19. ан̃н̃атарабра̄хман̣аваттху

йо дуккхасса̄ти имам̣ дхаммадесанам̣ саттха̄ джетаване вихаранто ан̃н̃атарам̣ бра̄хман̣ам̣ а̄раббха катхеси.

тасса киреко да̄со апан̃н̃атте сиккха̄паде пала̄йитва̄ паббаджитва̄ арахаттам̣ па̄пун̣и. бра̄хман̣о там̣ олокенто адисва̄ екадивасам̣ саттха̄ра̄ саддхим̣ пин̣д̣а̄йа пависантам̣ два̄рантаре дисва̄ чӣварам̣ дал̣хам̣ аггахеси. саттха̄ ниваттитва̄ ‘‘ким̣ идам̣, бра̄хман̣а̄’’ти пуччхи. да̄со ме, бхо готама̄ти. паннабха̄ро еса, бра̄хман̣а̄ти. ‘‘паннабха̄ро’’ти ча вутте бра̄хман̣о ‘‘араха̄’’ти саллаккхеси. тасма̄ пунапи тена ‘‘евам̣, бхо готама̄’’ти вутте саттха̄ ‘‘а̄ма, бра̄хман̣а, паннабха̄ро’’ти ватва̄ имам̣ га̄тхама̄ха –

402. ‘‘йо дуккхасса паджа̄на̄ти, идхева кхайаматтано;

паннабха̄рам̣ висам̣йуттам̣, тамахам̣ брӯми бра̄хман̣а’’нти.

таттха дуккхасса̄ти кхандхадуккхасса. паннабха̄ранти охитакхандхабха̄рам̣ чатӯхи йогехи саббакилесехи ва̄ висам̣йуттам̣ тамахам̣ бра̄хман̣ам̣ вада̄мӣти аттхо. десана̄васа̄не со бра̄хман̣о сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

ан̃н̃атарабра̄хман̣аваттху екӯнавӣсатимам̣.