9. пилиндаваччхаттхерага̄тха̄ван̣н̣ана̄

сва̄гатанти а̄йасмато пилиндаваччхаттхерасса га̄тха̄. ка̄ уппатти? айам̣ кира падумуттарабуддхака̄ле хам̣саватӣнагаре маха̄бхогакуле ниббатто хет̣т̣ха̄ вуттанайенева саттху сантике дхаммам̣ сун̣анто саттха̄рам̣ екам̣ бхиккхум̣ девата̄нам̣ пийамана̄пабха̄вена аггат̣т̣ха̄не т̣хапентам̣ дисва̄ там̣ т̣ха̄нантарам̣ паттхетва̄ йа̄ваджӣвам̣ кусалам̣ катва̄ тато чуто девамануссесу сам̣саранто сумедхасса бхагавато ка̄ле мануссалоке ниббаттитва̄ бхагавати париниббуте саттху тхӯпасса пӯджам̣ катва̄ сан̇гхе ча маха̄да̄нам̣ паваттетва̄ тато чуто девамануссесу ева сам̣саранто ануппанне буддхе чаккаваттӣ ра̄джа̄ хутва̄ маха̄джанам̣ пан̃часу сӣлесу патит̣т̣ха̄петва̄ саггапара̄йан̣ам̣ ака̄си. со ануппаннейева амха̄кам̣ бхагавати са̄ваттхийам̣ бра̄хман̣агехе ниббатти. ‘‘пилиндо’’тисса на̄мам̣ акам̣су. ваччхоти пана готтам̣. тена со апарабха̄ге ‘‘пилиндаваччхо’’ти пан̃н̃а̄йиттха. сам̣са̄ре пана сам̣вегабахулата̄йа парибба̄джакапаббаджджам̣ паббаджитва̄ чӯл̣агандха̄рам̣ на̄ма виджджам̣ са̄дхетва̄ та̄йа виджджа̄йа а̄ка̄сача̄рӣ парачиттавидӯ ча хутва̄ ра̄джагахе ла̄бхаггайасаггаппатто пат̣ивасати.

атха йада̄ амха̄кам̣ бхагава̄ абхисамбуддхо хутва̄ ануккамена ра̄джагахам̣ упагато, тато пат̣т̣ха̄йа буддха̄нубха̄вена тасса са̄ виджджа̄ на сампаджджати, аттано киччам̣ на са̄дхети. со чинтеси – ‘‘сутам̣ кхо пана метам̣ а̄чарийапа̄чарийа̄нам̣ бха̄сама̄на̄нам̣ ‘йаттха маха̄гандха̄равиджджа̄ дхарати, таттха чӯл̣агандха̄равиджджа̄ на сампаджджатӣ’ти, саман̣асса пана готамасса а̄гатака̄лато пат̣т̣ха̄йа на̄йам̣ мама виджджа̄ сампаджджати, ниссам̣сайам̣ саман̣о готамо маха̄гандха̄равиджджам̣ джа̄на̄ти, йам̣нӯна̄хам̣ там̣ пайирупа̄ситва̄ тасса сантике там̣ виджджам̣ парийа̄пун̣еййа’’нти. со бхагавантам̣ упасан̇камитва̄ етадавоча – ‘‘ахам̣, маха̄саман̣а, тава сантике екам̣ виджджам̣ парийа̄пун̣итука̄мо, ока̄сам̣ ме карохӣ’’ти. бхагава̄ ‘‘тена хи паббаджа̄’’ти а̄ха. со ‘‘виджджа̄йа парикаммам̣ паббаджджа̄’’ти ман̃н̃ама̄но паббаджи. тасса бхагава̄ дхаммам̣ катхетва̄ чарита̄нукӯлам̣ каммат̣т̣ха̄нам̣ ада̄си. со упаниссайасампанната̄йа начирассева випассанам̣ вад̣д̣хетва̄ арахаттам̣ па̄пун̣и. йа̄ пана пуримаджа̄тийам̣ тассова̄де т̣хатва̄ сагге ниббатта̄ девата̄, там̣ катан̃н̃утам̣ нисса̄йа сан̃джа̄табахума̄на̄ са̄йам̣ па̄там̣ тхерам̣ пайирупа̄ситва̄ гаччханти. тасма̄ тхеро девата̄нам̣ пийамана̄пата̄йа аггатам̣ патто. тена вуттам̣ апада̄не (апа. тхера 1.2.55-67) –

‘‘ниббуте локана̄тхамхи, сумедхе аггапуггале;

пасанначитто сумано, тхӯпапӯджам̣ ака̄сахам̣.

‘‘йе ча кхӣн̣а̄сава̄ таттха, чхал̣абхин̃н̃а̄ махиддхика̄;

техам̣ таттха сама̄нетва̄, сан̇гхабхаттам̣ ака̄сахам̣.

‘‘сумедхасса бхагавато, упат̣т̣ха̄ко тада̄ аху;

сумедхо на̄ма на̄мена, анумодиттха со тада̄.

