7. пан̃часатада̄ракаваттху

сӣладассанасампаннанти имам̣ дхаммадесанам̣ саттха̄ вел̣уване вихаранто антара̄магге пан̃часатада̄раке а̄раббха катхеси.

екадивасан̃хи саттха̄ асӣтимаха̄тхерехи саддхим̣ пан̃часатабхиккхупарива̄ро ра̄джагахам̣ пин̣д̣а̄йа пависанто екасмим̣ чхан̣адивасе пан̃часате да̄раке пӯвапаччхийо уккхипа̄петва̄ нагара̄ никкхамма уййа̄нам̣ гаччханте аддаса. тепи саттха̄рам̣ вандитва̄ паккамим̣су, те екам̣ бхиккхумпи ‘‘пӯвам̣ ган̣хатха̄’’ти на вадим̣су. саттха̄ тесам̣ гатака̄ле бхиккхӯ а̄ха – ‘‘кха̄диссатха, бхиккхаве, пӯве’’ти. ‘‘кахам̣ бханте, пӯва̄’’ти? ‘‘ким̣ на пассатха те да̄раке пӯвапаччхийо уккхипа̄петва̄ атикканте’’ти? ‘‘бханте, еварӯпа̄ на̄ма да̄рака̄ кассачи пӯвам̣ на дентӣ’’ти. ‘‘бхиккхаве, кин̃ча̄пи ете мам̣ ва̄ тумхе ва̄ пӯвехи на нимантайим̣су, пӯваса̄мико пана бхиккху паччхато а̄гаччхати, пӯве кха̄дитва̄ва гантум̣ ват̣т̣атӣ’’ти. буддха̄нан̃хи екапуггалепи исса̄ ва̄ досо ва̄ наттхи, тасма̄ имам̣ ватва̄ бхиккхусан̇гхам̣ а̄да̄йа екасмим̣ руккхамӯле чха̄йа̄йа нисӣди. да̄рака̄ маха̄кассапаттхерам̣ паччхато а̄гаччхантам̣ дисва̄ уппаннасинеха̄ пӣтивегена парипун̣н̣асарӣра̄ хутва̄ паччхийо ота̄ретва̄ тхерам̣ пан̃чапатит̣т̣хитена вандитва̄ пӯве паччхӣхи саддхим̣йева уккхипитва̄ ‘‘ган̣хатха, бханте’’ти тхерам̣ вадим̣су. атха не тхеро а̄ха – ‘‘еса саттха̄ бхиккхусан̇гхам̣ гахетва̄ руккхамӯле нисинно, тумха̄кам̣ деййадхаммам̣ а̄да̄йа гантва̄ бхиккхусан̇гхасса сам̣вибха̄гам̣ каротха̄’’ти. те ‘‘са̄дху, бханте’’ти ниваттитва̄ тхерена саддхим̣йева гантва̄ пӯве датва̄ олокайама̄на̄ екаманте т̣хатва̄ парибхога̄васа̄не удакам̣ адам̣су. бхиккхӯ уджджха̄йим̣су ‘‘да̄ракехи мукхолоканена бхиккха̄ динна̄, самма̄самбуддхам̣ ва̄ маха̄тхере ва̄ пӯвехи ана̄пуччхитва̄ маха̄кассапаттхерам̣ дисва̄ паччхӣхи саддхим̣йева а̄да̄йа а̄гамим̣сӯ’’ти. саттха̄ тесам̣ катхам̣ сутва̄, ‘‘бхиккхаве, мама путтена маха̄кассапена садисо бхиккху деваманусса̄нам̣ пийо хоти, те ча тасса чатупаччайена пӯджам̣ каронтийева̄’’ти ватва̄ имам̣ га̄тхама̄ха –

217. ‘‘сӣладассанасампаннам̣, дхаммат̣т̣хам̣ саччавединам̣;

аттано камма кубба̄нам̣, там̣ джано куруте пийа’’нти.

таттха сӣладассанасампаннанти чатупа̄рисуддхисӣлена чева маггапхаласампайуттена ча самма̄дассанена сампаннам̣. дхаммат̣т̣ханти нававидхалокуттарадхамме т̣хитам̣, саччхикаталокуттарадхамманти аттхо. саччавединанти чатуннам̣ сачча̄нам̣ сол̣асаха̄ка̄рехи саччхикататта̄ саччан̃а̄н̣ена саччавединам̣. аттано камма кубба̄нанти аттано каммам̣ на̄ма тиссо сиккха̄, та̄ пӯрайама̄нанти аттхо. там̣ джаноти там̣ пуггалам̣ локийамаха̄джано пийам̣ кароти, дат̣т̣хука̄мо вандитука̄мо паччайена пӯджетука̄мо хотийева̄ти аттхо.

десана̄васа̄не саббепи те да̄рака̄ сота̄паттипхале патит̣т̣хахим̣сӯти.

пан̃часатада̄ракаваттху саттамам̣.