11. уджджха̄насан̃н̃иттхераваттху

параваджджа̄нупассисса̄ти имам̣ дхаммадесанам̣ саттха̄ джетаване вихаранто уджджха̄насан̃н̃им̣ на̄ма екам̣ тхерам̣ а̄раббха катхеси.

со кира ‘‘айам̣ евам̣ нива̄сети, евам̣ па̄рупатӣ’’ти бхиккхӯнам̣ антарамева гавесанто вичарати. бхиккхӯ ‘‘асуко на̄ма, бханте, тхеро евам̣ каротӣ’’ти саттху а̄рочесум̣. саттха̄, ‘‘бхиккхаве, ваттасӣсе т̣хатва̄ евам̣ оваданто ананупава̄до. йо пана ниччам̣ уджджха̄насан̃н̃ита̄йа паресам̣ антарам̣ парийесама̄но евам̣ ватва̄ вичарати, тасса джха̄на̄дӣсу екопи висесо нуппаджджати, кевалам̣ а̄сава̄йева вад̣д̣хантӣ’’ти ватва̄ имам̣ га̄тхама̄ха –

253. ‘‘параваджджа̄нупассисса, ниччам̣ уджджха̄насан̃н̃ино;

а̄сава̄ тасса вад̣д̣ханти, а̄ра̄ со а̄саваккхайа̄’’ти.

таттха уджджха̄насан̃н̃иноти евам̣ нива̄сетаббам̣ евам̣ па̄рупитаббанти паресам̣ антарагавесита̄йа уджджха̄набахуласса пуггаласса джха̄на̄дӣсу екадхаммопи на вад̣д̣хати, атха кхо а̄сава̄ва тасса вад̣д̣ханти. тенева ка̄ран̣ена со арахаттамаггасан̇кха̄та̄ а̄саваккхайа̄ а̄ра̄ дӯрам̣ гатова хотӣти.

десана̄васа̄не бахӯ сота̄паттипхала̄дӣни па̄пун̣им̣сӯти.

уджджха̄насан̃н̃иттхераваттху ека̄дасамам̣.