40. дассанависуддхин̃а̄н̣аниддесаван̣н̣ана̄

91. дассанависуддхин̃а̄н̣аниддесе саббе дхамма̄ екасан̇гахита̄ти саббе сан̇кхата̄сан̇кхата̄ дхамма̄ екена сан̇гахита̄ париччхинна̄. татхат̣т̣хена̄ти бхӯтат̣т̣хена, аттано аттано сабха̄вавасена виджджама̄наттхена̄ти аттхо. анаттат̣т̣хена̄ти ка̄ракаведакасан̇кха̄тена аттана̄ рахитат̣т̣хена. саччат̣т̣хена̄ти ависам̣ва̄дакат̣т̣хена, аттано сабха̄ван̃н̃атхатта̄бха̄вена̄ти аттхо. пат̣иведхат̣т̣хена̄ти сабха̄вато н̃а̄н̣ена пат̣ивиджджхитаббат̣т̣хена. идха локуттаран̃а̄н̣ена асаммохато а̄рамман̣ато ча пат̣иведхо ведитаббо. абхиджа̄нанат̣т̣хена̄ти локикена н̃а̄н̣ена а̄рамман̣ато, локуттарена н̃а̄н̣ена асаммохато а̄рамман̣ато ча тесам̣ тесам̣ дхамма̄нам̣ сабха̄вато абхиджа̄нитаббат̣т̣хена. ‘‘саббам̣, бхиккхаве, абхин̃н̃еййа’’нти (сам̣. ни. 4.46) хи вуттам̣. париджа̄нанат̣т̣хена̄ти вуттанайенева локийалокуттарехи н̃а̄н̣ехи сабха̄вато абхин̃н̃а̄та̄нам̣ дхамма̄нам̣ аничча̄дито ниййа̄на̄дито ча париччхиндитва̄ джа̄нитаббат̣т̣хена. ‘‘саббам̣, бхиккхаве, парин̃н̃еййа’’нти хи вуттам̣. дхаммат̣т̣хена̄ти сабха̄вадха̄ран̣а̄дина̄ дхаммат̣т̣хена. дха̄тут̣т̣хена̄ти ниджджӣвата̄дина̄ дха̄тут̣т̣хена. н̃а̄тат̣т̣хена̄ти локийалокуттарехи н̃а̄н̣ехи н̃а̄тум̣ саккун̣еййат̣т̣хена. йатха̄ дат̣т̣хум̣ саккун̣еййа̄дина̄ аттхена ‘‘дит̣т̣хам̣ сутам̣ мутам̣ вин̃н̃а̄там̣ рӯпа’’нти вуттам̣, евамидха̄пи н̃а̄тум̣ саккун̣еййат̣т̣хо н̃а̄тат̣т̣хоти ведитаббо. саччхикирийат̣т̣хена̄ти а̄рамман̣ато паччаккхака̄таббат̣т̣хена. пхусанат̣т̣хена̄ти паччаккхакатасса а̄рамман̣ато пунаппунам̣ пхуситаббат̣т̣хена. абхисамайат̣т̣хена̄ти локикена н̃а̄н̣ена абхисама̄гантаббат̣т̣хена. кин̃ча̄пи хи ‘‘татхат̣т̣хе пан̃н̃а̄ саччавиват̣т̣е н̃а̄н̣ам̣, абхин̃н̃а̄пан̃н̃а̄ н̃а̄тат̣т̣хе н̃а̄н̣ам̣, саччхикирийа̄пан̃н̃а̄ пхассанат̣т̣хе н̃а̄н̣а’’нти екекамева н̃а̄н̣ам̣ вуттам̣. ат̣т̣хакатха̄йан̃ча –

‘‘самава̄йе кхан̣е ка̄ле, самӯхе хетудит̣т̣хису;

пат̣ила̄бхе паха̄не ча, пат̣иведхе ча диссатӣ’’ти . –

га̄тха̄ван̣н̣ана̄йам̣ абхисамайасаддасса пат̣иведхаттхо вутто, идха пана йатха̄вуттена аттхена тесам̣ на̄наттам̣ ведитаббам̣. ат̣т̣хакатха̄йамева хи со локийан̃а̄н̣авасена дхамма̄бхисамайо вуттоти.

