8. гон̣апетаваттхуван̣н̣ана̄

ким̣ ну умматтарӯпо ва̄ти идам̣ саттха̄ джетаване вихаранто ан̃н̃атарам̣ матапитикам̣ кут̣умбикам̣ а̄раббха катхеси. са̄ваттхийам̣ кира ан̃н̃атарасса кут̣умбикасса пита̄ ка̄ламака̄си. со питу маран̣ена сокасантаттахадайо родама̄но умматтако пийа вичаранто йам̣ йам̣ пассати, там̣ там̣ пуччхати – ‘‘апи ме питарам̣ пасситтха̄’’ти? на кочи тасса сокам̣ винодетум̣ асаккхи. тасса пана хадайе гхат̣е падӣпо вийа сота̄паттипхаласса упаниссайо паджджалати.

саттха̄ паччӯсасамайе локам̣ олокенто тасса сота̄паттипхаласса упаниссайам̣ дисва̄ ‘‘имасса атӣтака̄ран̣ам̣ а̄харитва̄ сокам̣ вӯпасаметва̄ сота̄паттипхалам̣ да̄тум̣ ват̣т̣атӣ’’ти чинтетва̄ пунадивасе паччха̄бхаттам̣ пин̣д̣апа̄тапат̣икканто паччха̄саман̣ам̣ ана̄да̄йа тасса гхарадва̄рам̣ агама̄си. со ‘‘саттха̄ а̄гато’’ти сутва̄ паччуггантва̄ саттха̄рам̣ гехам̣ павесетва̄ саттхари пан̃н̃атте а̄сане нисинне сайам̣ бхагавантам̣ вандитва̄ екамантам̣ нисинно ‘‘ким̣, бханте, майхам̣ питу гатат̣т̣ха̄нам̣ джа̄на̄тха̄’’ти а̄ха. атха нам̣ саттха̄, ‘‘упа̄сака, ким̣ имасмим̣ аттабха̄ве питарам̣ пуччхаси, уда̄ху атӣте’’ти а̄ха. со там̣ вачанам̣ сутва̄ ‘‘бахӯ кира майхам̣ питаро’’ти танубхӯтасоко тхокам̣ маджджхаттатам̣ пат̣илабхи. атхасса саттха̄ сокавиноданам̣ дхаммакатхам̣ катва̄ апагатасокам̣ каллачиттам̣ видитва̄ са̄муккам̣сика̄йа дхаммадесана̄йа сота̄паттипхале патит̣т̣ха̄петва̄ виха̄рам̣ агама̄си.

атха бхиккхӯ дхаммасабха̄йам̣ катхам̣ самут̣т̣ха̄песум̣ – ‘‘пассатха, а̄вусо, буддха̄нубха̄вам̣, татха̄ сокапаридевасама̄панно упа̄сако кхан̣енева бхагавата̄ сота̄паттипхале винӣто’’ти. саттха̄ таттха гантва̄ пан̃н̃аттаварабуддха̄сане нисинно ‘‘ка̄йа нуттха, бхиккхаве, етарахи катха̄йа саннисинна̄’’ти пуччхи. бхиккхӯ таматтхам̣ бхагавато а̄рочесум̣. саттха̄ ‘‘на, бхиккхаве, ида̄нева майа̄ имасса соко апанӣто, пуббепи апанӣтойева̄’’ти ватва̄ техи йа̄чито атӣтам̣ а̄хари.

