12. суппабуддхасакйаваттху

на анталиккхети имам̣ дхаммадесанам̣ саттха̄ нигродха̄ра̄ме вихаранто суппабуддхам̣ саккам̣ а̄раббха катхеси.

со кира ‘‘айам̣ мама дхӣтарам̣ чхад̣д̣етва̄ никкханто ча, мама путтам̣ пабба̄джетва̄ тасса верит̣т̣ха̄не т̣хито ча̄’’ти имехи двӣхи ка̄ран̣ехи саттхари а̄гха̄там̣ бандхитва̄ екадивасам̣ ‘‘на да̄нисса нимантанат̣т̣ха̄нам̣ гантва̄ бхун̃джитум̣ дасса̄мӣ’’ти гаманамаггам̣ пидахитва̄ антаравӣтхийам̣ сурам̣ пиванто нисӣди. атхасса саттхари бхиккхусан̇гхапаривуте там̣ т̣ха̄нам̣ а̄гате ‘‘саттха̄ а̄гато’’ти а̄рочесум̣. со а̄ха – ‘‘пурато гаччха̄ти тасса вадетха, на̄йам̣ майа̄ махаллакатаро, на̄сса маггам̣ дасса̄мӣ’’ти пунаппунам̣ вуччама̄нопи татхева ватва̄ нисӣди. саттха̄ ма̄туласса сантика̄ маггам̣ алабхитва̄ тато ниватти. сопи екам̣ чарапурисам̣ песеси ‘‘гаччха, тасса катхам̣ сутва̄ ехӣ’’ти. саттха̄пи ниваттанто ситам̣ катва̄ а̄нандаттхерена ‘‘ко ну кхо, бханте, ситасса па̄тукаммасса паччайо’’ти пут̣т̣хо а̄ха – ‘‘пассаси, а̄нанда, суппабуддха’’нти. пасса̄ми, бхантети. бха̄рийам̣ тена каммам̣ катам̣ ма̄дисасса буддхасса маггам̣ адентена, ито саттаме дивасе хет̣т̣ха̄па̄са̄де сопа̄напа̄дамӯле патхавим̣ пависиссатӣти. чарапурисо там̣ катхам̣ сутва̄ суппабуддхасса сантикам̣ гантва̄ ‘‘ким̣ мама бха̄гинеййена ниваттантена вутта’’нти пут̣т̣хо йатха̄сутам̣ а̄рочеси. со тасса вачанам̣ сутва̄ ‘‘на да̄ни мама бха̄гинеййасса катха̄йа досо аттхи, аддха̄ йам̣ со вадати, там̣ татхева хоти. евам̣ сантепи нам̣ ида̄ни муса̄ва̄дена нигган̣хисса̄ми. со хи мам̣ ‘саттаме дивасе патхавим̣ пависиссатӣ’ти анийамена аватва̄ ‘хет̣т̣ха̄па̄са̄де сопа̄напа̄дамӯле патхавим̣ пависиссатӣ’’’ти а̄ха. ‘‘ито да̄ни пат̣т̣ха̄йа̄хам̣ там̣ т̣ха̄нам̣ на гамисса̄ми, атха нам̣ тасмим̣ т̣ха̄не патхавим̣ апависитва̄ муса̄ва̄дена нигган̣хисса̄мӣ’’ти аттано упабхогаджа̄там̣ саббам̣ саттабхӯмикапа̄са̄дасса упари а̄ропетва̄ сопа̄нам̣ хара̄петва̄ два̄рам̣ пидаха̄петва̄ екекасмим̣ два̄ре две две малле т̣хапетва̄ ‘‘сача̄хам̣ пама̄дена хет̣т̣ха̄ орохитука̄мо хоми, нива̄реййа̄тха ма’’нти ватва̄ саттаме па̄са̄датале сиригаббхе нисӣди. саттха̄ там̣ паваттим̣ сутва̄, ‘‘бхиккхаве, суппабуддхо на кевалам̣ па̄са̄датале веха̄сам̣ уппатитва̄ а̄ка̄се ва̄ нисӣдату, на̄ва̄йа ва̄ самуддам̣ паккхандату, паббатантарам̣ ва̄ пависату, буддха̄нам̣ катха̄йа двидха̄бха̄во на̄ма наттхи, майа̄ вуттат̣т̣ха̄нейева со патхавим̣ пависиссатӣ’’ти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

128. ‘‘на анталиккхе на самуддамаджджхе, на паббата̄нам̣ виварам̣ пависса;

на виджджатӣ со джагатиппадесо, йаттхат̣т̣хитам̣ наппасахеййа маччӯ’’ти.

таттха йаттха т̣хитам̣ наппасахеййа, маччӯти йасмим̣ падесе т̣хитам̣ маран̣ам̣ наппасахеййа на̄бхибхавеййа, кесаггаматтопи патхавиппадесо наттхи. сесам̣ пуримасадисамева̄ти.

десана̄васа̄не бахӯ сота̄паттипхала̄дӣни па̄пун̣им̣сӯти.

саттаме дивасе саттху бхиккха̄ча̄рамаггасса нируддхавела̄йа хет̣т̣ха̄па̄са̄де суппабуддхасса ман̇галассо удда̄мо хутва̄ там̣ там̣ бхиттим̣ пахари. со упари нисинновасса саддам̣ сутва̄ ‘‘кимета’’нти пуччхи. ‘‘ман̇галассо удда̄мо’’ти. со панассо суппабуддхам̣ дисва̄ва саннисӣдати. атха нам̣ со ган̣хитука̄мо хутва̄ нисиннат̣т̣ха̄на̄ ут̣т̣ха̄йа два̄ра̄бхимукхо ахоси, два̄ра̄ни сайамева виват̣а̄ни, сопа̄нам̣ сакат̣т̣ха̄нейева т̣хитам̣. два̄ре т̣хита̄ малла̄ там̣ гӣва̄йам̣ гахетва̄ хет̣т̣ха̄бхимукхам̣ кхипим̣су. етенупа̄йена саттасупи талесу два̄ра̄ни сайамева виват̣а̄ни, сопа̄на̄ни йатха̄т̣ха̄не т̣хита̄ни. таттха таттха малла̄ там̣ гӣва̄йамева гахетва̄ хет̣т̣ха̄бхимукхам̣ кхипим̣су. атха нам̣ хет̣т̣ха̄па̄са̄де сопа̄напа̄дамӯлам̣ сампаттамева маха̄патхавӣ виварама̄на̄ бхиджджитва̄ сампат̣иччхи, со гантва̄ авӣчимхи ниббаттӣти.

суппабуддхасакйаваттху два̄дасамам̣.

па̄паваггаван̣н̣ана̄ нит̣т̣хита̄.

навамо вагго.