5. пан̃чаканипа̄то
1. ман̣икун̣д̣алавагго
[351] 1. ман̣икун̣д̣аладжа̄такаван̣н̣ана̄
джӣно ратхассам̣ ман̣икун̣д̣але ча̄ти идам̣ саттха̄ джетаване вихаранто косаларан̃н̃о антепуре саббаттхаса̄дхакам̣ падут̣т̣ха̄маччам̣ а̄раббха катхеси. ваттху хет̣т̣ха̄ виттха̄ритамева. идха пана бодхисатто ба̄ра̄н̣асира̄джа̄ ахоси. падут̣т̣ха̄маччо косалара̄джа̄нам̣ а̄нетва̄ ка̄сираджджам̣ га̄ха̄петва̄ ба̄ра̄н̣асира̄джа̄нам̣ бандха̄петва̄ бандхана̄га̄ре паккхипа̄песи. ра̄джа̄ джха̄нам̣ уппа̄детва̄ а̄ка̄се паллан̇кена нисӣди, чораран̃н̃о сарӣре д̣а̄хо уппаджджи. со ба̄ра̄н̣асира̄джа̄нам̣ упасан̇камитва̄ пат̣хамам̣ га̄тхама̄ха –
1. ‘‘джӣно ратхассам̣ ман̣икун̣д̣але ча, путте ча да̄ре ча татхева джӣно;
саббесу бхогесу асесакесу, касма̄ на сантаппаси сокака̄ле’’ти.
таттха джӣно ратхассам̣ ман̣икун̣д̣але ча̄ти маха̄ра̄джа, твам̣ ратхан̃ча ассан̃ча ман̣икун̣д̣ала̄ни ча джӣно, ‘‘джӣно ратхассе ча ман̣икун̣д̣але ча̄’’типи па̄т̣хо. асесакесӯти ниссесакесу.
там̣ сутва̄ бодхисатто има̄ две га̄тха̄ абха̄си –
2. ‘‘пуббева маччам̣ виджаханти бхога̄, маччо ва̄ те пуббатарам̣ джаха̄ти;
асассата̄ бхогино ка̄мака̄ми, тасма̄ на соча̄махам̣ сокака̄ле.
3. ‘‘удети а̄пӯрати вети чандо, аттхам̣ тапетва̄на палети сӯрийо;
видита̄ майа̄ саттука локадхамма̄, тасма̄ на соча̄махам̣ сокака̄ле’’ти.
таттха пуббева маччанти маччам̣ ва̄ бхога̄ пуббева пат̣хаматаран̃н̃ева виджаханти, маччо ва̄ те бхоге пуббатарам̣ джаха̄ти. ка̄мака̄мӣти чорара̄джа̄нам̣ а̄лапати. амбхо, ка̄ме ка̄майама̄на ка̄мака̄ми бхогино на̄ма локе асассата̄, бхогесу ва̄ нат̣т̣хесу джӣвама̄на̄ва абхогино хонти, бхоге ва̄ паха̄йа сайам̣ нассанти, тасма̄ ахам̣ маха̄джанасса сокака̄лепи на соча̄мӣти аттхо. видита̄ майа̄ саттука локадхамма̄ти чорара̄джа̄нам̣ а̄лапати. амбхо, саттука, майа̄ ла̄бхо ала̄бхо йасо айасотиа̄дайо локадхамма̄ видита̄. йатхева хи чандо удети ча пӯрати ча пуна ча кхӣйати, йатха̄ ча сӯрийо андхака̄рам̣ видхаманто махантам̣ а̄локам̣ тапетва̄на пуна са̄йам̣ аттхам̣ палети аттхам̣ гаччхати на диссати, евамева бхога̄ уппаджджанти ча нассанти ча, таттха ким̣ сокена, тасма̄ на соча̄мӣти аттхо.
евам̣ маха̄сатто чораран̃н̃о дхаммам̣ десетва̄ ида̄ни тамева чорам̣ гараханто а̄ха –
4. ‘‘аласо гихӣ ка̄мабхогӣ на са̄дху, асан̃н̃ато паббаджито на са̄дху;
ра̄джа̄ на са̄дху анисаммака̄рӣ, йо пан̣д̣ито кодхано там̣ на са̄дху.
5. ‘‘нисамма кхаттийо кайира̄, на̄нисамма дисампати;
нисаммака̄рино ра̄джа, йасо китти ча вад̣д̣хатӣ’’ти.
има̄ пана две га̄тха̄ хет̣т̣ха̄ виттха̄рита̄йева. чорара̄джа̄ бодхисаттам̣ кхама̄петва̄ раджджам̣ пат̣иччха̄петва̄ аттано джанападамева гато.
саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ косалара̄джа̄ а̄нандо ахоси, ба̄ра̄н̣асира̄джа̄ пана ахамева ахоси’’нти.
ман̣икун̣д̣аладжа̄такаван̣н̣ана̄ пат̣хама̄.
[352] 2. суджа̄таджа̄такаван̣н̣ана̄
ким̣ ну сантарама̄нова̄ти идам̣ саттха̄ джетаване вихаранто матапитикам̣ кут̣умбикам̣ а̄раббха катхеси. со кира питари мате паридевама̄но вичарати, сокам̣ винодетум̣ на саккоти. атха саттха̄ тасса сота̄паттипхалӯпаниссайам̣ дисва̄ са̄ваттхим̣ пин̣д̣а̄йа чаритва̄ паччха̄саман̣ам̣ а̄да̄йа тасса гехам̣ гантва̄ пан̃н̃атта̄сане нисинно там̣ вандитва̄ нисиннам̣ ‘‘ким̣, упа̄сака, сочасӣ’’ти ватва̄ ‘‘а̄ма, бханте’’ти вутте ‘‘а̄вусо, пора̄н̣акапан̣д̣ита̄ пан̣д̣ита̄нам̣ вачанам̣ сутва̄ питари ка̄лакате на сочим̣сӯ’’ти ватва̄ тена йа̄чито атӣтам̣ а̄хари.
атӣте ба̄ра̄н̣асийам̣ брахмадатте раджджам̣ ка̄ренте бодхисатто кут̣умбикагехе ниббатти, ‘‘суджа̄такума̄ро’’тисса на̄мам̣ карим̣су. тасса вайаппаттасса пита̄махо ка̄ламака̄си. атхасса пита̄ питу ка̄лакирийато пат̣т̣ха̄йа сокасамаппито а̄л̣а̄ханам̣ гантва̄ а̄л̣а̄ханато ат̣т̣хӣни а̄харитва̄ аттано а̄ра̄ме маттика̄тхӯпам̣ катва̄ та̄ни таттха нидахитва̄ гатагатавела̄йа тхӯпам̣ пуппхехи пӯджетва̄ четийам̣ а̄виджджханто паридевати, нева нха̄йати на лимпати на бхун̃джати на камманте вича̄рети. там̣ дисва̄ бодхисатто ‘‘пита̄ ме аййакасса матака̄лато пат̣т̣ха̄йа сока̄бхибхӯто чарати, т̣хапетва̄ пана мам̣ ан̃н̃о етам̣ сан̃н̃а̄петум̣ на саккоти, екена нам̣ упа̄йена ниссокам̣ карисса̄мӣ’’ти бахига̄ме екам̣ матагон̣ам̣ дисва̄ тин̣ан̃ча па̄нӣйан̃ча а̄харитва̄ тасса пурато т̣хапетва̄ ‘‘кха̄да, кха̄да, пива, пива̄’’ти а̄ха. а̄гата̄гата̄ нам̣ дисва̄ ‘‘самма суджа̄та, ким̣ умматтакоси, матагон̣асса тин̣одакам̣ десӣ’’ти ваданти. со на кин̃чи пат̣ивадати. атхасса питу сантикам̣ гантва̄ ‘‘путто те умматтако джа̄то, матагон̣асса тин̣одакам̣ детӣ’’ти а̄хам̣су. там̣ сутва̄ кут̣умбикасса питусоко апагато, путтасоко патит̣т̣хито. со вегена̄гантва̄ ‘‘нану твам̣, та̄та суджа̄та, пан̣д̣итоси, ким̣ка̄ран̣а̄ матагон̣асса тин̣одакам̣ десӣ’’ти ватва̄ две га̄тха̄ абха̄си –
6. ‘‘ким̣ ну сантарама̄нова, ла̄йитва̄ харитам̣ тин̣ам̣;
кха̄да кха̄да̄ти лапаси, гатасаттам̣ джараггавам̣.
