4. рат̣т̣хапа̄латтхерага̄тха̄ван̣н̣ана̄

пасса читтакатантиа̄дика̄ а̄йасмато рат̣т̣хапа̄латтхерасса га̄тха̄. ка̄ уппатти? айам̣ кира падумуттарасса бхагавато уппаттито пуретарамева хам̣саватӣнагаре гахапатимаха̄са̄лакуле ниббаттитва̄ вайаппатто питу аччайена гхара̄ва̄се патит̣т̣хито ратанакот̣т̣ха̄га̄ракаммикена дасситам̣ апарима̄н̣ам̣ кулавам̣са̄нугатам̣ дханам̣ дисва̄ ‘‘имам̣ еттакам̣ дханара̄сим̣ майхам̣ питуаййакапаййака̄дайо аттана̄ саддхим̣ гахетва̄ гантум̣ на̄саккхим̣су, майа̄ пана гахетва̄ гантум̣ ват̣т̣атӣ’’ти чинтетва̄ капан̣аддхика̄дӣнам̣ маха̄да̄нам̣ ада̄си. со абхин̃н̃а̄ла̄бхим̣ екам̣ та̄пасам̣ упат̣т̣хаханто тена девалока̄дхипачче нийоджито йа̄ваджӣвам̣ пун̃н̃а̄ни катва̄ тато чуто девалоке ниббаттитва̄ диббасампаттим̣ анубхаванто таттха йа̄вата̄йукам̣ т̣хатва̄ тато чуто мануссалоке бхиннам̣ рат̣т̣хам̣ сандха̄ретум̣ саматтхасса куласса екапуттако хутва̄ ниббатти.

тена ча самайена падумуттаро бхагава̄ локе уппаджджитва̄ паваттитаварадхаммачакко венеййасатте нибба̄намаха̄нагарасан̇кха̄там̣ кхемантабхӯмим̣ сампа̄песи. атха со кулапутто ануккамена вин̃н̃утам̣ патто екадивасам̣ упа̄сакехи саддхим̣ виха̄рам̣ гантва̄ саттха̄рам̣ дхаммам̣ десентам̣ дисва̄ пасанначитто парисапарийанте нисӣди. тена кхо пана самайена саттха̄ екам̣ бхиккхум̣ саддха̄паббаджита̄нам̣ аггат̣т̣ха̄не т̣хапеси. там̣ дисва̄ со пасаннама̄насо тадаттха̄йа читтам̣ т̣хапетва̄ сатасахассабхиккхупаривутасса бхагавато махата̄ сакка̄рена сатта̄хам̣ маха̄да̄нам̣ паваттетва̄ пан̣идха̄нам̣ ака̄си. саттха̄ тасса анантара̄йена иджджханабха̄вам̣ дисва̄ ‘‘ана̄гате готамасса на̄ма самма̄самбуддхасса са̄сане саддха̄паббаджита̄нам̣ агго бхависсатӣ’’ти бйа̄ка̄си. со саттха̄рам̣ бхиккхусан̇гхан̃ча вандитва̄ ут̣т̣ха̄йа̄сана̄ пакка̄ми. со таттха йа̄вата̄йукам̣ пун̃н̃а̄ни катва̄ тато чавитва̄ девамануссесу сам̣саранто ито двенавуте каппе пхуссасса бхагавато ка̄ле саттху вема̄тикабха̄тикесу тӣсу ра̄джапуттесу саттха̄рам̣ упат̣т̣хахантесу тесам̣ пун̃н̃акирийа̄йа киччам̣ ака̄си.

