катхам̣ катхетва̄ сачча̄ни пака̄сеси. саччапарийоса̄не са̄ сабба̄пи сахапарива̄ра̄ сота̄панна̄ ахесум̣. тхеро там̣ паваттим̣ мануссалокам̣ а̄гантва̄ бхагавато а̄рочеси. бхагава̄ таматтхам̣ ат̣т̣хуппаттим̣ катва̄ сампаттапариса̄йа дхаммам̣ десеси. са̄ дхаммадесана̄ маха̄джанасса са̄ттхика̄ джа̄та̄ти.

чатуриттхивима̄наван̣н̣ана̄ нит̣т̣хита̄.