4. чатуттханибба̄напат̣исам̣йуттасуттаван̣н̣ана̄

74. чатуттхе атха кхо бхагава̄ етаматтхам̣ видитва̄ти тада̄ кира бхагавата̄ анекапарийа̄йена сандассана̄дивасена нибба̄напат̣исам̣йутта̄йа дхаммадесана̄йа ката̄йа тесам̣ бхиккхӯнам̣ етадахоси – ‘‘айам̣ та̄ва бхагавата̄ аматамаха̄нибба̄надха̄туйа̄ анека̄ка̄равока̄рам̣ а̄нисам̣сам̣ дассентена анан̃н̃аса̄дха̄ран̣о а̄нубха̄во пака̄сито, адхигамӯпа̄йо панасса̄ на бха̄сито, катхам̣ ну кхо пат̣ипаджджантехи амхехи айам̣ адхигантабба̄’’ти. атха бхагава̄ тесам̣ бхиккхӯнам̣ етам̣ йатха̄вуттапаривитаккасан̇кха̄там̣ аттхам̣ сабба̄ка̄рато видитва̄. имам̣ уда̄нанти тан̣ха̄васена каттхачи анисситасса пассаддхака̄йачиттасса вӣтхипат̣ипаннавипассанасса арийамаггена анавасесато тан̣ха̄паха̄нена нибба̄на̄дхигамавибха̄ванам̣ имам̣ уда̄нам̣ уда̄неси.

таттха нисситасса чалитанти рӯпа̄дисан̇кха̄ре тан̣ха̄дит̣т̣хӣхи нисситасса чалитам̣ ‘‘етам̣ мама, есо ме атта̄’’ти тан̣ха̄дит̣т̣хивиппхандитам̣ хоти. аппахӣнатан̣ха̄дит̣т̣хикасса хи пуггаласса сукха̄дӣсу уппаннесу та̄ни абхибхуййа вихаритум̣ асакконтасса ‘‘мама ведана̄, ахам̣ ведийа̄мӣ’’тиа̄дина̄ тан̣ха̄дит̣т̣хига̄хавасена кусалаппаваттито читтасанта̄насса чаланам̣ кампанам̣, аваккхалитам̣ ва̄ хотӣти аттхо. анисситасса чалитам̣ наттхӣти йо пана висуддхипат̣ипадам̣ пат̣ипаджджанто саматхавипассана̄хи тан̣ха̄дит̣т̣хийо виккхамбхетва̄ аничча̄дивасена сан̇кха̄ре саммасанто вихарати, тасса там̣ анисситасса йатха̄вуттам̣ чалитам̣ аваккхалитам̣, виппхандитам̣ ва̄ наттхи ка̄ран̣асса сувиккхамбхитатта̄.

чалите асатӣти йатха̄вутте чалите асати йатха̄ тан̣ха̄дит̣т̣хига̄ха̄ наппаваттанти, татха̄ вӣтхипат̣ипанна̄йа випассана̄йа там̣ уссуккантасса. пассаддхӣти випассана̄читтасахаджа̄та̄нам̣ ка̄йачитта̄нам̣ са̄рамбхакаракилесавӯпасаминӣ дувидха̄пи пассаддхи хоти. пассаддхийа̄ сати нати на хотӣти пуббена̄парам̣ висесайутта̄йа пассаддхийа̄ сати анаваджджасукха̄дхит̣т̣ха̄нам̣ сама̄дхим̣ вад̣д̣хетва̄ там̣ пан̃н̃а̄йа самава̄йакаран̣ена саматхавипассанам̣ йуганаддхам̣ йоджетва̄ маггапарампара̄йа килесе кхепентасса ка̄мабхава̄дӣсу наманато ‘‘натӣ’’ти ладдхана̄ма̄ тан̣ха̄ арахаттамаггаккхан̣е анавасесато на хоти, ануппаттидхамматам̣ а̄па̄дитатта̄ на уппаджджатӣти аттхо.

натийа̄ асатӣти арахаттамаггена тан̣ха̄йа суппахӣнатта̄ бхава̄диаттха̄йа а̄лайаниканти парийут̣т̣ха̄не асати. а̄гатигати на хотӣти пат̣исандхивасена идха а̄гати а̄гаманам̣ чутивасена гати ито паралокагаманам̣ печчабха̄во на хоти на паваттати. а̄гатигатийа̄ асатӣти вуттанайена а̄гатийа̄ ча гатийа̄ ча асати. чутӯпапа̄то на хотӣти апара̄парам̣ чаванупападжджанам̣ на хоти на паваттати. асати хи килесават̣т̣е каммават̣т̣ам̣ паччхиннамева, паччхинне ча тасмим̣ куто випа̄кават̣т̣асса самбхаво. тена̄ха – ‘‘чутӯпапа̄те асати невидха на хура’’нтиа̄ди. таттха йам̣ ваттаббам̣, там̣ хет̣т̣ха̄ ба̄хийасутте виттха̄рато вуттамева. тасма̄ таттха вуттанайенева аттхо ведитаббо.

ити бхагава̄ идха̄пи тесам̣ бхиккхӯнам̣ анавасесато ват̣т̣адуккхавӯпасамахетубхӯтам̣ аматамаха̄нибба̄насса а̄нубха̄вам̣ самма̄пат̣ипаттийа̄ пака̄сети.

чатуттхасуттаван̣н̣ана̄ нит̣т̣хита̄.