2. тиссаметтеййасуттаван̣н̣ана̄

1047. кодха сантусситоти тиссаметтеййасуттам̣. ка̄ уппатти? саббасутта̄нам̣ пуччха̄васика̄ ева уппатти. те хи бра̄хман̣а̄ ‘‘ката̄вака̄са̄ пуччхавхо’’ти бхагавата̄ пава̄ритатта̄ аттано аттано сам̣сайам̣ пуччхим̣су. пут̣т̣хо пут̣т̣хо ча тесам̣ бхагава̄ бйа̄ка̄си. евам̣ пуччха̄васика̄невета̄ни сутта̄нӣти ведитабба̄ни.

нит̣т̣хите пана аджитапан̃хе ‘‘катхам̣ локам̣ авеккхантам̣, маччура̄джа̄ на пассатӣ’’ти (су. ни. 1124; чӯл̣ани. пин̇гийама̄н̣авапуччха̄ 144) евам̣ могхара̄джа̄ пуччхитум̣ а̄рабхи. там̣ ‘‘на та̄васса индрийа̄ни парипа̄кам̣ гата̄нӣ’’ти н̃атва̄ бхагава̄ ‘‘тит̣т̣ха твам̣, могхара̄джа, ан̃н̃о пуччхатӯ’’ти пат̣иккхипи. тато тиссаметтеййо аттано сам̣сайам̣ пуччханто ‘‘кодха̄’’ти га̄тхама̄ха. таттха кодха сантусситоти ко идха тут̣т̣хо. ин̃джита̄ти тан̣ха̄дит̣т̣хивиппхандита̄ни. убхантамабхин̃н̃а̄йа̄ти убхо анте абхиджа̄нитва̄. манта̄ на липпатӣти пан̃н̃а̄йа на липпати.

1048-9. тассетаматтхам̣ бйа̄каронто бхагава̄ ‘‘ка̄месӯ’’ти га̄тха̄двайама̄ха. таттха ка̄месу брахмачарийава̄ти ка̄манимиттам̣ брахмачарийава̄, ка̄месу а̄дӣнавам̣ дисва̄ маггабрахмачарийена саманна̄гатоти вуттам̣ хоти. етта̄вата̄ сантуситам̣ дассети, ‘‘вӣтатан̣хо’’тиа̄дӣхи анин̃джитам̣. таттха сан̇кха̄йа ниббутоти аничча̄дивасена дхамме вӣмам̣ситва̄ ра̄га̄динибба̄нена ниббуто. сесам̣ таттха таттха вуттанайатта̄ па̄кат̣амева.

евам̣ бхагава̄ имампи суттам̣ арахаттаникӯт̣енева десеси. десана̄парийоса̄не айампи бра̄хман̣о арахатте патит̣т̣ха̄си саддхим̣ антева̄сисахассена, ан̃н̃есан̃ча анекасахасса̄нам̣ дхаммачаккхум̣ удапа̄ди. сесам̣ пуббасадисамева̄ти.

параматтхаджотика̄йа кхуддака-ат̣т̣хакатха̄йа

суттанипа̄та-ат̣т̣хакатха̄йа тиссаметтеййасуттаван̣н̣ана̄ нит̣т̣хита̄.