4. чатуттхапӣт̣хавима̄наван̣н̣ана̄

пӣт̣хам̣ те вел̣урийамайанти чатуттхапӣт̣хавима̄нам̣. имасса̄пи ваттху ра̄джагахе самут̣т̣хитам̣, там̣ дутийавима̄не вуттанайенева ведитаббам̣. нӣлаваттхена хи аттхаритва̄ пӣт̣хасса диннатта̄ имисса̄пи вима̄нам̣ вел̣урийамайам̣ ниббаттам̣. сесам̣ пат̣хамавима̄не вуттасадисам̣. тена вуттам̣ –

23. ‘‘пӣт̣хам̣ те вел̣урийамайам̣ ул̣а̄рам̣, маноджавам̣ гаччхати йенака̄мам̣;

алан̇кате малйадхаре суваттхе, обха̄саси виджджуриваббхакӯт̣ам̣.

24. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

25. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

26. ‘‘са̄ девата̄ аттамана̄, моггалла̄нена пуччхита̄;

пан̃хам̣ пут̣т̣ха̄ вийа̄ка̄си, йасса каммассидам̣ пхалам̣’’.

27. ‘‘аппасса каммасса пхалам̣ мамедам̣, йенамхи евам̣ джалита̄нубха̄ва̄;

ахам̣ мануссесу мануссабхӯта̄, пурима̄йа джа̄тийа̄ мануссалоке.

28. ‘‘аддасам̣ вираджам̣ бхиккхум̣, виппасаннамана̄вилам̣;

тасса ада̄сахам̣ пӣт̣хам̣, пасанна̄ сехи па̄н̣ибхи.

29. ‘‘тена мета̄дисо ван̣н̣о, тена ме идха миджджхати;

уппаджджанти ча ме бхога̄, йе кечи манасо пийа̄.

30. ‘‘аккха̄ми те бхиккху маха̄нубха̄ва, мануссабхӯта̄ йамака̄си пун̃н̃ам̣;

тенамхи евам̣ джалита̄нубха̄ва̄, ван̣н̣о ча ме саббадиса̄ пабха̄сатӣ’’ти.

еттха̄пи хи нӣлаваттхена аттхаритва̄ пӣт̣хасса диннатта̄ имисса̄пи вима̄нам̣ вел̣урийамайам̣ ниббаттам̣. теневеттха ‘‘пӣт̣хам̣ те вел̣урийамайа’’нти а̄дито а̄гатам̣. сесам̣ татийасадисамева̄ти таттха вуттанайенева аттхо ведитаббо.

чатуттхапӣт̣хавима̄наван̣н̣ана̄ нит̣т̣хита̄.