4. ад̣д̣хака̄ситхерӣга̄тха̄ван̣н̣ана̄

йа̄ва ка̄сиджанападотиа̄дика̄ ад̣д̣хака̄сийа̄ тхерийа̄ га̄тха̄. айам̣ кира кассапасса дасабаласса ка̄ле кулагехе ниббаттитва̄ вин̃н̃утам̣ патва̄ бхиккхунӣнам̣ сантикам̣ гантва̄ дхаммам̣ сутва̄ пат̣иладдхасаддха̄ паббаджитва̄ бхиккхунисӣле т̣хитам̣ ан̃н̃атарам̣ пат̣исамбхида̄ппаттам̣ кхӣн̣а̄саваттхерим̣ ган̣ика̄ва̄дена аккоситва̄, тато чута̄ нирайе паччитва̄ имасмим̣ буддхуппа̄де ка̄сикарат̣т̣хе ул̣а̄равибхаве сет̣т̣хикуле ниббаттитва̄ вуддхиппатта̄ пуббе катасса вачӣдуччаритасса ниссандена т̣ха̄нато парибхат̣т̣ха̄ ган̣ика̄ ахоси. на̄мена ад̣д̣хака̄сӣ на̄ма. тасса̄ паббаджджа̄ ча дӯтена упасампада̄ ча кхандхаке а̄гата̄йева. вуттан̃хетам̣ –

тена кхо пана самайена ад̣д̣хака̄сӣ ган̣ика̄ бхиккхунӣсу паббаджита̄ хоти. са̄ ча са̄ваттхим̣ гантука̄ма̄ хоти ‘‘бхагавато сантике упасампаджджисса̄мӣ’’ти. ассосум̣ кхо дхутта̄ – ‘‘ад̣д̣хака̄сӣ кира ган̣ика̄ са̄ваттхим̣ гантука̄ма̄’’ти. те магге парийут̣т̣хим̣су. ассоси кхо ад̣д̣хака̄сӣ ган̣ика̄ ‘‘дхутта̄ кира магге парийут̣т̣хита̄’’ти. бхагавато сантике дӯтам̣ па̄хеси – ‘‘ахан̃хи упасампаджджитука̄ма̄, катхам̣ ну кхо майа̄ пат̣ипаджджитабба’’нти? атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, дӯтенапи упасампа̄дету’’нти (чӯл̣ава. 430).

евам̣ ладдхӯпасампада̄ пана випассана̄йа каммам̣ каронтӣ на чирассева саха пат̣исамбхида̄хи арахаттам̣ па̄пун̣и. тена вуттам̣ апада̄не (апа. тхерӣ 2.4.168-183) –

‘‘имамхи бхаддаке каппе, брахмабандху маха̄йасо;

кассапо на̄ма готтена, уппаджджи вадатам̣ варо.

‘‘тада̄хам̣ паббаджитва̄на, тасса буддхасса са̄сане;

сам̣вута̄ па̄тимоккхамхи, индрийесу ча пан̃часу.

‘‘маттан̃н̃унӣ ча асане, йутта̄ джа̄гарийепи ча;

васантӣ йуттайога̄хам̣, бхиккхуним̣ вигата̄савам̣.

‘‘аккосим̣ дут̣т̣хачитта̄хам̣, ган̣икети бхан̣им̣ тада̄;

тена па̄пена каммена, нирайамхи апаччисам̣.

‘‘тена камма̄васесена, аджа̄йим̣ ган̣ика̄куле;

бахусова пара̄дхӣна̄, паччхима̄йа ча джа̄тийам̣.

‘‘ка̄сӣсу сет̣т̣хикуладжа̄, брахмача̄рӣбаленахам̣;

аччхара̄ вийа девесу, ахосим̣ рӯпасампада̄.

‘‘дисва̄на дассанӣйам̣ мам̣, гириббаджапуруттаме;

ган̣икатте нивесесум̣, аккосанабалена ме.

‘‘са̄хам̣ сутва̄на саддхаммам̣, буддхасет̣т̣хена деситам̣;

пуббава̄санасампанна̄, паббаджим̣ анага̄рийам̣.

‘‘тадӯпасампадаттха̄йа, гаччхантӣ джинасантикам̣;

магге дхутте т̣хите сутва̄, лабхим̣ дӯтопасампадам̣.

‘‘саббакаммам̣ париккхӣн̣ам̣, пун̃н̃ам̣ па̄пам̣ татхева ча;

саббасам̣са̄рамуттин̣н̣а̄, ган̣икаттан̃ча кхепитам̣.

