5. апаралакун̣д̣акабхаддийасуттаван̣н̣ана̄

65. пан̃чаме самбахула̄нам̣ бхиккхӯнам̣ пит̣т̣хито пит̣т̣хитоти а̄йасма̄ лакун̣д̣акабхаддийо екадивасам̣ самбахулехи бхиккхӯхи саддхим̣ га̄мантарена пин̣д̣а̄йа чаритва̄ катабхаттакиччо паттам̣ водакам̣ катва̄ тхавика̄йа паккхипитва̄ ам̣се лаггетва̄ чӣварам̣ сан̇гхаритва̄ тампи ва̄мам̣се т̣хапетва̄ па̄са̄дикена абхиккантена пат̣иккантена а̄локитена вилокитена самин̃джитена паса̄ритена оккхиттачаккху ирийа̄патхасампанно аттано сатипан̃н̃а̄вепуллам̣ пака̄сенто вийа сатисампаджан̃н̃ам̣ сӯпат̣т̣хитам̣ катва̄ сама̄хитена читтена паде падам̣ никкхипанто гаччхати, гаччханто ча бхиккхӯнам̣ паччхато паччхато гаччхати техи бхиккхӯхи асам̣миссо. касма̄? асам̣сат̣т̣хавиха̄рита̄йа. апича тасса̄йасмато рӯпам̣ парибхӯтам̣ парибхават̣т̣ха̄нӣйам̣ путхуджджана̄ охӣл̣енти. тхеро там̣ джа̄нитва̄ пит̣т̣хито пит̣т̣хито гаччхати ‘‘ма̄ име мам̣ нисса̄йа апун̃н̃ам̣ пасавим̣сӯ’’ти. евам̣ те бхиккхӯ ча тхеро ча са̄ваттхим̣ патва̄ виха̄рам̣ пависитва̄ йена бхагава̄ тенупасан̇каманти. тена вуттам̣ – ‘‘тена кхо пана самайена а̄йасма̄ лакун̣д̣акабхаддийо’’тиа̄ди.

таттха дуббан̣н̣анти вирӯпам̣. тенасса ван̣н̣асампаттийа̄ сан̣т̣ха̄насампаттийа̄ ча абха̄вам̣ дассети. дуддасиканти апа̄са̄дикадассанам̣. тенасса анубйан̃джанасампаттийа̄ а̄ка̄расампаттийа̄ ча абха̄вам̣ дассети. окот̣имаканти рассам̣. имина̄ а̄рохасампаттийа̄ абха̄вам̣ дассети. йебхуййена бхиккхӯнам̣ парибхӯтарӯпанти путхуджджанабхиккхӯхи охӣл̣итарӯпам̣. путхуджджана̄ екачче чхаббаггийа̄дайо тасса̄йасмато гун̣ам̣ аджа̄нанта̄ хаттхакан̣н̣ачӯл̣ика̄дӣсу ган̣ханта̄ пара̄масанта̄ кӣл̣анта̄ парибхаванти, на арийа̄, калйа̄н̣апутхуджджана̄ ва̄.

бхиккхӯ а̄мантесӣти касма̄ а̄мантеси? тхерасса гун̣ам̣ пака̄сетум̣. евам̣ кира бхагавато ахоси ‘‘име бхиккхӯ мама путтасса маха̄нубха̄ватам̣ на джа̄нанти, тена там̣ парибхаванти, там̣ несам̣ дӣгхараттам̣ ахита̄йа дуккха̄йа бхависсати, ханда̄хам̣ имасса гун̣е бхиккхӯнам̣ пака̄сетва̄ парибхавато нам̣ мочесса̄мӣ’’ти.

пассатха ноти пассатха ну. на ча са̄ сама̄патти сулабхарӯпа̄, йа̄ тена бхиккхуна̄ асама̄паннапубба̄ти рӯпасама̄патти арӯпасама̄патти брахмавиха̄расама̄патти ниродхасама̄патти пхаласама̄паттӣти евам̣ пабхеда̄ са̄вакаса̄дха̄ран̣а̄ йа̄ ка̄чи сама̄паттийо на̄ма, та̄су ека̄пи сама̄патти на сулабхарӯпа̄, дуллабха̄, наттхийева са̄ тена лакун̣д̣акабхаддийена бхиккхуна̄ асама̄паннапубба̄. етенасса йам̣ вуттам̣. ‘‘махиддхико маха̄нубха̄во’’ти, таттха махиддхикатам̣ пака̄сетва̄ ида̄ни маха̄нубха̄ватам̣ дассетум̣ ‘‘йасса чаттха̄йа̄’’тиа̄дима̄ха. там̣ хет̣т̣ха̄ вуттанайамева. еттха ча бхагава̄ ‘‘есо, бхиккхаве, бхиккхӯ’’тиа̄дина̄, ‘‘бхиккхаве, айам̣ бхиккху на йо ва̄ со ва̄ дуббан̣н̣о дуддасико окот̣имакоти бхиккхӯнам̣ пит̣т̣хито пит̣т̣хито а̄гаччхатӣти ча еттакена на он̃н̃а̄таббо, атха кхо махиддхико маха̄нубха̄во, йам̣кин̃чи са̄вакена паттаббам̣, саббам̣ там̣ тена ануппаттам̣, тасма̄ там̣ па̄са̄н̣аччхаттам̣ вийа гарум̣ катва̄ олокетха, там̣ во дӣгхараттам̣ хита̄йа сукха̄йа бхависсатӣ’’ти дассети.

