3. ад̣д̣хавагго

[371] 1. дӣгхӣтикосаладжа̄такаван̣н̣ана̄

евам̣бхӯтасса те ра̄джа̄ти идам̣ саттха̄ джетаване вихаранто косамбаке бхан̣д̣анака̄раке а̄раббха катхеси. тесан̃хи джетаванам̣ а̄гантва̄ кхама̄панака̄ле саттха̄ те а̄мантетва̄ ‘‘бхиккхаве, тумхе майхам̣ ораса̄ мукхато джа̄та̄ путта̄ на̄ма, путтехи ча питара̄ диннам̣ ова̄дам̣ бхиндитум̣ на ват̣т̣ати, тумхе пана мама ова̄дам̣ на кариттха, пора̄н̣акапан̣д̣ита̄ аттано ма̄та̄питаро гха̄тетва̄ раджджам̣ гахетва̄ т̣хитачорепи аран̃н̃е хаттхапатхам̣ а̄гате ма̄та̄питӯхи диннам̣ ова̄дам̣ на бхиндисса̄ма̄ти на ма̄райим̣сӯ’’ти ватва̄ атӣтам̣ а̄хари.

имасмим̣ пана джа̄таке двепи ваттхӯни. сан̇гхабхедакаккхандхаке виттха̄рато а̄ви бхависсанти. со пана дӣгха̄вукума̄ро аран̃н̃е аттано ан̇ке нипаннам̣ ба̄ра̄н̣асира̄джа̄нам̣ чӯл̣а̄йа гахетва̄ ‘‘ида̄ни майхам̣ ма̄та̄питугха̄такам̣ чорам̣ кхан̣д̣а̄кхан̣д̣ам̣ катва̄ чхиндисса̄мӣ’’ти асим̣ уккхипанто тасмим̣ кхан̣е ма̄та̄питӯхи диннам̣ ова̄дам̣ саритва̄ ‘‘джӣвитам̣ чаджантопи тесам̣ ова̄дам̣ на бхиндисса̄ми, кевалам̣ имам̣ таджджесса̄мӣ’’ти чинтетва̄ пат̣хамам̣ га̄тхама̄ха –

110. ‘‘евам̣бхӯтасса те ра̄джа, а̄гатасса васе мама;

аттхи ну кочи парийа̄йо, йо там̣ дуккха̄ памочайе’’ти.

таттха васе мама̄ти мама васам̣ а̄гатасса. парийа̄йоти ка̄ран̣ам̣.

тато ра̄джа̄ дутийам̣ га̄тхама̄ха –

111. ‘‘евам̣бхӯтасса ме та̄та, а̄гатасса васе тава;

наттхи но кочи парийа̄йо, йо мам̣ дуккха̄ памочайе’’ти.

таттха ноти нипа̄таматтхам̣, наттхи кочи парийа̄йо, йо мам̣ етасма̄ дуккха̄ памочайети аттхо.

тато бодхисатто авасесага̄тха̄ абха̄си –

112. ‘‘на̄н̃н̃ам̣ сучаритам̣ ра̄джа, на̄н̃н̃ам̣ ра̄джа субха̄ситам̣;

та̄йате маран̣ака̄ле, евамевитарам̣ дханам̣.

113. ‘‘аккоччхи мам̣ авадхи мам̣, аджини мам̣ аха̄си ме;

йе ча там̣ упанайханти, верам̣ тесам̣ на саммати.

114. ‘‘аккоччхи мам̣ авадхи мам̣, аджини мам̣ аха̄си ме;

йе ча там̣ нупанайханти, верам̣ тесӯпасаммати.

115. ‘‘на хи верена вера̄ни, саммантӣдха куда̄чанам̣;

аверена ча самманти, еса дхаммо санантано’’нти.

таттха на̄н̃н̃ам̣ сучаританти на̄н̃н̃ам̣ сучарита̄, айамева ва̄ па̄т̣хо, т̣хапетва̄ сучаритам̣ ан̃н̃ам̣ на пасса̄мӣти аттхо. идха ‘‘сучарита’’нтипи ‘‘субха̄сита’’нтипи ма̄та̄питӯхи диннам̣ ова̄дам̣йева сандха̄йа̄ха. евамева̄ти нираттхакамева. идам̣ вуттам̣ хоти – маха̄ра̄джа, ан̃н̃атра ова̄да̄нусит̣т̣хисан̇кха̄та̄ сучаритасубха̄сита̄ маран̣ака̄ле та̄йитум̣ раккхитум̣ саматтхо на̄ма ан̃н̃о наттхи, йам̣ етам̣ итарам̣ дханам̣, там̣ евамева нираттхакамева хоти, тван̃хи ида̄ни майхам̣ кот̣исатасахассаматтампи дханам̣ даданто джӣвитам̣ на лабхеййа̄си, тасма̄ ведитаббаметам̣ ‘‘дханато сучаритасубха̄ситамева уттаритара’’нти.

сесага̄тха̄супи айам̣ сан̇кхепаттхо – маха̄ра̄джа, йе пуриса̄ ‘‘айам̣ мам̣ аккоси, айам̣ мам̣ пахари, айам̣ мам̣ аджини, айам̣ мама сантакам̣ аха̄сӣ’’ти евам̣ верам̣ упанайханти бандхитва̄ вийа хадайе т̣хапенти, тесам̣ верам̣ на упасаммати. йе ча панетам̣ на упанайханти хадайе на т̣хапенти, тесам̣ вӯпасаммати. вера̄ни хи на када̄чи верена самманти, аверенева пана самманти. еса дхаммо санантаноти есо пора̄н̣ако дхаммо чирака̄лаппаватто сабха̄воти.

еван̃ча пана ватва̄ бодхисатто ‘‘ахам̣, маха̄ра̄джа, тайи на дуббха̄ми, твам̣ пана мам̣ ма̄рехӣ’’ти тасса хаттхе асим̣ т̣хапеси. ра̄джа̄пи ‘‘на̄хам̣ тайи дуббха̄мӣ’’ти сапатхам̣ катва̄ тена саддхим̣ нагарам̣ гантва̄ там̣ амачча̄нам̣ дассетва̄ ‘‘айам̣, бхан̣е, косаларан̃н̃о путто дӣгха̄вукума̄ро на̄ма, имина̄ майхам̣ джӣвитам̣ диннам̣, на лаббха̄ имам̣ кин̃чи ка̄ту’’нти ватва̄ аттано дхӣтарам̣ датва̄ питу сантаке радждже патит̣т̣ха̄песи. тато пат̣т̣ха̄йа убхопи самагга̄ саммодама̄на̄ раджджам̣ ка̄ресум̣.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ ма̄та̄питаро маха̄ра̄джакула̄ни ахесум̣, дӣгха̄вукума̄ро пана ахамева ахоси’’нти.