‘‘иддхӣсу ча васӣ хоми, дибба̄йа сотадха̄туйа̄;

четопарийан̃а̄н̣асса, васӣ хоми маха̄муне.

‘‘пуббенива̄сам̣ джа̄на̄ми, диббачаккху висодхитам̣;

сабба̄савапариккхӣн̣а̄, наттхи да̄ни пунаббхаво.

‘‘аттхадхамманируттӣсу, пат̣ибха̄не татхева ча;

н̃а̄н̣ам̣ мама маха̄вӣра, уппаннам̣ тава сантике.

‘‘килеса̄ джха̄пита̄ майхам̣…пе… катам̣ буддхасса са̄сана’’нти. (апа. тхерӣ 2.4.168-183);

арахаттам̣ пана патва̄ уда̄навасена –

25. ‘‘йа̄ва ка̄сиджанападо, сун̇ко ме таттако аху;

там̣ катва̄ негамо аггхам̣, ад̣д̣хенаггхам̣ т̣хапеси мам̣.

26. ‘‘атха ниббиндахам̣ рӯпе, ниббиндан̃ча вираджджахам̣;

ма̄ пуна джа̄тисам̣са̄рам̣, сандха̄веййам̣ пунаппунам̣;

тиссо виджджа̄ саччхиката̄, катам̣ буддхасса са̄сана’’нти. –

има̄ га̄тха̄ абха̄си.

таттха йа̄ва ка̄сиджанападо, сун̇ко ме таттако ахӯти ка̄сӣсу джанападесу бхаво сун̇ко ка̄сиджанападо, со йа̄ва йаттако, таттако майхам̣ сун̇ко аху ахоси. киттако пана соти? сахассаматто. ка̄сират̣т̣хе кира тада̄ сун̇кавасена екадивасам̣ ран̃н̃о уппаджджанакаа̄йо ахоси сахассаматто, има̄йапи пуриса̄нам̣ хаттхато екадивасам̣ ладдхадханам̣ таттакам̣. тена вуттам̣ – ‘‘йа̄ва ка̄сиджанападо, сун̇ко ме таттако ахӯ’’ти. са̄ пана ка̄сисун̇капарима̄н̣ата̄йа ка̄сӣти саман̃н̃ам̣ лабхи. таттха йебхуййена манусса̄ сахассам̣ да̄тум̣ асакконта̄ тато упад̣д̣хам̣ датва̄ дивасабха̄гамева рамитва̄ гаччханти, тесам̣ васена̄йам̣ ад̣д̣хака̄сӣти пан̃н̃а̄йиттха. тена вуттам̣ – ‘‘там̣ катва̄ негамо аггхам̣, ад̣д̣хенаггхам̣ т̣хапеси ма’’нти. там̣ пан̃часатаматтам̣ дханам̣ аггхам̣ катва̄ негамо нигамава̄сиджано иттхиратанабха̄вена анаггхампи сама̄нам̣ ад̣д̣хена аггхам̣ нимиттам̣ ад̣д̣хака̄сӣти саман̃н̃а̄васена мам̣ т̣хапеси, татха̄ мам̣ вохарӣти аттхо.

атха ниббиндахам̣ рӯпети евам̣ рӯпӯпаджӣвинӣ хутва̄ т̣хита̄. атха паччха̄ са̄санам̣ нисса̄йа рӯпе ахам̣ ниббиндим̣ ‘‘итипи рӯпам̣ аниччам̣, итипидам̣ рӯпам̣ дуккхам̣, асубха’’нти пассантӣ таттха уккан̣т̣хим̣. ниббиндан̃ча вираджджаханти ниббиндантӣ ча̄хам̣ тато парам̣ вира̄гам̣ а̄паджджим̣. ниббиндаггахан̣ена четтха тарун̣авипассанам̣ дассети, вира̄гаггахан̣ена балававипассанам̣. ‘‘ниббинданто вираджджати вира̄га̄ вимуччатӣ’’ти хи вуттам̣. ма̄ пуна джа̄тисам̣са̄рам̣, сандха̄веййам̣ пунаппунанти имина̄ ниббинданавираджджана̄ка̄ре нидассети. тиссо виджджа̄тиа̄дина̄ тесам̣ маттхакаппаттим̣, там̣ вуттанайамева.

ад̣д̣хака̄ситхерӣга̄тха̄ван̣н̣ана̄ нит̣т̣хита̄.