евам̣ таттха таттха бхаве там̣ там̣ бахум̣ кусалам̣ упачинитва̄ сугатӣсуйева сам̣саранто имасмим̣ буддхуппа̄де курурат̣т̣хе тхуллакот̣т̣хиканигаме рат̣т̣хапа̄ласет̣т̣хино гехе ниббатти, тасса бхиннам̣ рат̣т̣хам̣ сандха̄ретум̣ саматтхе куле ниббаттатта̄ рат̣т̣хапа̄лоти вам̣са̄нугатамева на̄мам̣ ахоси. со махата̄ парива̄рена вад̣д̣ханто ануккамена йоббанапатто ма̄та̄питӯхи патирӯпена да̄рена сам̣йоджито маханте ча йасе патит̣т̣ха̄пито диббасампаттисадисам̣ сампаттим̣ паччанубхоти. атха бхагава̄ курурат̣т̣хе джанападача̄рикам̣ чаранто тхуллакот̣т̣хикам̣ анупа̄пун̣и. там̣ сутва̄ рат̣т̣хапа̄ло кулапутто саттха̄рам̣ упасан̇камитва̄ саттху сантике дхаммам̣ сутва̄ пат̣иладдхасаддхо паббаджитука̄мо сатта̄хам̣ бхаттаччхедам̣ катва̄ киччхена касирена ма̄та̄питаро ануджа̄на̄петва̄ саттха̄рам̣ упасан̇камитва̄ паббаджджам̣ йа̄читва̄ саттху а̄н̣аттийа̄ ан̃н̃атарасса тхерасса сантике паббаджитва̄ йонисоманасика̄рена каммам̣ каронто випассанам̣ вад̣д̣хетва̄ арахаттам̣ па̄пун̣и. тена вуттам̣ апада̄не (апа. тхера 1.2.97-111) –

‘‘падумуттарасса бхагавато, локаджет̣т̣хасса та̄дино;

варана̄го майа̄ динно, ӣса̄данто урӯл̣хава̄.

‘‘сетаччхатто пасобхито, сакаппано сахаттхипо;

аггха̄петва̄на там̣ саббам̣, сан̇гха̄ра̄мам̣ ака̄райим̣.

‘‘чатупан̃н̃а̄сасахасса̄ни, па̄са̄де ка̄райим̣ ахам̣;

махогхада̄нам̣ каритва̄на, ниййа̄десим̣ махесино.

‘‘анумоди маха̄вӣро, сайамбхӯ аггапуггало;

саббе джане ха̄сайанто, десеси аматам̣ падам̣.

‘‘там̣ ме буддхо вийа̄ка̄си, джаладжуттарана̄мако;

бхиккхусан̇гхе нисӣдитва̄, има̄ га̄тха̄ абха̄сатха.

‘‘чатупан̃н̃а̄сасахасса̄ни, па̄са̄де ка̄райӣ айам̣;

катхайисса̄ми випа̄кам̣, сун̣отха мама бха̄сато.

‘‘ат̣т̣ха̄расасахасса̄ни, кӯт̣а̄га̄ра̄ бхависсаре;

бйамхуттамамхи ниббатта̄, саббасон̣н̣амайа̄ ча те.

‘‘пан̃н̃а̄саккхаттум̣ девиндо, девараджджам̣ кариссати;

ат̣т̣хапан̃н̃а̄саккхаттун̃ча, чаккаваттӣ бхависсати.

‘‘каппасатасахассамхи, окка̄какуласамбхаво;

готамо на̄ма готтена, саттха̄ локе бхависсати.

‘‘девалока̄ чавитва̄на, суккамӯлена чодито;

ад̣д̣хе куле маха̄бхоге, ниббаттиссати та̄ваде.

‘‘со паччха̄ паббаджитва̄на, суккамӯлена чодито;

рат̣т̣хапа̄лоти на̄мена, хессати саттху са̄вако.

‘‘падха̄напахитатто со, упасанто нирӯпадхи;

сабба̄саве парин̃н̃а̄йа, нибба̄йиссатина̄саво.

‘‘ут̣т̣ха̄йа абхиниккхамма, джахита̄ бхогасампада̄;

кхел̣апин̣д̣ева бхогамхи, пемам̣ майхам̣ на виджджати.

‘‘вӣрийам̣ ме дхурадхорайхам̣, йогаккхема̄дхива̄ханам̣;

дха̄реми антимам̣ дехам̣, самма̄самбуддхаса̄сане.

‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄сана’’нти.

арахаттам̣ пана патва̄ саттха̄рам̣ ануджа̄на̄петва̄ ма̄та̄питаро пасситум̣ тхуллакот̣т̣хикам̣ гантва̄, таттха сапада̄нам̣ пин̣д̣а̄йа чаранто питу нивесане а̄бхидосикам̣ кумма̄сам̣ лабхитва̄ там̣ аматам̣ вийа парибхун̃джанто, питара̄ нимантито сва̄тана̄йа адхива̄сетва̄, дутийадивасе питу нивесане пин̣д̣апа̄там̣ парибхун̃джитва̄ алан̇катапат̣ийатте иттха̄га̄раджане упагантва̄ ‘‘кӣдиса̄ на̄ма та̄, аййапутта, аччхара̄йо, йа̄сам̣ твам̣ хету брахмачарийам̣ чарасӣ’’тиа̄дӣни (ма. ни. 2.301) ватва̄, палобханакаммам̣ ка̄тум̣ а̄раддхе тасса адхиппа̄йам̣ париваттетва̄ аниччата̄дипат̣исам̣йуттам̣ дхаммам̣ катхенто –

769. ‘‘пасса читтакатам̣ бимбам̣, арука̄йам̣ самусситам̣;

а̄турам̣ бахусан̇каппам̣, йасса наттхи дхувам̣ т̣хити.

