1. абхирӯпананда̄тхерӣга̄тха̄ван̣н̣ана̄

дуканипа̄те а̄турам̣ асучим̣ пӯтинтиа̄дика̄ абхирӯпананда̄йа сиккхама̄на̄йа га̄тха̄. айам̣ кира випассисса бхагавато ка̄ле бандхуматӣнагаре гахапатимаха̄са̄ласса дхӣта̄ хутва̄ саттху сантике дхаммам̣ сутва̄ саран̣есу ча сӣлесу ча патит̣т̣хита̄ саттхари париниббуте дха̄тучетийам̣ ратанапат̣иман̣д̣итена суван̣н̣аччхаттена пӯджам̣ катва̄, ка̄лан̇катва̄ сагге ниббаттитва̄ апара̄парам̣ сугатӣсуйева сам̣сарантӣ имасмим̣ буддхуппа̄де капилаваттхунагаре кхемакасса саккасса аггамахесийа̄ куччхисмим̣ ниббатти. нанда̄тисса̄ на̄мам̣ ахоси. са̄ аттабха̄васса ативийа рӯпасобхаггаппаттийа̄ абхирӯпа̄ дассанӣйа̄ па̄са̄дика̄ абхирӯпананда̄твева пан̃н̃а̄йиттха. тасса̄ вайаппатта̄йа ва̄реййадивасейева варабхӯто сакйакума̄ро ка̄ламака̄си. атха нам̣ ма̄та̄питаро ака̄мам̣ пабба̄джесум̣.

са̄ паббаджитва̄пи рӯпам̣ нисса̄йа уппаннамада̄ ‘‘саттха̄ рӯпам̣ виван̣н̣ети гарахати анекапарийа̄йена рӯпе а̄дӣнавам̣ дассетӣ’’ти буддхупат̣т̣ха̄нам̣ на гаччхати. бхагава̄ тасса̄ н̃а̄н̣апарипа̄кам̣ н̃атва̄ маха̄паджа̄патим̣ а̄н̣а̄песи ‘‘сабба̄пи бхиккхунийо пат̣ипа̄т̣ийа̄ ова̄дам̣ а̄гаччхантӯ’’ти. са̄ аттано ва̄ре сампатте ан̃н̃ам̣ песеси. бхагава̄ ‘‘ва̄ре сампатте аттана̄ва а̄гантаббам̣, на ан̃н̃а̄ песетабба̄’’ти а̄ха. са̄ саттху а̄н̣ам̣ лан̇гхитум̣ асакконтӣ бхиккхунӣхи саддхим̣ буддхупат̣т̣ха̄нам̣ агама̄си. бхагава̄ иддхийа̄ екам̣ абхирӯпам̣ иттхирӯпам̣ ма̄петва̄ пуна джара̄джин̣н̣ам̣ дассетва̄ сам̣вегам̣ уппа̄детва̄ –

19. ‘‘а̄турам̣ асучим̣ пӯтим̣, пасса нанде самуссайам̣;

асубха̄йа читтам̣ бха̄вехи, екаггам̣ сусама̄хитам̣.

20. ‘‘анимиттан̃ча бха̄вехи, ма̄на̄нусайамуджджаха;

тато ма̄на̄бхисамайа̄, упасанта̄ чариссасӣ’’ти. –

има̄ две га̄тха̄ абха̄си. та̄сам̣ аттхо хет̣т̣ха̄ вуттанайо ева. га̄тха̄парийоса̄не абхирӯпананда̄ арахаттам̣ па̄пун̣и. тена вуттам̣ апада̄не –

‘‘нагаре бандхуматийа̄, бандхума̄ на̄ма кхаттийо;

тасса ран̃н̃о ахум̣ бхарийа̄, екаджджхам̣ ча̄райа̄махам̣.

‘‘рахогата̄ нисӣдитва̄, евам̣ чинтесахам̣ тада̄;

а̄да̄йа гаманӣйан̃хи, кусалам̣ наттхи ме катам̣.

