19. дхаммат̣т̣хавагго

1. виниччхайамаха̄маттаваттху

на тена хотӣти имам̣ дхаммадесанам̣ саттха̄ джетаване вихаранто виниччхайамаха̄матте а̄раббха катхеси.

екадивасан̃хи бхиккхӯ са̄ваттхийам̣ уттарадва̄рага̄ме пин̣д̣а̄йа чаритва̄ пин̣д̣апа̄тапат̣икканта̄ нагарамаджджхена виха̄рам̣ а̄гаччханти. тасмим̣ кхан̣е мегхо ут̣т̣ха̄йа па̄васси. те саммукха̄гатам̣ виниччхайаса̄лам̣ пависитва̄ виниччхайамаха̄матте лан̃джам̣ гахетва̄ са̄мике аса̄мике каронте дисва̄ ‘‘ахо име адхаммика̄, майам̣ пана ‘име дхаммена виниччхайам̣ каронтӣ’ти сан̃н̃ино ахумха̄’’ти чинтетва̄ вассе вигате виха̄рам̣ гантва̄ саттха̄рам̣ вандитва̄ екамантам̣ нисинна̄ таматтхам̣ а̄рочесум̣. саттха̄ ‘‘на, бхиккхаве, чханда̄дивасика̄ хутва̄ са̄хасена аттхам̣ виниччхинанта̄ дхаммат̣т̣ха̄ на̄ма хонти, апара̄дхам̣ пана анувиджджитва̄ апара̄дха̄нурӯпам̣ аса̄хасена виниччхайам̣ каронта̄ ева дхаммат̣т̣ха̄ на̄ма хонтӣ’’ти ватва̄ има̄ га̄тха̄ абха̄си –

256. ‘‘на тена хоти дхаммат̣т̣хо, йенаттхам̣ са̄хаса̄ найе;

йо ча аттхам̣ анаттхан̃ча, убхо ниччхеййа пан̣д̣ито.

257. ‘‘аса̄хасена дхаммена, самена найатӣ паре;

дхаммасса гутто медха̄вӣ, дхаммат̣т̣хоти павуччатӣ’’ти.

таттха тена̄ти еттакенева ка̄ран̣ена. дхаммат̣т̣хоти ра̄джа̄ хи аттано ка̄таббе виниччхайадхамме т̣хитопи дхаммат̣т̣хо на̄ма на хоти. йена̄ти йена ка̄ран̣ена. аттханти отин̣н̣ам̣ виниччхитаббам̣ аттхам̣. са̄хаса̄ найети чханда̄дӣсу патит̣т̣хито са̄хасена муса̄ва̄дена виниччхеййа. йо хи чханде патит̣т̣ха̄йа н̃а̄тӣти ва̄ миттоти ва̄ муса̄ ватва̄ аса̄микамева са̄микам̣ кароти, досе патит̣т̣ха̄йа аттано верӣнам̣ муса̄ ватва̄ са̄микамева аса̄микам̣ кароти, мохе патит̣т̣ха̄йа лан̃джам̣ гахетва̄ виниччхайака̄ле ан̃н̃авихито вийа ито чито ча олокенто муса̄ ватва̄ ‘‘имина̄ джитам̣, айам̣ пара̄джито’’ти парам̣ нӣхарати, бхайе патит̣т̣ха̄йа кассачидева иссараджа̄тикасса пара̄джайам̣ па̄пун̣антасса̄пи джайам̣ а̄ропети, айам̣ са̄хасена аттхам̣ нети на̄ма. есо дхаммат̣т̣хо на̄ма на хотӣти аттхо. аттхам̣ анаттхан̃ча̄ти бхӯтан̃ча абхӯтан̃ча ка̄ран̣ам̣. убхо ниччхеййа̄ти йо пана пан̣д̣ито убхо аттха̄наттхе виниччхинитва̄ вадати. аса̄хасена̄ти амуса̄ва̄дена. дхаммена̄ти виниччхайадхаммена, на чханда̄дивасена. самена̄ти апара̄дха̄нурӯпенева паре найати, джайам̣ ва̄ пара̄джайам̣ ва̄ па̄пети. дхаммасса гуттоти со дхаммагутто дхаммараккхито дхаммоджапан̃н̃а̄йа саманна̄гато медха̄вӣ виниччхайадхамме т̣хитатта̄ дхаммат̣т̣хоти павуччатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

виниччхайамаха̄маттаваттху пат̣хамам̣.