‘‘тена читтаппаса̄дена, вима̄нам̣ упападжджахам̣;

чхал̣а̄сӣтисахасса̄ни, аччхара̄йо рамим̣су ме.

‘‘мамева ануваттанти, саббака̄мехи та̄ сада̄;

ан̃н̃е деве абхибхоми, пун̃н̃акаммассидам̣ пхалам̣.

‘‘пан̃чавӣсамхи каппамхи, варун̣о на̄ма кхаттийо;

висуддхабходжано а̄сим̣, чаккаваттӣ ахам̣ тада̄.

‘‘на те бӣджам̣ паваппанти, напи нӣйанти нан̇гала̄;

акат̣т̣хапа̄кимам̣ са̄лим̣, парибхун̃джанти ма̄нуса̄.

‘‘таттха раджджам̣ каритва̄на, деваттам̣ пуна гаччхахам̣;

тада̄пи едиса̄ майхам̣, ниббатта̄ бхогасампада̄.

‘‘на мам̣ митта̄ амитта̄ ва̄, хим̣санти саббапа̄н̣ино;

саббесампи пийо хоми, пун̃н̃акаммассидам̣ пхалам̣.

‘‘тим̣сакаппасахассамхи, йам̣ да̄намададим̣ тада̄;

дуггатим̣ на̄бхиджа̄на̄ми, гандха̄лепассидам̣ пхалам̣.

‘‘имасмим̣ бхаддаке каппе, еко а̄сим̣ джана̄дхипо;

маха̄нубха̄во ра̄джа̄хам̣, чаккаваттӣ махаббало.

‘‘сохам̣ пан̃часу сӣлесу, т̣хапетва̄ джанатам̣ бахум̣;

па̄петва̄ сугатим̣йева, девата̄нам̣ пийо ахум̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

татха̄ девата̄хи ативийа пийа̄йитаббабха̄вато имам̣ тхерам̣ бхагава̄ девата̄нам̣ пийамана̄пабха̄вена аггат̣т̣ха̄не т̣хапеси – ‘‘етадаггам̣, бхиккхаве, мама са̄вака̄нам̣ бхиккхӯнам̣ девата̄нам̣ пийамана̄па̄нам̣ йадидам̣ пилиндаваччхо’’ти (а. ни. 1.209, 215) со екадивасам̣ бхиккхусан̇гхамаджджхе нисинно аттано гун̣е паччавеккхитва̄ тесам̣ ка̄ран̣абхӯтам̣ виджджа̄нимиттам̣ бхагавато сантике а̄гаманам̣ пасам̣санто ‘‘сва̄гатам̣ на̄пагата’’нти га̄тхам̣ абха̄си.

9. таттха сва̄гатанти сундарам̣ а̄гаманам̣, идам̣ мама̄ти самбандхо. атха ва̄ сва̄гатанти сут̣т̣ху а̄гатам̣, майа̄ти вибхатти випарин̣а̄метабба̄. на̄пагатанти на апагатам̣ хита̄бхивуддхито на апетам̣. найидам̣ думантитам̣ мама̄ти идам̣ мама дут̣т̣ху катхитам̣, дут̣т̣ху ва̄ вӣмам̣ситам̣ на хоти. идам̣ вуттам̣ хоти – йам̣ бхагавато сантике мама̄гаманам̣, йам̣ ва̄ майа̄ таттха а̄гатам̣, там̣ сва̄гатам̣, сва̄гататта̄йева на дура̄гатам̣. йам̣ ‘‘бхагавато сантике дхаммам̣ сутва̄ паббаджисса̄мӣ’’ти мама мантитам̣ гадитам̣ катхитам̣, читтена ва̄ вӣмам̣ситам̣ идампи на думмантинти. ида̄ни таттха ка̄ран̣ам̣ дассенто ‘‘сам̣вибхаттесӯ’’тиа̄дима̄ха. сам̣вибхаттесӯти пака̄рато вибхаттесу. дхаммесӯти н̃еййадхаммесу саматхадхаммесу ва̄, на̄на̄титтхийехи пакатиа̄дивасена, самма̄самбуддхехи дуккха̄дивасена сам̣вибхаджитва̄ вуттадхаммесу. йам̣ сет̣т̣хам̣ тадупа̄гаминти йам̣ таттха сет̣т̣хам̣, там̣ чатусаччадхаммам̣, тасса ва̄ бодхакам̣ са̄санадхаммам̣ упа̄гамим̣, ‘‘айам̣ дхаммо айам̣ винайо’’ти упагаччхим̣. самма̄самбуддхехи ева ва̄ кусала̄дивасена кхандха̄дивасена йатха̄сабха̄вато сам̣вибхаттесу сабха̄вадхаммесу йам̣ таттха сет̣т̣хам̣ уттамам̣ паварам̣, там̣ маггапхаланибба̄надхаммам̣ упа̄гамим̣, аттапаччаккхато упагаччхим̣ саччха̄ка̄сим̣, тасма̄ сва̄гатам̣ мама на апагатам̣ сумантитам̣ на думмантитанти йоджана̄.

пилиндаваччхаттхерага̄тха̄ван̣н̣ана̄ нит̣т̣хита̄.