770. ‘‘пасса читтакатам̣ рӯпам̣, ман̣ина̄ кун̣д̣алена ча;

ат̣т̣хим̣ тачена онаддхам̣, саха ваттхехи собхати.

771. ‘‘алаттакаката̄ па̄да̄, мукхам̣ чун̣н̣акамаккхитам̣;

алам̣ ба̄ласса моха̄йа, но ча па̄рагавесино.

772. ‘‘ат̣т̣ха̄падаката̄ кеса̄, нетта̄ ан̃джанамаккхита̄;

алам̣ ба̄ласса моха̄йа, но ча па̄рагавесино.

773. ‘‘ан̃джанӣва нава̄ читта̄, пӯтика̄йо алан̇като;

алам̣ ба̄ласса моха̄йа, но ча па̄рагавесино.

774. ‘‘одахи мигаво па̄сам̣, на̄сада̄ ва̄гурам̣ миго;

бхутва̄ нива̄пам̣ гаччха̄ма, канданте мигабандхаке.

775. ‘‘чхинно па̄со мигавасса, на̄сада̄ ва̄гурам̣ миго;

бхутва̄ нива̄пам̣ гаччха̄ма, сочанте мигалуддаке’’ти. – има̄ га̄тха̄ абха̄си;

таттха читтакатанти читтам̣ катам̣ читтакатам̣, ваттха̄бхаран̣ама̄ла̄дӣхи вичиттам̣ катанти аттхо. бимбанти дӣгха̄дибха̄вена йуттат̣т̣ха̄несу дӣгха̄дӣхи ан̇гапаччан̇гехи ман̣д̣итам̣ аттабха̄вам̣. арука̄йанти наваннам̣ ван̣амукха̄нам̣ ломакӯпа̄нан̃ча васена виссандама̄наасучим̣, саббасо ча арубхӯтам̣ ван̣абхӯтам̣ арӯнам̣ ва̄ ка̄йам̣. самусситанти тӣхи ат̣т̣хисатехи самусситам̣. а̄туранти саббака̄лам̣ ирийа̄патхантара̄дӣхи парихаритаббата̄йа ниччам̣ гила̄нам̣. бахусан̇каппанти ба̄ладжанена абхӯтам̣ а̄ропетва̄ бахудха̄ сан̇каппитаббам̣. йасса наттхи дхувам̣ т̣хитӣти йасса ка̄йасса дхувабха̄во т̣хитисабха̄во наттхи, екам̣сато бхеданавикиран̣авиддхам̣санадхаммойева. там̣ пасса̄ти самӣпе т̣хитам̣ джанам̣, атта̄намева ва̄ сандха̄йа вадати.

рӯпанти сарӣрам̣. сарӣрампи хи ‘‘ат̣т̣хин̃ча пат̣ичча, нха̄рун̃ча пат̣ичча, мам̣сан̃ча пат̣ичча, чамман̃ча пат̣ичча, а̄ка̄со парива̄рито ‘рӯпантвева сан̇кхам̣ гаччхатӣ’’тиа̄дӣсу (ма. ни. 1.306) рӯпанти вуччати. ман̣ина̄ кун̣д̣алена ча̄ти сӣсӯпага̄диа̄бхаран̣агатена ман̣ина̄ кун̣д̣алена читтакатам̣. ат̣т̣хим̣ тачена онаддханти аллачаммена парийонаддхам̣ атирекатисатапабхедам̣ ат̣т̣хим̣ пасса̄ти йоджана̄. кун̣д̣алена ча̄ти ча-саддена сеса̄бхаран̣а̄лан̇ка̄ре сан̇ган̣ха̄ти. саха ваттхехи собхатӣти тайидам̣ рӯпам̣ ман̣ина̄ читтакатампи ваттхехи пат̣иччха̄дитамева собхати, на апат̣иччха̄дитанти аттхо. йе пана ‘‘ат̣т̣хитачена̄’’ти пат̣ханти, тесам̣ ат̣т̣хитаченам̣ онаддхам̣ собхати, онаддхатта̄ ат̣т̣хитачена̄ти аттхо.