дӣгхӣтикосаладжа̄такаван̣н̣ана̄ пат̣хама̄.

[372] 2. мигапотакаджа̄такаван̣н̣ана̄

ага̄ра̄ паччупетасса̄ти идам̣ саттха̄ джетаване вихаранто екам̣ махаллакам̣ а̄раббха катхеси. со кирекам̣ да̄ракам̣ пабба̄джеси. са̄ман̣еро там̣ саккаччам̣ упат̣т̣хахитва̄ апарабха̄ге апха̄сукена ка̄ламака̄си. тасса ка̄лакирийа̄йа махаллако сока̄бхибхӯто махантена саддена паридеванто вичари. бхиккхӯ сан̃н̃а̄петум̣ асакконта̄ дхаммасабха̄йам̣ катхам̣ самут̣т̣ха̄песум̣ ‘‘а̄вусо, асуко на̄ма махаллако са̄ман̣ерасса ка̄лакирийа̄йа паридеванто вичарати, маран̣ассатибха̄вана̄йа париба̄хиро есо бхависсатӣ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄нева, пуббепеса етасмим̣ мате паридеванто вичарӣ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто саккаттам̣ ка̄реси. тада̄ еко ка̄сират̣т̣хава̄сӣ бра̄хман̣о химавантам̣ пависитва̄ исипаббаджджам̣ паббаджитва̄ пхала̄пхалехи йа̄песи. со екадивасам̣ аран̃н̃е екам̣ матама̄тикам̣ мигапотакам̣ дисва̄ ассамам̣ а̄нетва̄ гочарам̣ датва̄ посеси. мигапотако вад̣д̣ханто абхирӯпо ахоси собхаггаппатто. та̄пасо там̣ аттано путтакам̣ катва̄ парихарати. екадивасам̣ мигапотако бахум̣ тин̣ам̣ кха̄дитва̄ аджӣракена ка̄ламака̄си. та̄пасо ‘‘путто ме мато’’ти паридеванто вичарати. тада̄ сакко девара̄джа̄ локам̣ паригган̣ханто там̣ та̄пасам̣ дисва̄ ‘‘сам̣веджесса̄ми на’’нти а̄гантва̄ а̄ка̄се т̣хито пат̣хамам̣ га̄тхама̄ха –

116. ‘‘ага̄ра̄ паччупетасса, анага̄расса те сато;

саман̣асса на там̣ са̄дху, йам̣ петаманусочасӣ’’ти.

там̣ сутва̄ та̄пасо дутийам̣ га̄тхама̄ха –

117. ‘‘сам̣ва̄сена хаве сакка, мануссасса мигасса ва̄;

хадайе джа̄йате пемам̣, на там̣ сакка̄ асочиту’’нти.

таттха на там̣ сакка̄ти там̣ мануссам̣ ва̄ тираччха̄нам̣ ва̄ на сакка̄ асочитум̣, соча̄мийева̄ханти.

тато сакко две га̄тха̄ абха̄си –

118. ‘‘матам̣ мариссам̣ роданти, йе руданти лапанти ча;

тасма̄ твам̣ иси ма̄ роди, родитам̣ могхама̄ху санто.

119. ‘‘родитена хаве брахме, мато пето самут̣т̣хахе;

саббе сан̇гамма рода̄ма, ан̃н̃аман̃н̃асса н̃а̄таке’’ти.

таттха мариссанти йо ида̄ни мариссати, там̣. лапанти ча̄ти вилапанти ча. идам̣ вуттам̣ хоти – йе локе матан̃ча мариссантан̃ча роданти, те руданти чева вилапанти ча, тесам̣ ассупаччхиджджанадивасо на̄ма наттхи. ким̣ка̄ран̣а̄? сада̄пи мата̄нан̃ча мариссанта̄нан̃ча аттхита̄йа. тасма̄ твам̣ иси ма̄ роди. ким̣ка̄ран̣а̄? родитам̣ могхама̄ху сантоти, буддха̄дайо пана пан̣д̣ита̄ родитам̣ ‘‘могха’’нти ваданти. мато петоти йо еса мато петоти вуччати, йади со родитена самут̣т̣хахеййа, евам̣ санте ким̣ никкамма̄ аччха̄ма, саббева сама̄гамма ан̃н̃аман̃н̃асса н̃а̄таке рода̄ма. йасма̄ пана те родитака̄ран̣а̄ на ут̣т̣хаханти, тасма̄ родитасса могхабха̄вам̣ са̄дхети.

евам̣ саккасса катхентасса та̄пасо ‘‘нираттхакам̣ родита’’нти саллаккхетва̄ саккасса тхутим̣ каронто тиссо га̄тха̄ абха̄си –

120. ‘‘а̄диттам̣ вата мам̣ сантам̣, гхатаситтам̣ва па̄вакам̣;

ва̄рина̄ вийа осин̃чам̣, саббам̣ нибба̄пайе дарам̣.

121. ‘‘аббахи вата ме саллам̣, йама̄си хадайасситам̣;

йо ме сокапаретасса, путтасокам̣ апа̄нуди.

122. ‘‘сохам̣ аббӯл̣хасаллосми, вӣтасоко ана̄вило;

на соча̄ми на рода̄ми, тава сутва̄на ва̄сава̄’’ти.

таттха йама̄сӣти йам̣ ме а̄си. хадайасситанти хадайе нисситам̣. апа̄нудӣти нӣхари. сакко та̄пасасса ова̄дам̣ датва̄ сакат̣т̣ха̄намева гато.

саттха̄ идхам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ та̄пасо махаллако ахоси, миго са̄ман̣еро, сакко пана ахамева ахоси’’нти.

мигапотакаджа̄такаван̣н̣ана̄ дутийа̄.