атӣте ба̄ра̄н̣асийам̣ ан̃н̃атарасса гахапатикасса пита̄ ка̄ламака̄си. со питу маран̣ена сокапаридевасама̄панно ассумукхо раттаккхо канданто читакам̣ падаккхин̣ам̣ кароти. тасса путто суджа̄то на̄ма кума̄ро пан̣д̣ито бйатто буддхисампанно питусокавинайанӯпа̄йам̣ чинтенто екадивасам̣ бахинагаре екам̣ матагон̣ам̣ дисва̄ тин̣ан̃ча па̄нӣйан̃ча а̄харитва̄ тасса пурато т̣хапетва̄ ‘‘кха̄да, кха̄да, пива, пива̄’’ти ваданто ат̣т̣ха̄си. а̄гата̄гата̄ там̣ дисва̄ ‘‘самма суджа̄та, ким̣ умматтакоси, йо твам̣ матасса гон̣асса тин̣одакам̣ упанесӣ’’ти ваданти? со на кин̃чи пат̣ивадати. манусса̄ тасса питу сантикам̣ гантва̄ ‘‘путто те умматтако джа̄то, матагон̣асса тин̣одакам̣ детӣ’’ти а̄хам̣су. там̣ сутва̄ ча кут̣умбикасса питарам̣ а̄раббха т̣хито соко апагато. со ‘‘майхам̣ кира путто умматтако джа̄то’’ти сам̣вегаппатто вегена гантва̄ ‘‘нану твам̣, та̄та суджа̄та, пан̣д̣ито бйатто буддхисампанно, касма̄ матагон̣асса тин̣одакам̣ десӣ’’ти чоденто –

46. ‘‘ким̣ ну умматтарӯпова, ла̄йитва̄ харитам̣ тин̣ам̣;

кха̄да кха̄да̄ти лапаси, гатасаттам̣ джараггавам̣.

47. ‘‘на хи аннена па̄нена, мато гон̣о самут̣т̣хахе;

твам̣си ба̄ло ча думмедхо, йатха̄ тан̃н̃ова думматӣ’’ти. –

га̄тха̄двайама̄ха. таттха ким̣ нӯти пуччха̄вачанам̣. умматтарӯпова̄ти умматтакасабха̄во вийа читтаккхепам̣ патто вийа. ла̄йитва̄ти лавитва̄. харитам̣ тин̣анти аллатин̣ам̣. лапаси вилапаси. гатасаттанти вигатаджӣвитам̣. джараггаванти балибаддам̣ джин̣н̣агон̣ам̣. аннена па̄нена̄ти тайа̄ диннена харитатин̣ена ва̄ па̄нӣйена ва̄. мато гон̣о самут̣т̣хахети ка̄лакато гон̣о ладдхаджӣвито хутва̄ на хи самут̣т̣хахеййа. твам̣си ба̄ло ча думмедхоти твам̣ ба̄лйайогато ба̄ло, медха̄сан̇кха̄та̄йа пан̃н̃а̄йа абха̄вато думмедхо аси. йатха̄ тан̃н̃ова думматӣти йатха̄ там̣ ан̃н̃опи ниппан̃н̃о виппалапеййа, евам̣ твам̣ нираттхакам̣ виппалапасӣти аттхо. йатха̄ танти нипа̄таматтам̣.

там̣ сутва̄ суджа̄то питарам̣ сан̃н̃а̄петум̣ аттано адхиппа̄йам̣ пака̄сенто –

48. ‘‘име па̄да̄ идам̣ сӣсам̣, айам̣ ка̄йо сава̄ладхи;

нетта̄ татхева тит̣т̣ханти, айам̣ гон̣о самут̣т̣хахе.

49. ‘‘на̄ййакасса хаттхапа̄да̄, ка̄йо сӣсан̃ча диссати;