алаттакаката̄ти алаттакена катаран̃джана̄ ла̄кха̄йа сам̣ран̃джита̄. па̄да̄ти чаран̣а̄. мукхам̣ чун̣н̣акамаккхитанти мукхам̣ чун̣н̣акена маккхитам̣, йам̣ ман̣д̣анамануйутта̄ са̄сапакаккена мукхапӣл̣ака̄дӣни харитва̄ лон̣аматтика̄йа дут̣т̣халохитам̣ харитва̄ мукхачун̣н̣акавилепанам̣ каронти, там̣ сандха̄йа вуттам̣. аланти ба̄ласса андхапутхуджджанасса но ча па̄рагавесино ват̣т̣а̄бхиратасса моха̄йа саммохана̄йа саматтхам̣ тасса читтам̣ мохетум̣ парийаттам̣, па̄рагавесино пана виват̣т̣а̄бхиратасса но алам̣ на парийаттам̣.

ат̣т̣ха̄падаката̄ти ат̣т̣хапада̄ка̄рена ката̄ сан̃чита̄ пуримабха̄ге кесе каппетва̄ нала̄т̣асса пат̣иччха̄данавасена ката̄ кесарачана̄ ат̣т̣хападам̣ на̄ма, йам̣ ‘‘алака’’нтипи вуччати. нетта̄ ан̃джанамаккхита̄ти убхопи найана̄ни анто двӣсу антесу ча йатха̄ ан̃джаначчха̄йа̄ диссати, евам̣ ан̃джитан̃джана̄ни.

ан̃джанӣва нава̄ читта̄, пӯтика̄йо алан̇катоти йатха̄ ан̃джанӣ ан̃джанана̄л̣ика̄ нава̄ абхинава̄ ма̄ла̄каммамакараданта̄дивасена читта̄ бахи мат̣т̣ха̄ уджджала̄ дассанӣйа̄, анто пана на дассанӣйа̄ хоти, евамева та̄сам̣ ка̄йо нха̄наббхан̃джанаваттха̄лан̇ка̄рехи алан̇като бахи уджджало, анто пана пӯти на̄наппака̄раасучӣхи бхарито тит̣т̣хатӣти аттхо.

одахӣти од̣д̣еси. мигавоти, мигалуддако. па̄санти, дан̣д̣ава̄гурам̣. на̄сада̄ти на сан̇гхат̣т̣еси. ва̄гуранти па̄сам̣. нива̄панти мига̄нам̣ кха̄данаттха̄йа кхиттам̣ тин̣а̄дигха̄сам̣. упама̄ кхо айам̣ тхерена ката̄ аттхасса вин̃н̃а̄пана̄йа. айан̃хеттха аттхо – йатха̄ мига̄нам̣ ма̄ран̣аттха̄йа дан̣д̣ава̄гурам̣ од̣д̣етва̄ таттха нива̄пам̣ викирийа мигалуддаке нилӣне т̣хите таттхеко джавапараккамасампанно чхеко миго па̄сам̣ апхусанто ева йатха̄сукхам̣ нива̄пам̣ кха̄дитва̄, ‘‘ван̃чеси вата миго’’ти мигалуддаке вираванте ева гаччхати. апаро миго балава̄ чхеко джавасампаннова таттха гантва̄ нива̄пам̣ кха̄дитва̄ таттха таттха па̄сам̣ чхиндитва̄, ‘‘ван̃чеси вата миго, па̄со чхинно’’ти мигалуддаке сочанте ева гаччхати, евам̣ майампи пуббе путхуджджанака̄ле ма̄та̄питӯхи а̄саджджанаттха̄йа ниййа̄дите бхоге бхун̃джитва̄ таттха таттха асаджджама̄на̄ никкханта̄. ида̄ни пана саббасо чхиннакилеса̄ апа̄са̄ хутва̄ т̣хита̄, техи диннабходжанам̣ бхун̃джитва̄ тесу сочантесу ева гаччха̄ма̄ти.

