8. амбавима̄наван̣н̣ана̄

диббам̣ те амбаванам̣ рамманти амбавима̄нам̣. тасса ка̄ уппатти? бхагава̄ са̄ваттхийам̣ вихарати джетаване. тена самайена са̄ваттхийам̣ ан̃н̃атара̄ упа̄сика̄ а̄ва̄сада̄насса махаппхалатам̣ маха̄нисам̣сатан̃ча сутва̄ чхандаджа̄та̄ бхагавантам̣ абхива̄детва̄ евама̄ха ‘‘ахам̣, бханте, екам̣ а̄ва̄сам̣ ка̄ретука̄ма̄, иччха̄ми та̄дисам̣ ока̄сам̣, а̄чиккхатӯ’’ти. бхагава̄ бхиккхӯ а̄н̣а̄песи, бхиккхӯ тасса̄ ока̄сам̣ дассесум̣. са̄ таттха раман̣ӣйам̣ а̄ва̄сам̣ ка̄ретва̄ тасса самантато амбаруккхе ропеси. со а̄ва̄со самантато амбапантӣхи париккхитто чха̄йӯдакасампанно мутта̄джа̄ласадисава̄лука̄кин̣н̣апан̣д̣арабхӯмибха̄го ативийа манохаро ахоси. са̄ там̣ виха̄рам̣ на̄на̄ван̣н̣ехи ваттхехи пуппхада̄магандхада̄ма̄дӣхи ча девавима̄нам̣ вийа алан̇каритва̄ телападӣпам̣ а̄ропетва̄ амбаруккхе ча ахатехи ваттхехи вет̣хетва̄ сан̇гхасса ниййа̄деси.

са̄ апарабха̄ге ка̄лам̣ катва̄ та̄ватим̣сабхаване ниббатти, тасса̄ махантам̣ вима̄нам̣ па̄турахоси амбаванапариккхиттам̣. са̄ таттха аччхара̄ган̣апарива̄рита̄ диббасампаттим̣ анубхавати. там̣ а̄йасма̄ маха̄моггалла̄но упагантва̄ има̄хи га̄тха̄хи пуччхи –

783. ‘‘диббам̣ те амбаванам̣ раммам̣, па̄са̄деттха махаллако;

на̄на̄тӯрийасан̇гхут̣т̣хо, аччхара̄ган̣агхосито.

784. ‘‘падӣпо четтха джалати, ниччам̣ сован̣н̣айо маха̄;

дуссапхалехи руккхехи, саманта̄ парива̄рито.

785. ‘‘кена тета̄дисо ван̣н̣о…пе…ван̣н̣о ча те саббадиса̄ пабха̄сатӣ’’ти.

787. ‘‘са̄ девата̄ аттамана̄…пе… йасса каммассидам̣ пхалам̣’’.

788. ‘‘ахам̣ мануссесу мануссабхӯта̄, пурима̄йа джа̄тийа̄ мануссалоке;

виха̄рам̣ сан̇гхасса ка̄ресим̣, амбехи парива̄ритам̣.

789. ‘‘парийосите виха̄ре, ка̄ренте нит̣т̣хите махе;

амбехи чха̄дайитва̄на, катва̄ дуссамайе пхале.

790. ‘‘падӣпам̣ таттха джа̄летва̄, бходжайитва̄ ган̣уттамам̣;

ниййа̄десим̣ там̣ сан̇гхасса, пасанна̄ сехи па̄н̣ибхи.

791. ‘‘тена ме амбаванам̣ раммам̣, па̄са̄деттха махаллако;

на̄на̄тӯрийасан̇гхут̣т̣хо, аччхара̄ган̣агхосито.

792. ‘‘падӣпо четтха джалати, ниччам̣ сован̣н̣айо маха̄;

дуссапхалехи руккхехи, саманта̄ парива̄рито.

793. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

са̄ девата̄ бйа̄ка̄си.

783. таттха махаллакоти маханто а̄йа̄мавиттха̄рехи уббедхена ча випуло, ул̣а̄ратамоти аттхо. аччхара̄ган̣агхоситоти там̣ памодитум̣ сан̇гӣтивасена чева пийасалла̄павасена ча аччхара̄сан̇гхена самуггхосито.

784. падӣпо четтха джалатӣти сӯрийарасмисамуджджалакиран̣авита̄но ратанаппадӣпо ча еттха етасмим̣ па̄са̄де абхиджалати. дуссапхалехӣти дусса̄ни пхала̄ни етесанти дуссапхала̄. техи самуггирийама̄надиббаваттхехӣти аттхо.

789. ка̄ренте нит̣т̣хите махети катапарийоситасса виха̄расса махе пӯджа̄йа карӣйама̄на̄йа ча. катва̄ дуссамайе пхалети дуссейева тесам̣ амба̄нам̣ пхалам̣ катва̄.

790. ган̣уттаманти ган̣а̄нам̣ уттамам̣ бхагавато са̄вакасан̇гхам̣. ниййа̄десинти сампат̣иччха̄песим̣, ада̄синти аттхо. сесам̣ вуттанайамева.

амбавима̄наван̣н̣ана̄ нит̣т̣хита̄.