[373] 3. мӯсикаджа̄такаван̣н̣ана̄

кухим̣ гата̄ каттха гата̄ти идам̣ саттха̄ вел̣уване вихаранто аджа̄тасаттум̣ а̄раббха катхеси. ваттху хет̣т̣ха̄ тхусаджа̄таке (джа̄. 1.4.149 а̄дайо) виттха̄ритамева. идха̄пи саттха̄ татхева ра̄джа̄нам̣ саким̣ путтена саддхим̣ кӣл̣ама̄нам̣ саким̣ дхаммам̣ сун̣антам̣ дисва̄ ‘‘там̣ нисса̄йа ран̃н̃о бхайам̣ уппаджджиссатӣ’’ти н̃атва̄ ‘‘маха̄ра̄джа, пора̄н̣акара̄джа̄но а̄сан̇китаббам̣ а̄сан̇китва̄ аттано путтам̣ ‘амха̄кам̣ дхӯмака̄ле раджджам̣ ка̄ретӯ’ти екаманте акам̣сӯ’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто таккасила̄йам̣ бра̄хман̣акуле ниббаттитва̄ диса̄па̄моккха̄чарийо ахоси. тасса сантике ба̄ра̄н̣асиран̃н̃о путто йавакума̄ро на̄ма саббасиппа̄ни угган̣хитва̄ ануйогам̣ датва̄ гантука̄мо там̣ а̄пуччхи. а̄чарийо ‘‘путтам̣ нисса̄йа тасса антара̄йо бхависсатӣ’’ти ан̇гавиджджа̄васена н̃атва̄ ‘‘етамасса харисса̄мӣ’’ти екам̣ упамам̣ упадха̄ретум̣ а̄рабхи. тада̄ панасса еко ассо ахоси, тасса па̄де ван̣о ут̣т̣хахи, там̣ ван̣а̄нураккхан̣аттхам̣ гехейева карим̣су. тасса̄видӯре еко удапа̄но аттхи. атхека̄ мӯсика̄ геха̄ никкхамитва̄ ассасса па̄де ван̣ам̣ кха̄дати, ассо ва̄ретум̣ на саккоти. со екадивасам̣ веданам̣ адхива̄сетум̣ асакконто мӯсикам̣ кха̄дитум̣ а̄гатам̣ па̄дена пахаритва̄ ма̄ретва̄ удапа̄не па̄теси. ассагопака̄ мӯсикам̣ апассанта̄ ‘‘ан̃н̃есу дивасесу мӯсика̄ а̄гантва̄ ван̣ам̣ кха̄дати, ида̄ни на пан̃н̃а̄йати, кахам̣ ну кхо гата̄’’ти вадим̣су.

бодхисатто там̣ ка̄ран̣ам̣ паччаккхам̣ катва̄ ‘‘ан̃н̃е аджа̄нанта̄ ‘кахам̣ мӯсика̄ гата̄’ти ваданти, мӯсика̄йа пана ма̄ретва̄ удапа̄не кхиттабха̄вам̣ ахамева джа̄на̄мӣ’’ти идамева ка̄ран̣ам̣ упамам̣ катва̄ пат̣хамам̣ га̄тхам̣ бандхитва̄ ра̄джакума̄расса ада̄си. со апарам̣ упамам̣ упадха̄ренто тамева ассам̣ парул̣хаван̣ам̣ никкхамитва̄ екам̣ йававаттхум̣ гантва̄ ‘‘йавам̣ кха̄дисса̄мӣ’’ти ватиччхиддена мукхам̣ павесентам̣ дисва̄ тамева ка̄ран̣ам̣ упамам̣ катва̄ дутийам̣ га̄тхам̣ бандхитва̄ тасса ада̄си. татийага̄тхам̣ пана аттано пан̃н̃а̄баленева бандхитва̄ тампи тасса датва̄ ‘‘та̄та, твам̣ радждже патит̣т̣ха̄йа са̄йам̣ нха̄напоккхаран̣им̣ гаччханто йа̄ва дхурасопа̄на̄ пат̣хамам̣ га̄тхам̣ саджджха̄йанто гаччхеййа̄си, тава нивасанапа̄са̄дам̣ пависанто йа̄ва сопа̄напа̄дамӯла̄ дутийам̣ га̄тхам̣ саджджха̄йанто гаччхеййа̄си, тато йа̄ва сопа̄наматтхака̄ татийам̣ га̄тхам̣ саджджха̄йанто гаччхеййа̄сӣ’’ти ватва̄ песеси.

со кума̄ро гантва̄ упара̄джа̄ хутва̄ питу аччайена раджджам̣ ка̄реси, тассеко путто джа̄йи. со сол̣асавассака̄ле раджджалобхена ‘‘питарам̣ ма̄ресса̄мӣ’’ти чинтетва̄ упат̣т̣ха̄ке а̄ха ‘‘майхам̣ пита̄ тарун̣о, ахам̣ етасса дхӯмака̄лам̣ олокенто махаллако бхависса̄ми джара̄джин̣н̣о, та̄дисе ка̄ле ладдхенапи раджджена ко аттхо’’ти. те а̄хам̣су ‘‘дева, на сакка̄ паччантам̣ гантва̄ чораттам̣ ка̄тум̣, тава питарам̣ кеначи упа̄йена ма̄ретва̄ раджджам̣ ган̣ха̄’’ти. со ‘‘са̄дхӯ’’ти антонивесане ран̃н̃о са̄йам̣ нха̄напоккхаран̣ӣсамӣпам̣ гантва̄ ‘‘еттха нам̣ ма̄ресса̄мӣ’’ти кхаггам̣ гахетва̄ ат̣т̣ха̄си. ра̄джа̄ са̄йам̣ мӯсикам̣ на̄ма да̄сим̣ ‘‘гантва̄ поккхаран̣ӣпит̣т̣хим̣ содхетва̄ ехи, нха̄йисса̄мӣ’’ти песеси. са̄ гантва̄ поккхаран̣ӣпит̣т̣хим̣ содхентӣ кума̄рам̣ пасси. кума̄ро аттано каммасса па̄кат̣абха̄вабхайена там̣ двидха̄ чхиндитва̄ поккхаран̣ийам̣ па̄теси. ра̄джа̄ нха̄йитум̣ агама̄си. сесаджано ‘‘аджджа̄пи мӯсика̄ да̄сӣ на пуна̄гаччхати, кухим̣ гата̄ каттха гата̄’’ти а̄ха. ра̄джа̄ –

123. ‘‘кухим̣ гата̄ каттха гата̄, ити ла̄лаппатӣ джано;

ахамевеко джа̄на̄ми, удапа̄не мӯсика̄ хата̄’’ти. –

пат̣хамам̣ га̄тхам̣ бхан̣анто поккхаран̣ӣтӣрам̣ агама̄си.