евам̣ тхеро мигалуддакам̣ вийа ма̄та̄питаро, хиран̃н̃асуван̣н̣ам̣ иттха̄га̄ран̃ча ва̄гураджа̄лам̣ вийа, аттана̄ пуббе бхуттабхоге ча ида̄ни бхуттабходжанан̃ча нива̄патин̣ам̣ вийа, атта̄нам̣ маха̄мигам̣ вийа ча катва̄ дассети. има̄ га̄тха̄ ватва̄ веха̄сам̣ аббхуггантва̄ ран̃н̃о корабйасса мига̄джинауййа̄не ман̇галасила̄пат̣т̣е нисӣди. тхерасса кира пита̄ саттасу два̄ракот̣т̣хакесу аггал̣ам̣ да̄петва̄ малле а̄н̣а̄песи ‘‘никкхамитум̣ ма̄ детха, ка̄са̄йа̄ни апанетва̄ сетака̄ни нива̄сетха̄’’ти, тасма̄ тхеро а̄ка̄сена агама̄си. атха ра̄джа̄ корабйо тхерасса таттха нисиннабха̄вам̣ сутва̄ там̣ упасан̇камитва̄ саммоданӣйам̣ катхам̣ са̄ран̣ӣйам̣ вӣтиса̄ретва̄ ‘‘идха, бхо рат̣т̣хапа̄ла, паббаджанто бйа̄дхипа̄риджун̃н̃ам̣ ва̄ джара̄бхоган̃а̄типа̄риджун̃н̃ам̣ ва̄ патто паббаджати. твам̣ пана кин̃чипи па̄риджун̃н̃ам̣ анупагато ева касма̄ паббаджито’’ти пуччхи. атхасса тхеро, ‘‘упаниййати локо аддхуво, ата̄н̣о локо анабхиссаро, ассако локо саббам̣ паха̄йа гаманӣйам̣, ӯно локо атитто тан̣ха̄да̄со’’ти (ма. ни. 2.305) имесам̣ чатуннам̣ дхаммуддеса̄нам̣ атта̄нам̣ вивиттабха̄вам̣ катхетва̄ тасса̄ десана̄йа анугӣтим̣ катхенто –

776. ‘‘пасса̄ми локе садхане мануссе, ладдха̄на виттам̣ на даданти моха̄;

луддха̄ дханам̣ санничайам̣ каронти, бхиййова ка̄ме абхипаттхайанти.

777. ‘‘ра̄джа̄ пасайхаппатхавим̣ виджетва̄, саса̄гарантам̣ махима̄васанто;

орам̣ самуддасса атиттарӯпо, па̄рам̣ самуддассапи паттхайетха.

778. ‘‘ра̄джа̄ ча ан̃н̃е ча бахӯ манусса̄, авӣтатан̣ха̄ маран̣ам̣ упенти;

ӯна̄ва хутва̄на джаханти дехам̣, ка̄мехи локамхи на хаттхи титти.

779. ‘‘канданти нам̣ н̃а̄тӣ пакирийа кесе, ‘ахо вата̄ но амара̄’ти ча̄ху;

ваттхена нам̣ па̄рутам̣ нӣхаритва̄, читам̣ самодха̄йа тато д̣аханти.

780. ‘‘со д̣айхати сӯлехи туджджама̄но, екена ваттхена паха̄йа бхоге;

на мӣйама̄насса бхаванти та̄н̣а̄, н̃а̄тӣ ча митта̄ атха ва̄ саха̄йа̄.

781. ‘‘да̄йа̄дака̄ тасса дханам̣ харанти, сатто пана гаччхати йенакаммам̣;

на мӣйама̄нам̣ дханаманвети кин̃чи, путта̄ ча да̄ра̄ ча дханан̃ча рат̣т̣хам̣.

782. ‘‘на дӣгхама̄йум̣ лабхате дханена, на ча̄пи виттена джарам̣ виханти;

аппам̣ хидам̣ джӣвитама̄ху дхӣра̄, асассатам̣ виппарин̣а̄мадхаммам̣.

783. ‘‘ад̣д̣ха̄ далидда̄ ча пхусанти пхассам̣, ба̄ло ча дхӣро ча татхева пхут̣т̣хо;

ба̄ло хи ба̄лйа̄ вадхитова сети, дхӣро ча но ведхати пхассапхут̣т̣хо.

784. ‘‘тасма̄ хи пан̃н̃а̄ва дханена сеййа̄, йа̄йа воса̄намидха̄дхигаччхати;

абйоситатта̄ хи бхава̄бхавесу, па̄па̄ни камма̄ни кароти моха̄.