7. ‘‘на хи аннена па̄нена, мато гон̣о самут̣т̣хахе;
тван̃ча туччхам̣ вилапаси, йатха̄ там̣ думматӣ татха̄’’ти.
таттха сантарама̄нова̄ти турито вийа хутва̄. ла̄йитва̄ти лунитва̄. лапасӣти вилапаси. гатасаттам̣ джараггаванти вигатаджӣвитам̣ джин̣н̣агон̣ам̣. йатха̄ танти еттха танти нипа̄таматтам̣, йатха̄ думмати аппапан̃н̃о вилапеййа, татха̄ твам̣ туччхам̣ вилапасӣти.
тато бодхисатто две га̄тха̄ абха̄си –
8. ‘‘татхева тит̣т̣хати сӣсам̣, хаттхапа̄да̄ ча ва̄ладхи;
сота̄ татхева тит̣т̣ханти, ман̃н̃е гон̣о самут̣т̣хахе.
9. ‘‘неваййакасса сӣсан̃ча, хаттхапа̄да̄ ча диссаре;
рудам̣ маттикатхӯпасмим̣, нану тван̃н̃ева думматӣ’’ти.
таттха татхева̄ти йатха̄ пуббе т̣хитам̣, татхева тит̣т̣хати. ман̃н̃ети етесам̣ сӣса̄дӣнам̣ татхева т̣хитатта̄ айам̣ гон̣о самут̣т̣хахеййа̄ти ман̃н̃а̄ми. неваййакасса сӣсан̃ча̄ти аййакасса пана сӣсан̃ча хаттхапа̄да̄ ча на диссанти. ‘‘пит̣т̣хипа̄да̄ на диссаре’’типи па̄т̣хо. нану тван̃н̃ева думматӣти ахам̣ та̄ва сӣса̄дӣни пассанто евам̣ кароми, твам̣ пана на кин̃чи пассаси, джха̄питат̣т̣ха̄нато ат̣т̣хӣни а̄харитва̄ маттика̄тхӯпам̣ катва̄ паридеваси. ити мам̣ пат̣ичча сатагун̣ена сахассагун̣ена сатасахассагун̣ена нану тван̃н̃ева думмати. бхиджджанадхамма̄ на̄ма сан̇кха̄ра̄ бхиджджанти, таттха ка̄ паридевана̄ти.
там̣ сутва̄ бодхисаттасса пита̄ ‘‘мама путто пан̣д̣ито идхалокапаралокакиччам̣ джа̄на̄ти, мама сан̃н̃а̄панаттха̄йа етам̣ каммам̣ ака̄сӣ’’ти чинтетва̄ ‘‘та̄та суджа̄тапан̣д̣ита, ‘саббе сан̇кха̄ра̄ аничча̄’ти ме н̃а̄та̄, ито пат̣т̣ха̄йа на сочисса̄ми, питусокахаран̣акапуттена на̄ма та̄дисена бхавитабба’’нти ватва̄ путтасса тхутим̣ каронто а̄ха –
10. ‘‘а̄диттам̣ вата мам̣ сантам̣, гхатаситтам̣ва па̄вакам̣;
ва̄рина̄ вийа осин̃чам̣, саббам̣ нибба̄пайе дарам̣.
11. ‘‘аббахӣ вата ме саллам̣, йама̄си хадайасситам̣;
йо ме сокапаретасса, питусокам̣ апа̄нуди.
12. ‘‘сохам̣ аббӯл̣хасаллосми, вӣтасоко ана̄вило;
на соча̄ми на рода̄ми, тава сутва̄на ма̄н̣ава.
13. ‘‘евам̣ каронти саппан̃н̃а̄, йе хонти анукампака̄;
виниваттенти сокамха̄, суджа̄то питарам̣ йатха̄’’ти.
таттха нибба̄пайети нибба̄пайи. даранти сокадаратхам̣. суджа̄то питарам̣ йатха̄ти йатха̄ мама путто суджа̄то мам̣ питарам̣ сама̄нам̣ аттано саппан̃н̃ата̄йа сокамха̄ виниваттайи, евам̣ ан̃н̃епи саппан̃н̃а̄ сокамха̄ виниваттайантӣти.
саттха̄ имам̣ дхаммадесанам̣ а̄харитва̄ сачча̄ни пака̄сетва̄ джа̄такам̣ самодха̄неси, саччапарийоса̄не кут̣умбико сота̄паттипхале патит̣т̣хахи. тада̄ суджа̄то ахамева ахосинти.
суджа̄таджа̄такаван̣н̣ана̄ дутийа̄.
[353] 3. венаса̄кхаджа̄такаван̣н̣ана̄
найидам̣ ниччам̣ бхавитаббанти идам̣ саттха̄ бхаггесу сам̣сума̄рагирам̣ нисса̄йа бхесакал̣а̄ване вихаранто бодхира̄джакума̄рам̣ а̄раббха катхеси. бодхира̄джакума̄ро на̄ма уденасса ран̃н̃о путто тасмим̣ ка̄ле сам̣сума̄рагире васанто екам̣ парийода̄тасиппам̣ вад̣д̣хаким̣ паккоса̄петва̄ ан̃н̃ехи ра̄джӯхи асадисам̣ катва̄ коканадам̣ на̄ма па̄са̄дам̣ ка̄ра̄песи. ка̄ра̄петва̄ ча пана ‘‘айам̣ вад̣д̣хакӣ ан̃н̃ассапи ран̃н̃о еварӯпам̣ па̄са̄дам̣ кареййа̄’’ти маччхара̄йанто тасса аккхӣни уппа̄т̣а̄песи. тенасса аккхӣнам̣ уппа̄т̣итабха̄во бхиккхусан̇гхе па̄кат̣о джа̄то. тасма̄ бхиккхӯ дхаммасабха̄йам̣ катхам̣ самут̣т̣ха̄песум̣ ‘‘а̄вусо, бодхира̄джакума̄ро кира татха̄рӯпасса вад̣д̣хакино аккхӣни уппа̄т̣а̄песи, ахо каккхал̣о пхарусо са̄хасико’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄нева, пуббепеса каккхал̣о пхарусо са̄хасикова. на кевалан̃ча ида̄нева, пуббепеса кхаттийасахасса̄нам̣ аккхӣни уппа̄т̣а̄петва̄ ма̄ретва̄ тесам̣ мам̣сена баликаммам̣ ка̄ресӣ’’ти ватва̄ атӣтам̣ а̄хари.
