4. са̄рипуттасуттаван̣н̣ана̄

24. чатуттхе паримукхам̣ сатим̣ упат̣т̣хапетва̄ти а̄рамман̣а̄бхимукхам̣ сатим̣ т̣хапайитва̄ мукхасамӣпе катва̄. татха̄ хи вибхан̇ге вуттам̣ –

‘‘айам̣ сати упат̣т̣хита̄ хоти супат̣т̣хита̄ на̄сикагге ва̄ мукханимитте ва̄, тена вуччати паримукхам̣ сатим̣ упат̣т̣хапетва̄’’ти (вибха. 537).

атха ва̄ ‘‘парӣти париггахат̣т̣хо, мукханти ниййа̄нат̣т̣хо, сатӣти упат̣т̣ха̄нат̣т̣хо, тена вуччати ‘паримукхам̣ сати’’’нти. евам̣ пат̣исамбхида̄йам̣ (пат̣и. ма. 1.164) вуттанайенапеттха аттхо ведитаббо. татра̄йам̣ сан̇кхепаттхо – париггахитаниййа̄насатим̣ катва̄ти. ниййа̄нанти ча сатийа̄ ога̄хитаббам̣ а̄рамман̣ам̣ дат̣т̣хаббам̣. еттха ча пуримо паччхимо ча аттхо саббасан̇га̄хакавасена, итаро сама̄паттийа̄ пуббабха̄гасаманна̄ха̄равасена дат̣т̣хаббо. сатӣти ва̄ сатисӣсена джха̄нам̣ вуттам̣ ‘‘йе ка̄йагата̄сатим̣ парибхун̃джантӣ’’тиа̄дӣсу (а. ни. 1.600) вийа. катамам̣ пана там̣ джха̄нанти? рӯпа̄вачарачатуттхаджджха̄нам̣ па̄дакам̣ катва̄ сама̄паннам̣ арахаттапхаладжджха̄нам̣. катхам̣ панетам̣ джа̄нитаббанти? а̄нен̃джасама̄дхийогена тхерасса сависесам̣ ниччалабха̄вам̣ кеначи акампанӣйатан̃ча паббатопама̄йа пака̄сенто бхагава̄ имам̣ уда̄нам̣ абха̄сӣти га̄тха̄йа ева айаматтхо вин̃н̃а̄йати. на ча̄йам̣ нисаджджа̄ тхерасса саччаппат̣иведха̄йа, атха кхо дит̣т̣хадхаммасукхавиха̄ра̄йа. пуббейева хи сӯкаракхатален̣е (ма. ни. 2.201) аттано бха̄гинеййасса дӣгханакхапарибба̄джакасса бхагавати дхаммам̣ десенте айам̣ маха̄тхеро саччаппат̣иведхакиччам̣ маттхакам̣ па̄песӣти.

етаматтханти етам̣ тхерасса а̄нен̃джасама̄дхийогена та̄дибха̄ваппаттийа̄ ча кеначи акампанӣйата̄сан̇кха̄там̣ аттхам̣ сабба̄ка̄рато видитва̄ тадаттхавибха̄ванам̣ имам̣ уда̄нам̣ уда̄неси.

таттха йатха̄пи паббато селоти йатха̄ сила̄майо екаггханасила̄паббато, на пам̣супаббато на миссакапаббатоти аттхо. ачало суппатит̣т̣хитоти суппатит̣т̣хитамӯло пакатива̄техи ачало акампанӣйо хоти. евам̣ мохаккхайа̄ бхиккху, паббатова на ведхатӣти мохасса анавасесаппаха̄на̄ мохамӯлакатта̄ ча сабба̄кусала̄нам̣ пахӣнасабба̄кусало бхиккху, йатха̄ со паббато пакатива̄техи, евам̣ локадхаммехи на ведхати на кампати. мохаккхайоти ва̄ йасма̄ нибба̄нам̣ арахаттан̃ча вуччати, тасма̄ мохаккхайасса хету нибба̄насса арахаттасса ва̄ адхигататта̄ чатӯсу арийасаччесу суппатит̣т̣хито асама̄паннака̄лепи йатха̄вуттапаббато вийа на кеначи ведхати, пагева сама̄паннака̄лети адхиппа̄йо.

чатуттхасуттаван̣н̣ана̄ нит̣т̣хита̄.