2. чхаббаггийаваттху

на тена пан̣д̣ито хотӣти имам̣ дхаммадесанам̣ саттха̄ джетаване вихаранто чхаббаггийе а̄раббха катхеси.

те кира виха̄репи га̄мепи бхаттаггам̣ а̄кулам̣ каронта̄ вичаранти. атхекадивасе бхиккхӯ га̄ме бхаттакиччам̣ катва̄ а̄гате дахаре са̄ман̣ере ча пуччхим̣су – ‘‘кӣдисам̣, а̄вусо, бхаттагга’’нти? бханте, ма̄ пуччхатха, чхаббаггийа̄ ‘‘майамева вийатта̄, майамева пан̣д̣ита̄, име пахаритва̄ сӣсе качаварам̣ а̄киритва̄ нӣхарисса̄ма̄’’ти ватва̄ амхе пит̣т̣хийам̣ гахетва̄ качаварам̣ окиранта̄ бхаттаггам̣ а̄кулам̣ акам̣сӯти. бхиккхӯ саттху сантикам̣ гантва̄ таматтхам̣ а̄рочесум̣. саттха̄ ‘‘на̄хам̣, бхиккхаве, бахум̣ бха̄ситва̄ паре вихет̣хайама̄нам̣ ‘пан̣д̣ито’ти вада̄ми, кхеминам̣ пана аверӣнам̣ абхайамева пан̣д̣итоти вада̄мӣ’’ти ватва̄ имам̣ га̄тхама̄ха –

258. ‘‘на тена пан̣д̣ито хоти, йа̄вата̄ баху бха̄сати;

кхемӣ аверӣ абхайо, пан̣д̣итоти павуччатӣ’’ти.

таттха йа̄вата̄ти йаттакена ка̄ран̣ена сан̇гхамаджджха̄дӣсу бахум̣ катхети, тена пан̣д̣ито на̄ма на хоти. йо пана сайам̣ кхемӣ пан̃чаннам̣ вера̄нам̣ абха̄вена аверӣ ниббхайо, йам̣ ва̄ а̄гамма маха̄джанасса бхайам̣ на хоти, со пан̣д̣ито на̄ма хотӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

чхаббаггийаваттху дутийам̣.

3. екуда̄накхӣн̣а̄саваттхераваттху

на та̄вата̄ти имам̣ дхаммадесанам̣ саттха̄ джетаване вихаранто екуда̄наттхерам̣ на̄ма кхӣн̣а̄савам̣ а̄раббха катхеси.

со кира екакова екасмим̣ ванасан̣д̣е вихарати, екамевасса уда̄нам̣ пагун̣ам̣ –

‘‘адхичетасо аппамаджджато,

мунино монапатхесу сиккхато;

сока̄ на бхаванти та̄дино,

упасантасса сада̄ сатӣмато’’ти. (па̄чи. 153; уда̄. 37);

со кира упосатхадивасесу сайамева дхаммассаванам̣ гхосетва̄ имам̣ га̄тхам̣ вадати. патхавиундрийанасаддо вийа девата̄нам̣ са̄дхука̄расаддо хоти. атхекасмим̣ упосатхадивасе пан̃чапан̃часатапарива̄ра̄ две типит̣акадхара̄ бхиккхӯ тасса васанат̣т̣ха̄нам̣ агамам̣су. со те дисва̄ва тут̣т̣хама̄насо ‘‘са̄дху во катам̣ идха а̄гаччхантехи, аджджа майам̣ тумха̄кам̣ дхаммам̣ сун̣исса̄ма̄’’ти а̄ха. аттхи пана, а̄вусо, идха дхаммам̣ сотука̄ма̄ти. аттхи, бханте, айам̣ ванасан̣д̣о дхаммассаванадивасе девата̄нам̣ са̄дхука̄расаддена еканинна̄до хотӣти. тесу еко типит̣акадхаро дхаммам̣ оса̄реси, еко катхеси. екадевата̄пи са̄дхука̄рам̣ на̄да̄си. те а̄хам̣су – ‘‘твам̣, а̄вусо, дхаммассаванадивасе имасмим̣ ванасан̣д̣е девата̄ махантена саддена са̄дхука̄рам̣ дентӣти вадеси, ким̣ на̄мета’’нти. бханте, ан̃н̃есу дивасесу са̄дхука̄расаддена еканинна̄до ева хоти, на аджджа пана джа̄на̄ми ‘‘кимета’’нти. ‘‘тена хи, а̄вусо, твам̣ та̄ва дхаммам̣ катхехӣ’’ти. со бӣджаним̣ гахетва̄ а̄сане нисинно тамева га̄тхам̣ вадеси. девата̄ махантена саддена са̄дхука̄рамадам̣су. атха несам̣ парива̄ра̄ бхиккхӯ уджджха̄йим̣су ‘‘имасмим̣ ванасан̣д̣е девата̄ мукхолоканена са̄дхука̄рам̣ даданти, типит̣акадхарабхиккхӯсу еттакам̣ бхан̣антесупи кин̃чи пасам̣санаматтампи аватва̄ екена махаллакаттхерена екага̄тха̄йа катхита̄йа маха̄саддена са̄дхука̄рам̣ дадантӣ’’ти. тепи виха̄рам̣ гантва̄ саттху таматтхам̣ а̄рочесум̣.

