11. ванданавима̄наван̣н̣ана̄

абхиккантена ван̣н̣ена̄ти ванданавима̄нам̣. тасса ка̄ уппатти? бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена самайена самбахула̄ бхиккхӯ ан̃н̃атарасмим̣ га̄мака̄ва̄се вассам̣ васитва̄ вуттхавасса̄ пава̄ретва̄ сена̄санам̣ пат̣иса̄метва̄ паттачӣварама̄да̄йа са̄ваттхим̣ уддисса бхагавантам̣ дассанаттха̄йа гаччханта̄ ан̃н̃атарасса га̄масса маджджхена атиккаманти. таттха ан̃н̃атара̄ иттхӣ те бхиккхӯ дисва̄ пасанначитта̄ сан̃джа̄тага̄равабахума̄на̄ пан̃чапатит̣т̣хитена вандитва̄ сирасмим̣ ан̃джалим̣ паггайха йа̄ва дассанӯпача̄ра̄ паса̄дасомма̄ни аккхӣни уммӣлетва̄ олокентӣ ат̣т̣ха̄си. са̄ апарена самайена ка̄лам̣ катва̄ та̄ватим̣сесу ниббатти. атха нам̣ таттха диббасампаттим̣ анубхавантим̣ а̄йасма̄ маха̄моггалла̄но има̄хи га̄тха̄хи пат̣ипуччхи –

819. ‘‘абхиккантена ван̣н̣ена…пе…ван̣н̣о ча те саббадиса̄ пабха̄сатӣ’’ти.

822. ‘‘са̄ девата̄ аттамана̄…пе… йасса каммассидам̣ пхалам̣’’.

823. ‘‘ахам̣ мануссесу мануссабхӯта̄, дисва̄на саман̣е сӣлаванте;

па̄да̄ни вандитва̄ манам̣ паса̄дайим̣, витта̄ чахам̣ ан̃джаликам̣ ака̄сим̣.

824. ‘‘тена мета̄дисо ван̣н̣о…пе…ван̣н̣о ча ме саббадиса̄ пабха̄сатӣ’’ти. –

има̄хи га̄тха̄хи бйа̄ка̄си.

823. таттха саман̣ети самитапа̄пе. сӣлавантети сӣлагун̣айутте. манам̣ паса̄дайинти ‘‘са̄дхурӯпа̄ ватиме аййа̄ дхаммача̄рино самача̄рино брахмача̄рино’’ти тесам̣ гун̣е а̄раббха читтам̣ паса̄десим̣. витта̄ чахам̣ ан̃джаликам̣ ака̄синти тут̣т̣ха̄ соманассаджа̄та̄ ахам̣ вандим̣. песала̄нам̣ бхиккхӯнам̣ паса̄давикасита̄ни аккхӣни уммӣлетва̄ дассанаматтампи имесам̣ сатта̄нам̣ бахӯпака̄рам̣, пагева вандана̄ти. тена̄ха ‘‘тена мета̄дисо ван̣н̣о’’тиа̄ди. сесам̣ вуттанайамева.

ванданавима̄наван̣н̣ана̄ нит̣т̣хита̄.