785. ‘‘упети габбхан̃ча паран̃ча локам̣, сам̣са̄рама̄паджджа парампара̄йа;

тассаппапан̃н̃о абхисаддаханто, упети габбхан̃ча паран̃ча локам̣.

786. ‘‘чоро йатха̄ сандхимукхе гахӣто, сакаммуна̄ хан̃н̃ати па̄падхаммо;

евам̣ паджа̄ печча парамхи локе, сакаммуна̄ хан̃н̃ати па̄падхаммо.

787. ‘‘ка̄ма̄ хи читра̄ мадхура̄ манорама̄, вирӯпарӯпена матхенти читтам̣;

а̄дӣнавам̣ ка̄магун̣есу дисва̄, тасма̄ ахам̣ паббаджитомхи ра̄джа.

788. ‘‘думаппхала̄нӣва патанти ма̄н̣ава̄, дахара̄ ча вуд̣д̣ха̄ ча сарӣрабхеда̄;

етампи дисва̄ паббаджитомхи ра̄джа, апан̣н̣акам̣ са̄ман̃н̃амева сеййо.

789. ‘‘саддха̄йа̄хам̣ паббаджито, упето джинаса̄сане;

аван̃джха̄ майхам̣ паббаджджа̄, анан̣о бхун̃джа̄ми бходжанам̣.

790. ‘‘ка̄ме а̄диттато дисва̄, джа̄тарӯпа̄ни саттхато;

габбхавоккантито дуккхам̣, нирайесу махаббхайам̣.

791. ‘‘етама̄дӣнавам̣ н̃атва̄, сам̣вегам̣ алабхим̣ тада̄;

сохам̣ виддхо тада̄ санто, сампатто а̄саваккхайам̣.

792. ‘‘паричин̣н̣о майа̄ саттха̄, катам̣ буддхасса са̄санам̣;

охито гаруко бха̄ро, бхаванетти самӯхата̄.

793. ‘‘йассаттха̄йа паббаджито, ага̄расма̄нага̄рийам̣;

со ме аттхо ануппатто, саббасам̣йоджанаккхайо’’ти. – има̄ га̄тха̄ авоча;

таттха пасса̄ми локети ахам̣, маха̄ра̄джа, имасмим̣ локе садхане дханасампанне ад̣д̣хе мануссе пасса̄ми, те пана ладдха̄на виттам̣ дханам̣ лабхитва̄ бхогасампаттийам̣ т̣хита̄ саман̣абра̄хман̣а̄дӣсу кассачи кин̃чипи на даданти. касма̄? моха̄ каммассаката̄пан̃н̃а̄йа абха̄вато. луддха̄ лобха̄бхибхӯта̄ йатха̄ладдхам̣ дханам̣ санничайам̣ саббасо ничетаббам̣ нидхетаббам̣ каронти. бхиййова йатха̄дхигатака̄мато упари ка̄ме ка̄магун̣е ‘‘татха̄хам̣ едисе ча бхоге пат̣илабхеййа’’нти абхипаттхайанти пачча̄сӣсанти таджджан̃ча ва̄йа̄мам̣ каронти.

бхиййо ка̄мапаттхана̄йа уда̄харан̣ам̣ дассенто ‘‘ра̄джа̄’’тиа̄дима̄ха. таттха пасайхаппатхавим̣ виджетва̄ти аттано вам̣са̄нугатам̣ патхавим̣ балакка̄рена абхивиджийа. а̄васантоти паса̄сенто. орам̣ самуддасса̄ти анавасесам̣ самуддасса орабха̄гам̣ лабхитва̄пи тена атиттарӯпо па̄рам̣ самуддасса дӣпантарампи паттхайеййа.

авӣтатан̣ха̄ти авигататан̣ха̄. ӯна̄ва̄ти апарипун̣н̣аманоратха̄ва. ка̄мехи локамхи на хаттхи титтӣти тан̣ха̄випанна̄нам̣ имасмим̣ локе ваттхука̄мехи титти на̄ма наттхи.

канданти нанти матапурисам̣ уддисса тасса гун̣е киттента̄ канданам̣ каронти. ахо вата̄ но амара̄ти ча̄хӯти ахо вата амха̄кам̣ н̃а̄тӣ амара̄ сийунти ча катхенти, га̄тха̄сукхаттхан̃хеттха вата̄-ити дӣгхам̣ катва̄ вуттам̣.