таттха кухим̣ гата̄ каттха гата̄ти ан̃н̃аман̃н̃авевачана̄ни. ити ла̄лаппатӣти евам̣ виппалапати. ити айам̣ га̄тха̄ ‘‘аджа̄нанто джано мӯсика̄ да̄сӣ кухим̣ гата̄ти виппалапати, ра̄джакума̄рена двидха̄ чхиндитва̄ мӯсика̄йа поккхаран̣ийам̣ па̄титабха̄вам̣ ахамева еко джа̄на̄мӣ’’ти ран̃н̃о аджа̄нантассева имаматтхам̣ дӣпети.

кума̄ро ‘‘майа̄ катакаммам̣ майхам̣ питара̄ н̃а̄та’’нти бхӣто пала̄йитва̄ таматтхам̣ упат̣т̣ха̄ка̄нам̣ а̄рочеси. те саттат̣т̣хадивасаччайена пуна там̣ а̄хам̣су ‘‘дева, саче ра̄джа̄ джа̄неййа, на тун̣хӣ бхавеййа, таккага̄хена пана тена там̣ вуттам̣ бхависсати, ма̄рехи на’’нти. со пунекадивасам̣ кхаггахаттхо сопа̄напа̄дамӯле т̣хатва̄ ран̃н̃о а̄гаманака̄ле ито чито ча пахаран̣ока̄сам̣ олокеси. ра̄джа̄ –

124. ‘‘йан̃четам̣ ити чӣти ча, гадрабхова ниваттаси;

удапа̄не мӯсикам̣ хантва̄, йавам̣ бхаккхетумиччхасӣ’’ти. –

дутийам̣ га̄тхам̣ саджджха̄йанто агама̄си. айампи га̄тха̄ ‘‘йасма̄ твам̣ ити чӣти ча ито чито ча пахаран̣ока̄сам̣ олокенто гадрабхова ниваттаси, тасма̄ там̣ джа̄на̄ми ‘пуримадивасе поккхаран̣ийам̣ мӯсикам̣ да̄сим̣ хантва̄ аджджа мам̣ йавара̄джа̄нам̣ бхаккхетум̣ ма̄ретум̣ иччхасӣ’’’ти ран̃н̃о аджа̄нантассева имаматтхам̣ дӣпети.

кума̄ро ‘‘дит̣т̣хомхи питара̄’’ти утрасто пала̄йи. со пуна ад̣д̣хама̄саматтам̣ атиккамитва̄ ‘‘ра̄джа̄нам̣ даббийа̄ пахаритва̄ ма̄ресса̄мӣ’’ти екам̣ дӣгхадан̣д̣акам̣ даббипахаран̣ам̣ гахетва̄ олумбитва̄ ат̣т̣ха̄си. ра̄джа̄ –

125. ‘‘дахаро ча̄си думмедха, пат̣хамуппаттико сусу;

дӣгхан̃четам̣ сама̄саджджа, на те дасса̄ми джӣвита’’нти. –

татийам̣ га̄тхам̣ саджджха̄йанто сопа̄напа̄даматтхакам̣ абхирухи.

таттха пат̣хамуппаттикоти пат̣хамавайена уппаттито упето, пат̣хамавайе т̣хитоти аттхо. сусӯти тарун̣о. дӣгханти дӣгхадан̣д̣акам̣ даббипахаран̣ам̣. сама̄саджджа̄ти гахетва̄, олумбитва̄ т̣хитосӣти аттхо. айампи га̄тха̄ ‘‘думмедха, аттано вайам̣ парибхун̃джитум̣ на лабхиссаси, на те да̄ни нилладжджасса джӣвитам̣ дасса̄ми, ма̄ретва̄ кхан̣д̣а̄кхан̣д̣ам̣ чхиндитва̄ сӯлейева а̄вун̣а̄песса̄мӣ’’ти ран̃н̃о аджа̄нантассева кума̄рам̣ сантаджджайама̄на̄ имаматтхам̣ дӣпети.

со там̣ дивасам̣ пала̄йитум̣ асакконто ‘‘джӣвитам̣ ме дехи, дева̄’’ти ран̃н̃о па̄дамӯле нипаджджи. ра̄джа̄ там̣ таджджетва̄ сан̇кхалика̄хи бандха̄петва̄ бандхана̄га̄ре ка̄ретва̄ сетаччхаттасса хет̣т̣ха̄ алан̇катара̄джа̄сане нисӣдитва̄ ‘‘амха̄кам̣ а̄чарийо диса̄па̄моккхо бра̄хман̣о имам̣ майхам̣ антара̄йам̣ дисва̄ има̄ тиссо га̄тха̄ абха̄сӣ’’ти хат̣т̣хатут̣т̣хо уда̄нам̣ уда̄ненто сесага̄тха̄ абха̄си –

126. ‘‘на̄нталиккхабхаванена, на̄н̇гапуттапинена ва̄;

путтена хи паттхайито, силокехи памочито.

127. ‘‘саббам̣ сутамадхӣйетха, хӣнамуккат̣т̣хамаджджхимам̣;

саббасса аттхам̣ джа̄неййа, на ча саббам̣ пайоджайе;

хоти та̄дисако ка̄ло, йаттха аттха̄вахам̣ сута’’нти.

таттха на̄нталиккхабхаванена̄ти анталиккхабхаванам̣ вуччати диббавима̄нам̣, ахам̣ аджджа анталиккхабхаванампи на а̄рул̣хо, тасма̄ анталиккхабхаванена̄пи аджджа маран̣ато на памочитомхи. на̄н̇гапуттапинена ва̄ти ан̇гасариккхакена ва̄ путтапиненапи на памочито. путтена хи паттхайитоти ахам̣ пана аттано путтенева аджджа ма̄ретум̣ паттхито. силокехи памочитоти сохам̣ а̄чарийена бандхитва̄ динна̄хи га̄тха̄хи памочито.