атӣте ба̄ра̄н̣асийам̣ брахмадатте раджджам̣ ка̄ренте бодхисатто таккасила̄йам̣ диса̄па̄моккхо а̄чарийо ахоси. джамбудӣпатале кхаттийама̄н̣ава̄ бра̄хман̣ама̄н̣ава̄ ча тассева сантике сиппам̣ угган̣хим̣су. ба̄ра̄н̣асиран̃н̃о путто брахмадаттакума̄ро на̄ма тасса сантике тайо веде угган̣хи. со пана пакатийа̄пи каккхал̣о пхарусо са̄хасико ахоси. бодхисатто ан̇гавиджджа̄васена тасса каккхал̣апхарусаса̄хасикабха̄вам̣ н̃атва̄ ‘‘та̄та, твам̣ каккхал̣о пхарусо са̄хасико, пхарусена на̄ма ладдхам̣ иссарийам̣ ачират̣т̣хитикам̣ хоти, со иссарийе винат̣т̣хе бхиннана̄во вийа самудде патит̣т̣хам̣ на лабхати, тасма̄ ма̄ еварӯпо ахосӣ’’ти там̣ оваданто две га̄тха̄ абха̄си –
14. ‘‘найидам̣ ниччам̣ бхавитаббам̣ брахмадатта, кхемам̣ субхиккхам̣ сукхата̄ ча ка̄йе;
аттхаччайе ма̄ аху сампамӯл̣хо, бхиннаплаво са̄гарассева маджджхе.
15. ‘‘йа̄ни кароти пурисо, та̄ни аттани пассати;
калйа̄н̣ака̄рӣ калйа̄н̣ам̣, па̄пака̄рӣ ча па̄пакам̣;
йа̄дисам̣ вапате бӣджам̣, та̄дисам̣ харате пхала’’нти.
таттха сукхата̄ ча ка̄йети та̄та брахмадатта, йадетам̣ кхемам̣ ва̄ субхиккхам̣ ва̄ йа̄ ва̄ еса̄ сукхата̄ ка̄йе, идам̣ саббам̣ имесам̣ сатта̄нам̣ ниччам̣ саббака̄ламева на бхавати, идам̣ пана аниччам̣ хутва̄ абха̄вадхаммам̣. аттхаччайети со твам̣ аниччата̄васена иссарийе вигате аттано аттхасса аччайе йатха̄ на̄ма бхиннаплаво бхиннана̄во мануссо са̄гарамаджджхе патит̣т̣хам̣ алабханто сампамӯл̣хо хоти, евам̣ ма̄ аху сампамӯл̣хо. та̄ни аттани пассатӣти тесам̣ камма̄нам̣ випа̄кам̣ винданто та̄ни аттани пассати на̄ма.
со а̄чарийам̣ вандитва̄ ба̄ра̄н̣асим̣ гантва̄ питу сиппам̣ дассетва̄ опарадждже патит̣т̣ха̄йа питу аччайена раджджам̣ па̄пун̣и. тасса пин̇гийо на̄ма пурохито ахоси каккхал̣о пхарусо са̄хасико. со йасалобхена чинтеси ‘‘йам̣нӯна̄хам̣ имина̄ ран̃н̃а̄ сакаладжамбудӣпе саббе ра̄джа̄но га̄ха̄пеййам̣, евамеса екара̄джа̄ бхависсати, ахампи екапурохито бхависса̄мӣ’’ти. со там̣ ра̄джа̄нам̣ аттано катхам̣ га̄ха̄песи. ра̄джа̄ махатийа̄ сена̄йа нагара̄ никкхамитва̄ екасса ран̃н̃о нагарам̣ рундхитва̄ там̣ ра̄джа̄нам̣ ган̣хи. етенупа̄йена сакаладжамбудӣпе раджджам̣ гахетва̄ ра̄джасахассапаривуто ‘‘таккасила̄йам̣ раджджам̣ ган̣хисса̄мӣ’’ти агама̄си. бодхисатто нагарам̣ пат̣исан̇кхаритва̄ парехи аппадхам̣сийам̣ ака̄си.
ба̄ра̄н̣асира̄джа̄ ган̇га̄надӣтӣре махато нигродхаруккхасса мӯле са̄н̣им̣ париккхипа̄петва̄ упари вита̄нам̣ ка̄ра̄петва̄ сайанам̣ пан̃н̃апетва̄ нива̄сам̣ ган̣хи. со джамбудӣпатале сахассара̄джа̄но гахетва̄ йуджджхама̄нопи таккасилам̣ гахетум̣ асакконто аттано пурохитам̣ пуччхи ‘‘а̄чарийа, майам̣ еттакехи ра̄джӯхи саддхим̣ а̄гантва̄пи таккасилам̣ гахетум̣ на саккома, ким̣ ну кхо ка̄табба’’нти. ‘‘маха̄ра̄джа, сахассара̄джӯнам̣ аккхӣни уппа̄т̣етва̄ ма̄ретва̄ куччхим̣ пха̄летва̄ пан̃чамадхурамам̣сам̣ а̄да̄йа имасмим̣ нигродхе адхиваттха̄йа девата̄йа баликаммам̣ катва̄ антават̣т̣ӣхи руккхам̣ париккхипитва̄ лохитапан̃чан̇гулика̄ни карома, евам̣ но кхиппамева джайо бхависсатӣ’’ти. ра̄джа̄ ‘‘са̄дхӯ’’ти пат̣иссун̣итва̄ антоса̄н̣ийам̣ маха̄бале малле т̣хапетва̄ екамекам̣ ра̄джа̄нам̣ паккоса̄петва̄ ниппӣл̣анена висан̃н̃ам̣ ка̄ретва̄ аккхӣни уппа̄т̣етва̄ ма̄ретва̄ мам̣сам̣ а̄да̄йа кал̣евара̄ни ган̇га̄йам̣ пава̄хетва̄ вуттаппака̄рам̣ баликаммам̣ ка̄ретва̄ балибхерим̣ а̄кот̣а̄петва̄ йуддха̄йа гато.
атхасса ат̣т̣а̄лакато еко йаккхо а̄гантва̄ даккхин̣аккхим̣ уппа̄т̣етва̄ агама̄си, атхасса махатӣ ведана̄ уппаджджи. со ведана̄ппатто а̄гантва̄ нигродхаруккхамӯле пан̃н̃атта̄сане утта̄нако нипаджджи. тасмим̣ кхан̣е еко гиджджхо екам̣ тикхин̣акот̣икам̣ ат̣т̣хим̣ гахетва̄ руккхагге нисинно мам̣сам̣ кха̄дитва̄ ат̣т̣хим̣ виссаджджеси, ат̣т̣хикот̣и а̄гантва̄ ран̃н̃о ва̄маккхимхи айасӯлам̣ вийа патитва̄ аккхим̣ бхинди. тасмим̣ кхан̣е бодхисаттасса вачанам̣ саллаккхеси. со ‘‘амха̄кам̣ а̄чарийо ‘име сатта̄ бӣджа̄нурӯпам̣ пхалам̣ вийа камма̄нурӯпам̣ випа̄кам̣ анубхонтӣ’ти катхенто идам̣ дисва̄ катхеси ман̃н̃е’’ти ватва̄ вилапанто две га̄тха̄ абха̄си –
16. ‘‘идам̣ тада̄чарийавачо, па̄ра̄сарийо йадабрави;
‘ма̄ су твам̣ акари па̄пам̣, йам̣ твам̣ паччха̄ катам̣ тапе’.
17. ‘‘айамева со пин̇гийа венаса̄кхо, йамхи гха̄тайим̣ кхаттийа̄нам̣ сахассам̣;
алан̇кате чанданаса̄ра̄нулитте, тамева дуккхам̣ пачча̄гатам̣ мама’’нти.
