8. качча̄насуттаван̣н̣ана̄

68. ат̣т̣хаме аджджхаттанти еттха айам̣ аджджхаттасаддо ‘‘чха аджджхаттика̄ни а̄йатана̄нӣ’’тиа̄дӣсу (ма. ни. 3.304) аджджхаттаджджхатте а̄гато. ‘‘аджджхатта̄ дхамма̄ (дха. са. тикама̄тика̄ 20), аджджхаттам̣ ва̄ ка̄йе ка̄йа̄нупассӣ’’тиа̄дӣсу (дӣ. ни. 2.373-374) нийакаджджхатте. ‘‘саббанимитта̄нам̣ аманасика̄ра̄ аджджхаттам̣ сун̃н̃атам̣ упасампаджджа вихаратӣ’’тиа̄дӣсу (ма. ни. 3.187) висайаджджхатте, иссарийат̣т̣ха̄нети аттхо. пхаласама̄патти хи буддха̄нам̣ иссарийат̣т̣ха̄нам̣ на̄ма. ‘‘тена̄нанда, бхиккхуна̄ тасмим̣йева пуримасмим̣ сама̄дхинимитте аджджхаттамева читтам̣ сан̣т̣хапетабба’’нтиа̄дӣсу (ма. ни. 3.188) гочараджджхатте. идха̄пи гочараджджхаттейева дат̣т̣хаббо. тасма̄ аджджхаттанти гочараджджхаттабхӯте каммат̣т̣ха̄на̄рамман̣ети вуттам̣ хоти. паримукханти абхимукхам̣. сӯпат̣т̣хита̄йа̄ти сут̣т̣ху упат̣т̣хита̄йа ка̄йагата̄йа сатийа̄. сатисӣсена четтха джха̄нам̣ вуттам̣. идам̣ вуттам̣ хоти ‘‘аджджхаттам̣ ка̄йа̄нупассана̄сатипат̣т̣ха̄навасена пат̣иладдхам̣ ул̣а̄рам̣ джха̄нам̣ сама̄паджджитва̄’’ти.

айан̃хи тхеро бхагавати са̄ваттхийам̣ вихаранте екадивасам̣ са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄таппат̣икканто виха̄рам̣ пависитва̄ бхагавато ваттам̣ дассетва̄ дива̄т̣т̣ха̄не дива̄виха̄рам̣ нисинно на̄на̄сама̄паттӣхи дивасабха̄гам̣ вӣтина̄метва̄ са̄йанхасамайам̣ виха̄рамаджджхам̣ отаритва̄ бхагавати гандхакут̣ийам̣ нисинне ‘‘ака̄ло та̄ва бхагавантам̣ упасан̇камиту’’нти гандхакут̣ийа̄ авидӯре, ан̃н̃атарасмим̣ руккхамӯле ка̄лапариччхедам̣ катва̄ йатха̄вуттам̣ сама̄паттим̣ сама̄паджджитва̄ нисӣди. саттха̄ там̣ татха̄нисиннам̣ гандхакут̣ийам̣ нисиннойева пасси. тена вуттам̣ – ‘‘тена кхо пана самайена а̄йасма̄ маха̄качча̄но…пе… сӯпат̣т̣хита̄йа̄’’ти.

етаматтхам̣ видитва̄ти етам̣ а̄йасмато маха̄качча̄наттхерасса сатипат̣т̣ха̄набха̄вана̄васена адхигатам̣ джха̄нам̣ па̄дакам̣ катва̄ сама̄паджджанам̣ сабба̄ка̄рато видитва̄ тадаттхадӣпанам̣ имам̣ уда̄нам̣ уда̄неси.

таттха йасса сийа̄ саббада̄ сати, сататам̣ ка̄йагата̄ упат̣т̣хита̄ти йасса а̄раддхавипассакасса екадивасам̣ чха кот̣т̣ха̄се катва̄ саббасмимпи ка̄ле на̄марӯпабхедена дувидхепи ка̄йе гата̄ ка̄йа̄рамман̣а̄ пан̃чаннам̣ упа̄да̄наккхандха̄нам̣ аничча̄дисаммасанавасена сататам̣ нирантарам̣ са̄тачча̄бхийогавасена сати упат̣т̣хита̄ сийа̄.

