7. саттапуттакха̄дакапетиваттхуван̣н̣ана̄

нагга̄ дуббан̣н̣арӯпа̄сӣти идам̣ саттхари са̄ваттхийам̣ вихаранте саттапуттакха̄дакапетим̣ а̄раббха вуттам̣. са̄ваттхийа̄ кира авидӯре ан̃н̃атарасмим̣ га̄маке ан̃н̃атарасса упа̄сакасса две путта̄ ахесум̣ – пат̣хамавайе т̣хита̄ рӯпасампанна̄ сӣла̄ча̄рена саманна̄гата̄. тесам̣ ма̄та̄ ‘‘путтаватӣ аха’’нти путтабалена бхатта̄рам̣ атиман̃н̃ати. со бхарийа̄йа авама̄нито ниббиннама̄насо ан̃н̃ам̣ кан̃н̃ам̣ а̄неси. са̄ начирассева габбхинӣ ахоси. атхасса джет̣т̣хабхарийа̄ исса̄паката̄ ан̃н̃атарам̣ веджджам̣ а̄мисена упала̄петва̄ тена тасса̄ тема̄сикам̣ габбхам̣ па̄теси. атха са̄ н̃а̄тӣхи ча бхатта̄ра̄ ча ‘‘тайа̄ имисса̄ габбхо па̄тито’’ти пут̣т̣ха̄ ‘‘на̄хам̣ па̄темӣ’’ти муса̄ ватва̄ техи асаддахантехи ‘‘сапатхам̣ карохӣ’’ти вутта̄ ‘‘са̄йам̣ па̄там̣ сатта сатта путте виджа̄йитва̄ путтамам̣са̄ни кха̄да̄ми, ниччам̣ дуггандха̄ ча маккхика̄парикин̣н̣а̄ ча бхавеййа’’нти сапатхам̣ ака̄си.

са̄ апарена самайена ка̄лам̣ катва̄ тасса габбхапа̄танасса муса̄ва̄дасса ча пхаленева петайонийам̣ ниббаттитва̄ путтанайена путтамам̣са̄ни кха̄дантӣ тассева га̄масса авидӯре вичарати. тена ча самайена самбахула̄ тхера̄ га̄мака̄ва̄се вуттхавасса̄ бхагавантам̣ дассана̄йа са̄ваттхим̣ а̄гаччханта̄ тасса га̄масса авидӯре екасмим̣ падесе раттийам̣ ва̄сам̣ каппесум̣. атха са̄ петӣ тесам̣ тхера̄нам̣ атта̄нам̣ дассеси. там̣ маха̄тхеро га̄тха̄йа пуччхи –

35. ‘‘нагга̄ дуббан̣н̣арӯпа̄си, дуггандха̄ пӯти ва̄йаси;

маккхика̄хи парикин̣н̣а̄, ка̄ ну твам̣ идха тит̣т̣хасӣ’’ти.

са̄ тхерена пут̣т̣ха̄ тӣхи га̄тха̄хи пат̣ивачанам̣ ада̄си –

36. ‘‘ахам̣ бхаданте петӣмхи, дуггата̄ йамалокика̄;

па̄пакаммам̣ каритва̄на, петалокам̣ ито гата̄.

37. ‘‘ка̄лена сатта путта̄ни, са̄йам̣ сатта пуна̄паре;

виджа̄йитва̄на кха̄да̄ми, тепи на̄ хонти ме алам̣.

38. ‘‘парид̣айхати дхӯма̄йати, кхуда̄йа хадайам̣ мама;

ниббутим̣ на̄дхигаччха̄ми, аггидад̣д̣ха̄ва а̄тапе’’ти.

38. таттха ниббутинти кхуппипа̄са̄дуккхасса вӯпасамам̣. на̄дхигаччха̄мӣти на лабха̄ми. аггидад̣д̣ха̄ва а̄тапети атиун̣хаа̄тапе аггина̄ д̣айхама̄на̄ вийа ниббутим̣ на̄дхигаччха̄мӣти йоджана̄.

там̣ сутва̄ маха̄тхеро та̄йа катакаммам̣ пуччханто –

39. ‘‘ким̣ ну ка̄йена ва̄ча̄йа, манаса̄ дуккат̣ам̣ катам̣;

киссакаммавипа̄кена, путтамам̣са̄ни кха̄дасӣ’’ти. – га̄тхама̄ха;

атха са̄ петӣ аттано петалокӯпапаттин̃ча путтамам̣сакха̄данака̄ран̣ан̃ча катхентӣ –

40. ‘‘ахӯ майхам̣ дуве путта̄, убхо сампаттайоббана̄;

са̄хам̣ путтабалӯпета̄, са̄микам̣ атиман̃н̃исам̣.

41. ‘‘тато ме са̄мико куддхо, сапатим̣ майхама̄найи;

са̄ ча габбхам̣ алабхиттха, тасса̄ па̄пам̣ ачетайим̣.

42. ‘‘са̄хам̣ падут̣т̣хаманаса̄, акарим̣ габбхапа̄танам̣;

тасса тема̄сико габбхо, пӯтилохитако пати.

43. ‘‘тадасса̄ ма̄та̄ купита̄, майхам̣ н̃а̄тӣ сама̄найи;

сапатхан̃ча мам̣ ка̄реси, парибха̄са̄пайӣ ча мам̣.

44. ‘‘са̄хам̣ гхоран̃ча сапатхам̣, муса̄ва̄дам̣ абха̄сисам̣;

‘путтамам̣са̄ни кха̄да̄ми, саче там̣ пакатам̣ майа̄’.

45. ‘‘тасса каммасса випа̄кена, муса̄ва̄дасса чӯбхайам̣;

путтамам̣са̄ни кха̄да̄ми, пуббалохитамаккхита̄’’ти. – има̄ га̄тха̄ абха̄си;

40-45. таттха путтабалӯпета̄ти путтабалена упета̄, путта̄нам̣ васена ладдхабала̄. атиман̃н̃исанти атиккамитва̄ ман̃н̃им̣ аваман̃н̃им̣. пӯтилохитако патӣти кун̣апалохитам̣ хутва̄ габбхо парипати. сесам̣ саббам̣ анантарасадисамева. таттха ат̣т̣ха тхера̄, идха самбахула̄. таттха пан̃ча путта̄, идха сатта̄ти айамева висесоти.

саттапуттакха̄дакапетиваттхуван̣н̣а̄на̄ нит̣т̣хита̄.