5. випаккхасевакабхиккхуваттху

сала̄бханти имам̣ дхаммадесанам̣ саттха̄ вел̣уване вихаранто ан̃н̃атарам̣ випаккхасевакам̣ бхиккхум̣ а̄раббха катхеси.

тасса киреко девадаттапаккхико бхиккху саха̄йо ахоси. со там̣ бхиккхӯхи саддхим̣ пин̣д̣а̄йа чаритва̄ катабхаттакиччам̣ а̄гаччхантам̣ дисва̄ ‘‘кухим̣ гатосӣ’’ти пуччхи. ‘‘асукат̣т̣ха̄нам̣ на̄ма пин̣д̣а̄йа чариту’’нти. ‘‘ладдхо те пин̣д̣апа̄то’’ти? ‘‘а̄ма, ладдхо’’ти. ‘‘идха амха̄кам̣ маха̄ла̄бхасакка̄ро, катипа̄хам̣ идхева хохӣ’’ти. со тасса вачанена катипа̄хам̣ таттха васитва̄ сакат̣т̣ха̄намева агама̄си. атха нам̣ бхиккхӯ ‘‘айам̣, бханте, девадаттасса уппаннала̄бхасакка̄рам̣ парибхун̃джати, девадаттасса паккхико есо’’ти татха̄гатасса а̄рочесум̣. саттха̄ там̣ паккоса̄петва̄ ‘‘саччам̣ кира твам̣ евамака̄сӣ’’ти пуччхи. ‘‘а̄ма, бханте, ахам̣ таттха екам̣ дахарам̣ нисса̄йа катипа̄хам̣ васим̣, на ча пана девадаттасса ладдхим̣ рочемӣ’’ти. атха нам̣ бхагава̄ ‘‘кин̃ча̄пи твам̣ ладдхим̣ на рочеси, дит̣т̣хадит̣т̣хака̄нам̣йева пана ладдхим̣ роченто вийа вичараси. на твам̣ ида̄нева евам̣ кароси, пуббепи еварӯпойева̄’’ти ватва̄ ‘‘ида̄ни та̄ва, бханте, амхехи са̄мам̣ дит̣т̣хо, пуббе панеса кесам̣ ладдхим̣ роченто вийа вичари, а̄чиккхатха но’’ти бхиккхӯхи йа̄чито атӣтам̣ а̄харитва̄ –

‘‘пура̄н̣ачора̄на вачо нисамма,

махил̣а̄мукхо потхайаманвача̄рӣ;

сусан̃н̃ата̄нан̃хи вачо нисамма,

гаджуттамо саббагун̣есу ат̣т̣ха̄’’ти. (джа̄. 1.1.26) –

имам̣ махил̣а̄мукхаджа̄такам̣ виттха̄ретва̄, ‘‘бхиккхаве, бхиккхуна̄ на̄ма сакала̄бхенева сантут̣т̣хена бхавитаббам̣, парала̄бхам̣ паттхетум̣ на ват̣т̣ати. парала̄бхам̣ паттхентасса хи джха̄навипассана̄маггапхалесу екадхаммопи нуппаджджати, сакала̄бхасантут̣т̣хассева пана джха̄на̄дӣни уппаджджантӣ’’ти ватва̄ дхаммам̣ десенто има̄ га̄тха̄ абха̄си –

365. ‘‘сала̄бхам̣ на̄тиман̃н̃еййа, на̄н̃н̃есам̣ пихайам̣ чаре;

ан̃н̃есам̣ пихайам̣ бхиккху, сама̄дхим̣ на̄дхигаччхати.

366. ‘‘аппала̄бхопи че бхиккху, сала̄бхам̣ на̄тиман̃н̃ати;

там̣ ве дева̄ пасам̣санти, суддха̄джӣвим̣ атандита’’нти.

таттха сала̄бханти аттано уппаджджанакала̄бхам̣. сапада̄нача̄ран̃хи париваджджетва̄ анесана̄йа джӣвикам̣ каппенто сала̄бхам̣ атиман̃н̃ати хӣл̣ети джигуччхати на̄ма. тасма̄ евам̣ акаран̣ена сала̄бхам̣ на̄тиман̃н̃еййа. ан̃н̃есам̣ пихайанти ан̃н̃есам̣ ла̄бхам̣ паттхенто на чареййа̄ти аттхо. сама̄дхим̣ на̄дхигаччхатӣти ан̃н̃есан̃хи ла̄бхам̣ пихайанто тесам̣ чӣвара̄дикаран̣е уссуккам̣ а̄панно бхиккху аппана̄сама̄дхим̣ ва̄ упача̄расама̄дхим̣ ва̄ на̄дхигаччхати. сала̄бхам̣ на̄тиман̃н̃атӣти аппала̄бхопи сама̄но уччанӣчакуле пат̣ипа̄т̣ийа̄ сапада̄нам̣ чаранто бхиккху сала̄бхам̣ на̄тиман̃н̃ати на̄ма. там̣ вети там̣ еварӯпам̣ бхиккхум̣ са̄раджӣвитата̄йа суддха̄джӣвим̣ джан̇гхабалам̣ нисса̄йа джӣвитакаппанена акусӣтата̄йа атандитам̣ дева̄ пасам̣санти тхоментӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

випаккхасевакабхиккхуваттху пан̃чамам̣.