саттха̄ ‘‘на̄хам̣, бхиккхаве, йо бахумпи угган̣хати ва̄ бха̄сати ва̄, там̣ дхаммадхароти вада̄ми. йо пана екампи га̄тхам̣ угган̣хитва̄ сачча̄ни пат̣ивиджджхати, айам̣ дхаммадхаро на̄ма̄’’ти ватва̄ дхаммам̣ десенто имам̣ га̄тхама̄ха –

259. ‘‘на та̄вата̄ дхаммадхаро, йа̄вата̄ баху бха̄сати;

йо ча аппампи сутва̄на, дхаммам̣ ка̄йена пассати;

са ве дхаммадхаро хоти, йо дхаммам̣ наппамаджджатӣ’’ти.

таттха йа̄вата̄ти йаттакена уггахан̣адха̄ран̣ава̄чана̄дина̄ ка̄ран̣ена бахум̣ бха̄сати, та̄ваттакена дхаммадхаро на хоти, вам̣са̄нураккхако пана павен̣ипа̄лако на̄ма хоти. йо ча аппампӣти йо пана аппаматтакампи сутва̄ дхаммаманва̄йа аттхаманва̄йа дхамма̄нудхаммаппат̣ипанно хутва̄ на̄мака̄йена дуккха̄дӣни париджа̄нанто чатусаччадхаммам̣ пассати, са ве дхаммадхаро хоти. йо дхаммам̣ наппамаджджатӣти йопи а̄раддхавӣрийо хутва̄ аджджа аджджева̄ти пат̣иведхам̣ а̄кан̇кханто дхаммам̣ наппамаджджати, айампи дхаммадхаройева̄ти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

екуда̄накхӣн̣а̄саваттхераваттху татийам̣.

4. лакун̣д̣акабхаддийаттхераваттху

на тена тхеро со хотӣти имам̣ дхаммадесанам̣ саттха̄ джетаване вихаранто лакун̣д̣акабхаддийаттхерам̣ а̄раббха катхеси.

екадивасан̃хи тасмим̣ тхере саттху упат̣т̣ха̄нам̣ гантва̄ паккантаматте тим̣саматта̄ а̄ран̃н̃ика̄ бхиккхӯ там̣ пассанта̄ ева а̄гантва̄ саттха̄рам̣ вандитва̄ нисӣдим̣су. саттха̄ тесам̣ арахаттӯпаниссайам̣ дисва̄ имам̣ пан̃хам̣ пуччхи – ‘‘ито гатам̣ екам̣ тхерам̣ пассатха̄’’ти? ‘‘на пасса̄ма, бханте’’ти. ‘‘ким̣ ну дит̣т̣хо во’’ти? ‘‘екам̣, бханте, са̄ман̣ерам̣ пассимха̄’’ти. ‘‘на со, бхиккхаве, са̄ман̣еро, тхеро ева со’’ти? ‘‘ативийа кхуддако, бханте’’ти. ‘‘на̄хам̣, бхиккхаве, махаллакабха̄вена тхера̄сане нисиннаматтакена тхероти вада̄ми. йо пана сачча̄ни пат̣ивиджджхитва̄ маха̄джанасса ахим̣сакабха̄ве т̣хито, айам̣ тхеро на̄ма̄’’ти ватва̄ има̄ га̄тха̄ абха̄си –

260. ‘‘на тена тхеро со хоти, йенасса палитам̣ сиро;

парипакко вайо тасса, могхаджин̣н̣оти вуччати.