со д̣айхати сӯлехи туджджама̄ноти со матасатто чхавад̣а̄хакехи самма̄ джха̄петум̣ сӯлехи туджджама̄но. та̄н̣а̄ти паритта̄н̣акара̄.

йенакамманти йатха̄каммам̣. дхананти дхана̄йитаббам̣ йам̣кин̃чи ваттху. пуна дхананти хиран̃н̃асуван̣н̣ам̣ сандха̄йа вадати.

‘‘на дӣгхама̄йу’’нтиа̄дина̄ ка̄магун̣асса джара̄йа ча пат̣ика̄ра̄бха̄вам̣ ватва̄ пуна тасса екантикабха̄вам̣ дассетум̣ ‘‘аппам̣ хӣ’’тиа̄ди вуттам̣. пхусантӣти анит̣т̣хапхассам̣ пхусанти па̄пун̣анти, таттха ад̣д̣хадалиддата̄ ака̄ран̣анти дассети. пхассам̣ ба̄ло ча дхӣро ча татхева пхут̣т̣хоти йатха̄ ба̄ло ит̣т̣ха̄нит̣т̣хасампхассам̣ пхут̣т̣хо, татхева дхӣро ит̣т̣ха̄нит̣т̣хапхассам̣ пхут̣т̣хо хоти, на еттха ба̄лапан̣д̣ита̄нам̣ кочи висесо. айам̣ пана висесо, ба̄ло хи ба̄лйа̄ вадхитова сетӣти ба̄лапуггало кеначи дуккхадхаммена пхут̣т̣хо сочанто киламанто уратта̄л̣им̣ канданто ба̄лабха̄вена вадхито пӣл̣итова хутва̄ сети сайати. ито чито ча а̄ват̣т̣анто виват̣т̣анто виродхенто ведхати пхассапхут̣т̣хоти дхӣро пана пан̣д̣ито дуккхасампхассена сампхут̣т̣хо на ведхати кампанаматтампи тасса на хотӣти.

тасма̄ти йасма̄ ба̄лапан̣д̣ита̄нам̣ локадхамме едисӣ паватти, тасма̄ хи пан̃н̃а̄ва дханена сеййа̄, йа̄йа воса̄намидха̄дхигаччхатӣти пан̃н̃а̄ва дханато па̄сам̣сатара̄, йа̄йа пан̃н̃а̄йа воса̄нам̣ бхавасса парийоса̄набхӯтам̣ нибба̄нам̣ адхигаччхати. абйоситатта̄ хӣти анадхигатанит̣т̣хатта̄. бхава̄бхавесӯти маханта̄махантесу бхавесу.

упети габбхан̃ча паран̃ча локам̣, сам̣са̄рама̄паджджа парампара̄йа̄ти йо па̄па̄ни катва̄ апара̄парам̣ сам̣саран̣ама̄паджджитва̄ упети габбхан̃ча паран̃ча локам̣ габбхасеййа̄йа паралокуппаттийа̄ ча на муччати, тасса па̄пакаммака̄рино пуггаласса кирийам̣ абхисаддаханто ‘‘атта̄ ча ме хотӣ’’ти паттийа̄йанто ан̃н̃опи аппапан̃н̃о ба̄ло йатха̄ пат̣ипаджджитва̄ упети габбхан̃ча паран̃ча локам̣, на тато паримуччати.

чоро йатха̄ти йатха̄ чоро па̄падхаммо гхарасандхим̣ чхинданто сандхимукхе а̄раккхакапурисехи гахито сакаммуна̄ тена аттано сандхиччхедакаммуна̄ ка̄ран̣абхӯтена каса̄дӣхи та̄л̣ана̄дивасена хан̃н̃ати ра̄джапурисехи ба̄дхиййати баджджхати ча. евам̣ паджа̄ти евамайам̣ сатталоко идха па̄па̄ни каритва̄ печча патва̄ тена каммуна̄ парамхи локе нирайа̄дӣсу хан̃н̃ати, пан̃чавидхабандханакаммака̄ран̣а̄дивасена ба̄дхиййати.

