8. дутийамигалуддакапетаваттхуван̣н̣ана̄

кӯт̣а̄га̄ре ча па̄са̄дети идам̣ бхагавати вел̣уване вихаранте апарам̣ мигалуддакапетам̣ а̄раббха вуттам̣. ра̄джагахе кира ан̃н̃атаро ма̄гавико ма̄н̣аво вибхавасампаннопи сама̄но бхогасукхам̣ паха̄йа раттиндивам̣ миге хананто вичарати. тасса саха̄йабхӯто еко упа̄сако ануддайам̣ пат̣ичча – ‘‘са̄дху, самма, па̄н̣а̄типа̄тато вирама̄хи, ма̄ те ахоси дӣгхараттам̣ ахита̄йа дуккха̄йа̄’’ти ова̄дам̣ ада̄си. со там̣ ана̄дийи. атха со упа̄сако ан̃н̃атарам̣ аттано манобха̄ванӣйам̣ кхӣн̣а̄саваттхерам̣ йа̄чи – ‘‘са̄дху, бханте, асукапурисасса татха̄ дхаммам̣ десетха, йатха̄ со па̄н̣а̄типа̄тато вирамеййа̄’’ти.

атхекадивасам̣ со тхеро ра̄джагахе пин̣д̣а̄йа чаранто тасса гехадва̄ре ат̣т̣ха̄си. там̣ дисва̄ со ма̄гавико сан̃джа̄табахума̄но паччуггантва̄ гехам̣ павесетва̄ а̄санам̣ пан̃н̃а̄петва̄ ада̄си. нисӣди тхеро пан̃н̃атте а̄сане, сопи тхерам̣ упасан̇камитва̄ нисӣди. тасса тхеро па̄н̣а̄типа̄те а̄дӣнавам̣, тато виратийа̄ а̄нисам̣сан̃ча пака̄сеси. со там̣ сутва̄пи тато вирамитум̣ на иччхи. атха нам̣ тхеро а̄ха – ‘‘саче, твам̣ а̄вусо, саббена саббам̣ вирамитум̣ на саккоси, раттимпи та̄ва вирамассӯ’’ти, со ‘‘са̄дху, бханте, вирама̄ми ратти’’нти тато вирами. сесам̣ анантараваттхусадисам̣. га̄тха̄су пана –

488. ‘‘кӯт̣а̄га̄ре ча па̄са̄де, паллан̇ке гонакаттхате;

пан̃чан̇гикена турийена, рамаси суппава̄дите.

489. ‘‘тато ратйа̄ виваса̄не, сӯрийуггаманам̣ пати;

апавиддхо суса̄насмим̣, бахудуккхам̣ нигаччхаси.

490. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

киссакаммавипа̄кена, идам̣ дуккхам̣ нигаччхасӣ’’ти. –

тӣхи га̄тха̄хи на̄радаттхеро нам̣ пат̣ипуччхи. атхасса пето –

491. ‘‘ахам̣ ра̄джагахе рамме, раман̣ӣйе гириббадже;

мигалуддо пуре а̄сим̣, луддо ча̄симасан̃н̃ато.

492. ‘‘тасса ме саха̄йо сухадайо, саддхо а̄си упа̄сако;

тасса кулӯпако бхиккху, а̄си готамаса̄вако;

сопи мам̣ анукампанто, нива̄реси пунаппунам̣.

493. ‘‘‘ма̄ка̄си па̄пакам̣ каммам̣, ма̄ та̄та дуггатим̣ ага̄;

саче иччхаси печча сукхам̣, вирама па̄н̣авадха̄ асам̣йама̄’.

494. ‘‘тасса̄хам̣ вачанам̣ сутва̄, сукхака̄масса хита̄нукампино;

на̄ка̄сим̣ сакала̄нуса̄саним̣, чирапа̄па̄бхирато абуддхима̄.

495. ‘‘со мам̣ пуна бхӯрисумедхасо, анукампа̄йа сам̣йаме нивесайи;

‘саче дива̄ ханаси па̄н̣ино, атха те раттим̣ бхавату сам̣йамо’.

496. ‘‘сва̄хам̣ дива̄ ханитва̄ па̄н̣ино, вирато раттимахоси сан̃н̃ато;

ратта̄хам̣ парича̄реми, дива̄ кхаджджа̄ми дуггато.

497. ‘‘тасса каммасса кусаласса, анубхоми раттим̣ ама̄нусим̣;

дива̄ пат̣ихата̄ва куккура̄, упадха̄ванти саманта̄ кха̄дитум̣.

498. ‘‘йе ча те сатата̄нуйогино, дхувам̣ пайутта̄ сугатасса са̄сане;

ман̃н̃а̄ми те аматамева кевалам̣, адхигаччханти падам̣ асан̇кхата’’нти. –

таматтхам̣ а̄чиккхи. та̄сам̣ аттхо хет̣т̣ха̄ вуттанайова.

дутийамигалуддакапетаваттхуван̣н̣ана̄ нит̣т̣хита̄.