таттха идам̣ тада̄чарийавачоти идам̣ там̣ а̄чарийасса вачанам̣. па̄ра̄сарийоти там̣ готтена киттети. паччха̄ катанти йам̣ па̄пам̣ тайа̄ катам̣, паччха̄ там̣ тапеййа киламеййа, там̣ ма̄ карӣти ова̄дам̣ ада̄си, ахам̣ панасса вачанам̣ на каринти. айамева̄ти нигродхаруккхам̣ дассенто вилапати. венаса̄кхоти паттхат̣аса̄кхо. йамхи гха̄тайинти йамхи руккхе кхаттийасахассам̣ ма̄ресим̣. алан̇кате чанданаса̄ра̄нулиттети ра̄джа̄лан̇ка̄рехи алан̇кате лохитачанданаса̄ра̄нулитте те кхаттийе йаттха̄хам̣ гха̄тесим̣, айамева со руккхо ида̄ни майхам̣ кин̃чи паритта̄н̣ам̣ ка̄тум̣ на саккотӣти дӣпети. тамева дуккханти йам̣ майа̄ паресам̣ аккхиуппа̄т̣анадуккхам̣ катам̣, идам̣ ме татхева пат̣иа̄гатам̣, ида̄ни но а̄чарийасса вачанам̣ маттхакам̣ паттанти паридевати.
со евам̣ паридевама̄но аггамахесим̣ ануссаритва̄ –
18. ‘‘са̄ма̄ ча кхо чанданалиттагатта̄, лат̣т̣хӣва собхан̃джанакасса уггата̄;
адисва̄ ка̄лам̣ карисса̄ми уббарим̣, там̣ ме ито дуккхатарам̣ бхависсатӣ’’ти. –
га̄тхама̄ха –
тассаттхо – мама бхарийа̄ суван̣н̣аса̄ма̄ уббарӣ йатха̄ на̄ма сиггуруккхасса уджу уггата̄ са̄кха̄ мандама̄лутерита̄ кампама̄на̄ собхати, евам̣ иттхивила̄сам̣ курума̄на̄ собхати, тамахам̣ ида̄ни аккхӣнам̣ бхиннатта̄ уббарим̣ адисва̄ва ка̄лам̣ карисса̄ми, там̣ ме тасса̄ адассанам̣ ито маран̣адуккхатопи дуккхатарам̣ бхависсатӣти.
со евам̣ вилапантова маритва̄ нирайе ниббатти. на нам̣ иссарийалуддхо пурохито паритта̄н̣ам̣ ка̄тум̣ саккхи, на аттано иссарийам̣. тасмим̣ матаматтейева балака̄йо бхиджджитва̄ пала̄йи.
саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ ба̄ра̄н̣асира̄джа̄ бодхира̄джакума̄ро ахоси, пин̇гийо девадатто, диса̄па̄моккха̄чарийо пана ахамева ахоси’’нти.
венаса̄кхаджа̄такаван̣н̣ана̄ татийа̄.
[354] 4. урагаджа̄такаван̣н̣ана̄
урагова тачам̣ джин̣н̣анти идам̣ саттха̄ джетаване вихаранто матапуттакам̣ кут̣умбикам̣ а̄раббха катхеси. ваттху пана матабхарийаматапитикаваттхусадисамева. идха̄пи татхева саттха̄ тасса нивесанам̣ гантва̄ там̣ а̄гантва̄ вандитва̄ нисиннам̣ ‘‘ким̣, а̄вусо, сочасӣ’’ти пуччхитва̄ ‘‘а̄ма, бханте, путтасса ме матака̄лато пат̣т̣ха̄йа соча̄мӣ’’ти вутте ‘‘а̄вусо, бхиджджанадхаммам̣ на̄ма бхиджджати, нассанадхаммам̣ на̄ма нассати, тан̃ча кхо на екасмим̣йева куле, на̄пи екасмин̃н̃ева га̄ме, атха кхо апарима̄н̣есу чаккава̄л̣есу тӣсу бхавесу амаран̣адхаммо на̄ма наттхи, таббха̄венева т̣ха̄тум̣ саматтхо екасан̇кха̄ропи сассато на̄ма наттхи, саббе сатта̄ маран̣адхамма̄, саббе сан̇кха̄ра̄ бхиджджанадхамма̄, пора̄н̣акапан̣д̣ита̄пи путте мате ‘маран̣адхаммам̣ матам̣, нассанадхаммам̣ нат̣т̣ха’нти на сочим̣сӯ’’ти ватва̄ тена йа̄чито атӣтам̣ а̄хари.
атӣте ба̄ра̄н̣асийам̣ брахмадатте раджджам̣ ка̄ренте бодхисатто ба̄ра̄н̣асийам̣ два̄рага̄маке бра̄хман̣акуле ниббаттитва̄ кут̣умбам̣ сан̣т̣хапетва̄ касикаммена джӣвикам̣ каппеси. тасса путто ча дхӣта̄ ча̄ти две да̄рака̄ ахесум̣. со путтасса вайаппаттасса сама̄накулато кума̄рикам̣ а̄харитва̄ ада̄си, ити те да̄сийа̄ саддхим̣ чха джана̄ ахесум̣ – бодхисатто, бхарийа̄, путто, дхӣта̄, сун̣иса̄, да̄сӣти. те самагга̄ саммодама̄на̄ пийасам̣ва̄са̄ ахесум̣. бодхисатто сеса̄нам̣ пан̃чаннам̣ евам̣ ова̄дам̣ дети ‘‘тумхе йатха̄ладдханийа̄менева да̄нам̣ детха, сӣлам̣ раккхатха, упосатхакаммам̣ каротха, маран̣ассатим̣ бха̄ветха, тумха̄кам̣ маран̣абха̄вам̣ саллаккхетха, имесан̃хи сатта̄нам̣ маран̣ам̣ дхувам̣, джӣвитам̣ аддхувам̣, саббе сан̇кха̄ра̄ аничча̄ кхайавайадхамминова, раттин̃ча дива̄ ча аппаматта̄ хотха̄’’ти. те ‘‘са̄дхӯ’’ти ова̄дам̣ сампат̣иччхитва̄ аппаматта̄ маран̣ассатим̣ бха̄венти.
