5. маккхасуттаван̣н̣ана̄

5. пан̃чаме маккханти парагун̣амаккханам̣. йадипи хи со гӯтхам̣ гахетва̄ парам̣ пахаранто вийа аттано карам̣ пат̣хаматарам̣ маккхатийева, татха̄пи паресам̣ гун̣амаккхана̄дхиппа̄йена паваттетаббатта̄ ‘‘парагун̣амаккхано’’ти вуччати. татха̄ хи со удакапун̃чханамива нха̄тасса сарӣрагатам̣ удакам̣ паресам̣ гун̣е маккхети пун̃чхати вина̄сети, парехи ва̄ ката̄нам̣ маханта̄нампи ка̄ра̄нам̣ кхепанато дхам̣санато маккхоти вуччати. со парагун̣амаккханалаккхан̣о, тесам̣ вина̄санарасо, тадаваччха̄данапаччупат̣т̣ха̄но. аттхато пана паресам̣ гун̣амаккхана̄ка̄рена паватто доманассасахагатачиттуппа̄доти дат̣т̣хаббам̣. паджахатха̄ти таттха вуттаппабхедам̣ досам̣, досе ча вуттанайам̣ а̄дӣнавам̣, паха̄не часса а̄нисам̣сам̣ паччавеккхитва̄ пуббабха̄ге тадан̇га̄дивасена паджаханта̄ випассанам̣ уссукка̄петва̄ татийамаггена анавасесам̣ самуччхиндатха̄ти аттхо. маккха̄сети маккхита̄ маккхитапарагун̣а̄, паресам̣ гун̣а̄нам̣ маккхита̄ро, тато ева аттанопи дхам̣ситагун̣а̄ти аттхо. сесам̣ вуттанайамева.

пан̃чамасуттаван̣н̣ана̄ нит̣т̣хита̄.