ка̄маччхандо на̄наттанти виккхепасаббха̄вато на̄на̄рамман̣атта̄ ча на̄на̄сабха̄воти аттхо. евам̣ саббакилеса̄ ведитабба̄. неккхаммам̣ екаттанти читтекаггата̄саббха̄вато на̄на̄рамман̣авиккхепа̄бха̄вато ча екасабха̄ванти аттхо. евам̣ саббакусала̄ ведитабба̄. идха пеййа̄лена сам̣кхитта̄нам̣ бйа̄па̄да̄дӣнам̣ акусала̄нам̣ йатха̄вуттена аттхена на̄наттам̣ ведитаббам̣. витаккавича̄ра̄дӣнам̣ пана хет̣т̣хима̄нам̣ хет̣т̣хима̄нам̣ упаримато упаримато ол̣а̄рикат̣т̣хена на̄наттам̣ ведитаббам̣. йасма̄ екасан̇гахитана̄наттекатта̄нам̣ пат̣иведхо маггаккхан̣е саччапат̣иведхена сиджджхати, тасма̄ ‘‘пат̣иведхо’’ти падам̣ уддхаритва̄ сачча̄бхисамайам̣ дассеси.

парин̃н̃а̄ пат̣иведхам̣ пат̣ивиджджхатӣти парин̃н̃а̄бхисамайена абхисамети. еса найо сесесу. сачча̄бхисамайака̄ласмин̃хи магган̃а̄н̣асса екаккхан̣е парин̃н̃а̄, паха̄нам̣, саччхикирийа̄, бха̄вана̄ти чатта̄ри кичча̄ни хонти. йатха̄ на̄ва̄ апуббам̣ ачаримам̣ екаккхан̣е чатта̄ри кичча̄ни кароти, оримам̣ тӣрам̣ паджахати, сотам̣ чхиндати, бхан̣д̣ам̣ вахати, па̄римам̣ тӣрам̣ аппети, евамева магган̃а̄н̣ам̣ апуббам̣ ачаримам̣ екаккхан̣е чатта̄ри сачча̄ни абхисамети, дуккхам̣ парин̃н̃а̄бхисамайена абхисамети, самудайам̣ паха̄на̄бхисамайена абхисамети, маггам̣ бха̄вана̄бхисамайена абхисамети, ниродхам̣ саччхикирийа̄бхисамайена абхисамети. ким̣ вуттам̣ хоти? ниродхам̣ а̄рамман̣ам̣ катва̄ киччавасена чатта̄рипи сачча̄ни па̄пун̣а̄ти пассати пат̣ивиджджхатӣти. йатха̄ оримам̣ тӣрам̣ паджахати, евам̣ магган̃а̄н̣ам̣ дуккхам̣ париджа̄на̄ти. йатха̄ сотам̣ чхиндати, евам̣ самудайам̣ паджахати. йатха̄ бхан̣д̣ам̣ вахати, евам̣ сахаджа̄та̄дипаччайата̄йа маггам̣ бха̄вети. йатха̄ па̄римам̣ тӣрам̣ аппети, евам̣ па̄риматӣрабхӯтам̣ ниродхам̣ саччхикаротӣти евам̣ упама̄сам̣санданам̣ ведитаббам̣.

дассанам̣ висуджджхатӣти там̣там̣маггаваджджхакилесатамаппаха̄нена н̃а̄н̣адассанам̣ висуддхибха̄вам̣ па̄пун̣а̄ти. дассанам̣ висуддханти тасса тасса пхаласса уппа̄даккхан̣е тасса тасса магган̃а̄н̣асса киччасиддхиппаттито н̃а̄н̣адассанам̣ висуддхибха̄вам̣ паттам̣ хоти. саббадхамма̄нам̣ екасан̇гахита̄йа на̄наттекаттапат̣иведхапан̃н̃а̄йа маггапхалан̃а̄н̣ехи сиддхито анте маггапхалан̃а̄н̣а̄ни вутта̄ни.

дассанависуддхин̃а̄н̣аниддесаван̣н̣ана̄ нит̣т̣хита̄.