10. уччхувима̄наван̣н̣ана̄

обха̄сайитва̄ патхавим̣ садеваканти уччхувима̄нам̣. там̣ хет̣т̣ха̄ уччхувима̄нена па̄л̣ито ча ат̣т̣хуппаттито ча садисамева. кевалам̣ таттха сассу сун̣исам̣ пӣт̣хакена пахаритва̄ ма̄реси, идха пана лед̣д̣уна̄ти айамева висесо. ваттхуно пана бхиннатта̄ убхайампи висум̣йева сан̇гахам̣ а̄рул̣ханти ведитаббам̣.

808. ‘‘обха̄сайитва̄ патхавим̣ садевакам̣, атирочаси чандимасӯрийа̄ вийа;

сирийа̄ ча ван̣н̣ена йасена теджаса̄, брахма̄ва деве тидасе сахиндаке.

809. ‘‘пуччха̄ми там̣ уппалама̄ладха̄ринӣ, а̄вел̣инӣ кан̃чанасаннибхаттаче;

алан̇кате уттамаваттхадха̄ринӣ, ка̄ твам̣ субхе девате вандасе мамам̣.

810. ‘‘ким̣ твам̣ пуре каммамака̄си аттана̄, мануссабхӯта̄ пурима̄йа джа̄тийа̄;

да̄нам̣ сучин̣н̣ам̣ атха сӣласан̃н̃амам̣, кенупапанна̄ сугатим̣ йасассинӣ;

девате пуччхита̄чиккха, кисса каммассидам̣ пхала’’нти. –

а̄йасма̄ маха̄моггалла̄наттхеро пуччхи. тато девата̄ има̄хи га̄тха̄хи бйа̄ка̄си –

811. ‘‘ида̄ни бханте имамева га̄мам̣, пин̣д̣а̄йа амха̄кам̣ гхарам̣ упа̄гами;

тато те уччхусса ада̄сим̣ кхан̣д̣икам̣, пасанначитта̄ атула̄йа пӣтийа̄.

812. ‘‘сассу ча паччха̄ ануйун̃джате мамам̣, кахам̣ ну уччхум̣ вадхуке ава̄кири;

на чхад̣д̣итам̣ но пана кха̄дитам̣ майа̄, сантасса бхиккхусса сайам̣ ада̄сахам̣.

813. ‘‘‘туйхам̣ нвидам̣ иссарийам̣ атхо мама’, итисса̄ сассу парибха̄сате мамам̣;

лед̣д̣ум̣ гахетва̄ паха̄рам̣ ада̄си ме, тато чута̄ ка̄лаката̄мхи девата̄.

814. ‘‘тадева каммам̣ кусалам̣ катам̣ майа̄, сукхан̃ча каммам̣ анубхоми аттана̄;

девехи саддхим̣ парича̄райа̄махам̣, мода̄махам̣ ка̄магун̣ехи пан̃чахи.

815. ‘‘тадева каммам̣ кусалам̣ катам̣ майа̄, сукхан̃ча каммам̣ анубхоми аттана̄;

девиндагутта̄ тидасехи раккхита̄, самаппита̄ ка̄магун̣ехи пан̃чахи.

816. ‘‘ета̄дисам̣ пун̃н̃апхалам̣ анаппакам̣, маха̄випа̄ка̄ мама уччхудаккхин̣а̄;

девехи саддхим̣ парича̄райа̄махам̣, мода̄махам̣ ка̄магун̣ехи пан̃чахи.

817. ‘‘ета̄дисам̣ пун̃н̃апхалам̣ анаппакам̣, маха̄джутика̄ мама уччхудаккхин̣а̄;

девиндагутта̄ тидасехи раккхита̄, сахассанетторива нандане ване.

818. ‘‘туван̃ча бханте анукампакам̣ видум̣, упечча вандим̣ кусалан̃ча пуччхисам̣;

тато те уччхусса ада̄сим̣ кхан̣д̣икам̣, пасанначитта̄ атула̄йа пӣтийа̄’’ти.

сесам̣ вуттасадисамева̄ти.

уччхувима̄наван̣н̣ана̄ нит̣т̣хита̄.