8. гӯтхакха̄дакапетаваттхуван̣н̣ана̄

гӯтхакӯпато уггантва̄ти идам̣ саттхари джетаване вихаранте екам̣ гӯтхакха̄дакапетам̣ а̄рамбха вуттам̣. са̄ваттхийа̄ кира авидӯре ан̃н̃атарасмим̣ га̄маке еко кут̣умбико аттано кулӯпакам̣ бхиккхум̣ уддисса виха̄рам̣ ка̄реси. таттха на̄на̄джанападато бхиккхӯ а̄гантва̄ пат̣ивасим̣су. те дисва̄ манусса̄ пасанначитта̄ пан̣ӣтена паччайена упат̣т̣хахим̣су. кулӯпако бхиккху там̣ асахама̄но исса̄пакато хутва̄ тесам̣ бхиккхӯнам̣ досам̣ ваданто кут̣умбикам̣ уджджха̄песи. кут̣умбико те бхиккхӯ кулӯпакан̃ча парибхаванто парибха̄си. атха кулӯпако ка̄лам̣ катва̄ тасмим̣йева виха̄ре ваччакут̣ийам̣ пето хутва̄ ниббатти, кут̣умбико пана ка̄лам̣ катва̄ тассева упари пето хутва̄ ниббатти. атха̄йасма̄ маха̄моггалла̄но там̣ дисва̄ пуччханто –

766. ‘‘гӯтхакӯпато уггантва̄, ко на дӣно патит̣т̣хаси;

ниссам̣сайам̣ па̄пакамманто, ким̣ ну саддахасе тува’’нти. –

га̄тхама̄ха. там̣ сутва̄ пето –

767. ‘‘ахам̣ бхаданте петомхи, дуггато йамалокико;

па̄пакаммам̣ каритва̄на, петалокам̣ ито гато’’ти. –

га̄тха̄йа атта̄нам̣ а̄чиккхи. атха нам̣ тхеро –

768. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

киссакаммавипа̄кена, идам̣ дуккхам̣ нигаччхасӣ’’ти. –

га̄тха̄йа тена катакаммам̣ пуччхи. со пето –

769. ‘‘аху а̄ва̄сико майхам̣, иссукӣ куламаччхарӣ;

аджджха̄сито майхам̣ гхаре, кадарийо парибха̄сако.

770. ‘‘тасса̄хам̣ вачанам̣ сутва̄, бхиккхаво парибха̄сисам̣;

тассакаммавипа̄кена, петалокам̣ ито гато’’ти. –

двӣхи га̄тха̄хи аттана̄ катакаммам̣ катхеси.

769. таттха аху а̄ва̄сико майханти майхам̣ а̄ва̄се майа̄ катавиха̄ре еко бхиккху а̄ва̄сико нибаддхавасанако ахоси. аджджха̄сито майхам̣ гхарети кулӯпакабха̄вена мама гехе тан̣ха̄бхинивесавасена абхинивит̣т̣хо.

770. тасса̄ти тасса кулӯпакабхиккхусса. бхиккхавоти бхиккхӯ. парибха̄сисанти аккосим̣. петалокам̣ ито гатоти имина̄ а̄ка̄рена петайоним̣ упагато петабхӯто.

там̣ сутва̄ тхеро итарасса гатим̣ пуччханто –

771. ‘‘амитто миттаван̣н̣ена, йо те а̄си кулӯпако;

ка̄йасса бхеда̄ дуппан̃н̃о, ким̣ ну печча гатим̣ гато’’ти. –

га̄тхама̄ха. таттха миттаван̣н̣ена̄ти миттапат̣ирӯпена миттапат̣ирӯпата̄йа.

пуна пето тхерасса таматтхам̣ а̄чиккханто –

772. ‘‘тассева̄хам̣ па̄пакаммасса, сӣсе тит̣т̣ха̄ми маттхаке;

со ча парависайам̣ патто, мамева парича̄рако.

773. ‘‘йам̣ бхаданте хадантан̃н̃е, етам̣ ме хоти бходжанам̣;

ахан̃ча кхо йам̣ хада̄ми, етам̣ со упаджӣватӣ’’ти. – га̄тха̄двайама̄ха;

772. таттха тассева̄ти тассева майхам̣ пуббе кулӯпакабхиккхубхӯтасса петасса. па̄пакаммасса̄ти па̄пасама̄ча̄расса. сӣсе тит̣т̣ха̄ми маттхакети сӣсе тит̣т̣ха̄ми, тит̣т̣ханто ча маттхаке ева тит̣т̣ха̄ми, на сӣсаппама̄н̣е а̄ка̄сети аттхо. парависайам̣ паттоти мануссалокам̣ упа̄да̄йа парависайабхӯтам̣ петтивисайам̣ патто. мамева̄ти майхам̣ ева парича̄рако ахосӣти вачанасесо.

773. йам̣ бхаданте хадантан̃н̃ети бхаданте, аййа маха̄моггала̄на, тассам̣ ваччакут̣ийам̣ йам̣ ан̃н̃е ухаданти ваччам̣ оссаджанти. етам̣ ме хоти бходжананти етам̣ ваччам̣ майхам̣ дивасе дивасе бходжанам̣ хоти. йам̣ хада̄мӣти там̣ пана ваччам̣ кха̄дитва̄ йампахам̣ ваччам̣ кароми. етам̣ со упаджӣватӣти етам̣ мама ваччам̣ со кулӯпакапето дивасе дивасе кха̄данавасена упаджӣвати, аттабха̄вам̣ йа̄петӣти аттхо.

тесу кут̣умбико песале бхиккхӯ ‘‘евам̣ а̄ха̄рапарибхогато варам̣ тумха̄кам̣ гӯтхакха̄дана’’нти аккоси. кулӯпако пана кут̣умбикампи татха̄вачане сама̄дапетва̄ сайам̣ татха̄ аккоси, тенасса татопи пат̣икут̣т̣хатара̄ джӣвика̄ ахоси. а̄йасма̄ маха̄моггалла̄но там̣ паваттим̣ бхагавато а̄рочеси. бхагава̄ таматтхам̣ ат̣т̣хуппаттим̣ катва̄ упава̄де а̄дӣнавам̣ дассетва̄ сампаттапариса̄йа дхаммам̣ десеси. са̄ десана̄ маха̄джанасса са̄ттхика̄ ахосӣти.

гӯтхакха̄дакапетаваттхуван̣н̣ана̄ нит̣т̣хита̄.