261. ‘‘йамхи саччан̃ча дхаммо ча, ахим̣са̄ сам̣йамо дамо;

са ве вантамало дхӣро, тхеро ити павуччатӣ’’ти.

таттха парипаккоти парин̣ато, вуд̣д̣хабха̄вам̣ паттоти аттхо. могхаджин̣н̣оти анто тхеракара̄нам̣ дхамма̄нам̣ абха̄вена туччхаджин̣н̣о на̄ма. йамхи саччан̃ча дхаммо ча̄ти йамхи пана пуггале сол̣асаха̄ка̄рехи пат̣ивиддхатта̄ чатуббидхам̣ саччам̣, н̃а̄н̣ена саччхикататта̄ нававидхо локуттарадхаммо ча аттхи. ахим̣са̄ти ахим̣санабха̄во. десана̄маттаметам̣, йамхи пана чатуббидха̄пи аппаман̃н̃а̄бха̄вана̄ аттхӣти аттхо. сам̣йамо дамоти сӣлан̃чева индрийасам̣варо ча. вантамалоти магган̃а̄н̣ена нӣхат̣амало. дхӣроти дхитисампанно. тхероти со имехи тхирабха̄вака̄ракехи саманна̄гататта̄ тхероти вуччатӣти аттхо.

десана̄васа̄не те бхиккхӯ арахатте патит̣т̣хахим̣сӯти.

лакун̣д̣акабхаддийаттхераваттху чатуттхам̣.

5. самбахулабхиккхуваттху

на ва̄ккаран̣аматтена̄ти имам̣ дхаммадесанам̣ саттха̄ джетаване вихаранто самбахуле бхиккхӯ а̄раббха катхеси.

екасмин̃хи самайе дахаре чева са̄ман̣ере ча аттано дхамма̄чарийа̄намева чӣварараджана̄дӣни веййа̄вачча̄ни каронте дисва̄ екачче тхера̄ чинтайим̣су – ‘‘майампи бйан̃джанасамайе кусала̄, амха̄камева кин̃чи наттхи. йам̣нӯна майам̣ саттха̄рам̣ упасан̇камитва̄ евам̣ вадеййа̄ма, ‘бханте, майам̣ бйан̃джанасамайе кусала̄, ан̃н̃есам̣ сантике дхаммам̣ угган̣хитва̄пи имесам̣ сантике асодхетва̄ ма̄ саджджха̄йиттха̄ти дахараса̄ман̣ере а̄н̣а̄петха̄’ти. еван̃хи амха̄кам̣ ла̄бхасакка̄ро вад̣д̣хиссатӣ’’ти. те саттха̄рам̣ упасан̇камитва̄ татха̄ вадим̣су.

саттха̄ тесам̣ вачанам̣ сутва̄ ‘‘имасмим̣ са̄сане павен̣ивасенева евам̣ ваттум̣ лабхати, име пана ла̄бхасакка̄ре ниссита̄ти н̃атва̄ ахам̣ тумхе ва̄ккаран̣аматтена са̄дхурӯпа̄ти на вада̄ми. йасса панете исса̄дайо дхамма̄ арахаттамаггена самуччхинна̄, есо ева са̄дхурӯпо’’ти ватва̄ има̄ га̄тха̄ абха̄си –

262. ‘‘на ва̄ккаран̣аматтена, ван̣н̣апоккхарата̄йа ва̄;

са̄дхурӯпо наро хоти, иссукӣ маччхарӣ сат̣хо.

263. ‘‘йасса четам̣ самуччхиннам̣, мӯлагхаччам̣ самӯхатам̣;

савантадосо медха̄вӣ, са̄дхурӯпоти вуччатӣ’’ти.

таттха на ва̄ккаран̣аматтена̄ти вачӣкаран̣аматтена саддалаккхан̣асампаннавачанаматтена. ван̣н̣апоккхарата̄йа ва̄ти сарӣраван̣н̣асса мана̄пабха̄вена ва̄. нароти еттакенева ка̄ран̣ена парала̄бха̄дӣсу исса̄манако пан̃чавидхена маччхерена саманна̄гато кера̄т̣икабха̄вена сат̣хо наро са̄дхурӯпо на хоти. йасса четанти йасса ча пуггалассетам̣ исса̄дидосаджа̄там̣ арахаттамагган̃а̄н̣ена самӯлакам̣ чхиннам̣, мӯлагха̄там̣ катва̄ самӯхатам̣, со вантадосо дхаммоджапан̃н̃а̄йа саманна̄гато са̄дхурӯпоти вуччатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

самбахулабхиккхуваттху пан̃чамам̣.

