16. аккосакабха̄радва̄джаваттху

аккосанти имам̣ дхаммадесанам̣ саттха̄ вел̣уване вихаранто аккосакабха̄радва̄джам̣ а̄раббха катхеси.

тасса хи бха̄ту бха̄радва̄джасса дханан̃джа̄нӣ на̄ма бра̄хман̣ӣ сота̄панна̄ ахоси. са̄ кхӣпитва̄пи ка̄ситва̄пи паккхалитва̄пи ‘‘намо тасса бхагавато арахато самма̄самбуддхасса̄’’ти имам̣ уда̄нам̣ уда̄неси. са̄ екадивасам̣ бра̄хман̣апаривесана̄йа паваттама̄на̄йа паккхалитва̄ татхева маха̄саддена уда̄нам̣ уда̄неси. бра̄хман̣о куджджхитва̄ ‘‘евамева̄йам̣ васалӣ йаттха ва̄ таттха ва̄ паккхалитва̄ тасса мун̣д̣акасса саман̣акасса ван̣н̣ам̣ бха̄сатӣ’’ти ватва̄ ‘‘ида̄ни те, васали, гантва̄ тасса саттхуно ва̄дам̣ а̄ропесса̄мӣ’’ти а̄ха. атха нам̣ са̄ ‘‘гаччха, бра̄хман̣а, на̄хам̣ там̣ пасса̄ми, йо тасса бхагавато ва̄дам̣ а̄ропеййа, апи ча гантва̄ там̣ бхагавантам̣ пан̃хам̣ пуччхассӯ’’ти а̄ха. со саттху сантикам̣ гантва̄ авандитва̄ва екамантам̣ т̣хито пан̃хам̣ пуччханто имам̣ га̄тхама̄ха –

‘‘ким̣су чхетва̄ сукхам̣ сети, ким̣су чхетва̄ на сочати;

киссассу екадхаммасса, вадхам̣ рочеси готама̄’’ти. (сам̣. ни. 1.187);

атхасса пан̃хам̣ бйа̄каронто саттха̄ имам̣ га̄тхама̄ха –

‘‘кодхам̣ чхетва̄ сукхам̣ сети, кодхам̣ чхетва̄ на сочати;

кодхасса висамӯласса, мадхураггасса бра̄хман̣а;

вадхам̣ арийа̄ пасам̣санти, тан̃хи чхетва̄ на сочатӣ’’ти. (сам̣. ни. 1.187);

со саттхари пасӣдитва̄ паббаджитва̄ арахаттам̣ па̄пун̣и. атхасса канит̣т̣хо аккосакабха̄радва̄джо ‘‘бха̄та̄ кира ме паббаджито’’ти сутва̄ куддхо а̄гантва̄ саттха̄рам̣ асаббха̄хи пхаруса̄хи ва̄ча̄хи аккоси. сопи саттха̄ра̄ атитхӣнам̣ кха̄данӣйа̄дида̄наопаммена сан̃н̃атто саттхари пасанно паббаджитва̄ арахаттам̣ па̄пун̣и. апареписса сундарикабха̄радва̄джо билин̇гакабха̄радва̄джоти две канит̣т̣хабха̄таро саттха̄рам̣ аккосанта̄ва саттха̄ра̄ винӣта̄ паббаджитва̄ арахаттам̣ па̄пун̣им̣су.

атхекадивасам̣ дхаммасабха̄йам̣ катхам̣ самут̣т̣ха̄песум̣, ‘‘а̄вусо, аччхарийа̄ вата буддхагун̣а̄, чатӯсу на̄ма бха̄тикесу аккосантесу саттха̄ кин̃чи аватва̄ тесам̣йева патит̣т̣ха̄ джа̄то’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте, ‘‘бхиккхаве, ахам̣ мама кхантибалена саманна̄гататта̄ дут̣т̣хесу адуссанто маха̄джанасса патит̣т̣ха̄ хомийева̄’’ти ватва̄ имам̣ га̄тхама̄ха –

399. ‘‘аккосам̣ вадхабандхан̃ча, адут̣т̣хо йо титиккхати;

кхантӣбалам̣ бала̄нӣкам̣, тамахам̣ брӯми бра̄хман̣а’’нти.

таттха адут̣т̣хоти етам̣ дасахи аккосаваттхӯхи аккосан̃ча па̄н̣иа̄дӣхи потханан̃ча андубандхана̄дӣхи бандханан̃ча йо акуддхама̄насо хутва̄ адхива̄сети, кхантибалена саманна̄гататта̄ кхантибалам̣, пунаппунам̣ уппаттийа̄ анӣкабхӯтена тенева кхантибалена саманна̄гататта̄ бала̄нӣкам̣ там̣ еварӯпам̣ ахам̣ бра̄хман̣ам̣ вада̄мӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

аккосакабха̄радва̄джаваттху сол̣асамам̣.