25. пилиндаваччхаттхераваттху

акаккасанти имам̣ дхаммадесанам̣ саттха̄ вел̣уване вихаранто пилиндаваччхаттхерам̣ а̄раббха катхеси.

со кира̄йасма̄ ‘‘ехи, васали, йа̄хи, васалӣ’’тиа̄дӣни ваданто гихӣпи паббаджитепи васалива̄денева самуда̄чарати. атхекадивасам̣ самбахула̄ бхиккхӯ саттху а̄рочесум̣ – ‘‘а̄йасма̄, бханте, пилиндаваччхо бхиккхӯ васалива̄дена самуда̄чаратӣ’’ти. саттха̄ там̣ паккоса̄петва̄ ‘‘саччам̣ кира твам̣ пилиндаваччха бхиккхӯ васалива̄дена самуда̄чарасӣ’’ти пуччхитва̄ ‘‘евам̣, бханте’’ти вутте тасса̄йасмато пуббенива̄сам̣ манасикаритва̄ ‘‘ма̄ кхо тумхе, бхиккхаве, ваччхасса бхиккхуно уджджха̄йиттха, на, бхиккхаве, ваччхо досантаро бхиккхӯ васалива̄дена самуда̄чарати, ваччхасса, бхиккхаве, бхиккхуно пан̃ча джа̄тисата̄ни аббокин̣н̣а̄ни сабба̄ни та̄ни бра̄хман̣акуле пачча̄джа̄та̄ни, со тасса дӣгхараттам̣ васалива̄до самуда̄чин̣н̣о, кхӣн̣а̄савасса на̄ма каккасам̣ пхарусам̣ паресам̣ маммагхат̣т̣анавачанамева наттхи. а̄чин̣н̣авасена хи мама путто евам̣ катхетӣ’’ти ватва̄ имам̣ га̄тхама̄ха –

408. ‘‘акаккасам̣ вин̃н̃а̄паним̣, гирам̣ саччамудӣрайе;

йа̄йа на̄бхисадже кан̃чи, тамахам̣ брӯми бра̄хман̣а’’нти.

таттха акаккасанти апхарусам̣. вин̃н̃а̄панинти аттхавин̃н̃а̄паним̣. саччанти бхӯтаттхам̣. на̄бхисаджети йа̄йа гира̄йа ан̃н̃ам̣ куджджха̄панавасена на лагга̄пеййа, кхӣн̣а̄саво на̄ма еварӯпамева гирам̣ бха̄сеййа, тасма̄ тамахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

пилиндаваччхаттхераваттху пан̃чавӣсатимам̣.