евамета̄хи ека̄дасахи га̄тха̄хи йатха̄рахам̣ чатта̄ро дхаммуддесе пака̄сетва̄ ида̄ни ка̄месу сам̣са̄ре ча а̄дӣнавам̣ дисва̄ саддха̄йа аттано паббаджитабха̄вам̣ паббаджитакиччасса ча маттхакаппаттим̣ вибха̄венто ‘‘ка̄ма̄ хӣ’’тиа̄дима̄ха. таттха ка̄ма̄ти ваттхука̄ма̄ мана̄пийа̄ рӯпа̄дайо дхамма̄, килесака̄ма̄ саббепи ра̄гаппабхеда̄. идха пана ваттхука̄ма̄ ведитабба̄. те хи рӯпа̄дивасена анекаппака̄рата̄йа читра̄. локасса̄давасена ит̣т̣ха̄ка̄рата̄йа мадхура̄. ба̄лапутхуджджана̄нам̣ манам̣ раментӣти манорама̄. вирӯпарӯпена̄ти вивидхарӯпена, анекавидхасабха̄вена̄ти аттхо. те хи рӯпа̄дивасена читра̄, нӣла̄дивасена вивидхарӯпа̄. евам̣ тена вирӯпарӯпена татха̄ татха̄ асса̄дам̣ дассетва̄ матхенти читтам̣ паббаджджа̄йа абхирамитум̣ на дентӣти имина̄ аппасса̄дабахудуккхата̄дина̄ а̄дӣнавам̣ ка̄магун̣есу дисва̄ тасма̄ там̣нимиттам̣ ахам̣ паббаджито амхи. думаппхала̄ни паккака̄ле апарипаккака̄ле ча йаттха каттхачи парӯпаккамато сарасато ва̄ патанти, евам̣ сатта̄ дахара̄ ча вуд̣д̣ха̄ ча сарӣрасса бхеда̄ патантийева. етампи дисва̄ти евам̣ аниччатампи пан̃н̃а̄чаккхуна̄ дисва̄, на кевалам̣ аппасса̄дата̄дита̄йа а̄дӣнавамева̄ти адхиппа̄йо. апан̣н̣аканти авираддханакам̣ са̄ман̃н̃амева саман̣абха̄вова сеййо уттаритаро.

саддха̄йа̄ти каммам̣ каммапхалам̣ буддхасубуддхатам̣ дхаммасудхамматам̣ сан̇гхасуппат̣ипаттин̃ча саддахитва̄. упето джинаса̄санети саттху са̄сане самма̄пат̣ипаттим̣ упагато. аван̃джха̄ майхам̣ паббаджджа̄ арахаттасса адхигататта̄. тато ева анан̣о бхун̃джа̄ми бходжанам̣ никкилесавасена са̄мибха̄вато са̄мипарибхогена парибхун̃джанато.

ка̄ме а̄диттато дисва̄ти ваттхука̄ме килесака̄ме ча ека̄дасахи аггӣхи а̄диттабха̄вато дисва̄. джа̄тарӯпа̄ни саттхатоти ката̄катаппабхеда̄ саббасуван̣н̣авикатийо анаттха̄вахата̄йа ниситасаттхато. габбхавоккантито дуккханти габбхавоккантито пат̣т̣ха̄йа саббасам̣са̄рапаваттидуккхам̣. нирайесу махаббхайанти сауссадесу ат̣т̣хасу маха̄нирайесу лаббхама̄нам̣ маха̄бхайан̃ча саббаттха дисва̄ти йоджана̄.

етама̄дӣнавам̣ н̃атва̄ти етам̣ ка̄ма̄нам̣ а̄диттата̄дим̣ сам̣са̄ре а̄дӣнавам̣ досам̣ н̃атва̄. сам̣вегам̣ алабхим̣ тада̄ти тасмим̣ саттху сантике дхаммасса сутака̄ле бхава̄дике сам̣вегам̣ алаттхам̣. виддхо тада̄ сантоти тасмим̣ гахат̣т̣хака̄ле ра̄гасалла̄дӣхи виддхо сама̄но ида̄ни саттху са̄санам̣ а̄гамма сампатто а̄саваккхайам̣, виддхо ва̄ чатта̄ри сачча̄ни, пат̣ивиддхоти аттхо. сесам̣ антарантара̄дӣсу вуттатта̄ сувин̃н̃еййамева.

евам̣ тхеро ран̃н̃о корабйасса дхаммам̣ десетва̄ саттху сантикамева гато. саттха̄ ча апарабха̄ге арийаган̣амаджджхе нисинно тхерам̣ саддха̄паббаджита̄нам̣ аггат̣т̣ха̄не т̣хапесӣти.

рат̣т̣хапа̄латтхерага̄тха̄ван̣н̣ана̄ нит̣т̣хита̄.