2. ан̃н̃атаракут̣умбикаваттху

пийато джа̄йатӣти имам̣ дхаммадесанам̣ саттха̄ джетаване вихаранто ан̃н̃атарам̣ кут̣умбикам̣ а̄раббха катхеси.

со хи аттано путте ка̄лакате путтасока̄бхибхӯто а̄л̣а̄ханам̣ гантва̄ родати, путтасокам̣ сандха̄ретум̣ на саккоти. саттха̄ паччӯсака̄ле локам̣ волокенто тасса сота̄паттимаггассӯпаниссайам̣ дисва̄ пин̣д̣апа̄тапат̣икканто екам̣ паччха̄саман̣ам̣ гахетва̄ тасса гехадва̄рам̣ агама̄си. со саттху а̄гатабха̄вам̣ сутва̄ ‘‘майа̄ саддхим̣ пат̣исантха̄рам̣ ка̄тука̄мо бхависсатӣ’’ти саттха̄рам̣ павесетва̄ гехамаджджхе а̄санам̣ пан̃н̃а̄петва̄ саттхари нисинне а̄гантва̄ екамантам̣ нисӣди. атха нам̣ саттха̄ ‘‘ким̣ ну кхо, упа̄сака, дуккхитосӣ’’ти пуччхитва̄ тена путтавийогадуккхе а̄рочите, ‘‘упа̄сака, ма̄ чинтайи, идам̣ маран̣ам̣ на̄ма на екасмим̣йева т̣ха̄не, на ча екассева хоти, йа̄вата̄ пана бхавуппатти на̄ма аттхи, саббасатта̄нам̣ хотийева. екасан̇кха̄ропи ниччо на̄ма наттхи. тасма̄ ‘маран̣адхаммам̣ матам̣, бхиджджанадхаммам̣ бхинна’нти йонисо паччавеккхитаббам̣, на сочитаббам̣. пора̄н̣апан̣д̣ита̄пи хи путтасса матака̄ле ‘маран̣адхаммам̣ матам̣, бхиджджанадхаммам̣ бхинна’нти сокам̣ акатва̄ маран̣ассатимева бха̄вайим̣сӯ’’ти ватва̄, ‘‘бханте, ке евамакам̣су, када̄ ча акам̣су, а̄чиккхатха ме’’ти йа̄чито тассаттхасса пака̄санаттхам̣ атӣтам̣ а̄харитва̄ –

‘‘урагова тачам̣ джин̣н̣ам̣, хитва̄ гаччхати сам̣ танум̣;

евам̣ сарӣре ниббхоге, пете ка̄лакате сати.

‘‘д̣айхама̄но на джа̄на̄ти, н̃а̄тӣнам̣ паридевитам̣;

тасма̄ етам̣ на соча̄ми, гато со тасса йа̄ гатӣ’’ти. (джа̄. 1.5.19-20) –

имам̣ пан̃чаканипа̄те урагаджа̄такам̣ виттха̄ретва̄ ‘‘евам̣ пуббе пан̣д̣ита̄ пийапутте ка̄лакате йатха̄ етарахи твам̣ камманте виссаджджетва̄ нира̄ха̄ро роданто вичараси, татха̄ авичаритва̄ маран̣ассатибха̄вана̄балена сокам̣ акатва̄ а̄ха̄рам̣ парибхун̃джим̣су, каммантан̃ча адхит̣т̣хахим̣су. тасма̄ ‘пийапутто ме ка̄лакато’ти ма̄ чинтайи. уппаджджама̄но хи соко ва̄ бхайам̣ ва̄ пийамева нисса̄йа уппаджджатӣ’’ти ватва̄ имам̣ га̄тхама̄ха –

212. ‘‘пийато джа̄йатӣ соко, пийато джа̄йатӣ бхайам̣;

пийато виппамуттасса, наттхи соко куто бхайа’’нти.

таттха пийатоти ват̣т̣амӯлако хи соко ва̄ бхайам̣ ва̄ уппаджджама̄нам̣ пийамева саттам̣ ва̄ сан̇кха̄рам̣ ва̄ нисса̄йа уппаджджати, тато пана виппамуттасса убхайампетам̣ наттхӣти аттхо.

десана̄васа̄не кут̣умбико сота̄паттипхале патит̣т̣хахи, сампатта̄нампи са̄ттхика̄ дхаммадесана̄ ахосӣти.

ан̃н̃атаракут̣умбикаваттху дутийам̣.