атхекадивасам̣ бодхисатто путтена саддхим̣ кхеттам̣ гантва̄ касати. путто качаварам̣ сан̇кад̣д̣хитва̄ джха̄пети. тасса̄видӯре екасмим̣ ваммике а̄сӣвисо аттхи. дхӯмо тасса аккхӣни пахари. со куддхо никкхамитва̄ ‘‘имам̣ нисса̄йа майхам̣ бхайа’’нти чатассо да̄т̣ха̄ нимуджджа̄пенто там̣ д̣ам̣си, со париваттитва̄ патито. бодхисатто париваттитва̄ там̣ патитам̣ дисва̄ гон̣е т̣хапетва̄ гантва̄ тасса матабха̄вам̣ н̃атва̄ там̣ уккхипитва̄ екасмим̣ руккхамӯле нипаджджа̄петва̄ па̄рупитва̄ нева роди на паридеви – ‘‘бхиджджанадхаммам̣ пана бхиннам̣, маран̣адхаммам̣ матам̣, саббе сан̇кха̄ра̄ аничча̄ маран̣аниппхаттика̄’’ти аниччабха̄вамева саллаккхетва̄ каси. со кхеттасамӣпена гаччхантам̣ екам̣ пат̣ивиссакам̣ пурисам̣ дисва̄ ‘‘та̄та, гехам̣ гаччхасӣ’’ти пуччхитва̄ ‘‘а̄ма̄’’ти вутте тена хи амха̄кампи гхарам̣ гантва̄ бра̄хман̣им̣ вадеййа̄си ‘‘аджджа кира пуббе вийа двиннам̣ бхаттам̣ ана̄харитва̄ екассева̄ха̄рам̣ а̄хареййа̄тха, пуббе ча екика̄ва да̄сӣ а̄ха̄рам̣ а̄харати, аджджа пана чатта̄ропи джана̄ суддхаваттханиваттха̄ гандхапуппхахаттха̄ а̄гаччхеййа̄тха̄’’ти. со ‘‘са̄дхӯ’’ти гантва̄ бра̄хман̣ийа̄ татхева катхеси. кена те, та̄та, имам̣ са̄санам̣ диннанти. бра̄хман̣ена, аййети. са̄ ‘‘путто ме мато’’ти ан̃н̃а̄си, кампанаматтамписса̄ на̄хоси. евам̣ субха̄витачитта̄ суддхаваттханиваттха̄ гандхапуппхахаттха̄ да̄сим̣ пана а̄ха̄рам̣ а̄хара̄петва̄ сесехи саддхим̣ кхеттам̣ агама̄си. екассапи родитам̣ ва̄ паридевитам̣ ва̄ на̄хоси.
бодхисатто путтасса нипанначха̄йа̄йамева нисӣдитва̄ бхун̃джи. бхутта̄васа̄не саббепи да̄рӯни уддхаритва̄ там̣ читакам̣ а̄ропетва̄ гандхапуппхехи пӯджетва̄ джха̄песум̣. екасса ча екабиндупи ассу на̄хоси, саббепи субха̄витамаран̣ассатино хонти. тесам̣ сӣлатеджена саккасса а̄санам̣ ун̣ха̄ка̄рам̣ дассеси. со ‘‘ко ну кхо мам̣ т̣ха̄на̄ ча̄ветука̄мо’’ти упадха̄ренто тесам̣ гун̣атеджена ун̣хабха̄вам̣ н̃атва̄ пасаннама̄насо хутва̄ ‘‘майа̄ етесам̣ сантикам̣ гантва̄ сӣхана̄дам̣ нада̄петва̄ сӣхана̄дапарийоса̄не етесам̣ нивесанам̣ саттаратанапарипун̣н̣ам̣ катва̄ а̄гантум̣ ват̣т̣атӣ’’ти вегена таттха гантва̄ а̄л̣а̄ханапассе т̣хито ‘‘та̄та, ким̣ каротха̄’’ти а̄ха. ‘‘екам̣ мануссам̣ джха̄пема, са̄мӣ’’ти. ‘‘на тумхе мануссам̣ джха̄пессатха, екам̣ пана мигам̣ ма̄ретва̄ пачатха ман̃н̃е’’ти. ‘‘наттхетам̣ са̄ми, мануссамева джха̄пема̄’’ти. ‘‘тена хи веримануссо во бхависсатӣ’’ти. атха нам̣ бодхисатто ‘‘орасапутто но са̄ми, на верико’’ти а̄ха. ‘‘тена хи во аппийапутто бхависсатӣ’’ти? ‘‘ативийа пийапутто, са̄мӣ’’ти. ‘‘атха касма̄ на родасӣ’’ти? со ароданака̄ран̣ам̣ катхенто пат̣хамам̣ га̄тхама̄ха –
19. ‘‘урагова тачам̣ джин̣н̣ам̣, хитва̄ гаччхати сам̣ танум̣;
евам̣ сарӣре ниббхоге, пете ка̄лакате сати.
20. ‘‘д̣айхама̄но на джа̄на̄ти, н̃а̄тӣнам̣ паридевитам̣;
тасма̄ етам̣ на соча̄ми, гато со тасса йа̄ гатӣ’’ти.
таттха сам̣ танунти аттано сарӣрам̣. ниббхогети джӣвитиндрийасса абха̄вена бхогарахите. петети паралокам̣ пат̣игате. ка̄лакатети катака̄ле, матети аттхо. идам̣ вуттам̣ хоти – са̄ми, мама путто йатха̄ на̄ма ураго джин̣н̣атачам̣ ниччхиндитва̄ анолокетва̄ анапеккхо чхад̣д̣етва̄ гаччхеййа, евам̣ аттано сарӣрам̣ чхад̣д̣етва̄ гаччхати, тасса джӣвитиндрийарахите сарӣре евам̣ ниббхоге тасмин̃ча ме путте пете пуна пат̣игате маран̣ака̄лам̣ катва̄ т̣хите сати ко ка̄рун̃н̃ена ва̄ паридевена ва̄ аттхо. айан̃хи йатха̄ сӯлехи виджджхитва̄ д̣айхама̄но сукхадуккхам̣ на джа̄на̄ти, евам̣ н̃а̄тӣнам̣ паридевитампи на джа̄на̄ти, тена ка̄ран̣ена̄хам̣ етам̣ на соча̄ми. йа̄ тасса аттано гати, там̣ со гатоти.
сакко бодхисаттасса вачанам̣ сутва̄ бра̄хман̣им̣ пуччхи ‘‘амма, туйхам̣ со ким̣ хотӣ’’ти? ‘‘даса ма̄се куччхина̄ парихаритва̄ тхан̃н̃ам̣ па̄йетва̄ хаттхапа̄де сан̣т̣хапетва̄ вад̣д̣хитапутто ме, са̄мӣ’’ти. ‘‘амма, пита̄ та̄ва пурисабха̄вена ма̄ родату, ма̄ту хадайам̣ пана мудукам̣ хоти, твам̣ касма̄ на родасӣ’’ти? са̄ ароданака̄ран̣ам̣ катхентӣ –
21. ‘‘анавхито тато а̄га̄, ананун̃н̃а̄то ито гато;
йатха̄гато татха̄ гато, таттха ка̄ паридевана̄.
22. ‘‘д̣айхама̄но на джа̄на̄ти, н̃а̄тӣнам̣ паридевитам̣;
тасма̄ етам̣ на соча̄ми, гато со тасса йа̄ гатӣ’’ти. – га̄тха̄двайама̄ха –
таттха анавхитоти айам̣ та̄та майа̄ паралокато анавхито айа̄чито. а̄га̄ти амха̄кам̣ гехам̣ а̄гато. итоти ито мануссалокато гаччхантопи майа̄ ананун̃н̃а̄това гато. йатха̄гатоти а̄гаччхантопи йатха̄ аттанова ручийа̄ а̄гато, гаччхантопи татхева гато. таттха̄ти тасмим̣ тасса ито гамане ка̄ паридевана̄. д̣айхама̄ноти га̄тха̄ вуттанайена ведитабба̄.
сакко бра̄хман̣ийа̄ катхам̣ сутва̄ тасса бхагиним̣ пуччхи ‘‘амма, туйхам̣ со ким̣ хотӣ’’ти? ‘‘бха̄та̄ ме, са̄мӣ’’ти. ‘‘амма, бхагинийо на̄ма бха̄тӯсу синеха̄ хонти, твам̣ касма̄ на родасӣ’’ти? са̄ ароданака̄ран̣ам̣ катхентӣ –
23. ‘‘саче роде киса̄ ассам̣, тасса̄ ме ким̣ пхалам̣ сийа̄;
н̃а̄тимиттасухаджджа̄нам̣, бхиййо но аратӣ сийа̄.