айам̣ кира̄йасма̄ пат̣хамам̣ ка̄йагата̄сатикаммат̣т̣ха̄навасена джха̄нам̣ ниббаттетва̄ там̣ па̄дакам̣ катва̄ ка̄йа̄нупассана̄сатипат̣т̣ха̄намукхена випассанам̣ пат̣т̣хапетва̄ арахаттам̣ патто. со апарабха̄гепи йебхуййена тамева джха̄нам̣ сама̄паджджитва̄ вут̣т̣ха̄йа татхева ча випасситва̄ пхаласама̄паттим̣ сама̄паджджати. сва̄йам̣ йена видхина̄ арахаттам̣ патто, там̣ видхим̣ дассенто саттха̄ ‘‘йасса сийа̄ саббада̄ сати, сататам̣ ка̄йагата̄ упат̣т̣хита̄’’ти ватва̄ тасса̄ упат̣т̣ха̄на̄ка̄рам̣ вибха̄ветум̣ ‘‘но часса но ча ме сийа̄, на бхависсати на ча ме бхависсатӣ’’ти а̄ха.

тассаттхо двидха̄ ведитаббо саммасанато пуббабха̄гавасена саммасанака̄лавасена ча̄ти. тесу пуббабха̄гавасена та̄ва но часса но ча ме сийа̄ти атӣтака̄ле мама килесакаммам̣ но часса на бхавеййа че, имасмим̣ паччуппаннака̄ле айам̣ аттабха̄во но ча ме сийа̄ на ме уппаджджеййа. йасма̄ пана ме атӣте каммакилеса̄ ахесум̣, тасма̄ там̣нимитто етарахи айам̣ ме аттабха̄во паваттати. на бхависсати на ча ме бхависсатӣти имасмим̣ аттабха̄ве пат̣ипаккха̄дхигамена килесакаммам̣ на бхависсати на уппаджджиссати ме, а̄йатим̣ випа̄кават̣т̣ам̣ на ча ме бхависсати на ме паваттиссатӣти. евам̣ ка̄латтайе каммакилесахетукам̣ идам̣ майхам̣ аттабха̄васан̇кха̄там̣ кхандхапан̃чакам̣, на иссара̄дихетукам̣, йатха̄ ча майхам̣, евам̣ саббасатта̄нанти саппаччайана̄марӯпадассанам̣ пака̄ситам̣ хоти.

саммасанака̄лавасена пана но часса но ча ме сийа̄ти йасма̄ идам̣ кхандхапан̃чакам̣ хутва̄ абха̄ват̣т̣хена аниччам̣, абхин̣хапат̣ипӣл̣анат̣т̣хена дуккхам̣, авасаваттанат̣т̣хена анатта̄, евам̣ йади айам̣ атта̄ на̄ма на̄пи кхандхапан̃чакавинимутто кочи но часса но ча сийа̄ на бхавеййа, евам̣, бханте, но ча ме сийа̄ мама сантакам̣ на̄ма кин̃чи на бхавеййа. на бхависсатӣти аттани аттанийе бхавитаббам̣ йатха̄ чидам̣ на̄марӯпам̣ етарахи ча атӣте ча аттаттанийам̣ сун̃н̃ам̣, евам̣ на бхависсати на ме бхависсати, ана̄гатепи кхандхавинимутто атта̄ на̄ма на кочи на ме бхависсати на паваттиссати, тато ева кин̃чи палибодхат̣т̣ха̄нийам̣ на ме бхависсати а̄йатимпи аттанийам̣ на̄ма на ме кин̃чи бхависсатӣти. имина̄ тӣсу ка̄лесу ‘‘аха’’нти гахетаббасса абха̄вато ‘‘мама’’нти гахетаббасса ча абха̄вам̣ дассети. тена чатуккот̣ика̄ сун̃н̃ата̄ пака̄сита̄ хоти.

анупуббавиха̄ри таттха соти евам̣ тӣсупи ка̄лесу аттаттанийам̣ сун̃н̃атам̣ таттха сан̇кха̄рагате анупассанто ануккамена удайаббайан̃а̄н̣а̄дивипассана̄н̃а̄н̣есу уппаджджама̄несу анупуббавипассана̄виха̄равасена анупуббавиха̄рӣ сама̄но. ка̄ленева таре висаттиканти со евам̣ випассанам̣ маттхакам̣ па̄петва̄ т̣хито йога̄вачаро индрийа̄нам̣ парипа̄кагатака̄лена вут̣т̣ха̄нага̄минийа̄ випассана̄йа маггена гхат̣итака̄лена арийамаггасса уппаттика̄лена сакаласса бхаваттайасса сам̣тананато висаттика̄сан̇кха̄там̣ тан̣хам̣ тареййа, витаритва̄ тасса̄ паратӣре тит̣т̣хеййа̄ти адхиппа̄йо.

ити бхагава̄ ан̃н̃а̄падесена а̄йасмато маха̄качча̄насса арахаттуппаттидӣпанам̣ уда̄нам̣ уда̄неси.

ат̣т̣хамасуттаван̣н̣ана̄ нит̣т̣хита̄.