4. лакун̣д̣акабхаддийаттхераваттху

на тена тхеро со хотӣти имам̣ дхаммадесанам̣ саттха̄ джетаване вихаранто лакун̣д̣акабхаддийаттхерам̣ а̄раббха катхеси.

екадивасан̃хи тасмим̣ тхере саттху упат̣т̣ха̄нам̣ гантва̄ паккантаматте тим̣саматта̄ а̄ран̃н̃ика̄ бхиккхӯ там̣ пассанта̄ ева а̄гантва̄ саттха̄рам̣ вандитва̄ нисӣдим̣су. саттха̄ тесам̣ арахаттӯпаниссайам̣ дисва̄ имам̣ пан̃хам̣ пуччхи – ‘‘ито гатам̣ екам̣ тхерам̣ пассатха̄’’ти? ‘‘на пасса̄ма, бханте’’ти. ‘‘ким̣ ну дит̣т̣хо во’’ти? ‘‘екам̣, бханте, са̄ман̣ерам̣ пассимха̄’’ти. ‘‘на со, бхиккхаве, са̄ман̣еро, тхеро ева со’’ти? ‘‘ативийа кхуддако, бханте’’ти. ‘‘на̄хам̣, бхиккхаве, махаллакабха̄вена тхера̄сане нисиннаматтакена тхероти вада̄ми. йо пана сачча̄ни пат̣ивиджджхитва̄ маха̄джанасса ахим̣сакабха̄ве т̣хито, айам̣ тхеро на̄ма̄’’ти ватва̄ има̄ га̄тха̄ абха̄си –

260. ‘‘на тена тхеро со хоти, йенасса палитам̣ сиро;

парипакко вайо тасса, могхаджин̣н̣оти вуччати.

261. ‘‘йамхи саччан̃ча дхаммо ча, ахим̣са̄ сам̣йамо дамо;

са ве вантамало дхӣро, тхеро ити павуччатӣ’’ти.

таттха парипаккоти парин̣ато, вуд̣д̣хабха̄вам̣ паттоти аттхо. могхаджин̣н̣оти анто тхеракара̄нам̣ дхамма̄нам̣ абха̄вена туччхаджин̣н̣о на̄ма. йамхи саччан̃ча дхаммо ча̄ти йамхи пана пуггале сол̣асаха̄ка̄рехи пат̣ивиддхатта̄ чатуббидхам̣ саччам̣, н̃а̄н̣ена саччхикататта̄ нававидхо локуттарадхаммо ча аттхи. ахим̣са̄ти ахим̣санабха̄во. десана̄маттаметам̣, йамхи пана чатуббидха̄пи аппаман̃н̃а̄бха̄вана̄ аттхӣти аттхо. сам̣йамо дамоти сӣлан̃чева индрийасам̣варо ча. вантамалоти магган̃а̄н̣ена нӣхат̣амало. дхӣроти дхитисампанно. тхероти со имехи тхирабха̄вака̄ракехи саманна̄гататта̄ тхероти вуччатӣти аттхо.

десана̄васа̄не те бхиккхӯ арахатте патит̣т̣хахим̣сӯти.

лакун̣д̣акабхаддийаттхераваттху чатуттхам̣.