6. нитакаттхерага̄тха̄ван̣н̣ана̄

касса селӯпамам̣ читтанти а̄йасмато нитакаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни каронто випассисса бхагавато ка̄ле бандхуматӣнагаре а̄ра̄магопако хутва̄ джӣванто екадивасам̣ бхагавантам̣ а̄ка̄сена гаччхантам̣ дисва̄ пасаннама̄насо на̄л̣икерапхалам̣ да̄тука̄мо ахоси. саттха̄ там̣ анугган̣ханто а̄ка̄сейева т̣хатва̄ пат̣игган̣хи. со там̣ датва̄ ул̣а̄рам̣ пӣтисоманассам̣ пат̣исам̣веди. со тена пун̃н̃акаммена девамануссесу сам̣саранто имасмим̣ буддхуппа̄де косаларат̣т̣хе бра̄хман̣акуле ниббаттитва̄ нитакоти ладдхана̄мо вин̃н̃утам̣ патто саттху сантике дхаммам̣ сутва̄ пат̣иладдхасаддхо паббаджитва̄ каммат̣т̣ха̄нам̣ гахетва̄ аран̃н̃е вихаранто гхат̣енто арахаттам̣ па̄пун̣и. тена вуттам̣ апада̄не (апа. тхера 2.51.91-99) –

‘‘нагаре бандхуматийа̄, а̄ра̄мико ахам̣ тада̄;

аддасам̣ вираджам̣ буддхам̣, гаччхантам̣ анилан̃джасе.

‘‘на̄л̣икерапхалам̣ гайха, буддхасет̣т̣хассада̄сахам̣;

а̄ка̄се т̣хитако санто, пат̣игган̣хи маха̄йасо.

‘‘виттисан̃джанано майхам̣, дит̣т̣хадхаммасукха̄вахо;

пхалам̣ буддхасса датва̄на, виппасаннена четаса̄.

‘‘адхигаччхим̣ тада̄ пӣтим̣, випулан̃ча сукхуттамам̣;

уппаджджатева ратанам̣, ниббаттасса тахим̣ тахим̣.

‘‘еканавутито каппе, йам̣ пхалам̣ ададим̣ тада̄;

дуггатим̣ на̄бхиджа̄на̄ми, пхалада̄нассидам̣ пхалам̣.

‘‘диббачаккху висуддхам̣ ме, сама̄дхикусало ахам̣;

абхин̃н̃а̄па̄рамиппатто, пхалада̄нассидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ тхере пхаласукхена нибба̄насукхена вихаранте падха̄напаригга̄хако тхеро там̣ а̄ран̃н̃а̄йатанам̣ гантва̄ таттха васанта̄нам̣ бхиккхӯнам̣ паригган̣ханаттхам̣ ‘‘касса селӯпама’’нтиа̄дина̄ пат̣хамам̣ га̄тхама̄ха.

191. таттха касса селӯпамам̣ читтам̣, т̣хитам̣ на̄нупакампатӣти имасмим̣ аран̃н̃а̄йатане васантесу касса бхиккхуно читтам̣ аггапхала̄дхигамена екагханасила̄майапаббатӯпамам̣ саббесам̣ ин̃джана̄нам̣ абха̄вато васӣбха̄ваппаттийа̄ ча т̣хитам̣ саббехипи локадхаммехи на̄нукампати на ведхати. ида̄нисса акампана̄ка̄рам̣ саддхим̣ ка̄ран̣ена дассетум̣ ‘‘виратта’’нтиа̄ди вуттам̣. таттха вираттам̣ раджанӣйесӯти вира̄гасан̇кха̄тена арийамаггена раджанӣйесу ра̄гуппаттихетубхӯтесу тебхӯмакадхаммесу вираттам̣, таттха саббасо самуччхиннара̄ганти аттхо. куппанӣйети пат̣игхат̣т̣ха̄нӣйе, саббасмимпи а̄гха̄таваттхусмим̣. на куппатӣти на дуссати на вика̄рам̣ а̄паджджати. йассевам̣ бха̄витам̣ читтанти йасса арийапуггаласса читтам̣ мано евам̣ вуттанайена та̄дибха̄вена бха̄витам̣, куто там̣ дуккхамессатӣти там̣ пуггалам̣ куто саттато сан̇кха̄рато ва̄ дуккхам̣ упагамиссати, на та̄дисасса дуккхам̣ аттхӣти аттхо.

192. евам̣ анийамавасена пуччхитаматтхам̣ нитакаттхеро аттӯпана̄йикам̣ катва̄ виссадждженто ‘‘мама селӯпамам̣ читта’’нтиа̄дина̄ дутийага̄тха̄йа ан̃н̃ам̣ бйа̄ка̄си. там̣ вуттаттхамева.

нитакаттхерага̄тха̄ван̣н̣ана̄ нит̣т̣хита̄.