6. хаттхакаваттху

на мун̣д̣акена саман̣оти имам̣ дхаммадесанам̣ саттха̄ са̄ваттхийам̣ вихаранто хаттхакам̣ а̄раббха катхеси.

со кира ва̄даккхитто ‘‘тумхе асукавела̄йа асукат̣т̣ха̄нам̣ на̄ма а̄гаччхеййа̄тха, ва̄дам̣ карисса̄ма̄’’ти ватва̄ пуретарамева таттха гантва̄ ‘‘пассатха, титтхийа̄ мама бхайена на̄гата̄, есова пана несам̣ пара̄джайо’’тиа̄дӣни ватва̄ ва̄даккхитто ан̃н̃енан̃н̃ам̣ пат̣ичаранто вичарати. саттха̄ ‘‘хаттхако кира евам̣ каротӣ’’ти сутва̄ там̣ паккоса̄петва̄ ‘‘саччам̣ кира твам̣, хаттхака, евам̣ каросӣ’’ти пуччхитва̄ ‘‘сачча’’нти вутте, ‘‘касма̄ евам̣ кароси? еварӯпан̃хи муса̄ва̄дам̣ каронто сӣсамун̣д̣ана̄диматтенева саман̣о на̄ма на хоти. йо пана ан̣ӯни ва̄ тхӯла̄ни ва̄ па̄па̄ни саметва̄ т̣хито, айамева саман̣о’’ти ватва̄ има̄ га̄тха̄ абха̄си –

264. ‘‘на мун̣д̣акена саман̣о, аббато аликам̣ бхан̣ам̣;

иччха̄лобхасама̄панно, саман̣о ким̣ бхависсати.

265. ‘‘йо ча самети па̄па̄ни, ан̣ум̣ тхӯла̄ни саббасо;

самитатта̄ хи па̄па̄нам̣, саман̣оти павуччатӣ’’ти.

таттха мун̣д̣акена̄ти сӣсамун̣д̣анаматтена. аббатоти сӣлаватена ча дхутан̇гаватена ча вирахито. аликам̣ бхан̣анти муса̄ва̄дам̣ бхан̣анто асампаттесу а̄рамман̣есу иччха̄йа паттесу ча лобхена саманна̄гато саман̣о на̄ма ким̣ бхависсати? саметӣти йо ча паритта̄ни ва̄ маханта̄ни ва̄ па̄па̄ни вӯпасамети, со тесам̣ самитатта̄ саман̣оти павуччатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

хаттхакаваттху чхат̣т̣хам̣.

7. ан̃н̃атарабра̄хман̣аваттху

на тена бхиккху со хотӣти имам̣ дхаммадесанам̣ саттха̄ джетаване вихаранто ан̃н̃атарам̣ бра̄хман̣ам̣ а̄раббха катхеси.

со кира ба̄хирасамайе паббаджитва̄ бхиккхам̣ чаранто чинтеси – ‘‘саман̣о готамо аттано са̄ваке бхиккха̄йа чаран̣ена ‘бхиккхӯ’ти вадати, мампи ‘бхиккхӯ’ти ваттум̣ ват̣т̣атӣ’’ти. со саттха̄рам̣ упасан̇камитва̄, ‘‘бхо готама, ахампи бхиккхам̣ чаритва̄ джӣва̄ми, мампи ‘бхиккхӯ’ти вадехӣ’’ти а̄ха. атха нам̣ саттха̄ ‘‘на̄хам̣, бра̄хман̣а, бхиккханаматтена бхиккхӯти вада̄ми. на хи виссам̣ дхаммам̣ сама̄да̄йа ваттанто бхиккху на̄ма хоти. йо пана саббасан̇кха̄ресу сан̇кха̄йа чарати, со бхиккху на̄ма̄’’ти ватва̄ има̄ га̄тха̄ абха̄си –

266. ‘‘на тена бхиккху со хоти, йа̄вата̄ бхиккхате паре;

виссам̣ дхаммам̣ сама̄да̄йа, бхиккху хоти на та̄вата̄.