24. д̣айхама̄но на джа̄на̄ти, н̃а̄тӣнам̣ паридевитам̣;
тасма̄ етам̣ на соча̄ми, гато со тасса йа̄ гатӣ’’ти. – га̄тха̄двайама̄ха –
таттха сачети йади ахам̣ бха̄тари мате родеййам̣, кисасарӣра̄ ассам̣. бха̄ту пана ме таппаччайа̄ вуд̣д̣хи на̄ма наттхӣти дассети. тасса̄ мети тасса̄ майхам̣ родантийа̄ ким̣ пхалам̣ ко а̄нисам̣со бхавеййа. майхам̣ авуддхи пана пан̃н̃а̄йатӣти дӣпети. н̃а̄тимиттасухаджджа̄нанти н̃а̄тимиттасухада̄нам̣. айамева ва̄ па̄т̣хо. бхиййо ноти йе амха̄кам̣ н̃а̄тӣ ча митта̄ ча сухадайа̄ ча, тесам̣ адхикатара̄ арати сийа̄.
сакко бхагинийа̄ катхам̣ сутва̄ бхарийам̣ пуччхи ‘‘амма, туйхам̣ со ким̣ хотӣ’’ти? ‘‘пати ме, са̄мӣ’’ти. ‘‘иттхийо на̄ма патимхи мате видхава̄ хонти ана̄тха̄, твам̣ касма̄ на родасӣ’’ти. са̄писса ароданака̄ран̣ам̣ катхентӣ –
25. ‘‘йатха̄пи да̄рако чандам̣, гаччхантамануродати;
евам̣сампадамеветам̣, йо петаманусочати.
26. ‘‘д̣айхама̄но на джа̄на̄ти, н̃а̄тӣнам̣ паридевитам̣;
тасма̄ етам̣ на соча̄ми, гато со тасса йа̄ гатӣ’’ти. – га̄тха̄двайама̄ха –
тассаттхо – йатха̄ на̄ма йаттха каттхачи йутта̄йуттам̣ лаббханӣйа̄лаббханӣйам̣ аджа̄нанто ба̄лада̄рако ма̄ту уччхан̇ге нисинно пун̣н̣ама̄сийам̣ пун̣н̣ам̣ чандам̣ а̄ка̄се гаччхантам̣ дисва̄ ‘‘амма, чандам̣ ме дехи, амма, чандам̣ ме дехӣ’’ти пунаппунам̣ родати, евам̣сампадамеветам̣, евам̣ниппхаттикамева етам̣ тасса рун̣н̣ам̣ хоти, йо петам̣ ка̄лакатам̣ анусочати. итопи ча ба̄латарам̣. ким̣ка̄ран̣а̄? со хи виджджама̄начандам̣ ануродати, майхам̣ пана пати мато етарахи авиджджама̄но сӯлехи виджджхитва̄ д̣айхама̄нопи на кин̃чи джа̄на̄тӣти.
сакко бхарийа̄йа вачанам̣ сутва̄ да̄сим̣ пуччхи ‘‘амма, туйхам̣ со ким̣ хотӣ’’ти? ‘‘аййо ме, са̄мӣ’’ти. ‘‘нану твам̣ имина̄ пӣл̣етва̄ потхетва̄ парибхутта̄ бхависсаси, тасма̄ ‘‘сумутта̄ аха’’нти на родасӣ’’ти. ‘са̄ми, ма̄ евам̣ авача, на етам̣ етасса ануччхавикам̣, кхантиметта̄нуддайасампанно ме аййапутто, уре сам̣вад̣д̣хитапутто вийа ахосӣ’ти. ‘‘атха касма̄ на родасӣ’’ти? са̄писса ароданака̄ран̣ам̣ катхентӣ –
27. ‘‘йатха̄пи удакакумбхо, бхинно аппат̣исандхийо;
евам̣сампадамеветам̣, йо петаманусочати.
28. ‘‘д̣айхама̄но на джа̄на̄ти, н̃а̄тӣнам̣ паридевитам̣;
тасма̄ етам̣ на соча̄ми, гато со тасса йа̄ гатӣ’’ти. – га̄тха̄двайама̄ха –
тассаттхо – йатха̄ на̄ма удакакумбхо уккхипийама̄но патитва̄ саттадха̄ бхинно пуна та̄ни капа̄ла̄ни пат̣ипа̄т̣ийа̄ т̣хапетва̄ сам̣видахитва̄ пат̣ипа̄катикам̣ ка̄тум̣ на саккоти, йо петаманусочати, тассапи етаманусочанам̣ евам̣ниппхаттикамева хоти, матасса пуна джӣва̄петум̣ асаккун̣еййатта̄ иддхимато ва̄ иддха̄нубха̄вена бхиннам̣ кумбхам̣ сам̣видахитва̄ удакасса пӯретум̣ сакка̄ бхавеййа, ка̄лакато пана иддхибалена̄пи на сакка̄ пат̣ипа̄катитам̣ ка̄тунти. итара̄ га̄тха̄ вуттаттха̄йева.
сакко саббесам̣ дхаммакатхам̣ сутва̄ пасӣдитва̄ ‘‘тумхехи аппаматтехи маран̣ассати бха̄вита̄, тумхе ито пат̣т̣ха̄йа сахаттхена каммам̣ ма̄ кариттха, ахам̣, сакко девара̄джа̄, ахам̣ во гехе сатта ратана̄ни апарима̄н̣а̄ни карисса̄ми, тумхе да̄нам̣ детха, сӣлам̣ раккхатха, упосатхакаммам̣ каротха, аппаматта̄ хотха̄’’ти тесам̣ ова̄дам̣ датва̄ гехам̣ апаримитадханам̣ катва̄ пакка̄ми.
саттха̄ имам̣ дхаммадесанам̣ а̄харитва̄ сачча̄ни пака̄сетва̄ джа̄такам̣ самодха̄неси, саччапарийоса̄не кут̣умбико сота̄паттипхале патит̣т̣хахи. тада̄ да̄сӣ кхуджджуттара̄ ахоси, дхӣта̄ уппалаван̣н̣а̄, путто ра̄хуло, ма̄та̄ кхема̄, бра̄хман̣о пана ахамева ахосинти.
урагаджа̄такаван̣н̣ана̄ чатуттха̄.
[355] 5. гхат̣аджа̄такаван̣н̣ана̄
ан̃н̃е сочанти родантӣти идам̣ саттха̄ джетаване вихаранто косаларан̃н̃о екам̣ амаччам̣ а̄раббха катхеси. ваттху хет̣т̣ха̄ катхитасадисамева. идха пана ра̄джа̄ аттано упака̄расса амаччасса махантам̣ йасам̣ датва̄ парибхедака̄нам̣ катхам̣ гахетва̄ там̣ бандха̄петва̄ бандхана̄га̄ре павесеси. со таттха нисиннова сота̄паттимаггам̣ ниббаттеси. ра̄джа̄ тасса гун̣ам̣ саллаккхетва̄ моча̄песи. со гандхама̄лам̣ а̄да̄йа саттху сантикам̣ гантва̄ вандитва̄ нисӣди. атха нам̣ саттха̄ ‘‘анаттхо кира те уппанно’’ти пуччхитва̄ ‘‘а̄ма, бханте, анаттхена пана ме аттхо а̄гато, сота̄паттимагго ниббатто’’ти вутте ‘‘на кхо, упа̄сака, тван̃н̃ева анаттхена аттхам̣ а̄хари, пора̄н̣акапан̣д̣ита̄пи а̄харим̣сӯ’’ти ватва̄ тена йа̄чито атӣтам̣ а̄хари.