рудам̣ маттикатхӯпасмим̣, нану тван̃н̃ева думматӣ’’ти. –

га̄тха̄двайам̣ абха̄си. тассаттхо – имасса гон̣асса име чатта̄ро па̄да̄, идам̣ сӣсам̣, саха ва̄ладхина̄ ваттатӣти сава̄ладхи айам̣ ка̄йо. има̄ни ча нетта̄ найана̄ни йатха̄ маран̣ато пуббе, татхева абхиннасан̣т̣ха̄на̄ни тит̣т̣ханти. айам̣ гон̣о самут̣т̣хахети имасма̄ ка̄ран̣а̄ айам̣ гон̣о самут̣т̣хахеййа самуттит̣т̣хеййа̄ти мама читтам̣ бхавеййа. ‘‘ман̃н̃е гон̣о самут̣т̣хахе’’ти кечи пат̣ханти, тена ка̄ран̣ена айам̣ гон̣о сахаса̄пи ка̄йам̣ самут̣т̣хахеййа̄ти ахам̣ ман̃н̃еййам̣, евам̣ ме ман̃н̃ана̄ самбхавеййа̄ти адхиппа̄йо. аййакасса пана майхам̣ пита̄махасса на хаттхапа̄да̄ ка̄йо сӣсам̣ диссати, кевалам̣ пана тасса ат̣т̣хика̄ни паккхипитва̄ кате маттика̄майе тхӯпе руданто сатагун̣ена сахассагун̣ена, та̄та, тван̃н̃ева думмати ниппан̃н̃о, бхиджджанадхамма̄ сан̇кха̄ра̄ бхиджджанти, таттха виджа̄натам̣ ка̄ паридевана̄ти питу дхаммам̣ катхеси.

там̣ сутва̄ бодхисаттасса пита̄ ‘‘мама мутто пан̣д̣ито мам̣ сан̃н̃а̄петум̣ имам̣ каммам̣ ака̄сӣ’’ти чинтетва̄ ‘‘та̄та суджа̄та, ‘саббепи сатта̄ маран̣адхамма̄’ти ан̃н̃а̄таметам̣, ито пат̣т̣ха̄йа на сочисса̄ми, сокахаран̣асаматтхена на̄ма медха̄вина̄ та̄дисенева бхавитабба’’нти путтам̣ пасам̣санто –

50. ‘‘а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

51. ‘‘аббахӣ вата ме саллам̣, сокам̣ хадайанисситам̣;

йо ме сокапаретасса, питусокам̣ апа̄нуди.

52. ‘‘сва̄хам̣ аббӯл̣хасаллосми, сӣтибхӯтосми ниббуто;

на соча̄ми на рода̄ми, тава сутва̄на ма̄н̣ава.

53. ‘‘евам̣ каронти саппан̃н̃а̄, йе хонти анукампака̄;

виниваттайанти сокамха̄, суджа̄то питарам̣ йатха̄’’ти. –

чатассо га̄тха̄ абха̄си. таттха а̄диттанти сокаггина̄ а̄диттам̣ джалитам̣. сантанти сама̄нам̣. па̄ваканти агги. ва̄рина̄ вийа осин̃чанти удакена авасин̃чанто вийа. саббам̣ нибба̄пайе даранти саббам̣ ме читтадаратхам̣ нибба̄песи. аббахӣ вата̄ти нӣхари вата. салланти сокасаллам̣. хадайанисситанти читтасаннисситасаллабхӯтам̣. сокапаретасса̄ти сокена абхибхӯтасса. питусоканти питарам̣ а̄раббха уппаннам̣ сокам̣. апа̄нудӣти апанеси. тава сутва̄на ма̄н̣ава̄ти, кума̄ра, тава вачанам̣ сутва̄ ида̄ни пана на соча̄ми на рода̄ми. суджа̄то питарам̣ йатха̄ти йатха̄ айам̣ суджа̄то аттано питарам̣ сокато виниваттеси, евам̣ ан̃н̃епи йе анукампака̄ анугган̣хасӣла̄ хонти, те саппан̃н̃а̄ евам̣ каронти питӯнам̣ ан̃н̃есан̃ча упака̄рам̣ каронтӣти аттхо.

ма̄н̣авасса вачанам̣ сутва̄ пита̄ апагатасоко хутва̄ сӣсам̣ наха̄йитва̄ бхун̃джитва̄ камманте паваттетва̄ ка̄лам̣ катва̄ саггапара̄йан̣о ахоси. саттха̄ имам̣ дхаммадесанам̣ а̄харитва̄ тесам̣ бхиккхӯнам̣ сачча̄ни пака̄сеси, саччапарийоса̄не бахӯ сота̄паттипхала̄дӣсу патит̣т̣хахим̣су. тада̄ суджа̄то локана̄тхо ахосӣти.

гон̣апетаваттхуван̣н̣ана̄ нит̣т̣хита̄.