267. ‘‘йодха пун̃н̃ан̃ча па̄пан̃ча, ба̄хетва̄ брахмачарийава̄;

сан̇кха̄йа локе чарати, са ве бхиккхӯти вуччатӣ’’ти.

таттха йа̄вата̄ти йаттакена паре бхиккхате, тена бхиккханаматтена бхиккху на̄ма на хоти. виссанти висамам̣ дхаммам̣, виссагандхам̣ ва̄ ка̄йакамма̄дикам̣ дхаммам̣ сама̄да̄йа чаранто бхиккху на̄ма на хоти. йодха̄ти йо идха са̄сане убхайампетам̣ пун̃н̃ан̃ча па̄пан̃ча маггабрахмачарийена ба̄хетва̄ панудитва̄ брахмачарийава̄ хоти. сан̇кха̄йа̄ти н̃а̄н̣ена. локети кхандха̄дилоке ‘‘име аджджхаттика̄ кхандха̄, име ба̄хира̄’’ти евам̣ саббепи дхамме джа̄нитва̄ чарати, со тена н̃а̄н̣ена килеса̄нам̣ бхиннатта̄ ‘‘бхиккхӯ’’ти вуччатӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

ан̃н̃атарабра̄хман̣аваттху саттамам̣.

8. титтхийаваттху

на монена̄ти имам̣ дхаммадесанам̣ саттха̄ джетаване вихаранто титтхийе а̄раббха катхеси.

те кира бхуттат̣т̣ха̄несу манусса̄нам̣ ‘‘кхемам̣ хоту, сукхам̣ хоту, а̄йу вад̣д̣хату, асукат̣т̣ха̄не на̄ма калалам̣ аттхи, асукат̣т̣ха̄не на̄ма кан̣т̣ако аттхи, еварӯпам̣ т̣ха̄нам̣ гантум̣ на ват̣т̣атӣ’’тиа̄дина̄ найена ман̇галам̣ ватва̄ паккаманти. бхиккхӯ пана пат̣хамабодхийам̣ анумодана̄дӣнам̣ ананун̃н̃а̄така̄ле бхаттагге манусса̄нам̣ анумоданам̣ акатва̄ паккаманти. манусса̄ ‘‘титтхийа̄нам̣ сантика̄ ман̇галам̣ сун̣а̄ма, бхадданта̄ пана тун̣хӣбхӯта̄ паккамантӣ’’ти уджджха̄йим̣су. бхиккхӯ таматтхам̣ саттху а̄рочесум̣. саттха̄, ‘‘бхиккхаве, ито пат̣т̣ха̄йа бхаттагга̄дӣсу йатха̄сукхам̣ анумоданам̣ каротха, упанисиннакатхам̣ каротха, дхаммам̣ катхетха̄’’ти ануджа̄ни. те татха̄ карим̣су. манусса̄ анумодана̄дӣни сун̣анта̄ усса̄хаппатта̄ бхиккхӯ нимантетва̄ сакка̄рам̣ каронта̄ вичаранти. титтхийа̄ пана ‘‘майам̣ мунино монам̣ карома, саман̣асса готамасса са̄вака̄ бхаттагга̄дӣсу маха̄катхам̣ катхента̄ вичарантӣ’’ти уджджха̄йим̣су.

саттха̄ таматтхам̣ сутва̄ ‘‘на̄хам̣, бхиккхаве, тун̣хӣбха̄ваматтена ‘мунӣ’ти вада̄ми. екачче хи аджа̄нанта̄ на катхенти, екачче ависа̄радата̄йа, екачче ‘ма̄ но имам̣ атисайаттхам̣ ан̃н̃е джа̄ним̣сӯ’ти маччхерена. тасма̄ монаматтена муни на хоти, па̄павӯпасамена пана муни на̄ма хотӣ’’ти ватва̄ има̄ га̄тха̄ абха̄си –

268. ‘‘на монена мунӣ хоти, мӯл̣харӯпо авиддасу;

йо ча тулам̣ва паггайха, варама̄да̄йа пан̣д̣ито.

269. ‘‘па̄па̄ни париваджджети, са мунӣ тена со муни;

йо муна̄ти убхо локе, муни тена павуччатӣ’’ти.