атӣте ба̄ра̄н̣асийам̣ брахмадатте раджджам̣ ка̄ренте бодхисатто тасса аггамахесийа̄ куччхимхи ниббатти, ‘‘гхат̣акума̄ро’’тисса на̄мам̣ карим̣су. со апарена самайена таккасила̄йам̣ уггахитасиппо дхаммена раджджам̣ ка̄реси. тасса антепуре еко амаччо дуббхи. со там̣ паччаккхато н̃атва̄ рат̣т̣ха̄ пабба̄джеси. тада̄ са̄ваттхийам̣ дхан̇кара̄джа̄ на̄ма раджджам̣ ка̄реси. со тасса сантикам̣ гантва̄ там̣ упат̣т̣хахитва̄ хет̣т̣ха̄ вуттанайена аттано вачанам̣ га̄ха̄петва̄ ба̄ра̄н̣асираджджам̣ ган̣ха̄песи. сопи раджджам̣ гахетва̄ бодхисаттам̣ сан̇кхалика̄хи бандха̄петва̄ бандхана̄га̄рам̣ павесеси. бодхисатто джха̄нам̣ ниббаттетва̄ а̄ка̄се паллан̇кена нисӣди, дхан̇касса сарӣре д̣а̄хо уппаджджи. со гантва̄ бодхисаттасса суван̣н̣а̄да̄сапхуллападумасассирикам̣ мукхам̣ дисва̄ бодхисаттам̣ пуччханто пат̣хамам̣ га̄тхама̄ха –
29. ‘‘ан̃н̃е сочанти роданти, ан̃н̃е ассумукха̄ джана̄;
пасаннамукхаван̣н̣оси, касма̄ гхат̣а на сочасӣ’’ти.
таттха ан̃н̃ети там̣ т̣хапетва̄ сесаманусса̄.
атхасса бодхисатто асочанака̄ран̣ам̣ катхенто чатассо га̄тха̄ абха̄си –
30. ‘‘на̄ббхатӣтахаро соко, на̄на̄гатасукха̄вахо;
тасма̄ дхан̇ка на соча̄ми, наттхи соке дутӣйата̄.
31. ‘‘сочам̣ пан̣д̣у кисо хоти, бхаттан̃часса на руччати;
амитта̄ сумана̄ хонти, саллавиддхасса руппато.
32. ‘‘га̄ме ва̄ йади ва̄ран̃н̃е, нинне ва̄ йади ва̄ тхале;
т̣хитам̣ мам̣ на̄гамиссати, евам̣ дит̣т̣хападо ахам̣.
33. ‘‘йассатта̄ на̄ламекова, саббака̄мараса̄харо;
сабба̄пи патхавӣ тасса, на сукхам̣ а̄вахиссатӣ’’ти.
таттха на̄ббхатӣтахароти на̄ббхатӣта̄ха̄ро, айамева ва̄ па̄т̣хо. соко на̄ма аббхатӣтам̣ атиккантам̣ нируддхам̣ аттхан̇гатам̣ пуна на̄харати. дутӣйата̄ти саха̄йата̄. атӣта̄харан̣ена ва̄ ана̄гата̄харан̣ена ва̄ соко на̄ма кассачи саха̄йо на хоти, тена̄пи ка̄ран̣ена̄хам̣ на соча̄мӣти вадати. сочанти сочанто. саллавиддхасса руппатоти сокасаллена виддхасса тенева гхат̣т̣ийама̄насса ‘‘дит̣т̣ха̄ вата но пачча̄миттасса пит̣т̣хӣ’’ти амитта̄ сумана̄ хонтӣти аттхо.
т̣хитам̣ мам̣ на̄гамиссатӣти самма дхан̇кара̄джа, етесу га̄ма̄дӣсу йаттха каттхачи т̣хитам̣ мам̣ пан̣д̣укисабха̄ва̄дикам̣ сокамӯлакам̣ бйасанам̣ на а̄гамиссати. евам̣ дит̣т̣хападоти йатха̄ там̣ бйасанам̣ на̄гаччхати, евам̣ майа̄ джха̄нападам̣ дит̣т̣хам̣. ‘‘ат̣т̣халокадхаммапада’’нтипи вадантийева. па̄л̣ийам̣ пана ‘‘на маттам̣ на̄гамиссатӣ’’ти ликхитам̣, там̣ ат̣т̣хакатха̄йам̣ наттхи. парийоса̄нага̄тха̄йа иччхитапаттхитаттхена джха̄насукхасан̇кха̄там̣ саббака̄марасам̣ а̄харатӣти саббака̄мараса̄харо. идам̣ вуттам̣ хоти – йасса ран̃н̃о паха̄йа ан̃н̃асаха̄йе атта̄ва еко саббака̄мараса̄харо на̄лам̣, саббам̣ джха̄насукхасан̇кха̄там̣ ка̄марасам̣ а̄харитум̣ асаматтхо, тасса ран̃н̃о сабба̄пи патхавӣ на сукхам̣ а̄вахиссати. ка̄ма̄турасса хи сукхам̣ на̄ма наттхи, йо пана килесадаратхарахитам̣ джха̄насукхам̣ а̄харитум̣ саматтхо, со ра̄джа̄ сукхӣ хотӣти. йо панета̄йа га̄тха̄йа ‘‘йассаттха̄ на̄ламеко’’типи па̄т̣хо, тассаттхо на диссати.
ити дхан̇ко има̄ чатассо га̄тха̄ сутва̄ бодхисаттам̣ кхама̄петва̄ раджджам̣ пат̣иччха̄петва̄ пакка̄ми. бодхисаттопи раджджам̣ амачча̄нам̣ пат̣иниййа̄детва̄ химавантападесам̣ гантва̄ исипаббаджджам̣ паббаджитва̄ апарихӣнаджджха̄но брахмалокапара̄йан̣о ахоси.
саттха̄ имам̣ дхаммадесанам̣ а̄харитва̄ джа̄такам̣ самодха̄неси – ‘‘тада̄ дхан̇кара̄джа̄ а̄нандо ахоси, гхат̣ара̄джа̄ пана ахамева ахоси’’нти.
гхат̣аджа̄такаван̣н̣ана̄ пан̃чама̄.
[356] 6. коран̣д̣ийаджа̄такаван̣н̣ана̄
еко аран̃н̃ети идам̣ саттха̄ джетаване вихаранто дхаммасена̄патим̣ а̄раббха катхеси. тхеро кира а̄гата̄гата̄нам̣ дуссӣла̄нам̣ мигалуддакамаччхабандха̄дӣнам̣ дит̣т̣хадит̣т̣ха̄нан̃н̃ева ‘‘сӣлам̣ ган̣хатха, сӣлам̣ ган̣хатха̄’’ти сӣлам̣ дети. те тхере гарубха̄вена тасса катхам̣ бхиндитум̣ асакконта̄ сӣлам̣ ган̣ханти, гахетва̄ ча пана на раккханти, аттано аттано каммамева каронти. тхеро саддхивиха̄рике а̄мантетва̄ ‘‘а̄вусо, име манусса̄ мама сантике сӣлам̣ ган̣хим̣су, ган̣хитва̄ ча пана на раккхантӣ’’ти а̄ха. ‘‘бханте, тумхе етесам̣ аручийа̄ сӣлам̣ детха, ете тумха̄кам̣ катхам̣ бхиндитум̣ асакконта̄ ган̣ханти, тумхе ито пат̣т̣ха̄йа еварӯпа̄нам̣ сӣлам̣ ма̄ адаттха̄’’ти. тхеро анаттамано ахоси. там̣ паваттим̣ сутва̄ бхиккхӯ дхаммасабха̄йам̣ катхам̣ самут̣т̣ха̄песум̣ – ‘‘а̄вусо, са̄рипуттаттхеро кира дит̣т̣хадит̣т̣ха̄нан̃н̃ева сӣлам̣ детӣ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄нева, пуббепеса дит̣т̣хадит̣т̣ха̄нам̣ айа̄чанта̄нан̃н̃ева сӣлам̣ детӣ’’ти ватва̄ атӣтам̣ а̄хари.