етаматтхам̣ видитва̄ти етам̣ а̄йасмато лакун̣д̣акабхаддийасса махиддхиката̄маха̄нубха̄вата̄дибхедам̣ гун̣ара̄сим̣ сабба̄ка̄рато джа̄нитва̄ тадаттхадӣпанам̣ имам̣ уда̄нам̣ уда̄неси.

таттха нелан̇готи елам̣ вуччати досо, на̄сса еланти нелам̣. ким̣ пана там̣? супарисуддхасӣлам̣. тан̃хи ниддосат̣т̣хена идха ‘‘нела’’нти адхиппетам̣. там̣ нелам̣ падха̄набхӯтам̣ ан̇гам̣ етасса̄ти нелан̇го. со йам̣ ‘‘ратхо’’ти ваккхати, тена самбандхо, тасма̄ супарисуддхасӣлан̇готи аттхо. арахаттапхаласӣлан̃хи идха̄дхиппетам̣. сето паччха̄до етасса̄ти сетапаччха̄до. паччха̄доти ратхасса упари аттхаритаббакамбала̄ди. со пана супарисуддхадхавалабха̄вена сето ва̄ хоти раттанӣла̄дӣсу ва̄ ан̃н̃атаро. идха пана арахаттапхалавимуттийа̄ адхиппетатта̄ супарисуддхабха̄вам̣ упа̄да̄йа ‘‘сетапаччха̄до’’ти вуттам̣ йатха̄ ан̃н̃атра̄пи ‘‘ратхо сӣлапариккха̄ро’’ти. еко сатисан̇кха̄то аро етасса̄ти ека̄ро. ваттатӣти паваттати. ратхоти тхерасса аттабха̄вам̣ сандха̄йа вадати.

анӣгханти ниддуккхам̣, кхобхавирахитам̣ йа̄нам̣ вийа килесапарикхобхавирахитанти аттхо. а̄йантанти самбахула̄нам̣ бхиккхӯнам̣ пит̣т̣хито пит̣т̣хито а̄гаччхантам̣. чхиннасотанти паччхиннасотам̣. пакатиратхасса хи сукхапаваттанаттхам̣ аккхасӣсесу на̄бхийан̃ча упалитта̄нам̣ саппитела̄дӣнам̣ сото саванам̣ санданам̣ хоти, тена со аччхиннасото на̄ма хоти. айам̣ пана чхаттим̣сатийа̄ сота̄нам̣ анавасесато пахӣнатта̄ чхиннасото на̄ма хоти, там̣ чхиннасотам̣. наттхи етасса бандхананти абандхано. ратхӯпаттхарасса хи аккхена саддхим̣ ниччалабха̄вакаран̣аттхам̣ бахӯни бандхана̄ни хонти, тена со сабандхано. айам̣ пана саббасам̣йоджанабандхана̄нам̣ анавасесато париккхӣн̣атта̄ абандхано, там̣ абандханам̣. пасса̄ти бхагава̄ тхерасса гун̣ехи соманассаппатто хутва̄ атта̄нам̣ вадати.

ити саттха̄ а̄йасмантам̣ лакун̣д̣акабхаддийам̣ арахаттапхаласӣсена сучаккам̣, арахаттапхалавимуттийа̄ сууттараччхадам̣, сӯпат̣т̣хита̄йа сатийа̄ сва̄рам̣, килесапарикхобха̄бха̄вена апарикхобхам̣, тан̣хӯпалепа̄бха̄вена анупалепам̣, сам̣йоджана̄дӣнам̣ абха̄вена абандханам̣ супариккхиттам̣ суйуттам̣ а̄джан̃н̃аратхам̣ катва̄ дассети.

пан̃чамасуттаван̣н̣ана̄ нит̣т̣хита̄.