таттха на монена̄ти ка̄ман̃хи монеййапат̣ипада̄сан̇кха̄тена магган̃а̄н̣амонена муни на̄ма хоти, идха пана тун̣хӣбха̄вам̣ сандха̄йа ‘‘монена̄’’ти вуттам̣. мӯл̣харӯпоти туччхарӯпо. авиддасӯти авин̃н̃ӯ. еварӯпо хи тун̣хӣбхӯтопи муни на̄ма на хоти. атха ва̄ монена муни на̄ма на хоти, туччхасабха̄во пана авин̃н̃ӯ ча хотӣти аттхо. йо ча тулам̣ва пагайха̄ти йатха̄ хи тулам̣ гахетва̄ т̣хито атирекам̣ че хоти, харати. ӯнам̣ че хоти, паккхипати. евамева йо атирекам̣ харанто вийа па̄пам̣ харати париваджджети, ӯнаке паккхипанто вийа кусалам̣ парипӯрети. еван̃ча пана каронто сӣласама̄дхипан̃н̃а̄вимуттивимуттин̃а̄н̣адассанасан̇кха̄там̣ варам̣ уттамамева а̄да̄йа па̄па̄ни акусалакамма̄ни париваджджети. са мунӣти со муни на̄ма̄ти аттхо. тена со мунӣти касма̄ пана со мунӣти че? йам̣ хет̣т̣ха̄ вуттака̄ран̣ам̣, тена со мунӣти аттхо. со муна̄ти убхо локети йо пуггало имасмим̣ кхандха̄дилоке тулам̣ а̄ропетва̄ минанто вийа ‘‘име аджджхаттика̄ кхандха̄, име ба̄хира̄’’тиа̄дина̄ найена име убхо аттхе муна̄ти. муни тена павуччатӣти тена ка̄ран̣ена мунӣти вуччатийева̄ти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

титтхийаваттху ат̣т̣хамам̣.

9. ба̄лисикаваттху

на тена арийо хотӣти имам̣ дхаммадесанам̣ саттха̄ джетаване вихаранто екам̣ арийам̣ на̄ма ба̄лисикам̣ а̄раббха катхеси.

екадивасан̃хи саттха̄ тасса сота̄паттимаггассӯпаниссайам̣ дисва̄ са̄ваттхийа̄ уттарадва̄рага̄ме пин̣д̣а̄йа чаритва̄ бхиккхусан̇гхапаривуто тато а̄гаччхати. тасмим̣ кхан̣е со ба̄лисико балисена маччхе ган̣ханто буддхаппамукхам̣ бхиккхусан̇гхам̣ дисва̄ балисайат̣т̣хим̣ чхад̣д̣етва̄ ат̣т̣ха̄си. саттха̄ тасса авидӯре т̣ха̄не ниваттитва̄ т̣хито ‘‘твам̣ ким̣ на̄мосӣ’’ти са̄рипуттаттхера̄дӣнам̣ на̄ма̄ни пуччхи. тепи ‘‘ахам̣ са̄рипутто ахам̣ моггалла̄но’’ти аттано аттано на̄ма̄ни катхайим̣су. ба̄лисико чинтеси – ‘‘саттха̄ саббесам̣ на̄ма̄ни пуччхати, мамампи на̄мам̣ пуччхиссати ман̃н̃е’’ти. саттха̄ тасса иччхам̣ н̃атва̄, ‘‘упа̄сака, твам̣ ко на̄мосӣ’’ти пуччхитва̄ ‘‘ахам̣, бханте, арийо на̄ма̄’’ти вутте ‘‘на, упа̄сака, та̄диса̄ па̄н̣а̄типа̄тино арийа̄ на̄ма хонти, арийа̄ пана маха̄джанасса ахим̣санабха̄ве т̣хита̄’’ти ватва̄ имам̣ га̄тхама̄ха –

270. ‘‘на тена арийо хоти, йена па̄н̣а̄ни хим̣сати;

ахим̣са̄ саббапа̄н̣а̄нам̣, арийоти павуччатӣ’’ти.

таттха ахим̣са̄ти ахим̣санена. идам̣ вуттам̣ хоти – йена хи па̄н̣а̄ни хим̣сати, на тена ка̄ран̣ена арийо хоти. йо пана саббапа̄н̣а̄нам̣ па̄н̣иа̄дӣхи ахим̣санена метта̄дибха̄вана̄йа патит̣т̣хитатта̄ хим̣сато а̄ра̄ва т̣хито, айам̣ арийоти вуччатӣти аттхо.

