11. апуттакасет̣т̣хиваттху

хананти бхога̄ти имам̣ дхаммадесанам̣ саттха̄ джетаване вихаранто апуттакасет̣т̣хим̣ на̄ма а̄раббха катхеси.

тасса кира ка̄лакирийам̣ сутва̄ ра̄джа̄ пасенади косало ‘‘апуттакам̣ са̄патеййам̣ касса па̄пун̣а̄тӣ’’ти пуччхитва̄ ‘‘ран̃н̃о’’ти сутва̄ саттахи дивасехи тасса гехато дханам̣ ра̄джакулам̣ абхихара̄петва̄ саттху сантикам̣ упасан̇камитва̄ ‘‘ханда куто ну твам̣, маха̄ра̄джа, а̄гаччхаси дива̄дивасса̄’’ти вутте ‘‘идха, бханте, са̄ваттхийам̣ сет̣т̣хи, гахапати, ка̄лакато, тамахам̣ апуттакам̣ са̄патеййам̣ ра̄джантепурам̣ абхихаритва̄ а̄гаччха̄мӣ’’ти а̄ха. саббам̣ сутте (сам̣. ни. 1.130) а̄гатанайенева ведитаббам̣.

со кира суван̣н̣апа̄тийа̄ на̄наггарасабходжане упанӣте ‘‘еварӯпам̣ на̄ма манусса̄ бхун̃джанти, ким̣ тумхе майа̄ саддхим̣ имасмим̣ гехе кел̣им̣ каротха̄’’ти бходжане упат̣т̣хите лед̣д̣удан̣д̣а̄дӣхи пахаритва̄ пала̄петва̄ ‘‘идам̣ манусса̄нам̣ бходжана’’нти кан̣а̄джакам̣ бхун̃джати бил̣ан̇гадутийам̣. ваттхайа̄начхаттесупи мана̄песу упат̣т̣ха̄питесу те мануссе лед̣д̣удан̣д̣а̄дӣхи пахаранто пала̄петва̄ са̄н̣а̄ни дха̄рети, джаджджараратхакена йа̄ти пан̣н̣ачхаттакена дха̄рийама̄нена̄ти евам̣ ран̃н̃а̄ а̄рочите саттха̄ тасса пуббакаммам̣ катхеси.

бхӯтапуббам̣ со, маха̄ра̄джа, сет̣т̣хи, гахапати, тагарасикхим̣ на̄ма паччекабуддхам̣ пин̣д̣апа̄тена пат̣ипа̄деси. ‘‘детха саман̣асса пин̣д̣а’’нти ватва̄ со ут̣т̣ха̄йа̄сана̄ пакка̄ми. тасмим̣ кира ассаддхе ба̄ле евам̣ ватва̄ пакканте тасса бхарийа̄ саддха̄ пасанна̄ ‘‘чирассам̣ вата ме имасса мукхато ‘дехӣ’ти вачанам̣ сутам̣, аджджа мама маноратхам̣ пӯрентӣ пин̣д̣апа̄там̣ дасса̄мӣ’’ти паччекабуддхасса паттам̣ гахетва̄ пан̣ӣтабходжанасса пӯретва̄ ада̄си. сопи ниваттама̄но там̣ дисва̄ ‘‘ким̣, саман̣а, кин̃чи те ладдха’’нти паттам̣ гахетва̄ пан̣ӣтапин̣д̣апа̄там̣ дисва̄ виппат̣иса̄рӣ хутва̄ евам̣ чинтеси – ‘‘вараметам̣ пин̣д̣апа̄там̣ да̄са̄ ва̄ каммакара̄ ва̄ бхун̃джеййум̣. те хи имам̣ бхун̃джитва̄ майхам̣ каммам̣ кариссанти, айам̣ пана гантва̄ бхун̃джитва̄ нидда̄йиссати, нат̣т̣хо ме со пин̣д̣апа̄то’’ти. со бха̄ту ча пана екапуттакам̣ са̄патеййасса ка̄ран̣а̄ джӣвита̄ воропеси. со кирасса ан̇гулим̣ гахетва̄ вичаранто ‘‘идам̣ майхам̣ питусантакам̣ йа̄накам̣, айам̣ тасса гон̣о’’тиа̄дӣни а̄ха. атха нам̣ со сет̣т̣хи ‘‘ида̄ни та̄веса евам̣ вадети, имасса пана вуд̣д̣хиппаттака̄ле имасмим̣ гехе бхоге ко раккхиссатӣ’’ти там̣ аран̃н̃ам̣ нетва̄ екасмим̣ гаччхамӯле гӣва̄йа гахетва̄ мӯлакандам̣ вийа гӣвам̣ пха̄летва̄ ма̄ретва̄ таттхева чхад̣д̣еси. идамасса пуббакаммам̣. тена вуттам̣ –

