6. чӯл̣аса̄риваттху

суджӣванти имам̣ дхаммадесанам̣ саттха̄ джетаване вихаранто чӯл̣аса̄рим̣ на̄ма са̄рипуттаттхерасса саддхивиха̄рикам̣ а̄раббха катхеси.

со кира екадивасе веджджакаммам̣ катва̄ пан̣ӣтабходжанам̣ лабхитва̄ а̄да̄йа никкхаманто антара̄магге тхерам̣ дисва̄, ‘‘бханте, идам̣ майа̄ веджджакаммам̣ катва̄ ладдхам̣, тумхе ан̃н̃аттха еварӯпам̣ бходжанам̣ на лабхиссатха, имам̣ бхун̃джатха, ахам̣ те веджджакаммам̣ катва̄ ниччака̄лам̣ еварӯпам̣ а̄ха̄рам̣ а̄харисса̄мӣ’’ти а̄ха. тхеро тасса вачанам̣ сутва̄ тун̣хӣбхӯтова пакка̄ми. бхиккхӯ виха̄рам̣ гантва̄ саттху таматтхам̣ а̄рочесум̣. саттха̄, ‘‘бхиккхаве, ахирико на̄ма пагаббхо ка̄касадисо хутва̄ екавӣсативидха̄йа анесана̄йа т̣хатва̄ сукхам̣ джӣвати, хириоттаппасампанно пана дуккхам̣ джӣватӣ’’ти ватва̄ има̄ га̄тха̄ абха̄си –

244. ‘‘суджӣвам̣ ахирикена, ка̄касӯрена дхам̣сина̄;

паккхандина̄ пагаббхена, сам̣килит̣т̣хена джӣвитам̣.

245. ‘‘хирӣмата̄ ча дуджджӣвам̣, ниччам̣ сучигавесина̄;

алӣнена̄ппагаббхена, суддха̄джӣвена пассата̄’’ти.

таттха ахирикена̄ти чхиннахироттаппакена. еварӯпена хи ама̄тарамева ‘‘ма̄та̄ ме’’ти апита̄дайо ева ча ‘‘пита̄ ме’’тиа̄дина̄ найена ватва̄ екавӣсативидха̄йа анесана̄йа патит̣т̣ха̄йа сукхена джӣватум̣ сакка̄. ка̄касӯрена̄ти сӯрака̄касадисена. йатха̄ хи сӯрака̄ко кулагхаресу йа̄гуа̄дӣни ган̣хитука̄мо бхиттиа̄дӣсу нисӣдитва̄ аттано олоканабха̄вам̣ н̃атва̄ анолокенто вийа ан̃н̃авихитако вийа нидда̄йанто вийа ча хутва̄ манусса̄нам̣ пама̄дам̣ саллаккхетва̄ анупатитва̄ ‘‘сӯсӯ’’ти вадантесуйева бха̄джанато мукхапӯрам̣ гахетва̄ пала̄йати, евамевам̣ ахирикапуггалопи бхиккхӯхи саддхим̣ га̄мам̣ пависитва̄ йа̄губхаттат̣т̣ха̄на̄дӣни ваваттхапети. таттха бхиккхӯ пин̣д̣а̄йа чаритва̄ йа̄панаматтам̣ а̄да̄йа а̄санаса̄лам̣ гантва̄ паччавеккханта̄ йа̄гум̣ пивитва̄ каммат̣т̣ха̄нам̣ манаси каронти саджджха̄йанти а̄санаса̄лам̣ саммаджджанти. айам̣ пана акатва̄ га̄ма̄бхимукхова хоти.

со хи бхиккхӯхи ‘‘пассатхима’’нти олокийама̄нопи анолокенто вийа ан̃н̃авихито вийа нидда̄йанто вийа ган̣т̣хикам̣ пат̣имун̃чанто вийа чӣварам̣ сам̣видаханто вийа хутва̄ ‘‘асукам̣ на̄ма ме каммам̣ аттхӣ’’ти ваданто ут̣т̣ха̄йа̄сана̄ га̄мам̣ пависитва̄ па̄това ваваттхапитагехесу ан̃н̃атарам̣ гехам̣ упасан̇камитва̄ гхарама̄нусакесу тхокам̣ кава̄т̣ам̣ пидха̄йа два̄ре нисӣдитва̄ кандантесупи екена хаттхена кава̄т̣ам̣ пан̣а̄метва̄ анто пависати. атха нам̣ дисва̄ ака̄мака̄пи а̄сане нисӣда̄петва̄ йа̄гуа̄дӣсу йам̣ аттхи, там̣ денти. со йа̄вадаттхам̣ бхун̃джитва̄ авасесам̣ паттена̄да̄йа паккамати. айам̣ ка̄касӯро на̄ма. еварӯпена ахирикена суджӣванти аттхо.

