3. мохасуттаван̣н̣ана̄

3. татийе моханти ан̃н̃а̄н̣ам̣. тан̃хи дуккхе ан̃н̃а̄н̣ам̣, дуккхасамудайе ан̃н̃а̄н̣ам̣, дуккханиродхе ан̃н̃а̄н̣ам̣, дуккханиродхага̄минийа̄ пат̣ипада̄йа ан̃н̃а̄н̣антиа̄дина̄ найена вибха̄гена анекаппабхедампи муйханти. тена сайам̣ ва̄ муйхати муйханаматтамева ва̄ танти мохоти вуччати. со читтасса андхабха̄валаккхан̣о, ан̃н̃а̄н̣алаккхан̣о ва̄, асампат̣иведхарасо, а̄рамман̣асабха̄ваччха̄данарасо ва̄, асамма̄ппат̣ипаттипаччупат̣т̣ха̄но, андхака̄рапаччупат̣т̣ха̄но ва̄, айонисоманасика̄рападат̣т̣ха̄но, сабба̄кусала̄нам̣ мӯланти дат̣т̣хаббо. идха̄пи паджахатха̄ти падасса –

‘‘мӯл̣хо аттхам̣ на джа̄на̄ти, мӯл̣хо дхаммам̣ на пассати;

андхатамам̣ тада̄ хоти, йам̣ мохо сахате нарам̣’’. (итиву. 88);

‘‘анаттхаджанано мохо…пе…. (итиву. 88);

‘‘авиджджа̄, бхиккхаве, пуббан̇гама̄ акусала̄нам̣ дхамма̄нам̣ сама̄паттийа̄’’ (итиву. 40);

‘‘мохасамбандхано локо, бхаббарӯпова диссати’’; (уда̄. 70);

‘‘мохо нида̄нам̣ камма̄нам̣ самудайа̄йа’’ (а. ни. 3.34);

‘‘мӯл̣хо кхо, бра̄хман̣а, мохена абхибхӯто парийа̄динначитто дит̣т̣хадхаммикампи бхайам̣ верам̣ пасавати, сампара̄йикампи бхайам̣ верам̣ пасаватӣ’’ти ча –

а̄дина̄ найена ‘‘йо кочи дхаммо ка̄маччханда̄дисам̣килесадхаммехи ниббаттетаббо, аттхато саббо со мохахетуко’’ти ча мохе а̄дӣнавам̣ таппат̣ипаккхато мохаппаха̄не а̄нисам̣сан̃ча паччавеккхитва̄ ка̄маччханда̄диппаха̄наккаменева пуббабха̄ге тадан̇га̄дивасена мохам̣ паджаханта̄ татийамаггена йатха̄вутталобхадосекат̣т̣хам̣ мохам̣ самуччхедавасена паджахатха̄ти аттхо дат̣т̣хаббо. ана̄га̄мимаггаваджджхо ева хи мохо идха̄дхиппетоти. мӯл̣ха̄сети кусала̄кусаласа̄ваджджа̄наваджджа̄дибхеде аттано хита̄хите саммӯл̣ха̄. сесам̣ вуттанайамева.

татийасуттаван̣н̣ана̄ нит̣т̣хита̄.