8. маха̄паджа̄патиготамӣваттху

йасса ка̄йена ва̄ча̄йа̄ти имам̣ дхаммадесанам̣ саттха̄ джетаване вихаранто маха̄паджа̄патим̣ готамим̣ а̄раббха катхеси.

бхагавата̄ хи ануппанне ваттхусмим̣ пан̃н̃атте ат̣т̣ха гарудхамме ман̣д̣анакаджа̄тийо пурисо сурабхипуппхада̄мам̣ вийа сираса̄ сампат̣иччхитва̄ сапарива̄ра̄ маха̄паджа̄пати готамӣ упасампадам̣ лабхи, ан̃н̃о тасса̄ упаджджха̄йо ва̄ а̄чарийо ва̄ наттхи. евам̣ ладдхӯпасампадам̣ тхерим̣ а̄раббха апарена самайена катхам̣ самут̣т̣ха̄песум̣ ‘‘маха̄паджа̄патийа̄ готамийа̄ а̄чарийупаджджха̄йа̄ на пан̃н̃а̄йанти, сахаттхенева ка̄са̄йа̄ни ган̣хӣ’’ти. еван̃ча пана ватва̄ бхиккхунийо куккучча̄йантийо та̄йа саддхим̣ нева упосатхам̣ на пава̄ран̣ам̣ каронти, та̄ гантва̄ татха̄гатассапи таматтхам̣ а̄рочесум̣. саттха̄ та̄сам̣ катхам̣ сутва̄ ‘‘майа̄ маха̄паджа̄патийа̄ готамийа̄ ат̣т̣ха гарудхамма̄ динна̄, ахамевасса̄чарийо, ахамева упаджджха̄йо. ка̄йадуччарита̄дивирахитесу кхӣн̣а̄савесу куккуччам̣ на̄ма на ка̄табба’’нти ватва̄ дхаммам̣ десенто имам̣ га̄тхама̄ха –

391. ‘‘йасса ка̄йена ва̄ча̄йа, манаса̄ наттхи дуккат̣ам̣;

сам̣вутам̣ тӣхи т̣ха̄нехи, тамахам̣ брӯми бра̄хман̣а’’нти.

таттха дуккат̣анти са̄ваджджам̣ дуккхудрайам̣ апа̄йасам̣ваттаникам̣ каммам̣. тӣхи т̣ха̄нехӣти етехи ка̄йа̄дӣхи тӣхи ка̄ран̣ехи ка̄йадуччарита̄дипавесанива̄ран̣аттха̄йа два̄рам̣ пихитам̣, там̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

маха̄паджа̄патиготамӣваттху ат̣т̣хамам̣.