десана̄васа̄не ба̄лисико сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

ба̄лисикаваттху навамам̣.

10. самбахуласӣла̄дисампаннабхиккхуваттху

на сӣлаббатаматтена̄ти имам̣ дхаммадесанам̣ саттха̄ джетаване вихаранто самбахуле сӣла̄дисампанне бхиккхӯ а̄раббха катхеси.

тесу кира екачча̄нам̣ евам̣ ахоси – ‘‘майам̣ сампаннасӣла̄, майам̣ дхутан̇гадхара̄, майам̣ бахуссута̄, майам̣ пантасена̄санава̄сино, майам̣ джха̄нала̄бхино, на амха̄кам̣ арахаттам̣ дуллабхам̣, иччхитадивасейева арахаттам̣ па̄пун̣исса̄ма̄’’ти. йепи таттха ана̄га̄мино, тесампи етадахоси – ‘‘на амха̄кам̣ ида̄ни арахаттам̣ дуллабха’’нти. те саббепи екадивасам̣ саттха̄рам̣ упасан̇камитва̄ вандитва̄ нисинна̄ ‘‘апи ну кхо во, бхиккхаве, паббаджитакиччам̣ маттхакам̣ патта’’нти саттха̄ра̄ пут̣т̣ха̄ евама̄хам̣су – ‘‘бханте, майам̣ еварӯпа̄ еварӯпа̄ ча, тасма̄ ‘иччхитиччхитаккхан̣ейева арахаттам̣ паттум̣ саматтхамха̄’ти чинтетва̄ вихара̄ма̄’’ти.

саттха̄ тесам̣ вачанам̣ сутва̄, ‘‘бхиккхаве, бхиккхуна̄ на̄ма парисуддхасӣла̄диматтакена ва̄ ана̄га̄мисукхаппаттаматтакена ва̄ ‘аппакам̣ но бхавадуккха’нти ваттум̣ на ват̣т̣ати, а̄саваккхайам̣ пана аппатва̄ ‘сукхитомхӣ’ти читтам̣ на уппа̄детабба’’нти ватва̄ има̄ га̄тха̄ абха̄си –

271. ‘‘на сӣлаббатаматтена, ба̄хусаччена ва̄ пана;

атха ва̄ сама̄дхила̄бхена, вивиттасайанена ва̄.

272. ‘‘пхуса̄ми неккхаммасукхам̣, апутхуджджанасевитам̣;

бхиккху висса̄сама̄па̄ди, аппатто а̄саваккхайа’’нти.

таттха сӣлаббатаматтена̄ти чатупа̄рисуддхисӣламаттена ва̄ терасадхутан̇гаматтена ва̄. ба̄хусаччена ва̄ти тин̣н̣ам̣ пит̣ака̄нам̣ уггахитаматтена ва̄. сама̄дхила̄бхена̄ти ат̣т̣хасама̄паттийа̄ ла̄бхена. неккхаммасукханти ана̄га̄мисукхам̣. там̣ ана̄га̄мисукхам̣ пхуса̄мӣти еттакаматтена ва̄. апутхуджджанасевитанти путхуджджанехи асевитам̣ арийасевитамева. бхиккхӯти тесам̣ ан̃н̃атарам̣ а̄лапанто а̄ха. висса̄сама̄па̄дӣти висса̄сам̣ на а̄паджджеййа. идам̣ вуттам̣ хоти – бхиккху имина̄ сампаннасӣла̄дибха̄ваматтакенева ‘‘майхам̣ бхаво аппако париттако’’ти а̄саваккхайасан̇кха̄там̣ арахаттам̣ аппатто хутва̄ бхиккху на̄ма висса̄сам̣ на̄паджджеййа. йатха̄ хи аппаматтакопи гӯтхо дуггандхо хоти, евам̣ аппаматтакопи бхаво дуккхоти.

десана̄васа̄не те бхиккхӯ арахатте патит̣т̣хахам̣су, сампатта̄нампи са̄ттхика̄ дхаммадесана̄ ахосӣти.

самбахуласӣла̄дисампаннабхиккхуваттху дасамам̣.

дхаммат̣т̣хаваггаван̣н̣ана̄ нит̣т̣хита̄.

екӯнавӣсатимо вагго.