‘‘маха̄бхита̄пам̣ кат̣укам̣, гхорарӯпам̣ суда̄рун̣ам̣;

нирайам̣ нӯна гаччха̄ми, еттха ме наттхи сам̣сайо.

‘‘ева̄хам̣ чинтайитва̄на, пахам̣сетва̄на ма̄насам̣;

ра̄джа̄нам̣ упагантва̄на, идам̣ вачанамабравим̣.

‘‘иттхӣ на̄ма майам̣ дева, пуриса̄нугата̄ сада̄;

екам̣ ме саман̣ам̣ дехи, бходжайисса̄ми кхаттийа.

‘‘ада̄си ме маха̄ра̄джа̄, саман̣ам̣ бха̄витиндрийам̣;

тасса паттам̣ гахетва̄на, параманнена пӯрайим̣.

‘‘пӯрайитва̄ параманнам̣, сахассаггханакенахам̣;

ваттхайугена чха̄детва̄, ада̄сим̣ тут̣т̣хама̄наса̄.

‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

‘‘сахассам̣ девара̄джӯнам̣, махеситтамака̄райим̣;

сахассам̣ чаккаваттӣнам̣, махеситтамака̄райим̣.

‘‘падесараджджам̣ випулам̣, ган̣ана̄то асан̇кхийам̣;

на̄на̄видхам̣ бахум̣ пун̃н̃ам̣, тасса каммапхала̄ тато.

‘‘уппалассева ме ван̣н̣а̄, абхирӯпа̄ судассана̄;

иттхӣ саббан̇гасампанна̄, абхиджа̄та̄ джутиндхара̄.

‘‘паччхиме бхавасампатте, аджа̄йим̣ са̄кийе куле;

на̄рӣсахассапа̄моккха̄, суддходанасутассахам̣.

‘‘ниббиндитва̄ ага̄рехам̣, паббаджим̣ анага̄рийам̣;

саттамим̣ раттим̣ сампатва̄, чатусаччам̣ апа̄пун̣им̣.

‘‘чӣварапин̣д̣апа̄тан̃ча, паччайан̃ча сена̄санам̣;

париметум̣ на саккоми, пин̣д̣апа̄тассидам̣ пхалам̣.

‘‘йам̣ майхам̣ пуримам̣ каммам̣, кусалам̣ джанитам̣ муни;

туйхаттха̄йа маха̄вӣра, паричин̣н̣ам̣ бахум̣ майа̄.

‘‘екатим̣се ито каппе, йам̣ да̄намададим̣ тада̄;

дуггатим̣ на̄бхиджа̄на̄ми, пин̣д̣апа̄тассидам̣ пхалам̣.

‘‘дуве гатӣ паджа̄на̄ми, деваттам̣ атха ма̄нусам̣;

ан̃н̃ам̣ гатим̣ на джа̄на̄ми, пин̣д̣апа̄тассидам̣ пхалам̣.

‘‘учче куле паджа̄на̄ми, тайо са̄ле маха̄дхане;

ан̃н̃ам̣ кулам̣ на джа̄на̄ми, пин̣д̣апа̄тассидам̣ пхалам̣.

‘‘бхава̄бхаве сам̣саритва̄, суккамӯлена чодита̄;

амана̄пам̣ на пасса̄ми, соманассакатам̣ пхалам̣.

‘‘иддхӣсу ча васӣ хоми, дибба̄йа сотадха̄туйа̄;

четопарийан̃а̄н̣асса, васӣ хоми маха̄муне.

‘‘пуббенива̄сам̣ джа̄на̄ми, диббачаккху висодхитам̣;

сабба̄савапариккхӣн̣а̄, наттхи да̄ни пунаббхаво.

‘‘аттхадхамманируттӣсу, пат̣ибха̄не татхева ча;

н̃а̄н̣ам̣ мама маха̄вӣра, уппаннам̣ тава сантике.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ патва̄ пана са̄ сайампи уда̄навасена та̄йева га̄тха̄ абха̄си, идамева часса̄ ан̃н̃а̄бйа̄каран̣ам̣ ахосӣти.

абхирӯпананда̄тхерӣга̄тха̄ван̣н̣ана̄ нит̣т̣хита̄.