10. чӯл̣апантхакасуттаван̣н̣ана̄

50. дасаме чӯл̣апантхакоти маха̄пантхакаттхерасса канит̣т̣хабха̄тикатта̄ пантхе джа̄татта̄ ча дахарака̄ле ладдхавоха̄рена апарабха̄гепи айама̄йасма̄ ‘‘чӯл̣апантхако’’твева пан̃н̃а̄йиттха. гун̣ависесехи пана чхал̣абхин̃н̃о пабхиннапат̣исамбхидо ‘‘етадаггам̣, бхиккхаве, мама са̄вака̄нам̣ бхиккхӯнам̣ маномайам̣ ка̄йам̣ абхинимминанта̄нам̣ йадидам̣ чӯл̣апантхако, четовиват̣т̣акусала̄нам̣ йадидам̣ чӯл̣апантхако’’ти двӣсу (а. ни. 1.199) т̣ха̄несу бхагавата̄ етадагге т̣хапито асӣтийа̄ маха̄са̄вакесу аббхантаро.

со екадивасам̣ паччха̄бхаттам̣ пин̣д̣апа̄таппат̣икканто аттано дива̄т̣т̣ха̄не дива̄виха̄рам̣ нисинно сама̄паттӣхи дивасабха̄гам̣ вӣтина̄метва̄ са̄йанхасамайам̣ упа̄сакесу дхаммассаванаттхам̣ ана̄гатесу ева виха̄рамаджджхам̣ пависитва̄ бхагавати гандхакут̣ийам̣ нисинне ‘‘ака̄ло та̄ва бхагавато упат̣т̣ха̄нам̣ упасан̇камиту’’нти гандхакут̣ипамукхе екамантам̣ нисӣди паллан̇кам̣ а̄бхуджитва̄. тена вуттам̣ – ‘‘тена кхо пана самайена а̄йасма̄ чӯл̣апантхако бхагавато авидӯре нисинно хоти паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄’’ти. со хи тада̄ ка̄лапариччхедам̣ катва̄ сама̄паттим̣ сама̄паджджитва̄ нисӣди.

етаматтхам̣ видитва̄ти етам̣ а̄йасмато чӯл̣апантхакасса ка̄йачитта̄нам̣ самма̄пан̣ихитабха̄васан̇кха̄там̣ аттхам̣ джа̄нитва̄. имам̣ уда̄нанти ан̃н̃опи йо пассаддхака̄йо саббирийа̄патхесу упат̣т̣хитассати сама̄хито, тасса бхиккхуно анупа̄да̄ паринибба̄напарийоса̄насса висеса̄дхигамасса таттха па̄тубха̄вавибха̄ванам̣ имам̣ уда̄нам̣ уда̄неси.

таттха т̣хитена ка̄йена̄ти ка̄йадва̄рикасса асам̣варасса паха̄нена акаран̣ена самма̄ т̣хапитена чопанака̄йена, татха̄ чаккха̄дӣнам̣ индрийа̄нам̣ ниббисеванабха̄вакаран̣ена сут̣т̣ху т̣хапитена пан̃чадва̄рикака̄йена, сам̣йатахаттхапа̄дата̄йа хаттхакуккучча̄дӣнам̣ абха̄вато апарипханданена т̣хитена караджака̄йена ча̄ти сан̇кхепато саббенапи ка̄йена ниббика̄рата̄сан̇кха̄тена ниччалабха̄вена т̣хитена. етенасса сӣлапа̄рисуддхи дассита̄. иттхамбхӯталаккхан̣е ча идам̣ каран̣авачанам̣. т̣хитена четаса̄ти читтасса т̣хитипаридӣпанена сама̄дхисампадам̣ дассети. сама̄дхи хи читтасса ‘т̣хитӣ’ти вуччати. тасма̄ саматхавасена випассана̄васенева ва̄ екаггата̄йа сати читтам̣ а̄рамман̣е екодибха̄вӯпагаманена т̣хитам̣ на̄ма хоти, на ан̃н̃атха̄. идан̃ча йатха̄вуттака̄йачитта̄нам̣ т̣хапанам̣ сама̄даханам̣ саббасмим̣ ка̄ле саббесу ча ирийа̄патхесу иччхитаббанти дассенто а̄ха – ‘‘тит̣т̣хам̣ нисинно уда ва̄ сайа̄но’’ти. таттха ва̄-саддо анийаматтхо. тена тит̣т̣ханто ва̄ нисинно ва̄ сайа̄но ва̄ тадан̃н̃ирийа̄патхо ва̄ти айаматтхо дӣпито хотӣти чан̇каманасса̄пи идха сан̇гахо ведитаббо.

етам̣ сатим̣ бхиккху адхит̣т̣хаха̄ноти йа̄йа пагева парисуддхасама̄ча̄ро ка̄йачиттадут̣т̣хуллабха̄вӯпасаманена ка̄йам̣ читтан̃ча аса̄раддхам̣ катва̄ пат̣иладдха̄йа анаваджджасукха̄дхит̣т̣ха̄йа ка̄йачиттапассаддхивасена читтам̣ лахум̣ мудум̣ камман̃н̃ан̃ча катва̄ самма̄ т̣хапенто сама̄даханто каммат̣т̣ха̄нам̣ парибрӯхети маттхакан̃ча па̄пети, там̣ ева каммат̣т̣ха̄на̄нуйогасса а̄димаджджхапарийоса̄несу бахӯпака̄рам̣ сатим̣ бхиккху адхит̣т̣хаха̄но сӣлависодханам̣ а̄дим̣ катва̄ йа̄ва висеса̄дхигама̄ таттха таттха адхит̣т̣хахантоти аттхо. лабхетха пубба̄парийам̣ висесанти со евам̣ сатиа̄раккхена четаса̄ каммат̣т̣ха̄нам̣ упарӯпари вад̣д̣хенто брӯхенто пха̄тим̣ каронто пубба̄парийам̣ пубба̄парийавантам̣ пубба̄парабха̄гена паваттам̣ ул̣а̄рул̣а̄ратара̄дибхедависесам̣ лабхеййа.

таттха дувидхо пубба̄парийависесо саматхавасена випассана̄васена ча̄ти. тесу саматхавасена та̄ва нимиттуппаттито пат̣т̣ха̄йа йа̄ва невасан̃н̃а̄на̄сан̃н̃а̄йатанавасӣбха̄во, та̄ва паватто бха̄вана̄висесо пубба̄парийависесо. випассана̄васена пана рӯпамукхена абхинивисантасса рӯпадхаммапариггахато, итарасса на̄мадхаммапариггахато пат̣т̣ха̄йа йа̄ва арахатта̄дхигамо, та̄ва паватто бха̄вана̄висесо пубба̄парийависесо. айамева ча идха̄дхиппето.

ладдха̄на пубба̄парийам̣ висесанти пубба̄парийависесам̣ уккам̣сапа̄рамиппаттам̣ арахаттам̣ лабхитва̄. адассанам̣ маччура̄джасса гаччхети джӣвитупаччхедавасена саббесам̣ сатта̄нам̣ абхибхаванато маччура̄джасан̇кха̄тасса маран̣асса висайабхӯтам̣ бхаваттайам̣ саматиккантатта̄ адассанам̣ агочарам̣ гаччхеййа. имасмим̣ вагге йам̣ авуттам̣, там̣ хет̣т̣ха̄ вуттанайамева̄ти.

дасамасуттаван̣н̣ана̄ нит̣т̣хита̄.

нит̣т̣хита̄ ча маха̄ваггаван̣н̣ана̄.