‘‘йам̣ кхо со, маха̄ра̄джа, сет̣т̣хи, гахапати, тагарасикхим̣ паччекабуддхам̣ пин̣д̣апа̄тена пат̣ипа̄деси, тасса каммасса випа̄кена саттаккхаттум̣ сугатим̣ саггам̣ локам̣ упападжджи, тассева каммасса випа̄ка̄васесена имисса̄йева са̄ваттхийа̄ саттаккхаттум̣ сет̣т̣хиттам̣ ка̄реси. йам̣ кхо со, маха̄ра̄джа, сет̣т̣хи, гахапати, датва̄ паччха̄ виппат̣иса̄рӣ ахоси ‘вараметам̣ пин̣д̣апа̄там̣ да̄са̄ ва̄ каммакара̄ ва̄ бхун̃джеййу’нти, тасса каммасса випа̄кена на̄ссул̣а̄ра̄йа бхаттабхога̄йа читтам̣ намати, на̄ссул̣а̄ра̄йа ваттхабхога̄йа, на̄ссул̣а̄ра̄йа йа̄набхога̄йа, на̄ссул̣а̄ра̄нам̣ пан̃чаннам̣ ка̄магун̣а̄нам̣ бхога̄йа читтам̣ намати. йам̣ кхо со, маха̄ра̄джа, сет̣т̣хи, гахапати, бха̄ту ча пана екапуттам̣ са̄патеййасса ка̄ран̣а̄ джӣвита̄ воропеси, тасса каммасса випа̄кена бахӯни вассасата̄ни бахӯни вассасахасса̄ни бахӯни вассасатасахасса̄ни нирайе паччиттха, тассева каммасса випа̄ка̄васесена идам̣ саттамам̣ апуттакам̣ са̄патеййам̣ ра̄джакосам̣ павесети. тасса кхо пана, маха̄ра̄джа, сет̣т̣хисса гахапатисса пура̄н̣ан̃ча пун̃н̃ам̣ париккхӣн̣ам̣, наван̃ча пун̃н̃ам̣ анупачитам̣. аджджа пана, маха̄ра̄джа, сет̣т̣хи, гахапати, маха̄роруве нирайе паччатӣ’’ти (сам̣. ни. 1.131).

ра̄джа̄ саттху вачанам̣ сутва̄ ‘‘ахо, бханте, бха̄рийам̣ каммам̣, еттаке на̄ма бхоге виджджама̄не нева аттана̄ парибхун̃джи, на тумха̄дисе буддхе дхуравиха̄ре вихаранте пун̃н̃акаммам̣ ака̄сӣ’’ти а̄ха. саттха̄ ‘‘еваметам̣, маха̄ра̄джа, думмедхапуггала̄ на̄ма бхоге лабхитва̄ нибба̄нам̣ на гавесанти, бхоге нисса̄йа уппаннатан̣ха̄ панете дӣгхараттам̣ ханатӣ’’ти ватва̄ имам̣ га̄тхама̄ха –

355. ‘‘хананти бхога̄ думмедхам̣, но ча па̄рагавесино;

бхогатан̣ха̄йа думмедхо, ханти ан̃н̃ева аттана’’нти.

таттха но ча па̄рагавесиноти йе пана нибба̄напа̄рагавесино пуггала̄, на те бхога̄ хананти. ан̃н̃ева аттананти бхоге нисса̄йа уппанна̄йа тан̣ха̄йа дуппан̃н̃о пуггало паре вийа атта̄намева ханатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

апуттакасет̣т̣хиваттху ека̄дасамам̣.