атӣте ба̄ра̄н̣асийам̣ брахмадатте раджджам̣ ка̄ренте бодхисатто бра̄хман̣акуле ниббаттитва̄ вайаппатто таккасила̄йам̣ диса̄па̄моккхасса а̄чарийасса джет̣т̣хантева̄сико коран̣д̣ийо на̄ма ахоси. тада̄ со а̄чарийо дит̣т̣хадит̣т̣ха̄нам̣ кеват̣т̣а̄дӣнам̣ айа̄чанта̄нан̃н̃ева ‘‘сӣлам̣ ган̣хатха, сӣлам̣ ган̣хатха̄’’ти сӣлам̣ дети. те гахетва̄пи на раккханти а̄чарийо таматтхам̣ антева̄сика̄нам̣ а̄рочеси. антева̄сика̄ ‘‘бханте, тумхе етесам̣ аручийа̄ сӣлам̣ детха, тасма̄ бхинданти, ито да̄ни пат̣т̣ха̄йа йа̄чанта̄нан̃н̃ева дадеййа̄тха, ма̄ айа̄чанта̄на’’нти вадим̣су. со виппат̣иса̄рӣ ахоси, евам̣ сантепи дит̣т̣хадит̣т̣ха̄нам̣ сӣлам̣ детийева.
атхекадивасам̣ екасма̄ га̄ма̄ манусса̄ а̄гантва̄ бра̄хман̣ава̄чанакаттха̄йа а̄чарийам̣ нимантайим̣су. со коран̣д̣ийама̄н̣авам̣ паккоситва̄ ‘‘та̄та, ахам̣ на гаччха̄ми, твам̣ име пан̃часате ма̄н̣аве гахетва̄ таттха гантва̄ ва̄чанака̄ни сампат̣иччхитва̄ амха̄кам̣ диннакот̣т̣ха̄сам̣ а̄хара̄’’ти песеси. со гантва̄ пат̣иниваттанто антара̄магге екам̣ кандарам̣ дисва̄ чинтеси ‘‘амха̄кам̣ а̄чарийо дит̣т̣хадит̣т̣ха̄нам̣ айа̄чанта̄нан̃н̃ева сӣлам̣ дети, ито да̄ни пат̣т̣ха̄йа йатха̄ йа̄чанта̄нан̃н̃ева дети, татха̄ нам̣ карисса̄мӣ’’ти. со тесу ма̄н̣авесу сукханисиннесу ут̣т̣ха̄йа махантам̣ махантам̣ селам̣ уккхипитва̄ кандара̄йам̣ кхипи, пунаппунам̣ кхипийева. атха нам̣ те ма̄н̣ава̄ ут̣т̣ха̄йа ‘‘а̄чарийа, ким̣ каросӣ’’ти а̄хам̣су. со на кин̃чи катхеси, те вегена гантва̄ а̄чарийасса а̄рочесум̣. а̄чарийо а̄гантва̄ тена саддхим̣ саллапанто пат̣хамам̣ га̄тхама̄ха –
34. ‘‘еко аран̃н̃е гирикандара̄йам̣, паггайха паггайха силам̣ павеччхаси;
пунаппунам̣ сантарама̄нарӯпо, коран̣д̣ийа ко ну тава йидхаттхо’’ти.
таттха ко ну тава йидхаттхоти ко ну тава идха кандара̄йам̣ сила̄кхипанена аттхо.
со тасса вачанам̣ сутва̄ а̄чарийам̣ пабодхетука̄мо дутийам̣ га̄тхама̄ха –
35. ‘‘ахан̃химам̣ са̄гарасевитантам̣, самам̣ карисса̄ми йатха̄пи па̄н̣и;
викирийа са̄нӯни ча паббата̄ни ча, тасма̄ силам̣ дарийа̄ паккхипа̄мӣ’’ти.
таттха ахан̃химанти ахан̃хи имам̣ маха̄патхавим̣. са̄гарасевитантанти са̄гарехи севитам̣ ча̄турантам̣. йатха̄пи па̄н̣ӣти хаттхаталам̣ вийа самам̣ карисса̄ми. викирийа̄ти викиритва̄. са̄нӯни ча паббата̄ни ча̄ти пам̣супаббате ча сила̄паббате ча.
там̣ сутва̄ бра̄хман̣о татийам̣ га̄тхама̄ха –
36. ‘‘найимам̣ махим̣ арахати па̄н̣икаппам̣, самам̣ мануссо каран̣а̄йа меко;
ман̃н̃а̄миман̃н̃ева дарим̣ джигӣсам̣, коран̣д̣ийа ха̄хаси джӣвалока’’нти.
таттха каран̣а̄йа мекоти каран̣а̄йа еко ка̄тум̣ на саккотӣти дӣпети. ман̃н̃а̄миман̃н̃ева дарим̣ джигӣсанти ахам̣ ман̃н̃а̄ми тит̣т̣хату патхавӣ, иман̃н̃ева екам̣ дарим̣ джигӣсам̣ пӯран̣аттха̄йа ва̄йаманто сила̄ парийесанто упа̄йам̣ вичинантова твам̣ имам̣ джӣвалокам̣ ха̄хаси джахиссаси, мариссасӣти аттхо.
там̣ сутва̄ ма̄н̣аво чатуттхам̣ га̄тхама̄ха –
37. ‘‘саче айам̣ бхӯтадхарам̣ на сакка̄, самам̣ мануссо каран̣а̄йа меко;
евамева твам̣ брахме име мануссе, на̄на̄дит̣т̣хике на̄найиссаси те’’ти.
тассаттхо – саче айам̣ еко мануссо имам̣ бхӯтадхарам̣ патхавим̣ самам̣ ка̄тум̣ на сакка̄ на саматтхо, евамева твам̣ име дуссӣламануссе на̄на̄дит̣т̣хике на̄найиссаси, те евам̣ ‘‘сӣлам̣ ган̣хатха, сӣлам̣ ган̣хатха̄’’ти ваданто аттано васам̣ на а̄найиссаси, пан̣д̣итапуриса̄йева хи па̄н̣а̄типа̄там̣ ‘‘акусала’’нти гараханти. сам̣са̄рамочака̄дайо панеттха кусаласан̃н̃ино, те твам̣ катхам̣ а̄найиссаси, тасма̄ дит̣т̣хадит̣т̣ха̄нам̣ сӣлам̣ адатва̄ йа̄чанта̄нан̃н̃ева дехӣти.
там̣ сутва̄ а̄чарийо ‘‘йуттам̣ вадати коран̣д̣ийо, ида̄ни на еварӯпам̣ карисса̄мӣ’’ти аттано вираддхабха̄вам̣ н̃атва̄ пан̃чамам̣ га̄тхама̄ха –
38. ‘‘сам̣кхиттарӯпена бхавам̣ маматтхам̣, аккха̄си коран̣д̣ийа еваметам̣;