сутанти парийаттим̣. адхӣйетха̄ти ган̣хеййа сиккхеййа. хӣнамуккат̣т̣хамаджджхиманти хӣнам̣ ва̄ хоту уттамам̣ ва̄ маджджхимам̣ ва̄, саббам̣ адхӣйитаббамева̄ти дӣпети. на ча саббам̣ пайоджайети хӣнам̣ мантам̣ ва̄ сиппам̣ ва̄ маджджхимам̣ ва̄ на пайоджайе, уттамамева пайоджайеййа̄ти аттхо. йаттха аттха̄вахам̣ сутанти йасмим̣ ка̄ле махосадхапан̣д̣итасса кумбхака̄ракаммакаран̣ам̣ вийа йам̣кин̃чи сиккхитасиппам̣ аттха̄вахам̣ хоти, та̄дисопи ка̄ло хотийева̄ти аттхо. апарабха̄ге ран̃н̃о аччайена кума̄ро радждже патит̣т̣ха̄си.

саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ диса̄па̄моккхо а̄чарийо ахамева ахоси’’нти.

мӯсикаджа̄такаван̣н̣ана̄ татийа̄.

[374] 4. чӯл̣адхануггахаджа̄такаван̣н̣ана̄

саббам̣ бхан̣д̣анти идам̣ саттха̄ джетаване вихаранто пура̄н̣адутийика̄палобханам̣ а̄раббха катхеси. тена бхиккхуна̄ ‘‘пура̄н̣адутийика̄ мам̣, бханте, уккан̣т̣ха̄петӣ’’ти вутте саттха̄ ‘‘еса̄ бхиккху, иттхӣ на ида̄нева туйхам̣ анаттхака̄рика̄, пуббепи те етам̣ нисса̄йа асина̄ сӣсам̣ чхинна’’нти ватва̄ бхиккхӯхи йа̄чито атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто саккаттам̣ ка̄реси. тада̄ еко ба̄ра̄н̣асива̄сӣ бра̄хман̣ама̄н̣аво таккасила̄йам̣ саббасиппа̄ни угган̣хитва̄ дханукамме ниппхаттим̣ патто чӯл̣адхануггахапан̣д̣ито на̄ма ахоси. атхасса а̄чарийо ‘‘айам̣ майа̄ садисам̣ сиппам̣ угган̣хӣ’’ти аттано дхӣтарам̣ ада̄си. со там̣ гахетва̄ ‘‘ба̄ра̄н̣асим̣ гамисса̄мӣ’’ти маггам̣ пат̣ипаджджи. антара̄магге еко ва̄ран̣о екам̣ падесам̣ сун̃н̃амака̄си, там̣ т̣ха̄нам̣ абхирухитум̣ на кочи уссахи. чӯл̣адхануггахапан̣д̣ито манусса̄нам̣ ва̄рента̄нан̃н̃ева бхарийам̣ гахетва̄ ат̣авимукхам̣ абхирухи. атхасса ат̣авимаджджхе ва̄ран̣о ут̣т̣хахи, со там̣ кумбхе сарена виджджхи. саро винивиджджхитва̄ паччха̄бха̄гена никкхами. ва̄ран̣о таттхева пати, дхануггахапан̣д̣ито там̣ т̣ха̄нам̣ кхемам̣ катва̄ пурато ан̃н̃ам̣ ат̣авим̣ па̄пун̣и. таттха̄пи пан̃н̃а̄са чора̄ маггам̣ хананти. тампи со мануссехи ва̄рийама̄но абхируйха тесам̣ чора̄нам̣ миге вадхитва̄ маггасамӣпе мам̣сам̣ пачитва̄ кха̄данта̄нам̣ т̣хитат̣т̣ха̄нам̣ па̄пун̣и.

тада̄ там̣ чора̄ алан̇катапат̣ийатта̄йа бхарийа̄йа саддхим̣ а̄гаччхантам̣ дисва̄ ‘‘ган̣хисса̄ма на’’нти усса̄хам̣ карим̣су. чораджет̣т̣хако пурисалаккхан̣акусало, со там̣ олокетва̄ва ‘‘уттамапурисо айа’’нти н̃атва̄ екассапи ут̣т̣хахитум̣ на̄да̄си. дхануггахапан̣д̣ито ‘‘гаччха ‘амха̄кампи екам̣ мам̣сасӯлам̣ детха̄’ти ватва̄ мам̣сам̣ а̄хара̄’’ти тесам̣ сантикам̣ бхарийам̣ песеси. са̄ гантва̄ ‘‘екам̣ кира мам̣сасӯлам̣ детха̄’’ти а̄ха. чораджет̣т̣хако ‘‘анаггхо пурисо’’ти мам̣сасӯлам̣ да̄песи. чора̄ ‘‘амхехи кира паккам̣ кха̄дита’’нти апаккамам̣сасӯлам̣ адам̣су. дхануггахо атта̄нам̣ самбха̄ветва̄ ‘‘майхам̣ апаккамам̣сасӯлам̣ дадантӣ’’ти чора̄нам̣ куджджхи. чора̄ ‘‘ким̣ айамевеко пурисо, майам̣ иттхийо’’ти куджджхитва̄ ут̣т̣хахим̣су. дхануггахо екӯнапан̃н̃а̄са джане екӯнапан̃н̃а̄сакан̣д̣ехи виджджхитва̄ па̄теси. чораджет̣т̣хакам̣ виджджхитум̣ кан̣д̣ам̣ на̄хоси. тасса кира кан̣д̣ана̄л̣ийам̣ самапан̣н̣а̄сайева кан̣д̣а̄ни. тесу екена ва̄ран̣ам̣ виджджхи, екӯнапан̃н̃а̄сакан̣д̣ехи чоре виджджхитва̄ чораджет̣т̣хакам̣ па̄тетва̄ тасса уре нисинно ‘‘сӣсамасса чхиндисса̄мӣ’’ти бхарийа̄йа хаттхато асим̣ а̄хара̄песи. са̄ тан̇кхан̣ан̃н̃ева чораджет̣т̣хаке лобхам̣ катва̄ чорасса хаттхе тхарум̣, са̄микасса хаттхе дха̄рам̣ т̣хапеси. чоро тхарудан̣д̣ам̣ пара̄маситва̄ асим̣ нӣхаритва̄ дхануггахасса сӣсам̣ чхинди.

