2. дутийанибба̄напат̣исам̣йуттасуттаван̣н̣ана̄

72. дутийе имам̣ уда̄нанти имам̣ нибба̄насса пакатийа̄ гамбхӣрабха̄вато дуддасабха̄вадӣпанам̣ уда̄нам̣ уда̄неси. таттха дуддасанти сабха̄вагамбхӣратта̄ атисукхумасан̣хасабха̄ватта̄ ча анупачитан̃а̄н̣асамбха̄рехи пасситум̣ на сакка̄ти дуддасам̣. вуттан̃хетам̣ – ‘‘тан̃хи те, ма̄ган̣д̣ийа, арийам̣ пан̃н̃а̄чаккху наттхи, йена твам̣ а̄рогйам̣ джа̄неййа̄си, нибба̄нампи пассеййа̄сӣ’’ти (ма. ни. 2.218). апарампи вуттам̣ – ‘‘идампи кхо т̣ха̄нам̣ дуддасам̣, йадидам̣ саббасан̇кха̄расаматхо’’тиа̄ди (маха̄ва. 8; ма. ни. 1.281; 2.337). анатанти рӯпа̄диа̄рамман̣есу, ка̄ма̄дӣсу ча бхавесу наманато танниннабха̄вена паваттито сатта̄нан̃ча таттха наманато тан̣ха̄ ната̄ на̄ма, наттхи еттха ната̄ти анатам̣, нибба̄нанти аттхо. ‘‘ананта’’нтипи пат̣ханти, ниччасабха̄ватта̄ антавирахитам̣, ачаванадхаммам̣ ниродхам̣ аматанти аттхо. кечи пана ‘‘ананта’’нти падасса ‘‘аппама̄н̣а’’нти аттхам̣ ваданти. еттха ча ‘‘дуддаса’’нти имина̄ пан̃н̃а̄йа дуббалӣкаран̣ехи ра̄га̄дикилесехи чирака̄лабха̄витатта̄ сатта̄нам̣ апаччайабха̄вана̄ на сукара̄ти нибба̄насса киччхена адхигаманӣйатам̣ дассети. на хи саччам̣ судассананти имина̄пи тамеваттхам̣ па̄кат̣ам̣ кароти. таттха саччанти нибба̄нам̣. тан̃хи кеначи парийа̄йена асантасабха̄ва̄бха̄вато екантенева сантатта̄ авипарӣтат̣т̣хена саччам̣. на хи там̣ судассанам̣ на сукхена пасситаббам̣, сучирампи ка̄лам̣ пун̃н̃ан̃а̄н̣асамбха̄ре сама̄нентехипи касиренева самадхигантаббато. татха̄ хи вуттам̣ бхагавата̄ – ‘‘киччхена ме адхигата’’нти (маха̄ва. 8; ма. ни. 1.281; 2.337).

пат̣ивиддха̄ тан̣ха̄ джа̄нато пассато наттхи кин̃чананти тан̃ча ниродхасаччам̣ саччхикирийа̄бхисамайавасена абхисаментена висайато киччато ча а̄рамман̣ато ча а̄рамман̣аппат̣иведхена асаммохаппат̣иведхена ча пат̣ивиддхам̣, йатха̄парин̃н̃а̄бхисамайавасена дуккхасаччам̣, бха̄вана̄бхисамайавасена маггасаччан̃ча асаммохато пат̣ивиддхам̣ хоти, евам̣ паха̄на̄бхисамайавасена асаммохато ча пат̣ивиддха̄ тан̣ха̄ хоти. еван̃ча чатта̄ри сачча̄ни йатха̄бхӯтам̣ арийамаггапан̃н̃а̄йа джа̄нато пассато бхава̄дӣсу натабхӯта̄ тан̣ха̄ наттхи, тадабха̄ве саббассапи килесават̣т̣асса абха̄во, татова каммавипа̄кават̣т̣а̄нам̣ асамбхавойева̄ти евам̣ бхагава̄ тесам̣ бхиккхӯнам̣ анавасесават̣т̣адуккхавӯпасамахетубхӯтам̣ аматамаха̄нибба̄насса а̄нубха̄вам̣ пака̄сеси. сесам̣ вуттанайамева.

дутийасуттаван̣н̣ана̄ нит̣т̣хита̄.