8. ниган̣т̣хаваттху

аладжджита̄йети имам̣ дхаммадесанам̣ саттха̄ джетаване вихаранто ниган̣т̣хе а̄раббха катхеси.

екасмин̃хи дивасе бхиккхӯ ниган̣т̣хе дисва̄ катхам̣ самут̣т̣ха̄песум̣, ‘‘а̄вусо, саббасо аппат̣иччханнехи ачелакехи име ниган̣т̣ха̄ варатара̄, йе екам̣ пуримапассампи та̄ва пат̣иччха̄денти, сахирика̄ ман̃н̃е ете’’ти. там̣ сутва̄ ниган̣т̣ха̄ ‘‘на майам̣ етена ка̄ран̣ена пат̣иччха̄дема, пам̣сураджа̄дайо пана пуггала̄ ева, джӣвитиндрийапат̣ибаддха̄ ева, те но бхиккха̄бха̄джанесу ма̄ патим̣сӯти имина̄ ка̄ран̣ена пат̣иччха̄дема̄’’ти ватва̄ техи саддхим̣ ва̄дапат̣ива̄давасена бахум̣ катхам̣ катхесум̣. бхиккхӯ саттха̄рам̣ упасан̇камитва̄ нисиннака̄ле там̣ паваттим̣ а̄рочесум̣. саттха̄, ‘‘бхиккхаве, аладжджитаббена ладжджитва̄ ладжджитаббена аладжджама̄на̄ на̄ма дуггатипара̄йан̣а̄ва хонтӣ’’ти ватва̄ дхаммам̣ десенто има̄ га̄тха̄ абха̄си –

316. ‘‘аладжджита̄йе ладжджанти, ладжджита̄йе на ладжджаре;

миччха̄дит̣т̣хисама̄да̄на̄, сатта̄ гаччханти дуггатим̣.

317. ‘‘абхайе бхайадассино, бхайе ча̄бхайадассино;

миччха̄дит̣т̣хисама̄да̄на̄, сатта̄ гаччханти дуггати’’нти.

таттха аладжджита̄йети аладжджитаббена. бхиккха̄бха̄джанан̃хи аладжджитаббам̣ на̄ма, те пана там̣ пат̣иччха̄детва̄ вичаранта̄ тена ладжджанти на̄ма. ладжджита̄йети апат̣иччханнена хирикопӣнан̇гена ладжджитаббена. те пана там̣ апат̣иччха̄детва̄ вичаранта̄ ладжджита̄йе на ладжджанти на̄ма. тена тесам̣ аладжджитаббена ладжджитам̣ ладжджитаббена аладжджитам̣ туччхагахан̣абха̄вена ча ан̃н̃атха̄гахан̣абха̄вена ча миччха̄дит̣т̣хи хоти. там̣ сама̄дийитва̄ вичаранта̄ пана те миччха̄дит̣т̣хисама̄да̄на̄ сатта̄ нирайа̄дибхедам̣ дуггатим̣ гаччхантӣти аттхо. абхайети бхиккха̄бха̄джанам̣ нисса̄йа ра̄гадосамохама̄надит̣т̣хикилесадуччаритабхайа̄нам̣ ануппаджджанато бхиккха̄бха̄джанам̣ абхайам̣ на̄ма, бхайена там̣ пат̣иччха̄дента̄ пана абхайе бхайадассино на̄ма. хирикопӣнан̇гам̣ пана нисса̄йа ра̄га̄дӣнам̣ уппаджджанато там̣ бхайам̣ на̄ма, тасса апат̣иччха̄данена бхайе ча̄бхайадассино. тасса там̣ айатха̄гахан̣асса сама̄диннатта̄ миччха̄дит̣т̣хисама̄да̄на̄ сатта̄ дуггахим̣ гаччхантӣти аттхо.

десана̄васа̄не бахӯ ниган̣т̣ха̄ сам̣виггама̄наса̄ паббаджим̣су, сампатта̄нампи са̄ттхика̄ дхаммадесана̄ ахосӣти.

ниган̣т̣хаваттху ат̣т̣хамам̣.