4. нанда̄петиваттхуван̣н̣ана̄

ка̄л̣ӣ дуббан̣н̣арӯпа̄сӣти идам̣ саттхари джетаване вихаранте нандам̣ на̄ма петим̣ а̄раббха вуттам̣. са̄ваттхийа̄ кира авидӯре ан̃н̃атарасмим̣ га̄маке нандисено на̄ма упа̄сако ахоси саддхо пасанно. бхарийа̄ панасса нанда̄ на̄ма ассаддха̄ аппасанна̄ маччхаринӣ чан̣д̣ӣ пхарусавачана̄ са̄мике ага̄рава̄ аггатисса̄ сассум̣ чорива̄дена аккосати парибха̄сати. са̄ апарена самайена ка̄лам̣ катва̄ петайонийам̣ ниббаттитва̄ тассева га̄масса авидӯре вичарантӣ екадивасам̣ нандисенасса упа̄сакасса га̄мато никкхамантасса авидӯре атта̄нам̣ дассеси. со там̣ дисва̄ –

168. ‘‘ка̄л̣ӣ дуббан̣н̣арӯпа̄си, пхаруса̄ бхӣрудассана̄;

пин̇гала̄си кал̣а̄ра̄си, на там̣ ман̃н̃а̄ми ма̄нуси’’нти. –

га̄тха̄йа аджджхабха̄си. таттха ка̄л̣ӣти ка̄л̣аван̣н̣а̄, джха̄ман̇га̄расадисо хисса̄ ван̣н̣о ахоси. пхаруса̄ти кхарагатта̄. бхӣрудассана̄ти бхайа̄накадассана̄ саппат̣ибхайа̄ка̄ра̄. ‘‘бха̄рудассана̄’’ти ва̄ па̄т̣хо, бха̄рийадассана̄, дуббан̣н̣ата̄дина̄ дуддасика̄ти аттхо. пин̇гала̄ти пин̇галалочана̄. кал̣а̄ра̄ти кал̣а̄раданта̄. на там̣ ман̃н̃а̄ми ма̄нусинти ахам̣ там̣ ма̄нусинти на ман̃н̃а̄ми, петимева ча там̣ ман̃н̃а̄мӣти адхиппа̄йо. там̣ сутва̄ петӣ атта̄нам̣ пака̄сентӣ –

169. ‘‘ахам̣ нанда̄ нандисена, бхарийа̄ те пуре ахум̣;

па̄пакаммам̣ каритва̄на, петалокам̣ ито гата̄’’ти. –

га̄тхама̄ха. таттха ахам̣ нанда̄ нандисена̄ти са̄ми нандисена ахам̣ нанда̄ на̄ма. бхарийа̄ те пуре ахунти пуримаджа̄тийам̣ туйхам̣ бхарийа̄ ахосим̣. ито парам̣ –

170. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

кисса каммавипа̄кена, петалокам̣ ито гата̄’’ти. –

тасса упа̄сакасса пуччха̄. атхасса са̄ –

171. ‘‘чан̣д̣ӣ ча пхаруса̄ ча̄сим̣, тайи ча̄пи ага̄рава̄;

та̄хам̣ дуруттам̣ ватва̄на, петалокам̣ ито гата̄’’ти. –

виссаджджеси. пуна со –

172. ‘‘хандуттарӣйам̣ дада̄ми те, имам̣ дуссам̣ нива̄сайа;

имам̣ дуссам̣ нива̄сетва̄, ехи несса̄ми там̣ гхарам̣.

173. ‘‘ваттхан̃ча аннапа̄нан̃ча, лаччхаси твам̣ гхарам̣ гата̄;

путте ча те пассиссаси, сун̣иса̄йо ча даккхасӣ’’ти. – атхасса са̄ –

174. ‘‘хаттхена хаттхе те диннам̣, на майхам̣ упакаппати;

бхиккхӯ ча сӣласампанне, вӣтара̄ге бахуссуте.

175. ‘‘таппехи аннапа̄нена, мама даккхин̣ама̄диса;

тада̄хам̣ сукхита̄ хессам̣, саббака̄масамиддхинӣ’’ти. –

две га̄тха̄ абха̄си. тато –

176. ‘‘са̄дхӯти со пат̣иссутва̄, да̄нам̣ випулама̄кири;

аннам̣ па̄нам̣ кха̄данӣйам̣, ваттхасена̄сана̄ни ча;

чхаттам̣ гандхан̃ча ма̄лан̃ча, вивидха̄ ча упа̄хана̄.

177. ‘‘бхиккхӯ ча сӣласампанне, вӣтара̄ге бахуссуте;

таппетва̄ аннапа̄нена, тасса̄ даккхин̣ама̄дисӣ.

178. ‘‘саманантара̄нуддит̣т̣хе, випа̄ко удападжджатха;

бходжаначчха̄данапа̄нӣйам̣, даккхин̣а̄йа идам̣ пхалам̣.

179. ‘‘тато суддха̄ сучивасана̄, ка̄сикуттамадха̄ринӣ;

вичиттаваттха̄бхаран̣а̄, са̄микам̣ упасан̇камӣ’’ти. –

чатассо га̄тха̄ сан̇гӣтика̄рехи вутта̄. тато парам̣ –

180. ‘‘абхиккантена ван̣н̣ена, йа̄ твам̣ тит̣т̣хаси девате;

обха̄сентӣ диса̄ сабба̄, осадхӣ вийа та̄рака̄.

181. ‘‘кена тета̄дисо ван̣н̣о, кена те идха миджджхати;

уппаджджанти ча те бхога̄, йе кечи манасо пийа̄.

182. ‘‘пуччха̄ми там̣ деви маха̄нубха̄ве, мануссабхӯта̄ кимака̄си пун̃н̃ам̣;

кена̄си евам̣ джалита̄нубха̄ва̄, ван̣н̣о ча те саббадиса̄ пабха̄сатӣ’’ти.

183. ‘‘ахам̣ нанда̄ нандисена, бхарийа̄ те пуре ахум̣;

па̄пакаммам̣ каритва̄на, петалокам̣ ито гата̄.

184. ‘‘тава диннена да̄нена, мода̄ми акутобхайа̄;

чирам̣ джӣва гахапати, саха саббехи н̃а̄тибхи;

асокам̣ вираджам̣ кхемам̣, а̄ва̄сам̣ васаваттинам̣.

185. ‘‘идха дхаммам̣ чаритва̄на, да̄нам̣ датва̄ гахапати;

винеййа маччхерамалам̣ самӯлам̣, аниндито саггамупехи т̣ха̄на’’нти. –

упа̄сакасса ча петийа̄ ча вачанапат̣ивачанага̄тха̄.

176. таттха да̄нам̣ випулама̄кирӣти уккхин̣еййакхетте деййадхаммабӣджам̣ виппакиранто вийа маха̄да̄нам̣ паваттеси. сесам̣ анантараваттхусадисамева.

евам̣ са̄ аттано диббасампаттим̣ тасса̄ ча ка̄ран̣ам̣ нандисенасса вибха̄ветва̄ аттано васанат̣т̣ха̄намева гата̄. упа̄сако там̣ паваттим̣ бхиккхӯнам̣ а̄рочеси, бхиккхӯ бхагавато а̄рочесум̣. бхагава̄ таматтхам̣ ат̣т̣хуппаттим̣ катва̄ сампаттапариса̄йа дхаммам̣ десеси. са̄ десана̄ маха̄джанасса са̄ттхика̄ ахосӣти.

нанда̄петиваттхуван̣н̣ана̄ нит̣т̣хита̄.