дхам̣сина̄ти ‘‘асукаттхеро на̄ма аппиччхо’’тиа̄дӣни вадантесу – ‘‘ким̣ пана майам̣ на аппиччха̄’’тиа̄дивачанена паресам̣ гун̣адхам̣саната̄йа дхам̣сина̄. татха̄рӯпасса вачанам̣ сутва̄ ‘‘айампи аппиччхата̄дигун̣е йутто’’ти ман̃н̃ама̄на̄ манусса̄ да̄таббам̣ ман̃н̃анти. со пана тато пат̣т̣ха̄йа вин̃н̃ӯпуриса̄нам̣ читтам̣ а̄ра̄дхетум̣ асакконто тамха̄пи ла̄бха̄ париха̄йати. евам̣ дхам̣сипуггало аттанопи парассапи ла̄бхам̣ на̄сетийева.

паккхандина̄ти паккхандача̄рина̄. паресам̣ кичча̄нипи аттано кичча̄ни вийа дассенто па̄това бхиккхӯсу четийан̇ган̣а̄дӣсу ваттам̣ катва̄ каммат̣т̣ха̄наманасика̄рена тхокам̣ нисӣдитва̄ ут̣т̣ха̄йа га̄мам̣ пависантесу мукхам̣ дховитва̄ пан̣д̣ука̄са̄вапа̄рупанааккхиан̃джанасӣсамаккхана̄дӣхи аттабха̄вам̣ ман̣д̣етва̄ саммаджджанто вийа две тайо саммаджджанипаха̄ре датва̄ два̄ракот̣т̣хака̄бхимукхо хоти. манусса̄ па̄това ‘‘четийам̣ вандисса̄ма, ма̄ла̄пӯджам̣ карисса̄ма̄’’ти а̄гата̄ там̣ дисва̄ ‘‘айам̣ виха̄ро имам̣ дахарам̣ нисса̄йа пат̣иджагганам̣ лабхати, имам̣ ма̄ памаджджиттха̄’’ти ватва̄ тасса да̄таббам̣ ман̃н̃анти. еварӯпена паккхандина̄пи суджӣвам̣. пагаббхена̄ти ка̄йапа̄габбхийа̄дӣхи саманна̄гатена. сам̣килит̣т̣хена джӣвитанти евам̣ джӣвикам̣ каппетва̄ джӣвантена хи пуггалена сам̣килит̣т̣хена хутва̄ джӣвитам̣ на̄ма хоти, там̣ дуджджӣвитам̣ па̄памева̄ти аттхо.

хирӣмата̄ ча̄ти хироттаппасампаннена пуггалена дуджджӣвам̣. со хи ама̄та̄дайова ‘‘ма̄та̄ ме’’тиа̄дӣни аватва̄ адхаммике паччайе гӯтхам̣ вийа джигуччханто дхаммена самена парийесанто сапада̄нам̣ пин̣д̣а̄йа чаритва̄ джӣвикам̣ каппенто лӯкхам̣ джӣвикам̣ джӣватӣти аттхо. сучигавесина̄ти сучӣни ка̄йакамма̄дӣни гавесантена. алӣнена̄ти джӣвитавуттиманаллӣнена. суддха̄джӣвена пассата̄ти еварӯпо хи пуггало суддха̄джӣво на̄ма хоти. тена евам̣ суддха̄джӣвена тамева суддха̄джӣвам̣ са̄рато пассата̄ лӯкхаджӣвитавасена дуджджӣвам̣ хотӣти аттхо.

десана̄васа̄не бахӯ сота̄паттипхала̄дӣни па̄пун̣им̣сӯти.

чӯл̣аса̄риваттху чхат̣т̣хам̣.