со там̣ гха̄тетва̄ иттхим̣ а̄да̄йа гаччханто джа̄тиготтам̣ пуччхи. са̄ ‘‘таккасила̄йам̣ диса̄па̄моккха̄чарийасса дхӣта̄мхӣ’’ти а̄ха. ‘‘катхам̣ твам̣ имина̄ ладдха̄’’ти. майхам̣ пита̄ ‘‘айам̣ майа̄ садисам̣ катва̄ сиппам̣ сиккхӣ’’ти тусситва̄ имасса мам̣ ада̄си, са̄хам̣ тайи синехам̣ катва̄ аттано куладаттийам̣ са̄микам̣ ма̄ра̄песинти. чораджет̣т̣хако ‘‘куладаттийам̣ та̄веса̄ са̄микам̣ ма̄реси, ан̃н̃ам̣ панекам̣ дисва̄ мампи евамевам̣ кариссати, имам̣ чхад̣д̣етум̣ ват̣т̣атӣ’’ти чинтетва̄ гаччханто антара̄магге екам̣ куннадим̣ утта̄наталам̣ тан̇кхан̣одакапӯрам̣ дисва̄ ‘‘бхадде, имиссам̣ надийам̣ сусума̄ра̄ каккхал̣а̄, ким̣ карома̄’’ти а̄ха. ‘‘са̄ми, саббам̣ а̄бхаран̣абхан̣д̣ам̣ мама уттара̄сан̇гена бхан̣д̣икам̣ катва̄ паратӣрам̣ нетва̄ пуна а̄гантва̄ мам̣ гахетва̄ гаччха̄’’ти. со ‘‘са̄дхӯ’’ти саббам̣ а̄бхаран̣абхан̣д̣ам̣ а̄да̄йа надим̣ отаритва̄ таранто вийа паратӣрам̣ патва̄ там̣ чхад̣д̣етва̄ па̄йа̄си. са̄ там̣ дисва̄ ‘‘са̄ми, ким̣ мам̣ чхад̣д̣етва̄ вийа гаччхаси, касма̄ евам̣ кароси, ехи мампи а̄да̄йа гаччха̄’’ти тена саддхим̣ саллапантӣ пат̣хамам̣ га̄тхама̄ха –

128. ‘‘саббам̣ бхан̣д̣ам̣ сама̄да̄йа, па̄рам̣ тин̣н̣оси бра̄хман̣а;

пачча̄гаччха лахум̣ кхиппам̣, мампи та̄рехи да̄нито’’ти.

таттха лахум̣ кхиппанти лахум̣ пачча̄гаччха, кхиппам̣ мампи та̄рехи да̄ни итоти аттхо.

чоро там̣ сутва̄ паратӣре т̣хитойева дутийам̣ га̄тхама̄ха –

129. ‘‘асантхутам̣ мам̣ чирасантхутена, нимӣни бхотӣ адхувам̣ дхувена;

майа̄пи бхотӣ ниминеййа ан̃н̃ам̣, ито ахам̣ дӯратарам̣ гамисса’’нти.

са̄ хет̣т̣ха̄ вуттаттха̄йева –

чоро пана ‘‘ито ахам̣ дӯратарам̣ гамиссам̣, тит̣т̣ха тва’’нти ватва̄ тасса̄ виравантийа̄ва а̄бхаран̣абхан̣д̣икам̣ а̄да̄йа пала̄то. тато са̄ ба̄ла̄ атриччхата̄йа еварӯпам̣ бйасанам̣ патта̄ ана̄тха̄ хутва̄ авидӯре екам̣ ел̣агала̄гумбам̣ упагантва̄ родама̄на̄ нисӣди. тасмим̣ кхан̣е сакко девара̄джа̄ локам̣ олокенто там̣ атриччхата̄хатам̣ са̄мика̄ ча джа̄ра̄ ча парихӣнам̣ родама̄нам̣ дисва̄ ‘‘етам̣ нигган̣хитва̄ ладжджа̄петва̄ а̄гамисса̄мӣ’’ти ма̄талин̃ча пан̃часикхан̃ча а̄да̄йа таттха гантва̄ надӣтӣре т̣хатва̄ ‘‘ма̄тали, твам̣ маччхо бхава, пан̃часикха твам̣ сакун̣о бхава, ахам̣ пана син̇га̄ло хутва̄ мукхена мам̣сапин̣д̣ам̣ гахетва̄ етисса̄ саммукхат̣т̣ха̄нам̣ гамисса̄ми, твам̣ майи таттха гате удакато уллан̇гхитва̄ мама пурато пата, атха̄хам̣ мукхена гахитамам̣сапин̣д̣ам̣ чхад̣д̣етва̄ маччхам̣ гахетум̣ паккхандисса̄ми, тасмим̣ кхан̣е твам̣, пан̃часикха, там̣ мам̣сапин̣д̣ам̣ гахетва̄ а̄ка̄се уппата, твам̣ ма̄тали, удаке пата̄’’ти а̄н̣а̄песи. ‘‘са̄дху, дева̄’’ти, ма̄тали, маччхо ахоси, пан̃часикхо сакун̣о ахоси. сакко син̇га̄ло хутва̄ мам̣сапин̣д̣ам̣ мукхена̄да̄йа тасса̄ саммукхат̣т̣ха̄нам̣ агама̄си. маччхо удака̄ уппатитва̄ син̇га̄ласса пурато пати. со мукхена гахитамам̣сапин̣д̣ам̣ чхад̣д̣етва̄ маччхассаттха̄йа паккханди. маччхо уппатитва̄ удаке пати, сакун̣о мам̣сапин̣д̣ам̣ гахетва̄ а̄ка̄се уппати, син̇га̄ло убхопи алабхитва̄ ел̣агала̄гумбам̣ олокенто думмукхо нисӣди. са̄ там̣ дисва̄ ‘‘айам̣ атриччхата̄хато нева мам̣сам̣, на маччхам̣ лабхӣ’’ти кут̣ам̣ бхиндантӣ вийа маха̄хаситам̣ хаси. там̣ сутва̄ син̇га̄ло татийам̣ га̄тхама̄ха –

130. ‘‘ка̄йам̣ ел̣агала̄гумбе, кароти ахуха̄сийам̣;

найӣдха наччагӣтам̣ ва̄, та̄л̣ам̣ ва̄ сусама̄хитам̣;

анамхика̄ле сусон̣и, кинну джаггхаси собхане’’ти.

