6. пун̣н̣ада̄сӣваттху

сада̄ джа̄гарама̄на̄нанти имам̣ дхаммадесанам̣ саттха̄ гиджджхакӯт̣е вихаранто пун̣н̣ам̣ на̄ма ра̄джагахасет̣т̣хино да̄сим̣ а̄раббха катхеси.

тасса̄ кира екадивасам̣ кот̣т̣анаттха̄йа бахувӣхим̣ адам̣су. са̄ раттимпи дӣпам̣ джа̄летва̄ вӣхим̣ кот̣т̣ентӣ виссаманаттха̄йа седатинтена гаттена бахива̄те ат̣т̣ха̄си. тасмим̣ самайе даббо маллапутто бхиккхӯнам̣ сена̄санапан̃н̃а̄пако ахоси. со дхаммассаванам̣ сутва̄ аттано аттано сена̄санам̣ гаччханта̄нам̣ бхиккхӯнам̣ ан̇гулим̣ джа̄летва̄ пурато пурато маггадесанаттха̄йа гаччханто бхиккхӯнам̣ а̄локам̣ ниммини. пун̣н̣а̄ тена̄локена паббате вичаранте бхиккхӯ дисва̄ ‘‘ахам̣ та̄ва аттано дуккхена упаддута̄ има̄йапи вела̄йа ниддам̣ на упеми, бхадданта̄ ким̣ ка̄ран̣а̄ на нидда̄йантӣ’’ти чинтетва̄ ‘‘аддха̄ кассачи бхиккхуно апха̄сукам̣ ва̄ бхависсати, дӣгхаджа̄тикена ва̄ упаддаво бхависсатӣ’’ти сан̃н̃ам̣ катва̄ па̄това кун̣д̣акам̣ а̄да̄йа удакена теметва̄ хаттхатале пӯвам̣ катва̄ ан̇га̄ресу пачитва̄ уччхан̇ге катва̄ титтхамагге кха̄дисса̄мӣти гхат̣ам̣ а̄да̄йа титтха̄бхимукхӣ па̄йа̄си. саттха̄пи га̄мам̣ пин̣д̣а̄йа пависитум̣ тамева маггам̣ пат̣ипаджджи.

са̄ саттха̄рам̣ дисва̄ чинтеси – ‘‘ан̃н̃есу дивасесу саттхари дит̣т̣хепи мама деййадхаммо на хоти, деййадхамме сати саттха̄рам̣ на пасса̄ми, ида̄ни ме деййадхаммо ча аттхи, саттха̄ ча саммукхӣбхӯто. саче лӯкхам̣ ва̄ пан̣ӣтам̣ ва̄ти ачинтетва̄ ган̣хеййа, дадеййа̄хам̣ имам̣ пӯва’’нти гхат̣ам̣ екаманте никкхипитва̄ саттха̄рам̣ вандитва̄, ‘‘бханте, имам̣ лӯкхам̣ да̄нам̣ пат̣игган̣ханта̄ мама сан̇гахам̣ каротха̄’’ти а̄ха. саттха̄ а̄нандаттхерам̣ олокетва̄ тена нӣхаритва̄ диннам̣ маха̄ра̄джадаттийам̣ паттам̣ упана̄метва̄ пӯвам̣ ган̣хи. пун̣н̣а̄пи там̣ саттху патте патит̣т̣хапетва̄ва пан̃чапатит̣т̣хитена вандитва̄, ‘‘бханте, тумхехи дит̣т̣хадхаммойева ме самиджджхатӯ’’ти а̄ха. саттха̄ ‘‘евам̣ хотӯ’’ти т̣хитакова анумоданам̣ ака̄си.

