7. папан̃чакхайасуттаван̣н̣ана̄

67. саттаме папан̃часан̃н̃а̄сан̇кха̄паха̄нанти папан̃ченти йаттха сайам̣ уппанна̄, там̣ санта̄нам̣ виттха̄ренти чирам̣ т̣хапентӣти папан̃ча̄, килеса̄. висесато ра̄гадосамохатан̣ха̄дит̣т̣хима̄на̄. татха̄ хи вуттам̣ –

‘‘ра̄го папан̃чо, досо папан̃чо, мохо папан̃чо, тан̣ха̄ папан̃чо, дит̣т̣хи папан̃чо, ма̄но папан̃чо’’ти. –

апича сам̣килесат̣т̣хо папан̃чат̣т̣хо, качаварат̣т̣хо папан̃чат̣т̣хо. таттха ра̄гапапан̃часса субхасан̃н̃а̄ нимиттам̣, досапапан̃часса а̄гха̄таваттху, мохапапан̃часса а̄сава̄, тан̣ха̄папан̃часса ведана̄, дит̣т̣хипапан̃часса сан̃н̃а̄, ма̄напапан̃часса витакко нимиттам̣. техи папан̃чехи сахагата̄ сан̃н̃а̄ папан̃часан̃н̃а̄. папан̃часан̃н̃а̄нам̣ сан̇кха̄ бха̄га̄ кот̣т̣ха̄са̄ папан̃часан̃н̃а̄сан̇кха̄. аттхато саддхим̣ нимиттехи там̣там̣папан̃часса паккхийо килесаган̣о. сан̃н̃а̄гахан̣ан̃четтха тасса несам̣ са̄дха̄ран̣ахетубха̄вена. вуттан̃хетам̣ – ‘‘сан̃н̃а̄нида̄на̄ хи папан̃часан̇кха̄’’ти (су. ни. 880). тесам̣ паха̄нам̣, тена тена маггена ра̄га̄дикилеса̄нам̣ самуччхедананти аттхо.

тада̄ хи бхагава̄ атӣта̄су анекакот̣исатасахассасан̇кха̄су аттано джа̄тӣсу анаттхасса нимиттабхӯте килесе имасмим̣ чаримабхаве арийамаггена бодхиман̣д̣е сава̄сане пахӣне паччавеккхитва̄ саттасанта̄нан̃ча килесачаритам̣ ра̄га̄дикилесасам̣килит̣т̣хам̣ кан̃джийапун̣н̣ала̄бум̣ вийа таккабхаритача̄т̣им̣ вийа васа̄пӣтапилотикам̣ вийа ча дуббинимочийам̣ дисва̄ ‘‘евам̣ гаханам̣ на̄мидам̣ килесават̣т̣ам̣ ана̄дика̄лабха̄витам̣ майхам̣ анавасесам̣ пахӣнам̣, ахо суппахӣна’’нти уппаннапӣтипа̄моджджо уда̄нам̣ уда̄неси. тена вуттам̣ – ‘‘атха кхо бхагава̄ аттано папан̃часан̃н̃а̄сан̇кха̄паха̄нам̣ видитва̄ та̄йам̣ вела̄йам̣ имам̣ уда̄нам̣ уда̄несӣ’’ти.

таттха йасса папан̃ча̄ т̣хити ча наттхӣти йасма̄ бхагава̄ атта̄намева парам̣ вийа катва̄ ниддисати тасма̄ йасса аггапуггаласса вутталаккхан̣а̄ папан̃ча̄, техи ката̄ сам̣са̄ре т̣хити ча наттхи. неттийам̣ пана ‘‘т̣хити на̄ма анусайо’’ти (нетти. 27) вуттам̣. анусайо хи бхавапаваттийа̄ мӯланти. сатте сам̣са̄ре папан̃чентӣти папан̃ча̄. ‘‘папан̃чат̣т̣хитӣ’’ти ча па̄т̣хо. тассаттхо – папан̃ча̄нам̣ т̣хити виджджама̄ната̄ маггена асамуччхедо папан̃чат̣т̣хити, папан̃ча̄ ева ва̄ авасит̣т̣хакусала̄кусалавипа̄ка̄нам̣ паваттийа̄ хетубха̄вато ват̣т̣асса т̣хити папан̃чат̣т̣хити, са̄ йасса аггапуггаласса наттхи. санда̄нам̣ палигхан̃ча вӣтиваттоти йо бандханат̣т̣хена санта̄насадисатта̄ ‘‘санда̄на’’нти ладдхана̄ма̄ тан̣ха̄дит̣т̣хийо, нибба̄нанагарапавесаниседханато палигхасадисатта̄ палигхасан̇кха̄там̣ авиджджан̃ча вӣтиватто сава̄санапаха̄нена висесато атикканто. апаре пана кодхам̣ ‘‘санда̄на’’нти ваданти, там̣ на гахетаббам̣. со хи ‘‘пара̄бхисаджджанӣ’’ти вуттоти.

там̣ ниттан̣хам̣ муним̣ чарантанти там̣ саббатха̄пи тан̣ха̄бха̄вена ниттан̣хам̣, убхайалокамунанато аттахитапарахитамунанато ча муним̣, екантенева саббасаттахитаттхам̣ чатӯхи ирийа̄патхехи на̄на̄сама̄паттича̄рехи анан̃н̃аса̄дха̄ран̣ена н̃а̄н̣ача̄рена ча чарантам̣. на̄ваджа̄на̄ти садевакопи локоти саббо сапан̃н̃аджа̄тико сатталоко садевакопи сабрахмакопи на када̄чипи аваджа̄на̄ти на парибхоти, атха кхо айамева локе агго сет̣т̣хо уттамо павароти гарум̣ каронто саккаччам̣ пӯджа̄сакка̄ранирато хотӣти.

саттамасуттаван̣н̣ана̄ нит̣т̣хита̄.