таттха ка̄йанти ка̄ айам̣. ел̣агала̄гумбети камбоджигумбе. ахуха̄сийанти дантавидам̣сакам̣ маха̄хаситам̣ вуччати, там̣ ка̄ еса̄ етасмим̣ гумбе каротӣти пуччхати. найӣдха наччагӣтам̣ ва̄ти имасмим̣ т̣ха̄не кассачи наччантасса наччам̣ ва̄ га̄йантасса гӣтам̣ ва̄ хаттхе сусама̄хите катва̄ ва̄дентасса сусама̄хитам̣ хаттхата̄л̣ам̣ ва̄ наттхи, кам̣ дисва̄ твам̣ хасеййа̄сӣти дӣпети. анамхика̄лети роданака̄ле. сусон̣ӣти сундарасон̣и. ким̣ ну джаггхасӣти кена ка̄ран̣ена твам̣ родитум̣ йуттака̄ле ародама̄на̄ва маха̄хаситам̣ хасаси. собханети там̣ пасам̣санто а̄лапати.

там̣ сутва̄ са̄ чатуттхам̣ га̄тхама̄ха –

131. ‘‘син̇га̄ла ба̄ла думмедха, аппапан̃н̃оси джамбука;

джӣно маччхан̃ча песин̃ча, капан̣о вийа джха̄йасӣ’’ти.

таттха джӣноти джа̄ниппатто хутва̄. песинти мам̣сапесим̣. капан̣о вийа джха̄йасӣти сахассабхан̣д̣икам̣ пара̄джито капан̣о вийа джха̄йаси сочаси чинтеси.

тато син̇га̄ло пан̃чамам̣ га̄тхама̄ха –

132. ‘‘судассам̣ ваджджаман̃н̃есам̣, аттано пана дуддасам̣;

джӣна̄ патин̃ча джа̄ран̃ча, ман̃н̃е тван̃н̃ева джха̄йасӣ’’ти.

таттха тван̃н̃ева джха̄йасӣти па̄падхамме дуссӣле ахам̣ та̄ва мама гочарам̣ на лабхисса̄ми, твам̣ пана атриччхата̄йа хата̄ там̣мухуттадит̣т̣хаке чоре пат̣ибаддхачитта̄ хутва̄ тан̃ча джа̄рам̣ куладаттийан̃ча патим̣ джӣна̄, мам̣ упа̄да̄йа сатагун̣ена сахассагун̣ена капан̣атара̄ хутва̄ джха̄йаси родаси паридевасӣти ладжджа̄петва̄ виппака̄рам̣ па̄пенто маха̄сатто евама̄ха.

са̄ тасса вачанам̣ сутва̄ га̄тхама̄ха –

133. ‘‘еваметам̣ мигара̄джа, йатха̄ бха̄саси джамбука;

са̄ нӯна̄хам̣ ито гантва̄, бхатту хессам̣ васа̄нуга̄’’ти.

таттха нӯна̄ти екам̣саттхе нипа̄то. са̄ ахам̣ ито гантва̄ пуна ан̃н̃ам̣ бхатта̄рам̣ лабхитва̄ екам̣сенева тасса бхатту васа̄нуга̄ васаваттинӣ бхависса̄мӣти.

атхасса̄ ана̄ча̄ра̄йа дуссӣла̄йа вачанам̣ сутва̄ сакко девара̄джа̄ оса̄нага̄тхама̄ха –

134. ‘‘йо харе маттикам̣ тха̄лам̣, кам̣сатха̄лампи со харе;

катам̣йева тайа̄ па̄пам̣, пунапевам̣ кариссасӣ’’ти.

тассаттхо – ана̄ча̄ре ким̣ катхеси, йо маттикам̣ тха̄лам̣ харати, суван̣н̣атха̄лараджататха̄ла̄диппабхедам̣ кам̣сатха̄лампи со харатева, идан̃ча тайа̄ па̄пам̣ катамева, на сакка̄ тава саддха̄тум̣, са̄ твам̣ пунапи евам̣ кариссасийева̄ти. евам̣ со там̣ ладжджа̄петва̄ виппака̄рам̣ па̄петва̄ сакат̣т̣ха̄намева агама̄си.

саттха̄ имам̣ дхаммадесанам̣ а̄харитва̄ сачча̄ни пака̄сетва̄ джа̄такам̣ самодха̄неси, саччапарийоса̄не уккан̣т̣хитабхиккху сота̄паттипхале патит̣т̣хахи.

тада̄ дхануггахо уккан̣т̣хитабхиккху ахоси, са̄ иттхӣ пура̄н̣адутийика̄, сакко девара̄джа̄ пана ахамева ахосинти.

чӯл̣адхануггахаджа̄такаван̣н̣ана̄ чатуттха̄.

[375] 5. капотаджа̄такаван̣н̣ана̄

ида̄ни кхомхӣти идам̣ саттха̄ джетаване вихаранто екам̣ лолабхиккхум̣ а̄раббха катхеси. лолаваттху анекасо виттха̄ритамева. там̣ пана саттха̄ ‘‘саччам̣ кира твам̣ бхиккху, лоло’’ти пуччхитва̄ ‘‘а̄ма, бханте’’ти вутте ‘‘на кхо бхиккху ида̄нева, пуббепи твам̣ лолоси, лолата̄йа пана джӣвитаккхайам̣ патто’’ти ватва̄ атӣтам̣ а̄хари.

атӣте ба̄ра̄н̣асийам̣ брахмадатте раджджам̣ ка̄ренте бодхисатто па̄ра̄ватайонийам̣ ниббаттитва̄ ба̄ра̄н̣асисет̣т̣хино маха̄насе нӣл̣апаччхийам̣ васати. атхеко ка̄ко маччхамам̣салуддхо тена саддхим̣ меттим̣ катва̄ таттхева васи. со екадивасам̣ бахум̣ маччхамам̣сам̣ дисва̄ ‘‘имам̣ кха̄дисса̄мӣ’’ти ниттхунанто нӣл̣апаччхийам̣йева нипаджджитва̄ па̄ра̄ватена ‘‘ехи, самма, гочара̄йа гамисса̄ма̄’’ти вуччама̄нопи ‘‘аджӣракена нипанномхи, гаччха тва’’нти ватва̄ тасмим̣ гате ‘‘гато ме пачча̄миттакан̣т̣ако, ида̄ни йатха̄ручи маччхамам̣сам̣ кха̄дисса̄мӣ’’ти чинтенто пат̣хамам̣ га̄тхама̄ха –

135. ‘‘ида̄ни кхомхи сукхито арого, никкан̣т̣ако ниппатито капото;

ка̄ха̄ми да̄нӣ хадайасса тут̣т̣хим̣, татха̄ хи мам̣ мам̣саса̄кам̣ балетӣ’’ти.

