2. тиссаметтеййама̄н̣авасуттаниддесаван̣н̣ана̄

9. дутийе тиссаметтеййасуттаниддесе – кодха сантуситоти нит̣т̣хите пана аджитасутте ‘‘катхам̣ локам̣ авеккхантам̣, маччура̄джа̄ на пассатӣ’’ти (су. ни. 1124; чӯл̣ани. могхара̄джама̄н̣авапуччха̄ 143) евам̣ могхара̄джа̄ пуччхитум̣ а̄рабхи. ‘‘на та̄васса индрийа̄ни парипа̄кам̣ гата̄нӣ’’ти н̃атва̄ бхагава̄ ‘‘тит̣т̣ха твам̣, могхара̄джа, ан̃н̃о пуччхатӯ’’ти пат̣иккхипи. тато тиссаметтеййо аттано сам̣сайам̣ пуччханто ‘‘кодха̄ти га̄тхама̄ха. таттха кодха сантуситоти ко идха сатто тут̣т̣хо. ин̃джита̄ти тан̣ха̄дит̣т̣хивиппхандита̄ни. убхантамабхин̃н̃а̄йа̄ти убхо анте абхиджа̄нитва̄. манта̄ на липпатӣти пан̃н̃а̄йа на липпати.

парипун̣н̣асан̇каппоти неккхамма̄дивитаккехи парипун̣н̣асан̇каппатта̄ парипун̣н̣аманоратхо.

тан̣хин̃джитанти тан̣ха̄йа чалитам̣. дит̣т̣хин̃джита̄дӣсупи есева найо. ка̄мин̃джитанти килесака̄мехи ин̃джитам̣ пхандитам̣. ‘‘каммин̃джита’’нтипи па̄т̣хо, там̣ на сундарам̣.

маханто пурисоти маха̄пурисо. уттамо пурисоти аггапурисо. падха̄но пурисоти сет̣т̣хапурисо. ала̄мако пурисоти висит̣т̣хапурисо. джет̣т̣хако пурисоти па̄моккхапурисо. на хет̣т̣химако пурисоти уттамапурисо. пуриса̄нам̣ кот̣иппатто пурисоти падха̄напурисо. саббесам̣ иччхито пурисоти паварапурисо.

сиббинимаччага̄ти тан̣хам̣ атиага̄, атиккамитва̄ т̣хито. упаччага̄ти бхусам̣ атиага̄.

10. тассетаматтхам̣ бхагава̄ бйа̄каронто ‘‘ка̄месӯ’’ти га̄тха̄двайама̄ха. таттха ка̄месу брахмачарийава̄ти ка̄манимиттам̣ брахмачарийава̄, ка̄месу а̄дӣнавам̣ дисва̄ маггабрахмачарийена саманна̄гатоти вуттам̣ хоти. етта̄вата̄ сантуситатам̣ дассети. ‘‘вӣтатан̣хо’’тиа̄дӣхи анин̃джитатам̣. таттха сан̇кха̄йа ниббутоти аничча̄дивасена дхамме вӣмам̣ситва̄ ра̄га̄динибба̄нена ниббуто.

асаддхаммасама̄паттийа̄ти нӣчадхаммасама̄йогато. а̄ратӣти а̄рака̄ раманам̣. виратӣти та̄йа вина̄ раманам̣. пат̣ивиратӣти пат̣иниваттитва̄ та̄йа вина̄ раманам̣. вераман̣ӣти веравина̄санам̣. акирийа̄ти кирийа̄паччхинданам̣. акаран̣анти каран̣апариччхинданам̣. анаджджха̄паттӣти ана̄паджджаната̄. вела̄анатиккамоти сӣма̄анатиккамо. сесам̣ таттха таттха вуттанайатта̄ па̄кат̣амева.

евам̣ бхагава̄ идампи суттам̣ арахаттаникӯт̣енева десеси. десана̄парийоса̄не айампи бра̄хман̣о арахатте патит̣т̣ха̄си саддхим̣ антева̄сикасахассена, ан̃н̃есан̃ча анекасахасса̄нам̣ дхаммачаккхум̣ удапа̄ди. сесам̣ пуббасадисамева.

саддхаммаппаджджотика̄йа чӯл̣аниддеса-ат̣т̣хакатха̄йа

тиссаметтеййама̄н̣авасуттаниддесаван̣н̣ана̄ нит̣т̣хита̄.