пун̣н̣а̄пи чинтеси – ‘‘кин̃ча̄пи ме саттха̄ сан̇гахам̣ каронто пӯвам̣ ган̣хи, на панидам̣ кха̄диссати. аддха̄ пурато ка̄касса ва̄ сунакхасса ва̄ датва̄ ран̃н̃о ва̄ ра̄джапуттасса ва̄ гехам̣ гантва̄ пан̣ӣтабходжанам̣ бхун̃джиссатӣ’’ти. саттха̄пи ‘‘ким̣ ну кхо еса̄ чинтесӣ’’ти тасса̄ читта̄ча̄рам̣ н̃атва̄ а̄нандаттхерам̣ олокетва̄ нисӣдана̄ка̄рам̣ дассеси. тхеро чӣварам̣ пан̃н̃а̄петва̄ ада̄си. саттха̄ бахинагарейева нисӣдитва̄ бхаттакиччам̣ ака̄си. девата̄ сакалачаккава̄л̣агаббхе деваманусса̄нам̣ упакаппанакам̣ оджам̣ мадхупат̣алам̣ вийа пӣл̣етва̄ таттха паккхипим̣су. пун̣н̣а̄ ча олокентӣ ат̣т̣ха̄си. бхаттакичча̄васа̄не тхеро удакам̣ ада̄си. саттха̄ катабхаттакиччо пун̣н̣ам̣ а̄мантетва̄ ‘‘касма̄ твам̣ пун̣н̣е мама са̄ваке парибхавасӣ’’ти а̄ха. на парибхава̄ми, бхантети. атха тайа̄ мама са̄ваке олокетва̄ ким̣ катхитанти? ‘‘ахам̣ та̄ва имина̄ дуккхупаддавена ниддам̣ на упеми, бхадданта̄ киматтхам̣ ниддам̣ на упенти, аддха̄ кассачи апха̄сукам̣ ва̄ бхависсати, дӣгхаджа̄тикена ва̄ упаддаво бхависсатӣ’’ти еттакам̣ майа̄, бханте, чинтитанти. саттха̄ тасса̄ вачанам̣ сутва̄ ‘‘пун̣н̣е твам̣ на та̄ва дуккхупаддавена нидда̄йаси, мама са̄вака̄ сада̄ джа̄гарийамануйуттата̄йа на нидда̄йантӣ’’ти ватва̄ имам̣ га̄тхама̄ха –

226. ‘‘сада̄ джа̄гарама̄на̄нам̣, ахоратта̄нусиккхинам̣;

нибба̄нам̣ адхимутта̄нам̣, аттхам̣ гаччханти а̄сава̄’’ти.

таттха ахоратта̄нусиккхинанти дива̄ ча раттин̃ча тиссо сиккха̄ сиккхама̄на̄нам̣. нибба̄нам̣ адхимутта̄нанти нибба̄наджджха̄сайа̄нам̣. аттхам̣ гаччхантӣти еварӯпа̄нам̣ саббепи а̄сава̄ аттхам̣ вина̄сам̣ наттхибха̄вам̣ гаччхантӣти аттхо.

десана̄васа̄не йатха̄т̣хита̄ пун̣н̣а̄ сота̄паттипхале патит̣т̣хахи, сампаттапариса̄йапи са̄ттхика̄ дхаммадесана̄ ахосӣти.

саттха̄ кун̣д̣акаан̇га̄рапӯвена бхаттакиччам̣ катва̄ виха̄рам̣ агама̄си. бхиккхӯ дхаммасабха̄йам̣ катхам̣ самут̣т̣ха̄песум̣ ‘‘дуккарам̣, а̄вусо, самма̄самбуддхена катам̣ пун̣н̣а̄йа диннена кун̣д̣акаан̇га̄рапӯвена бхаттакиччам̣ каронтена̄’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте ‘‘на, бхиккхаве, ида̄нева, пуббепи майа̄ има̄йа диннакун̣д̣акам̣ парибхуттамева̄’’ти ватва̄ атӣтам̣ а̄харитва̄ –

‘‘бхутва̄ тин̣апаригха̄сам̣, бхутва̄ а̄ча̄макун̣д̣акам̣;

етам̣ те бходжанам̣ а̄си, касма̄ да̄ни на бхун̃джаси.

‘‘йаттха посам̣ на джа̄нанти, джа̄тийа̄ винайена ва̄;

бахум̣ таттха маха̄брахме, апи а̄ча̄макун̣д̣акам̣.

‘‘тван̃ча кхо мам̣ паджа̄на̄си, йа̄диса̄йам̣ хайуттамо;

джа̄нанто джа̄нама̄гамма, на те бхаккха̄ми кун̣д̣ака’’нти. (джа̄. 1.3.10-12) –

имам̣ кун̣д̣акасиндхавапотакаджа̄такам̣ виттха̄ретва̄ катхеси.

пун̣н̣ада̄сӣваттху чхат̣т̣хам̣.