таттха ниппатитоти ниггато. капототи па̄ра̄вато. ка̄ха̄ми да̄нӣти карисса̄ми да̄ни. татха̄ хи мам̣ мам̣саса̄кам̣ балетӣти татха̄ хи мам̣сан̃ча авасесам̣ са̄кан̃ча майхам̣ балам̣ кароти, ут̣т̣хехи кха̄да̄ти вадама̄нам̣ вийа усса̄хам̣ мамам̣ каротӣти аттхо.

со бхаттака̄раке маччхамам̣сам̣ пачитва̄ маха̄наса̄ никкхамма сарӣрато седам̣ пава̄хенте паччхито никкхамитва̄ расакарот̣ийам̣ нилӣйитва̄ ‘‘кири кирӣ’’ти саддамака̄си. бхаттака̄рако вегена̄гантва̄ ка̄кам̣ гахетва̄ саббапатта̄ни лун̃джитва̄ алласин̇гӣверан̃ча сиддхаттхаке ча писитва̄ ласун̣ам̣ пӯтитаккена маддитва̄ сакаласарӣрам̣ маккхетва̄ екам̣ кат̣халам̣ гхам̣ситва̄ виджджхитва̄ суттакена тасса гӣва̄йам̣ бандхитва̄ нӣл̣апаччхийам̣йева там̣ паккхипитва̄ агама̄си. па̄ра̄вато а̄гантва̄ там̣ дисва̄ ‘‘ка̄ еса̄ бала̄ка̄ мама саха̄йасса паччхийам̣ нипанна̄, чан̣д̣о хи со а̄гантва̄ гха̄теййа̄пи на’’нти париха̄сам̣ каронто дутийам̣ га̄тхама̄ха –

136. ‘‘ка̄йам̣ бала̄ка̄ сикхинӣ, чорӣ лан̇гхипита̄маха̄;

орам̣ бала̄ке а̄гаччха, чан̣д̣о ме ва̄йасо сакха̄’’ти.

са̄ хет̣т̣ха̄ (джа̄. ат̣т̣ха. 2.3.70) вуттаттха̄йева.

там̣ сутва̄ ка̄ко татийам̣ га̄тхама̄ха –

137. ‘‘алан̃хи те джаггхита̄йе, мамам̣ дисва̄на едисам̣;

вилӯнам̣ сӯдапуттена, пит̣т̣хаман̣д̣ена маккхита’’нти.

таттха аланти пат̣иседхаттхе нипа̄то. джаггхита̄йети хаситум̣. идам̣ вуттам̣ хоти – ида̄ни мам̣ едисам̣ евам̣ дуккхаппаттам̣ дисва̄ тава алам̣ хаситум̣, ма̄ едисе ка̄ле париха̄сакел̣им̣ карохӣти.

со париха̄сакел̣им̣ каронтова пуна чатуттхам̣ га̄тхама̄ха –

138. ‘‘сунха̄то сувилиттоси, аннапа̄нена таппито;

кан̣т̣хе ча те вел̣урийо, агама̄ ну каджан̇гала’’нти.

таттха кан̣т̣хе ча те вел̣урийоти айам̣ те вел̣урийаман̣ипи кан̣т̣хе пил̣андхо, твам̣ еттакам̣ ка̄лам̣ амха̄кам̣ етам̣ на дассесӣти капа̄лам̣ сандха̄йевама̄ха. каджан̇галанти идха ба̄ра̄н̣асӣйева ‘‘каджан̇гала̄’’ти адхиппета̄. ито никкхамитва̄ каччи антонагарам̣ гатосӣти пуччхати.

тато ка̄ко пан̃чамам̣ га̄тхама̄ха –

139. ‘‘ма̄ те митто амитто ва̄, агама̄си каджан̇галам̣;

пин̃чха̄ни таттха ла̄йитва̄, кан̣т̣хе бандханти ват̣т̣ана’’нти.

таттха пин̃чха̄нӣти патта̄ни. таттха ла̄йитва̄ти тасмим̣ ба̄ра̄н̣асинагаре лун̃читва̄. ват̣т̣ананти кат̣халикам̣.

там̣ сутва̄ па̄ра̄вато оса̄нага̄тхама̄ха –

140. ‘‘пунапа̄паджджасӣ самма, сӣлан̃хи тава та̄дисам̣;

на хи ма̄нусака̄ бхога̄, субхун̃джа̄ хонти паккхина̄’’ти.

таттха пунапа̄паджджасӣти пунапи еварӯпам̣ а̄паджджиссаси. еварӯпан̃хи те сӣланти.

ити нам̣ со овадитва̄ таттха аваситва̄ паккхе паса̄ретва̄ ан̃н̃аттха агама̄си. ка̄копи таттхева джӣвитаккхайам̣ па̄пун̣и.

саттха̄ имам̣ дхаммадесанам̣ а̄харитва̄ сачча̄ни пака̄сетва̄ джа̄такам̣ самодха̄неси, саччапарийоса̄не лолабхиккху ана̄га̄мипхале патит̣т̣хахи. тада̄ ка̄ко лолабхиккху ахоси, капото пана ахамева ахосинти.

капотаджа̄такаван̣н̣ана̄ пан̃чама̄.

ад̣д̣хавагго татийо.

джа̄такудда̄нам̣ –

ман̣икун̣д̣ала суджа̄та̄, венаса̄кхан̃ча орагам̣;

гхат̣ам̣ коран̣д̣и лат̣уки, дхаммапа̄лам̣ мигам̣ татха̄.

суйонандӣ ван̣н̣а̄роха, сӣлам̣ хирӣ кхаджджопанам̣;

ахи гумбийа са̄л̣ийам̣, тачаса̄рам̣ миттавиндам̣.

пала̄сан̃чева дӣгхити, мигапотака мӯсикам̣;